Apiianga 9

Kia Ma te Au Tavini o te Atua

Eaa i tau ei kia ma tatou i te au tu ravarai? (1)

Eaa te aite anga e kia ma i te pae vaerua? (2) kia ma te tu akono? (3) kia ma te manako? (4) kia ma te pae kopapa? (5)

Eaa te au tu tuatua viivii ka tau tatou kia kopae ke? (6)

1. E ma te Atua ko Iehova e tapu oki. Te manakonako maira aia i tona aronga akamori iaia kia vai te tu ma—i te pae vaerua, te tu akono tau, te manako, e te pae kopapa oki. (1 Petero 1:16) Ka riro na te tauta tikai e vai ei te tu ma i nga mata o te Atua ra. Te noo nei tatou i roto i tetai ao viivii. E maro anga katoa oki ta tatou i to tatou uaorai au anoano kia rave tarevake. Inara auraka tatou e tuku ua.

2. Te Tu Ma i te Pae Vaerua: Me te anoano ra tatou kia tavini atu ia Iehova, kare e rauka ia tatou kia mou marie i tetai ua atu o te au apiianga me kare au peu a te akonoanga pikikaa. E mea tika ra no tatou kia aere ke mai ki vao i te akonoanga pikikaa e auraka e turu i te reira na tetai ua atu mataara. (2 Korinetia 6:14-18; Apokalupo 18:4) Me kite anake tatou i te tuatua mou no te Atua, ka tau tatou kia matakite auraka e akavareia e te au tangata te apii ra i te pikikaa.—2 Ioane 10, 11.

3. Te Tu Akono Ma: Te anoano ra a Iehova i te aronga akamori iaia kia akono ei au Kerititiano mou i te au taime ravarai. (1 Petero 2:12) Te kite ra aia i te au mea ravarai ta tatou e rave ra, noatu i te ngai ngaro. (Ebera 4:13) Ka tika tatou kia kopae ke i te ainga tau kore e etai atu ravenga viivii o teianei ao.—1 Korinetia 6:9-11.

4. Te Manako Ma: Me ka akaki tatou i to tatou au manako ki te manako ma, e te viivii kore, ka riro katoa to tatou tu akono kia ma. (Philipi 4:8) Inara me ka manako tamou tatou i te au mea viivii, ka akatupu ia i te au ravenga kikino. (Mataio 15:18-20) Ka tau tatou kia kopae ke i te au tu tamataora te ka tarepo i to tatou manako. Ka rauka ia tatou kia akaki i to tatou au manako ki te au manako ma na te apiianga i te Tuatua a te Atua.

5. Tu Ma i te Pae Kopapa: I te mea te komono ra ratou i te Atua ra, ka tau te au Kerititiano kia tama i to ratou kopapa e to ratou kakau. Ka tau tatou kia orei i to tatou nga rima i muri ake i te aere anga ki te are meangiti, e ka tau katoa tatou kia orei i to tatou rima i mua ake i te kaikaianga me kare i te akono anga i te manga. Me kare au ngai tikai no te akatae anga i te repo, ka tika kia tanumia te repo no te are meangiti mai ra. (Deuteronomi 23:12, 13) Na te tamou anga i te tu ma i te pae kopapa ka tauturu i te ora anga meitaki. E mea tika kia mako e kia ma te ngutuare o te Kerititiano a roto e vao katoa oki. Ka tau ia kia kiteia atu i te ngai tangata ra ei akaraanga meitaki.

6. Tuatua Ma: Ka tika te au tavini o te Atua kia tuatua i te tuatua mou i te au taime ravarai. Kare te aronga pikikaa e tomo ki te Patireia o te Atua. (Ephesia 4:25; Apokalupo 21:8) Kare te au Kerititiano e tuatua i te reo viivii. Kare ratou e akarongo atu me kare e tuatua i te takatakata anga repo me kare au tua viivii ra. No te ma o ta ratou tuatua, te taka ke ra ratou ei aronga tuke i te angaanga me kare i te apii e i te ngai i te pae mai.—Ephesia 4:29, 31; 5:3.

[Au Tutu i te kapi 18, 19]

Ka tika te au tavini o te Atua kia ma i te au tu ravarai