E Kopae i te Akonoanga Pikikaa!

Kare a Satani e tana au temoni e inangaro ia koe kia tavini i te Atua. Te inangaro ra ratou i te akauri ke i te katoatoa mei te Atua me ka rauka ia ratou. Akapeea ratou i te rave anga i teia? Ko tetai mataara na roto i te akonoanga pikikaa. (2 Korinetia 11:13-15) E pikikaa tetai akonoanga me kare te reira e apii ana i te tuatua mou mei te Pipiria. Mei te moni pikikaa rai te akonoanga pikikaa—penei ka akaraanga mei te apinga tika tikai, inara e mea puapinga kore ia. Ka rauka i te reira i te akatupu i te manamanata kia koe.

Kare rava e rauka i te pikikaa o tetai akonoanga i te akamareka ia Iehova, te Atua tuatua-mou. Ia Iesu i te enua nei, te vaira tetai pupu akonoanga tei inangaro i te tamate iaia. Kua manako ratou e ko ta ratou mataara akamori anga te mea tika ra. Kua tuatua ratou: “Okotai rai o matou metua, ko te Atua.” Kua akatika ainei a Iesu? Kare! Kua tuatua atu aia kia ratou: “Ko te diabolo to kotou metua.” (Ioane 8:41, 44) I teia tuatau e manganui te tangata te manako ra e te akamori ra ratou i te Atua, inara te tavini tikai ra ratou ia Satani e te au temoni!—1 Korinetia 10:20.

Mei tetai tumu rakau kino tei uua mai i te ua kino, te uua ra te akonoanga pikikaa i te au tangata te rave ra i te au mea kino. Kua ki te ao i te manamanata no te au mea kino e raveia nei e te tangata. Te vaira te tu akono tau kore, te taanga, te keia anga, te takinokino anga, te ta tangata, e te tauati. Ko te manganui te rave nei i teia au mea kino e akonoanga ta ratou, inara kare ta ratou akonoanga e akakeu ana ia ratou kia rave i te mea meitaki. Kare ratou i te au oa no te Atua kia akamutu roa ratou i te rave i te au mea kino.—Mataio 7:17, 18.

Te apii ra te akonoanga pikikaa i te tangata kia pure ki te au itoro. Te karanga ra te Atua e auraka e pure ki te au itoro. Te tau ra teia. Ka reka ainei koe me kare tetai tangata e tuatua atu kia koe inara kua tuatua ua ki toou tutu? E oa mou ainei te reira tangata noou? Kare. Te inangaro ra a Iehova i te tangata kia tuatua kiaia, kare ki tetai itoro me kare tutu, kare te reira e ora ana.—Exodo 20:4, 5.

Te apii ra te akonoanga pikikaa e e mea meitaki ua i te tamate atu i tetai i te tuatau o te tamaki. Kua tuatua a Iesu e ka aroa te au oa o te Atua ia ratou uaorai. Kare tatou e tamate i te au tangata ta tatou e aroa ra. (Ioane 13:35) E mea tarevake no tatou kia tamate i te au tangata kino. I te aere anga mai te au enemi o Iesu i te opu iaia, kare aia i tuku ana i tana au pipi kia ta ei paruru iaia.—Mataio 26:51, 52.

Te apii ra te akonoanga pikikaa e ka mamae te aronga kino i roto i te ai era. Inara, te apii ra te Pipiria e ka taki atu te ara ki te mate. (Roma 6:23) E Atua aroa a Iehova. Ka tamamae mutu kore ainei tetai Atua aroa i te tangata? Kare rava! I te Parataito, ka vai ua e okotai anake akonoanga, ko ta Iehova i mareka ra. (Apokalupo 15:4) Pouroa te au akonoanga tei akanooia ki runga i te au pikikaa a Satani ka ngaro ke ia.