APII 4
Akamareka Aia i Tona Papa e ia Iehova
Eaa te tia ta Iepheta i taputou kia Iehova?
Kare i te mea mama, inara kua rave te tamaine a Iepheta i ta tona papa i tia
Te kite ra koe i tera tamaine i roto i te tutu?— E tamaine aia na tetai tangata ko Iepheta tona ingoa. Kare te Pipiria i akakite mai ana i te ingoa o tera tamaine. Kua kite ra oki tatou e kua akamareka aia i tona papa, e Iehova. Aere mai ra, ka apii taua no runga iaia e tona papa ko Iepheta.
E tangata meitaki a Iepheta. E maata tona taime e pou ana i te apii i tana tamaine no runga ia Iehova. E tangata maroiroi katoa aia, e te arataki meitaki. No reira kua pati te tamariki Iseraela iaia kia arataki ia ratou i te tamaki atu i to ratou au enemi.
Kua pure a Iepheta ki te Atua kia tauturu mai iaia kia re. Taputou a Iepheta e me re aia, ka oronga aia i te tangata mua na Iehova te ka aere mai mei roto i tona are, me oki atu aia ki te kainga. Ka noo teia tangata i ko i te tapenakara o te Atua, e ka angaanga aia i reira no tona oraanga katoa. Ko te tapenakara, e ngai tapu teia e aere ana te tangata ki reira i te akamori i te Atua i tera tuatau. Tei tupu mai, kua re a Iepheta i te tamaki! Tona oki mai anga ki te kainga, kua kite koe e koai te tangata mua i aere mai ki vao i tona are i te aravei iaia?—
Ae, ko te tamaine a Iepheta! Koia ua rai oki tana tamaine okotai, e teianei ka tuku a Iepheta iaia kia aere. Kare roa aia i mataora ana. E akamaara ana ra oki e, kua maani aia i tetai tia. Tera taime rai, kua tuatua mai tana tamaine e: ‘E taku metua, kua tia koe kia Iehova, no reira kia akapera rai koe mei taau i tuatua.’
Te au mataiti ravarai, e aere ana te au oa o te tamaine Iepheta i te akara iaia
Kare katoa rai te tamaine a Iepheta i mataora ana. Me noo aia i ko i te tapenakara, kare e rauka iaia i te akaipoipo e kia anau tamariki. Inara, inangaro tikai aia i te rave i ta tona papa i tia, e kia akamareka ia Iehova. Ko tera te mea puapinga roa atu i te akaipoipo e te anau tamariki. I reira kua akaruke aia i tona kainga e kua noo i ko i te tapenakara no tona oraanga katoa.
Toou manako e kua riro tana i rave ei akamareka i tona papa, e ia Iehova?— Ae! Me akarongo koe kia Iehova, e me inangaro koe iaia mei te tamaine rai a Iepheta, ka akamareka katoa koe i toou nga metua, e Iehova.