Tuatua Patireia Nu. 37

Karere ki te ao Katoa

Te Vaitata Maira te Openga no te Akonoanga Pikikaa!

▪ Eaa te akonoanga pikikaa?

▪ Akapeea te reira e ope ei?

▪ Akapeea koe i te akakeuia anga?

Eaa te akonoanga pikikaa?

Te taitaia ra ainei koe i te au kino tei raveia i roto i te ingoa o te akonoanga? Te tamaki, te tamatakutakuanga, e te pikikaa tei raveia e te aronga tei karanga e te tavini ra i te Atua te akakino ra ainei i toou manako no te mea tau? I te akaraanga eaa ra e ko te akonoanga te tumu o te au manamanata e manganui?

Kare te apa e, ki te au akonoanga katoatoa, mari ra ki te akonoanga pikikaa. Kua akakite mai tetai tangata akonoanga akangateiteiia, ko Iesu Karaiti, e te ua maira te akonoanga pikikaa i te au angaanga kino, mei te “au rakau kikino ra, e ua mai ïa i te ua kino.” (Mataio 7:15-17) Eaa te ua ta te akonoanga pikikaa e akatupu maira?

Akonoanga Pikikaa . . .

◼ KAPITI ANA KI ROTO I TE TAMAKI E TE AU PORITIKI: “I Asia e pera katoa i tetai au ngai ke mai,” i karanga ai te tianara Asiaweek, “te akakeu ra te au tutara noinoi i te mana ma te akavaavaa i te au manako akonoanga o te au tangata i te akatupu i to ratou uaorai au anoano.” Tei tupu, te akamatakite maira te tianara: “I te akaraanga te topa atura te ao ki roto i tetai turanga oripu ua.” Kua karanga tetai arataki akonoanga rongonui i Marike e: “Kia ta koe i te aronga e tamatakutaku ra i mua ake ka akamutu ei te taanga.” Tana pauanga? “E tamate pouroa ia ratou i roto i te ingoa o te Atua.” Ei tuke anga, te karanga ra te Pipiria: “Kia karanga tetai tangata e, Te anoano nei au i te Atua, e kare i aroa i tona taeake, e pikikaa aia.” (1 Ioane 4:20) Kua karanga katoa a Iesu: “E aroa ua atu i to kotou au enemi.” (Mataio 5:44, NW) Eia aau akonoanga e kite ana e e piri ana tona au mema ki roto i te tamaki?

◼ APII ANA I TE APII PIKIKAA: No runga i te meta me kore te vaerua e apii ana te maataanga o te au akonoanga e e tuanga kitea koreia te reira o tetai tangata te ora atura me mate ana te kopapa tikai. Na roto i teia apiianga, e keia ana teia au akonoanga e manganui i to ratou au mema, te tiati anga i te moni kia pure no te aronga tei takake atu. Inara, e apii ke rai ta te Pipiria e apii maira. “Ko te meta e rave i te ara ra—ko te ka mate ia.” (Ezekiela 18:4, NW) “Kua kite oki te aronga e ora nei e ka mate ratou: kare ra a te aronga i mate ra e tuatua i kitea: kare oki a ratou tutaki toe i te enua nei; kua akangaropoinaia oki ratou.” (Koheleta 9:5) Kua apii a Iesu e ka akatuakaouia mai te aronga tei mate—tetai angaanga anoano koreia me e meta mate kore to te au tangata. (Ioane 11:11-25) Te apii ra ainei taau akonoanga e kare te meta e mate ana?

◼ AKATIKA ANA I TE PIRIANGA AINGA TAU KORE: I roto i tetai au enua, e akatainu ana te au pupu akonoanga i te au mema e pirianga tane e te tane to ratou, e e pirianga vaine e te vaine to ratou kia riro mai ei au orometua e te raurau ra i te au kavamani kia ariki i te au akaipoipoanga tane ki te tane e te vaine ki te vaine. Pera katoa te au akonoanga te akaapa ra i te pirianga tau kore kua akatika ua ratou i te au arataki akonoanga tei kanga i te au tamariki. Eaa i reira ta te Pipiria e apii maira? Te karanga ua maira te reira: “Auraka e vavare: kare te kanga, e te akamori idolo, e te akaturi, e te akavaine, e te aronga sodoma . . . kare anake ïa e noo i te basileia o te Atua.” (1 Korinetia 6:9, 10) Kua kite ainei koe i te au akonoanga te ariki ra i te pirianga ainga tau kore?

Eaa ta te tuatau ki mua e tapapa maira no te au akonoanga tei ua mai i te ua kino? Kua akamatakite a Iesu: “Te au rakau katoa kare e ua mai i te ua meitaki ra, e tipuia ïa, e ka titiriia ki roto i te ai.” (Mataio 7:19) Ae, ka tipuia te akonoanga pikikaa e ka takoreia! Inara akapeea e aea teia e tupu ei? Te oronga maira tetai orama totou i roto i te puka Pipiria o Apokalupo, pene 17 e te 18, i te paunga.

Akapeea te taopenga anga o te akonoanga pikikaa?

E akamanako ana i teia tutu. Te noo ra tetai vaine akaturi i runga i te mokotua o tetai puaka taae rikarika. E itu o te puaka taae mimiti e e tai ngauru ona tara. (Apokalupo 17:1-4) Koai teia vaine akaturi e akatutu maira? Te akakeu ra aia i tona mana “ki rungao i te au ariki o te ao nei.” Te kakau ra aia i te kakau purapura, te taangaanga ra i te atinga kakara, e e vaine moni tikai aia. Kapiti katoa mai, na roto i tana ravenga purepure, “kua vavare to te pa enua ravarai.” (Apokalupo 17:18; 18:12, 13, 23) Te tauturu maira te Pipiria ia tatou i te kite mai i teia vaine e e akaaereanga akonoanga i te ao katoa. Kare e te akatutu maira aia, e okotai ua akonoanga, mari ra ko te au akonoanga katoatoa te ua maira i te ua kino.

Te puaka taae ta te vaine akaturi e akaoro ra te akatutu maira i te au mana poritiki o te ao katoa.a (Apokalupo 17:10-13) Tei runga te akonoanga pikikaa i te mokotua o teia puaka taae poritiki, te tauta ra i te akakeu i ta te reira au ikianga e kia akatere i ta te reira aratakianga.

Inara, kare e roa atu ana, ka tupu tetai tupuanga umere tikai. “E nga tara okotai ngauru taau i akara ra, e te puaka taae ra, e akaviivii ïa i taua vaine akaturi ra, e e pou oki aia ia ratou i te āru, e e noo apinga kore ua aia, e e kai i tona kopapa, e e tutungi iaia ki te ai.” (Apokalupo 17:16) I roto i tetai tupuanga poitirere, e te viviki ua, ka taanga te au mana poritiki o te ao katoa ki runga i te akonoanga pikikaa e ka akapou takiri iaia! Eaa te ka akakeu i teia tupuanga? Te pau maira te puka Pipiria o Apokalupo e: “Kua tuku oki te Atua i te manako ki roto i to ratou ngakau kia rave ratou i tona anoano.” (Apokalupo 17:17) Ae, e tutakianga ta te akonoanga pikikaa ki te Atua no te au angaanga rikarika katoatoa tana i rave i roto i tona ingoa. I roto i tetai tu tau apa kore, ka taangaanga aia i te au taeake poritiki o te vaine ei ravenga akapouanga nana.

Eaa taau ka rave me kare koe e inangaro i te o atu ki roto i te tumatetenga o te akonoanga pikikaa? Te raurau maira te tangata karere a te Atua: “Ka aere ke mai ana kotou ki vao, e aku au tangata.” (Apokalupo 18:4) E tikai, ko teia te taime kia oro ke mai mei te akonoanga pikikaa! Inara ka oro tatou kiea? Auraka ki roto i te irinakianga e kare e Atua, mei te mea e e puapinga kore katoa ua to te reira tuatau ki mua. (2 Tesalonia 1:6-9) Te ngai akaruru anake ua koia oki ki roto tikai i te akonoanga tika. Akapeea koe i te akatakaanga i te akonoanga tika?

Akapeea i te akatakaanga i te akonoanga tika

Eaa te ua meitaki ta te akonoanga tika ka akatupu?—Mataio 7:17.

Akonoanga Tika . . .

◼ TAANGAANGA ANA I TE AROA: “Kare [te aronga akamori mou] i to teianei ao,” kare e akapae ke ia e te iti tangata, me kore te peu akonoanga, e e akaari ana ratou i te “aroa” i rotopu ia ratou uaorai. (Ioane 13:35, 17:16; Angaanga 10:34, 35) Kare ratou e ta ana i tetai e tetai, mari ra te anoano ra i te oronga i to ratou ora no tetai.—1 Ioane 3:16.

◼ IRINAKI ANA I TE TUATUA A TE ATUA: Kare e apii ana i te “ikuiku” e te ‘apii i tukuia mai e te tangata anake ra,’ e akatumu ana te akonoanga tika i ta te reira apiianga ki runga i te Tuatua a te Atua, te Pipiria. (Mataio 15:6-9) No teaa ra? No te mea “te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa.”—2 Timoteo 3:16.

◼ AKAMAROIROI ANA I TE AU PAMIRI E E AKONO ANA I TE AU TURANGA TEITEI NO TE TU AKONO TAU: E tereni ana te akonoanga tika i te au tane akaipoipo kia ‘aroa i ta ratou uaorai au vaine mei to ratou uaorai kopapa,’ e tauturu ana i te au vaine kia akatupu i te ‘akangateitei no ta ratou tane,’ e e apii ana i te au tamariki kia ‘akarongo atu i to ratou au metua.’ (Ephesia 5:28, 33; 6:1) Kapiti atu, te aronga tei orongaia te taoonga kia akaaere ka anoanoia ei au akaraanga tu tau tikai.—1 Timoteo 3:1-10.

E akonoanga ainei tetai te aru ra i teia au turanga? Te karanga ra, te puka Holocaust Politics, neneiia i te 2001 e: “Naringa e maata te au tangata e akono ra i te au apiianga e te au angaanga a te Au Kite o Iehova, kua kopaeia te Horokoti e kare te tamateanga iti tangata e akatupu atea i te kino maata i te ao nei.”

E tikai, i roto i te 235 enua, kare te Au Kite o Iehova e tutu anake ua i te au turanga tau a te Pipiria—e akono ana ratou i te reira. Te akamaroiroi atu nei matou ia koe kia pati atu i te Au Kite o Iehova kia tauturu mai ia koe kia kite mai eaa ta te Atua e umuumu maira ia koe e rauka ai ia koe i te akamori tau iaia. E rave koe i teia i teia taime. Auraka e taroaroa. Te vaitata maira te openga o te akonoanga pikikaa!—Zephania 2:2, 3.

Me ka inangaro koe i te akakiteanga maata atu no runga i te karere tei akatumuia ki runga i te Pipiria ta te Au Kite o Iehova e tutu aere ra, e tata atu kia ratou i te ngai nooanga i raro ake.

□ Kare e tutakianga, ka inangaro au i tetai kopi o te poroutia Kia Vai Matakite Ua Atu!

□ Tata mai kiaku nei no runga i tetai apii Pipiria oronga ua i te kainga ine.

[Tataanga Rikiriki]

[Tataanga i te kapi 3]

Te akakeu ra te akonoanga pikikaa i tona mana “ki rungao i te au ariki o te ao nei”

[Tataanga i te kapi 3]

“Ka aere ke mai ana kotou ki vao, e aku au tangata”