Tetai Ao Ou kia Tau ki ta te Atua Taputou

TE ORONGA maira te Pipiria, te Tuatua tataia a te Atua, i te manakonakoanga kia tatou i te tuatua anga te reira e: “Te tatari nei ra tatou i te rangi ou e te enua ou tana i tuatua maira, i te vai tika anga o te tuatua-tika ra.”​—2 Petero 3:13.

Eaa te “rangi ou”? Te kapiti ra te Pipiria i te rangi ki te tutaraanga. (Angaanga 7:49) Te “rangi ou” e kavamani ouia te ka tutara i runga ake i te enua. E mea ou te reira no te mea ka mono te reira i teia akatereanga o te tutaraanga; e takainga ou katoa te reira i te akatupu anga i ta te Atua akakoroanga. Ko te Patireia te reira ta Iesu i apii mai kia tatou kia pure. (Mataio 6:10) I te mea e ko te Atua te Tumu o te reira e te noo ra aia i te rangi, kua kapikiia te reira ko “te patireia o te au rangi.”​—Mataio 7:21, NW.

Eaa te “enua ou”? Kare oki e ko tetai paraneta ou, i te mea e te akakite meitaki maira te Pipiria e ka noo tangataia te enua e tuatau ua atu. Ko te “enua ou” ra ko te taiate tangata ouia. E mea ou te reira no te mea ka tipu keia te aronga kino. (Maseli 2:21, 22) Pouroa tei ora mai ka akangateitei e ka akarongo ki Tei Anga ra e ka noo ma te rotai ma tana au umuumuanga. (Salamo 22:27) Te patiia atu nei te au tangata o te pa enua katoa kia apii i taua au umuumuanga e kia apai mai i to ratou au oraanga kia rotai ki te reira i teianei. Te rave ra ainei koe i te reira?

I roto i te ao ou o te Atua, ka akangateitei te katoatoa i Tona tutaraanga. Te akakeu ra ainei te aroa no te Atua ia koe kia akarongo kiaia? (1 Ioane 5:3) Te kiteaia ra ainei te reira i roto i toou kainga? i te angaanga me kare i te apii? i roto i te tu te taangaanga ra koe i toou oraanga?

I roto i taua ao ou, ka taokotai te taiate tangata i roto i te akamori anga i te Atua mou. Te akamori ra ainei koe i Tei Anga i te rangi e te enua? Te taokotai tikai ra ainei taau akamori anga ia koe ki te au oa akamori o te pa enua katoa, te iti tangata katoa, te au reo katoa?​—Salamo 86:9, 10; Isaia 2:2-4; Zephania 3:9.

[Pia i te kapi 17]

Te Atua Tei Taputou Mai i Teia Au Mea Nei

Koia Tei Anga i te au rangi tikai e te paraneta Enua. Koia oki tei akatakaia mai e Iesu Karaiti e ko “te Atua mou ra.”​—Ioane 17:3.

Te maataanga o te tangata te akangateitei ra i te au atua ta ratou uaorai i maani. E mirioni ua atu te tupou ra ki mua i te au tiki ora kore. Kua akakaka tetai papaki i te au akaaerenga a te tangata nei, te au apii anga pae materia, me kare to ratou uaorai au anoano. Pera katoa te aronga tei karanga ana e te taangaanga ra i te Pipiria kare e akangateitei katoa ana i te ingoa o tei akatakaia e ko “te Atua [“mou,” NW].”​—Deuteronomi 4:35.

No runga iaia uaorai, te karanga ra Tei Anga e: “Ko au ko Iehova; ko toku ïa ingoa.” (Isaia 42:5, 8) Kua mama mai teia ingoa mei etai 7,000 taime i roto i te Pipiria i roto i to te reira au reo mua. Kua apii a Iesu Karaiti i tana au pipi kia pure e: “E to matou Metua i te au rangi ra, kia akatapuia toou ingoa.”​—Mataio 6:9, NW.

E tu peretana aa te Atua mou? Kua akataka mai aia iaia uaorai e ko tei “takinga-meitaki, e te aroa ua, e te akakoromaki maata, e te meitaki maata, e te tuatua-mou” e tei kore i oronga tikai mai i te akakore anga i te akautunga anga ki te aronga tei aati akakoro ra i tana au akaueanga. (Exodo 34:6, 7) Te akapapu maira te tuatua enua i tana au ravenga ki te au tangata ravarai i te tuatua tika o taua akataka anga ra.

Ko te ingoa e te peretana tei akatutuia maira e taua ingoa ra kia akatapuia, me kare kia akonoia ei tapu. Tei Anga e Tei Ngateitei i te Ao Katoa e Pini Ua Ake, kia tau iaia ta tatou akono anga e ta tatou akamori anga katoatoa. Te oronga ra ainei koe uaorai i teia kiaia ra?

[Pia/Tutu i te kapi 18]

Eaa te Au Tauianga ta te “Rangi Ou e te Enua Ou” ka Apai Mai?

Tauiia te enua ki roto i te Parataito Luka 23:43

Angaanga merengo anga, e maata te kai Isaia 25:6; 65:17, 21-23

[Pia/Tutu i te kapi 19]

Ka Puapingaia Ainei Koe?

Kare te Atua e pikikaa!​—Tito 1:2.

Te akakite maira a Iehova e: “Taku tuatua . . . kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.”​—Isaia 55:11.

Kua anga takere a Iehova i te “rangi ou e te enua ou.” Kua angaanga takereia te kavamani i te rangi. Kua akanoo takereia te tango no te “enua ou.”

I muri ake i te akakite anga mai no runga i etai au mea umere ta taua “rangi ou e te enua ou” ka apai mai ki te au tangata ravarai, kua taiku mai a Apokalupo i te Atua uaorai, te Ngateitei o te Ao Katoa e Pini Ua Ake, i te na ko anga e: “I na, te akariro nei au i te au mea ravarai ei mea ou.” Kua karanga katoa aia, e: “Ka tata ana: e tuatua-mou oki teianei au tuatua e te pikikaa kore.”​—Apokalupo 21:1, 5.

Te uianga puapinga maata roa atu koia oki, Te rave ra ainei tatou i te au akatikatikaanga e rauka ai kia manakoia mai ei tau kia riro mai ei tuanga no taua “enua ou” i raro ake i te “rangi ou” ra?