Tuanga 5

E Akakoroanga Mekameka to te Oraanga

1, 2. Akapeea tatou i te kite anga e te manako maira te Atua ia tatou, e ka uri tatou kiea no te au pau anga ki te au uianga o te oraanga?

¹ Te tu i maaniiai te enua e te au mea ora i runga i te reira te akaari maira e ko Tei Anga ia ratou e Atua aroa ia e te manako maira. E te akaari maira tana Tuatua, te Pipiria, e te manako maira aia; te oronga maira te reira i te au pau anga puapinga no runga i te au ui anga: Eaa ra tatou i konei i te enua? e, Te aere nei tatou kiea?

² Ka anoanoia tatou kia kimi i roto i te Pipiria no te reira au pau anga. Te karanga ra te Tuatua a te Atua: “Kia kimi kotou iaia, ka kitea aia e kotou; kia akaruke ra kotou iaia, ka akaruke aia ia kotou.” (2 Paraleipomeno 15:2) No reira, eaa ta te kimi anga i te Tuatua a te Atua e akaari maira no runga i tana akakoroanga no tatou?

Eaa ra te Atua i Anga ei i te Au Tangata

3. Eaa ra te Atua i anga ei i te enua?

³ Te akaari maira te Pipiria e kua akapapa te Atua i te enua no te au tangata ra. Te karanga ra a Isaia 45:18 no te enua “kare ra aia [te Atua] i anga ei mea puapinga kore ua; kua anga ra aia kia tangataia.” E kua oronga mai aia i te au apinga ravarai te ka inangaroia e te tangata i runga i te enua, kare anake e kia vai ua, mari ra kia rekareka ma te ki i te oraanga.—Genese, pene 1 e te 2.

4. Eaa ra te Atua i angai i nga tangata mua?

⁴ I roto i tana Tuatua, te akakite maira te Atua i te anga mai anga i nga tangata mua, ko Adamu raua ko Eva, e te akakite maira e eaa tana i akakoro no te pamiri tangata. Kua tuatua aia: “E anga tatou i te tangata i to tatou uaorai tu, kia aite ki to tatou uaorai tu: e kia mana ratou ki rungao i te au ika o te tai, e ki rungao i te au manu o te reva, e ki rungao i te au puaka, e ki rungao i te enua katoa nei, e ki rungao i te au mea totoro katoa ra, e totoro aere ua i te enua nei.” (Genese 1:26) Kia akaaere te au tangata ravarai “i te enua katoa” e te au animara tei angaia.

5. I tukunaia nga tangata mua kiea?

⁵ Kua maani te Atua i tetai aua maatamaata mei te paka rai i tetai ngai tei tapaia e ko Edene, ka kiteia i te Itinga Rotopu. I reira kua ‘rave iora [aia] i te tangata; tuku iora iaia ki roto i taua kainga i Edene ra, ei tatanu, e ei tiaki.’ E parataito ia tei ki i te au mea ka anoanoia e nga tangata mua kia kai. E kua kapiti mai i roto i te reira “te au rakau taurekareka katoa kia akara, e tei meitaki ei kai,” e pera katoa etai atu au rau rakau e tetai atu au tu animara tuke ra.—Genese 2:7-9, 15.

6. Eaa te au tu i te pae manako e te kopapa i angaiai te au tangata?

⁶ Kua angaia nga kopapa o te nga tangata mua ma te apa kore, kia kore raua e maki, e pakarikari, me kare e mate. Kua akapuapinga katoaia raua ma etai atu au tu, mei te iki anga rangatira. Te tu i maaniiai raua te akatakaia maira ia Genese 1:27: “Kua anga iora oki te Atua i te tangata i tona uaorai tu; i anga aia iaia i te tu o te Atua ra; i anga aia ia raua ko te tane e te vaine.” I te mea kua angaia tatou i to te Atua tu, kua orongaia mai kia tatou kare ua i te au tu i te pae kopapa e te manako pera katoa te au tu akono e te au tu pae vaerua, e kia akamerengoia teia me ka inangaro tatou kia mataora tikai. Ka oronga mai te Atua i te au ravenga no te akakianga i taua au anoano e pera katoa te anoano no te kai, te vai, e te reva. Mei ta Iesu Karaiti i tuatua, “kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.”—Mataio 4:4.

7. Eaa te akauenga tei orongaia ki nga tangata mua?

⁷ Pera katoa, kua oronga te Atua i tetai akauenga meitaki ki nga tangata mua ia raua i roto ia Edene: “Kia anau korua, e kia maata roa, e e akaki i te enua nei.” (Genese 1:28) No reira ka rauka ia raua i te uanga e kia anau mai i te au tamariki apa kore. I te katoa anga o te tangata e maata maira, ka rauka ia ratou te angaanga meitaki no te akamaata anga i te au kotinga o te paaka mua, te ngai parataito o Edene. I te openga ra, ka akariroia te enua katoa ei parataito, tei nooia e te au tangata mataora, apa kore te ka ora e tuatau ua atu. Te akakite maira te Pipiria kia tatou i muri ake i te akanoo anga i teia au mea pouroa, “akara akera te Atua i te au mea katoa tana i anga, e i na, te meitaki roa ra.”—Genese 1:31; akara katoa ia Salamo 118:17.

8. Akapeea te au tangata i te akono anga i te enua?

⁸ Te kite papuia ra e kia taangaanga te au tangata ravarai i te enua ei puapinga no ratou. Inara kia raveia teia na roto i tetai tu tau. Kia riro te au tangata ei aronga akono ngateitei i te enua, kare i te aronga akakino i te reira. Te akapou anga o te enua ta tatou e kite nei i teia tuatau te patoi ra i to te Atua anoano, e te aronga te piri ra ki roto i te reira te patoi ra i te akakoroanga o te oraanga i te enua nei. Ka anoano ia ratou kia tutaki i te utunga no te reira, te karanga ra te Pipiria e ka “mate ei ia koe [i te Atua] te aronga i mate ei to te ao ra.”—Apokalupo 11:18.

Ko to te Atua rai ia Akakoroanga

9. Eaa tatou ka papu ei e ka akatupuia to te Atua akakoroanga?

⁹ No reira, mei te akamataanga kua akakoro te Atua i tetai pamiri tangata apa kore kia noo e tuatau ua atu ki runga i te enua i parataito. E ko tona rai ia akakoroanga! Ma te kore e poka, ka akatupuia taua akakoroanga. Te karanga ra te Pipiria: “Kua taputou oki a Iehova Sabaota ra, na ko maira, Ko taku oki i maara ra, ko te reira te ka tupu; e ko taku i akakoro ra, ko te reira te ka mou.” “Kua tuatua oki au, e naku rai e akatupu; kua akakoro rai au, e naku ïa e rave.”—Isaia 14:24; 46:11.

10, 11. Akapeea a Iesu, a Petero, e te tata taramo ko Davida i te tuatua anga no runga i te Parataito?

¹⁰ Kua tuatua a Iesu Karaiti no runga i to te Atua akakoroanga kia akaoki akaou mai i tetai parataito i te enua nei i te akakite anga aia ki tetai tangata tei inangaro i te manakonakoanga no te tuatau ki mua: “Tei iaku nei koe i te Parataito.” (Luka 23:43, NW) Kua tuatua katoa te apotetoro ko Petero no runga i tetai ao ou te aere maira i te totou anga aia: “Te tatari nei ra tatou i te rangi ou [tetai akapapaanga kavamani ou te ka tutara mai mei te rangi] e te enua ou [tetai taiate enua ou] [ta te Atua] i tuatua maira, i te vai tika anga o te tuatua-tika ra.”—2 Petero 3:13.

¹¹ Kua tata katoa te tata taramo ko Davida no runga i te ao ou te aere maira e eaa te roa e vai ei te reira. Kua totou mai aia: “Ka riro te enua no te aronga tuatua-tika, ka noo tamou rai ratou i reira.” (Salamo 37:29) No reira oki a Iesu i taputou ei: “E ao to tei maru: e riro ia ratou te enua.”—Mataio 5:5.

12, 13. E akakite tapoto mai i to te Atua akakoroanga no te tangata ravarai.

¹² Mei teaa ra te reira manakonakoanga ­mekameka, te ora anga e tuatau ua atu i te enua parataito rangatira mei te au kino rava­rai, te ta ua, te maki, te mii, e te mamae! I roto i te puka openga o te Pipiria, kua taopenga te Tuatua totou a te Atua i teia akakoroanga mekameka i te na ko anga: “[Na te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa, no te mea kua kore te au mea taito.” Te kapiti maira te reira: “Kua tuatua maira tei noo ki runga i te terono ra, I na, te akariro nei au i te au mea ravarai ei mea ou. E kua tuatua maira aia kiaku, Ka tata ana: e tuatua-mou oki teianei au tuatua e te pikikaa kore.”—Apokalupo 21:4, 5.

¹³ Ae, e akakoroanga mekameka ta te Atua e manako ra. Ko tetai ao ou tuatua tika, tetai parataito mutu kore, tei totouia e Tetai te ka rauka iaia i te rave i tana i taputou, no te mea “e tuatua-mou oki teianei au tuatua e te pikikaa kore.”

[Au Tutu i te kapi 20, 21]

Kua akakoro te Atua e kia noo te tangata e tuatau ua atu ki runga i te enua. Ko tona rai ia akakoroanga

[Tutu i te kapi 22]

Ka rauka i te ona i te akautunga i te aronga noo are tei takinokino i tona are