Koai Ma to te Atua Au Enemi?

Ko to te Atua enemi maata ko Satani te Tiaporo. E vaerua ora aia tei meameaau ia Iehova. Te tamou nei rai a Satani i te tamaki atu i te Atua e te akatupu maata ra i te manamanata no te au tangata. E kino tikai a Satani. E pikikaa aia e te ta tangata.—Ioane 8:44.

Kua kapiti atu etai au vaerua ora kia Satani i tona meameaau anga i te Atua. Kua kapiki te Pipiria ia ratou e ko te au temoni. Mei ia Satani rai, e au enemi te au temoni no te au tangata. E reka ana ratou i te tamamae i te tangata. (Mataio 9:32, 33; 12:22) Ka takore a Iehova ia Satani e tana au temoni e mutu kore ua atu. E tuatau poto ua to ratou e toe nei no te tamanamanata i te au tangata.—Apokalupo 12:12.

Me ka inangaro koe kia riro ei oa no te Atua, auraka koe e rave i ta Satani e inangaro maira ia koe kia rave. E makitakita ana a Satani e te au temoni ia Iehova. E au enemi ratou no te Atua, e te inangaro ra ratou i te akariro ia koe ei enemi no te Atua. Kia iki koe e koai taau ka inangaro i te akamareka atu—ko Satani me ko Iehova. Me ka inangaro koe i te ora mutu kore, kia iki koe i te rave i to te Atua anoano. E manganui ta Satani au tiriki e te au mataara no te akavare anga i te tangata. Te akanenevaia nei te maata anga o te tangata e ia.—Apokalupo 12:9.