Pene Tai Ngauru Ma Ono
“Ko te Aroa Rai, kia Maata Tikaia ïa ia Kotou Uaorai”
1. Eaa te akamanako putuputuia ra e te aronga ouia ki te au uipaanga a te Au Kite o Iehova ra?
ME AERE mua mai te au tangata ki te au uipaanga a te Au Kite o Iehova, e putuputu ratou i te manako i te aroa tei akaariia i reira. Te kite ra ratou i te reira i te turou anga tei akatotoaia atu kia ratou e i roto i te pirianga oa pumaana oki. Te kite katoa ra te aronga e aere maira ki ta tatou au uruoaanga i teianei aroa. Kua tata tetai tangata ripoti nuti no runga i tetai uruoaanga: ‘Kare e tangata i raro ake i te mana o te au apinga akakona me kare te kava akakona. Kare e avaavaanga maata e te aoaoaanga. Kare e oparapara anga. Kare e putotoanga. Kare tetai e tao ana me kare e akakino anga. Kare tetai e tuatua viivii me kare e reo kino. Kare te reva kiia e te auai avaava. Kare e keiaanga. Kare tetai e titiri punu ana ki runga i te matie. E tuke rai ia.’ Pouroa teia e akakite anga i te aroa, te tu “kare e rave i te mea tau kore, kare e kimi i te meitaki nona uaorai.”—1 Korinetia 13:4-8.
2. (a) I muri akera, eaa te tau ra kia kiteia i te akakiteanga i to tatou aroa? (e) I te aru anga ia Karaiti, eaa te tu aroa ta tatou ka tau kia tatanu?
2 Te aroa taeake e akairo akatakaanga ia i te au Kerititiano tikai. (Ioane 13:35) Ia tatou e tupu ra i te pae vaerua, te apii ra tatou kia akakite maata atu i te aroa. Kua pure te apotetoro ko Paulo e kia riro te inangaro o tona au oa Kerititiano “kia tupu marie rai.” (Philipi 1:9) Kua akakite mai te apotetoro ko Ioane e ka tau to tatou aroa kia tuku atinga ia tatou uaorai. Kua tata aia: “Ko te mea teia i kite ei tatou i te aroa, ko [te Tamaiti a te Atua] i oronga i tona uaorai ora no tatou: e kia oronga katoa tatou i to tatou ora no te au taeake e tikaʼi.” (1 Ioane 3:16; Ioane 15:12, 13) Ka oronga tikai ainei tatou i to tatou oraanga no to tatou au taeake? Noatu rai kare te au turanga e maata e umuumu ana i te reira, eaa te mamao i ta tatou ka aere atu kia tauturu ia ratou i teianei, noatu rai me kare e ngoie ana te rave i te reira?
3. (a) Penei na roto i teea tu ta tatou akakite anga kia ki maata to tatou aroa? (e) Eaa ra i puapinga maatai kia tere atu te aroa no tetai e tetai i teianei?
3 Kapiti katoa ki ta tatou au angaanga te akaata maira i te vaerua tuku atinga ia tatou uaorai, ka tau tatou kia akono i te manako ngakau pumaana tikai ki to tatou au taeake. Te raurau maira te Tuatua a te Atua kia tatou: “Ei kapiti anga aroa mou to kotou ia kotou uaorai, i te aroa taeake ra.” (Roma 12:10) Te manako ngakau pera ra tatou ki etai au tangata. Inara ka rauka ainei ia tatou kia manako ngakau aroa atu kia etai ke atura? I te vaitata anga mai te openga o teia akatereanga taito, e mea puapinga maata no tatou kia akapiri vaitata atu ki to tatou au oa Kerititiano. Te na ko ra te Pipiria: “Kua vaitata ra te openga o te au mea ravarai nei. . . . Ko te aroa rai, kia maata tikaia ïa ia kotou uaorai: ka ngaro oki te apa e manganui i te aroa.”—1 Petero 4:7, 8.
Me Tupu Mai te Au Manamanata
4. (a) Eaa ka raukai kia tu mai te au manamanata i rotopu i te aronga o te putuputuanga ra? (e) Noatu rai e kare tatou i manako akapera ana, eaa te meitaki ka tupu me ka akono tatou i te ako anga a te Pipiria?
4 Inara, ia tatou e tu apa ua nei, te vaira te au tuatau e rave ei tatou i te au apinga te ka akariri ia etai ke ra. Penei ka rave ara mai to tatou au taeake kia tatou i roto i te au tu tuke. (1 Ioane 1:8) Me kite koe ia koe uaorai i roto i taua turanga ra, eaa taau ka tau kia rave? Te oronga maira te au Tuatua Tapu i te arataki angaanga umuumuia. Inara ko ta te reira ka tuatua mai penei kare e tau ki ta tatou au tangata apa ua nei e manako ra kia rave. (Roma 7:21-23) Tera ra, ko ta tatou akonoanga akatenga i te akoanga i roto i te Pipiria ka oronga i te akapapu anga i to tatou inangaro ngakau tae kia akamareka ia Iehova. Na te raveanga i te reira ka akamatutu katoa i te tu o to tatou aroa kia etai ke ra.
5. Me ka tamamae mai tetai ia tatou, eaa tatou i tau ei kia kore e tutaki atu?
5 Me ka mamae te au tangata, i etai taime ka kimi ratou i te au tu ei tutaki atu i tei akariri maira. Inara te akariro anake ra te reira kia kino atu te turanga. Me umuumuia te tutaki anga, ka tau tatou kia akaruke atu i te reira ki te Atua. (Maseli 24:29; Roma 12:17-21) Ko etai atu penei ka tauta kia kore e aravei atu i tei akariri maira. Inara kare tatou e tau kia rave pera ki te au oa akamori, no te mea ko te ariki maianga i ta tatou uaorai akamori anga tei runga, i tetai tuanga, i to tatou aroaanga i to tatou au taeake. (1 Ioane 4:20) No reira kua tata a Paulo: “E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei te Mesia i akakore i ta kotou na, e akapera katoa kotou.” (Kolosa 3:13) Ka rauka ainei ia koe te rave i te reira?
6. (a) Eaa te putuputu no tatou kia akakore i te ara a to tatou taeake? (e) Na te kiteanga i teaa no tatou uaorai te ka tauturu ia tatou kia akono i tei ara mai ia tatou?
6 Ka peea me ka rave putuputu mai tetai i te ara kia tatou mari ra kare e rave i te au ara kino e akaateaiai aia mei roto i te putuputuanga? No taua au tu ara rikiriki ra, kua manako te apotetoro ko Petero kia akakore i te ara e “kia taki itu.” Mari ra kua tuatua atura Iesu: “Kare au e karanga atu kia koe e, Kia taki itu ua, Kia itu ra ngauru i te taki itu anga.” Kua akateitei atu aia i te maata o ta tatou kaiou ki te Atua me akaaiteia atu ki ta tetai ua atu tangata kaiou kia tatou nei. (Mataio 18:21-35) I te au tu e manganui te ara ra tatou ki te Atua i te au ra ravarai—i etai taime na te angaanga noinoi, na ta tatou i tuatua me kare i manako, me kare na tei kore i raveia e tatou—kare ua i kite e te rave ara ra tatou. (Roma 3:23) Inara, te rave ua atura te Atua i te akaaroa mai ia tatou. (Salamo 103:10-14; 130:3, 4) Te umuumu maira aia ia tatou kia akono ma taua tu rai tetai ki tetai. (Mataio 6:14, 15; Ephesia 4:1-3) Ei reira ka rave tatou i te tu aroa “kare e manako kino ia etai ke.”—1 Korinetia 13:4, 5; 1 Petero 3:8, 9.
7. Eaa ta tatou ka rave me te akamoupuku maira tetai taeake ia tatou?
7 Penei te vaira te au taime te kite ra tatou e noatu ra kare o tatou akamoupuku ki to tatou taeake, e apinga tana e akamoupuku maira ia tatou. Ka rauka ia tatou kia iki i te ‘tapoki atu i te reira ma te aroa,’ mei ta 1 Petero 4:8 i akakite maira. Me kare ka rauka ia tatou kia aere atu e tuatua kiaia e te tauta kia akaora mai i te au pirianga ponuiaau.—Mataio 5:23, 24.
8. Me rave tetai oa akarongo i tetai apinga te ka akatupu taitaia kia tatou, eaa te ka rauka kia raveia no te reira?
8 Penei ko tetai oa akarongo te rave ra i tetai apinga te akataitaia maira kare ia koe anake mari ra kia etai ke katoa. Kare ainei i te mea meitaki kia tuatua atu kiaia? Penei ake. Me akataka meitaki atu koe uaorai i te manamanata kiaia na roto i te tu takinga meitaki, penei ka apai mai teia i te au tupu anga meitaki. Inara na mua koe i te ui kia koe uaorai: ‘Te rave ra ainei aia i tetai apinga tau kore i te tuatua tapu? Me kare ko te maata anga o te manamanata penei e tuke toku tupuanga mai e te terenianga mei tona?’ Kia matakite auraka e akanoo i taau uaorai au turanga e ka rave akavaanga kia tau ki te reira. (Iakobo 4:11, 12) Te ariki tau ra a Iehova i te au tangata no te au tu katoatoa e te akakoromaki ra ia ratou ia ratou e tupu ra i te pae vaerua.
9. (a) Koai ma te akono ra i te au tumu no te rave tarevake maata i roto i te putuputuanga? (e) Ko teea te apainga ka riro na tei araia ra e akono mua, e eaa te akakoro anga?
9 Me ka o atu tetai i roto i te putuputuanga ki roto i tetai raveanga tarevake kino, mei te ainga tau kore rai, ka tau kia akono vivikiia te reira. Eai ma? E te aronga pakari. (Iakobo 5:14, 15) Inara, me kua raveia tetai ara ki tetai, penei i roto i tetai tumu no te pitiniti me kare no te taangaanga kinoanga i te arero, ei reira ko tei araia atura ka tau kia tauta na mua i te aravei atu i tei ara maira ko raua anake ua. (Mataio 18:15) Me kare te reira e akaoti i taua tumu ra, ka tau kia raveia etai atu au takainga i reira, mei tei akapapaia maira ia Mataio 18:16, 17. Ko te aroa no to tatou taeake tei tarevake ra e te anoano kia ‘rauka’ aia ka tauturu ia tatou kia rave i teia na roto i te tu te kimi ra kia itae i tona ngakau.—Maseli 16:23.
10. Me tu mai tetai manamanata, eaa te ka tauturu ia tatou kia akamanako tikai i taua tumu ra?
10 Me tupu mai tetai manamanata, me e maata me kare e rikiriki ua, te tauturuia maira tatou me ka tauta tatou kia kite e akapeea ta Iehova manako atu i te reira. Kare aia e mareka ana i te ara i tetai ua atu tu, e i tona tuatau tau, ka takoreia atu te aronga akono tataraara kore i te ara kino i roto i tana akaaerenga. Inara, auraka e ngaropoina ia tatou e te ara nei tatou katoatoa i te au tu rikiriki e te anoano ra i tona akakoromakianga roa e te akaaroa. No reira te akanoo maira Iehova i te akaraanga no tatou kia aru me ka aroia mai tatou ma te au ara a etai ke ra. Me te akaaroa ua ra tatou, te akaata ra tatou i tona aroa.—Ephesia 5:1, 2.
E Kimi i te Au Ravenga kia “Maora Katoa”
11. Eaa a Paulo i akamaroiroi ei i to Korinetia ra kia “maora katoa”?
11 Kua akapou a Paulo i te au marama i te patu anga i te putuputuanga i Korinetia, i Ereni. Kua angaanga pakari aia kia tauturu i te au taeake i reira, e kua aroa aia ia ratou. Inara te ngere ra tetai papaki o ratou i te pumaana no te manako ngakau kiaia. E akaapa ua ratou. Kua raurau atura aia ia ratou kia “maora katoa” i te akakiteanga i te aroa. (2 Korinetia 6:11-13; 12:15) Ka rave meitaki tatou katoatoa kia akamanako i te maata o ta tatou akakite anga i te aroa ki etai atu e kia kimi i te au ravenga kia maora atu.—1 Ioane 3:14.
12. Akapeea tatou e tupu ei i to tatou aroa no te aronga katoa i roto i te putuputuanga?
12 Te vaira ainei etai i roto i te putuputuanga te kite ra tatou e ngata kia akapiri vaitata atu? Me ka aere ke atu tatou i to tatou aerenga kia tapoki atu i tetai ua atu tu tukeanga—mei ta tatou e anoano ra ia ratou kia rave no tatou—ka tauturu teia kia akapumaana i te pirianga i rotopu ia tatou nei. Ka meitaki katoa mai to tatou manako ngakau kia ratou me kimi tatou i to ratou au tu meitaki e ka tamanako maatai i te reira. Ka akariro papu mai teia i to tatou aroa no ratou kia tupu.—Luka 6:32, 33, 36.
13. Akapeea e raukai ia tatou te maora katoa i te akaari anga i te aroa ki te aronga i roto i ta tatou putuputuanga?
13 E tika, te vaira te au kotinga i ta tatou ka rauka kia rave no etai ke. Penei kare e rauka ia tatou kia aravei atu i te katoatoa i te uipaanga taki tai. Penei kare e rauka kia kapiti mai i te katoatoa i ta tatou patianga i te au oa no tetai kaikai anga. Inara ka rauka ainei ia tatou kia maora katoa atu na te akapouanga i tetai au miniti tokoiti ua no te akariroanga kia meitaki atu te matau anga i etai atu i roto i ta tatou putuputuanga? Penei i etai atianga ka pati atu tatou i tetai ta tatou kare ra i matau meitaki kia angaanga kapiti mai kia tatou i te angaanga tutu aerenga?
14. Me tei rotopu i te au Kerititiano kare ra tatou i aravei ake, akapeea e raukai ia tatou te akaari i te aroa maata no tetai e tetai?
14 Te oronga maira te au uruoaanga Kerititiano i te au tuatau kia akamaora katoa i to tatou aroa. Penei e au tauatini ua atu ka akaputu atu. Kare e rauka ia tatou kia aravei i te katoatoa, inara ka rauka ia tatou kia akono ia tatou uaorai na roto i te tu te ka akaari e te tuku ra tatou i to ratou meitaki na mua i to tatou turanga. I rotopu i te au akoanga, ka rauka ia tatou uaorai kia akaari i te manako anga na te rave anga kia aravei atu i etai o te aronga takapini ia tatou. A tetai tuatau ka riro te katoatoa te ka noo i te enua nei ei au tungane e te au tuaine, tei taokotaiia i te akamori anga i te Atua mou e te Metua o te katoatoa. Mei teaa ra te rekareka anga kia kite tetai i tetai! Na te aroa maata e akakeu ia tatou kia anoano kia rave i te reira. Eaa i kore ei e akamata i teianei?
Uriuri Akaou Anga
• Me tu mai te au manamanata i rotopu i te au Kerititiano, akapeea te akaoti anga tau i te reira, e no teaa ra?
• Ia tatou e tupu ra i te pae vaerua, na roto i teea au tu tau katoa te tupu anga o to tatou aroa?
• Akapeea e raukai kia akaari i te aroa maata no te aronga e tere atu i te au pupu oa piri vaitata ra?
[Tutu i te kapi 148]
E manganui te au tu no te akakite anga i te aroa Kerititiano, mei te au uipaanga putuputuanga ra