Eaa te Aiteanga Katoatoa o te Reira?

TE TUATUA ra a Iesu Karaiti e: “Te openga o te akatereanga o te au mea nei” ka akatakaia mai e te tamaki, te rava kore o te kai, te maki mate, e te au ngaruerue enua.​—Mataio 24:1-8, NW; Luka 21:10, 11.

Mei te 1914 kua akakinoia te oraanga e te au tamaki i rotopu i te pa enua e i rotopu i te au pupu eteniki, te maata anga o te taime tei tupu mai na te tamanamanata anga poritiki a te au orometua e i teianei na te au takinga kino tamataku akatotoaia.

Noatu te au tupuanga taineti, te kite ra te au anere ua atu au mirioni o te au tangata i te ao katoa i te rava kore tikai o te kai. I te au mataiti tataki tai e mirioni ua atu te au tangata te mate ra no te rava kore o te kai.

Te maki mate, me kare, te au maki akatotoaia o te au maki kino, e tuanga katoaia no te akairo ta Iesu i oronga mai. I muri mai i te Tamaki I o te Ao, kua tamateia e tetai maki vuru e tere atu i te 21,000,000 oraanga. Kare mei te au maki mate i roto i tetai au ngai i te tuatau i topa ua akenei, kua tupu te reira ki te au pa enua i te ao katoa e pera katoa i te au airani mamao. Te tupu nei te AIDS i teianei i te ao katoa, mei taua au maki mate mei te maki maro, te maki mariri, te piva ngakau, e te Dengue te tupu ua atura i roto i te au pa enua e puapinga te tupu anga.

Tei ripotiia mai, te vaira e ngauru ua atu au tauatini o te au ngaruerue enua tukeke e te pakari i te au mataiti ravarai. Noatu e te rauka ra te au apinga e te mako ra te au ravenga ripoti anga, kua riro putuputu mai ei au nuti te au tumatetenga i te au ngai tangata no te tupu anga o te au ngaruerue enua.

Kua akakite katoa mai te Pipiria e: “Ka tupu te kino maata i taua tuatau openga ra, kia kite mai koe. E riro te tangata nei ei akaperepere ia ratou uaorai, ei noinoi, ei akatietie, ei nengonengo, ei akakino, ei akarongo kore ki te metua, ei mareka kore, ei viivii, Ei aroa kore, ei akaatikau koreromotu ra, ei tapepe pikikaa, ei mako kore, ei rotoriri, ei akavaavaa i te tangata memeitaki ra, Ei pikikaa, ei māro, ei ngakau akateitei, ei anoano i te au mea e navenave ei ra, kare i anoano i te Atua; E tutu akono i te Atua to ratou, kareka te mana ra, kua akakore ratou i te reira: e ariu ke koe i taua aronga ra.”​—2 Timoteo 3:1-5.

Kare ainei koe e ariki ana e te noo nei tatou i roto i te “kino maata”?

Kua kite ainei koe e ko te au tangata, te maataanga o te taime, e aronga akaperepere ia ratou uaorai, ei aronga noinoi i te moni, e te akakeuia ra e te parau?

Koai te ka patoi mai e kua ki teia ao i te au tangata te maro maira inara ei mareka kore anga, ei akaatikau koreromotu anga, e ei viivii ra?

Kua kite ainei koe e te tupu viviki maira te akarongo kore ki nga metua pera katoa te ngere poitirere anga i te aroa, kare i te au ngai taki tai ua mari ra takapini i te ao katoa?

Kare ekoko anga e te kite ra koe e te noo nei tatou i roto i tetai ao te kona ra i te anoano no te mea navenave inara te ngere ra i te aroa no te tu meitaki. Ta te Pipiria ia e akataka maira i te au tu te ka tupu mai i te “tuatau openga.”

E maata atu ainei te anoanoia ra kia rauka i te akatakaia mai te tuatau e noo nei tatou? Kua akakite katoa mai a Iesu e i taua tuatau rai, ka tutu aereia te tuatua meitaki no te Patireia o te Atua e kako rava ake te ao katoa. (Mataio 24:14) Kua raveia ainei te reira?

Te Punanga Tiaki, e tianara akatumuia ki runga i te Pipiria tei akanooia ei akakite i te tuatua meitaki o to Iehova Patireia, te nenei putuputuia nei i tetai ua atu tianara i roto i te au reo e manganui.

I te au mataiti ravarai, kua akono te Au Kite o Iehova e tere atu i te pirioni ora i te akakitekite uaorai ki tetai ke no runga i te Patireia o te Atua.

Te nenei uaia nei e ratou te au puka te akamarama maira i te Pipiria i roto i etai 400 reo, pera katoa te au reo te itae ra i te au ngai mamao e te au pupu meangiti o te au tangata. Kua itaeia e te Au Kite o Iehova te au pa enua ravarai ma te tuatua meitaki; kua tutu aere katoa ratou ki te au airani e te au ngai e manganui e iti roa te puapinga i roto i te ao o te poritiki. I te maata anga o te au enua, te rave putuputu ra ratou i tetai porokaramu no te apii Pipiria.

E tikai, te tutu aereia nei te tuatua meitaki o te Patireia o te Atua ki te enua tei tangataia, kare kia taui i te ao, mari ra kia oronga i te kite. Te orongaia nei ki te au tangata i te au ngai ravarai te tuatau kia akaari e me te manako maira ratou e naai i anga i te au rangi e te enua e me te akaari maira ratou te ngateitei ki tana au ture e te akaari anga i te aroa ki to ratou au taeake tangata.​—Luka 10:25-27; Apokalupo 4:11.

Kare e roa atu ana, ka tama te Patireia o te Atua i te au tangata kino katoatoa mei te enua nei e ka akariro i te reira ei parataito i te ao katoa.​—Luka 23:43.

[Pia i te kapi 6]

Te Tuatau Openga o Teaa?

Kare i te tuatau openga no te au tangata ravarai. No te aronga te rave ra i te anoano o te Atua, te oronga maira te Pipiria i te manakonakoanga no te ora mutu kore.​—Ioane 3:16, 36; 1 Ioane 2:17.

Kare i te tuatau openga no te enua nei. Te taputou maira te Tuatua a te Atua e ka vai mutu kore ua atu te enua katoa.​—Salamo 37:29; 104:5; Isaia 45:18.

Kareka ra, e tuatau openga teia no teia akatereanga o te au mea kino, o te aroa kore e no te aronga te mou ra ki to te reira au tu.​—Maseli 2:21, 22.

[Pia/Tutu i te kapi 7]

E Tuatua Tikai Ainei te Pipiria na te Atua?

Kua ripiti putuputuia, kua tata mai te au peroveta Pipiria e: “Te na ko mairā a Iehova.” (Isaia 43:14; Ieremia 2:2) Kua akakite katoa maira a Iesu Karaiti, te Tamaiti a te Atua, e ‘kare ïa nana uaorai.’ (Ioane 14:10) Te akakite taka meitaki maira te Pipiria uaorai e: “Te au tuatua tapu katoa i tataia ra, e mea akauruia mai e te Atua.”​—2 Timoteo 3:16.

Kare atu e puka i neneiia i roto i te au reo e manganui​—tere atu i te 2,200, mei tei ripotiia mai e te United Bible Societies. Kare atu e puka i tua maataia—​i teianei e tere atu i te a pirioni kopi. Kare ainei e ko te reira taau ka tapapa atu no tetai karere no ko mai i te Atua no te au tangata ravarai?

No tetai uriurianga maata no te au akapapu anga e e mea akauruia te Pipiria e te Atua, e akara i te puka The Bible—God’s Word or Man’s?, neneiia e te Au Kite o Iehova.

Me te tatau ra koe i te Pipiria ma te arikianga no te tika e e Tuatua tikai ia na te Atua, ka puapinga maataia koe.

[Pia/Tutu i te kapi 8]

Eaa te Patireia o te Atua?

E kavamani te reira i te rangi te akakite maira i te tutara anga na te Atua mou, ko Iehova, Tei Anga i te rangi e te enua. ​—Ieremia 10:10, 12.

Te akataka maira te Pipiria ia Iesu Karaiti e koia oki ta te Atua i oronga atu i taua mana tutara anga. (Apokalupo 11:15) Iaia i te enua nei, kua akaari mai a Iesu e kua rauka takere iaia te mana umere mei te Atua ra​—e mana te tauturu ra iaia kia akatere i te au mea natura, kia akaora i te au tu maki katoatoa, e kia akatu katoa mai i tei mate ra. (Mataio 9:2-8; Mareko 4:37-41; Ioane 11:11-44) Kua akakite mai te totou Pipiria akauruia e ka oronga katoa te Atua kiaia i te “mana, e te kakā, e te basileia nona, kia tavini atu te au tangata katoa, te pa enua, e te au reo, kiaia.” (Daniela 7:13, 14) Kua tapaia taua kavamani ra ko te Patireia o te rangi; mei te rangi maira e akono mai ei a Iesu Karaiti i teianei i tona tutara anga.

[Au Tutu i te kapi 7]

Tutu aere anga i te tuatua meitaki i te ao katoa