Arataki te Akarongo Mou ki te Akamareka Anga i te Atua

1, 2. Eaa te au akaaoanga ta Iepheta e tana tamaine i aro atu?

KUA oro te mapu vaine i te aravei i tona metua tane. Kua mataora tikai aia i te kite anga e kua ora mai tona metua te oki anga mai mei te tamaki. Kua riro te autu anga o tona metua tane ei imene anga nana kia ura ma te rekareka. Inara kua poitirere aia i te akarongo anga i te tuatua a tona papa. Kua vevete tona papa i tona kakau ma te aue maata: “Aue koe, e taku tamaine e! kua akaaka rava io nei au ia koe!” I reira kua akakite aia ki tana tamaine e kua taputou aia i tetai tia te ka taui takiri i tona oraanga. Te ka tupu mai, kare rava tana tamaine e akaipoipo tane e te anau tamariki. Noatu ra, kua viviki aia i te oronga i te pauanga meitaki, i te akamaroiroi i tona metua tane kia akatupu i tana i tia kia Iehova. Kua akaari mai tana pauanga e kua irinaki pu tikai aia e ko ta Iehova i pati e mea meitaki nona. (Te Au Akava 11:34-37) Te kite anga tona metua tane i te akarongo o tana tamaine, kua rekareka tikai aia no te mea kua kite aia e ka riro tona tu puareinga i te akamareka ia Iehova.

² Kua irinaki pu tikai a Iepheta e tana tamaine ia Iehova e Tana au ravenga. Kua vai tiratiratu raua noatu e kare te reira i te mea māmā ua i te rave. Kua inangaro raua i te akamareka ia Iehova, e e mea puapinga atu teia i tetai ua atu akaatinga anga.

3. Eaa te tumu ka riro ei te akaraanga o Iepheta e tana tamaine ei tauturu ia tatou i teia tuatau?

³ Kare i te mea māmā ua kia vai tiratiratu kia Iehova. Ka anoanoia tatou ‘kia taumāro tikai i te akarongo.’ (Iuda 3) E rauka ai i te rave i te reira, ka apii tatou e akapeea a Iepheta e tana tamaine te akakoromaki anga i te au akaaoanga o to raua oraanga. Akapeea raua i te vai tiratiratu anga kia Iehova?

NOO MA TE AKARONGO NOATU TE AU AKAKEU ANGA TAU KORE O TEIANEI AO

4, 5. (a) Eaa te akauenga ta Iehova i oronga ki te ngati Iseraela te tomo anga ratou ki roto i te Enua Taputouia? (e) Kia tau kia Salamo 106, eaa tei tupu no tei akarongo kore te iti tangata Iseraela?

⁴ I te au rā ravarai, kua akamaara a Iepheta e tana tamaine i te au mea tei tupu ki te ngati Iseraela no to ratou akarongo kore kia Iehova. Vaitata i te 300 anere mataiti i mua atu ana, kua akaue a Iehova i te ngati Iseraela kia tamate pouroa i te aronga akamori pikikaa i roto i te Enua Taputouia, inara kare ratou i akarongo ana. (Deuteronomi 7:1-4) Te maata anga o te ngati Iseraela kua akamata i te aru i te tu o te ngati Kanaana, tei akamori i te au atua pikikaa e kua noo i te oraanga tau kore.​—E tatau ia Salamo 106:34-39.

⁵ No te tu akarongo kore o te ngati Iseraela, kare a Iehova i paruru ana ia ratou mei to ratou au enemi. (Te Au Akava 2:1-3, 11-15; Salamo 106:40-43) E mea papu e e ngata tikai no te au ngutuare tangata tei inangaro ia Iehova kia noo ma te akarongo i te reira tuatau. Inara, te taiku maira te Pipiria i te aronga akarongo mou, mei ia Iepheta e tana tamaine pera katoa ia Elikana, Hana, e Samuela. Kua inangaro tikai ratou i te akamareka ia Iehova.​—1 Samuela 1:20-28; 2:26.

6. Eaa te au akakeu anga tau kore ta teianei ao e akatupu ra i teia tuatau, e eaa ta tatou ka rave?

⁶ I teia tuatau, e rave ana te au tangata i te au mea mei ta te ngati Kanaana rai. Kua akamouia to ratou oraanga ki runga i te ainga, te tā ua, e te moni. Inara te oronga maira a Iehova i te au akamatakite anga taka meitaki. Te inangaro nei aia i te paruru ia tatou mei tana i rave i te paruru anga i te ngati Iseraela mei te au akakeu anga tau kore. Te kite ra ainei tatou i tetai apiianga mei to ratou au tarevake? (1 Korinetia 10:6-11) Kia tauta pakari tikai tatou i te kopae i te aerenga manako o teianei ao. (Roma 12:2) Ka rave ainei tatou i te ka rauka ia tatou kia akapera?

VAI TIRATIRATU A IEPHETA NOATU TE AU MANAMANATA

7. (a) Eaa ta te iti tangata o Iepheta i rave kiaia? (e) Akapeea a Iepheta i te ariu atu anga?

⁷ I to Iepheta tuatau, kua takinokino te ngati Philiseti e te ngati Amona i te ngati Iseraela no te mea kua akarongo kore ratou kia Iehova. (Te Au Akava 10:7, 8) Kapiti mai ki teia au pa enua, kua tupu katoa te au manamanata i rotopu ia Iepheta e tona au taeake e te au arataki o Iseraela. No te vareae e te makitakita a tona au taeake iaia, kua māro ratou iaia kia akaruke i te enua e tika anga tona kia noo ki reira. (Te Au Akava 11:1-3) Kare a Iepheta i akatika ana i to ratou tu kino kia taui i tona tu meitaki. Akapeea tatou i kite ei i teia? Te pati akatenga anga te au arataki o Iseraela kia tauturu ia ratou, kua rave viviki aia i te reira. (Te Au Akava 11:4-11) Eaa tei akakeu ia Iepheta kia ariu atu?

8, 9. (a) Eaa te au kaveinga i roto i te Ture tei tauturu ia Iepheta? (e) Eaa te mea puapinga rava atu kia Iepheta?

⁸ E toa uritumu a Iepheta e kua kite meitaki aia i te tuatua enua o Iseraela e te Ture a Mose. Kua riro te tu e akono ra a Iehova i Tona iti tangata ei apii iaia i to te Atua turanga no te mea tika e te tarevake. (Te Au Akava 11:12-27) Kua taangaanga a Iepheta i teia kite i roto i tona oraanga me rave aia i te au iki anga. Kua kite tikai aia i to Iehova manako no runga i te riri e te tutaki anga i te kino, e kua inangaro te Atua i Tona iti tangata kia aroa i tetai e tetai. Kua apii katoa te Ture iaia e akapeea me akono i tetai ke, kapiti mai te aronga tei makitakita mai iaia.​—E tatau ia Exodo 23:5; Levitiku 19:17, 18.

⁹ E mea papu e kua tauturu te akaraanga o Iosepha ia Iepheta. Kua kite aia e akapeea a Iosepha i te akaari anga i te tu aroa ki tona au tuakana noatu e kua makitakita ratou iaia. (Genese 37:4; 45:4, 5) Na te akamanakoanga i teia akaraanga, kua tauturu teia ia Iepheta kia ariu atu na roto i te tu e akamareka ra ia Iehova. Kua mamae tikai a Iepheta i ta tona au taeake i rave kiaia. Inara kua riro te paruru anga i te ingoa o Iehova e tona iti tangata ei mea puapinga atu ki to Iepheta au manako. (Te Au Akava 11:9) Kua inangaro tikai aia kia vai tiratiratu kia Iehova. Tei tupu mai no tona tu meitaki, kua akameitaki a Iehova iaia e te ngati Iseraela.​—Ebera 11:32, 33.

10. Akapeea te au kaveinga a te Atua te tauturu anga ia tatou ei au Kerititiano i teia tuatau?

¹⁰ Ka kite ainei tatou i tetai apiianga mei to Iepheta akaraanga? Eaa ta tatou ka rave me akataitaia mai te au taeake Kerititiano ia tatou e me manako e kare ratou e akono meitaki maira ia tatou? Auraka tatou e akatika i to tatou mamae ngakau kia tāpu ia tatou mei te tavini anga ia Iehova. Auraka rava e akamutu i te aere ki te au uipaanga Kerititiano e te kapiti atu ki te putuputuanga. Kia aru tatou i te tu o Iepheta e kia akarongo kia Iehova. Ka tauturu teia ia tatou kia autu i te au turanga ngata e ka riro tatou ei akaraanga meitaki.​—Roma 12:20, 21; Kolosa 3:13.

AKAARI MAI TE AKAATINGA ANGA PUAREINGA I TO TATOU AKARONGO

11, 12. Eaa ta Iepheta i tia, e eaa te ō maira ki te reira?

¹¹ Kua kite a Iepheta e ka anoanoia te tauturu a Iehova kia akamatara mai i te ngati Iseraela mei te ngati Amona. Kua tia aia kia Iehova me autu aia i te tamaki, ka oronga aia “ei atinga karakaratio” te tangata mua ka aere mai mei roto i tona are me oki mai aia mei te tamaki. (Te Au Akava 11:30, 31) Eaa ra te aiteanga i teia?

¹² E rikarika ana a Iehova i te akaatinga i te tangata, no reira kua kite tatou e kare a Iepheta i oronga ana i tetai atinga tika tikai. (Deuteronomi 18:9, 10) I raro ake i te Ture a Mose, kua riro te atinga karakaratio ei apinga aroa na tetai tangata kia oronga takiri kia Iehova. No reira ko te aiteanga i ta Iepheta i tuatua, koia oki te tangata tana ka oronga kia Iehova, ka tavini i ko i te tapenakara no te katoa anga o tona oraanga. Kua akarongo a Iehova kia Iepheta e kua tauturu iaia kia autu takiri i te tamaki. (Te Au Akava 11:32, 33) Inara koai ta Iepheta i oronga kia Iehova?

13, 14. Eaa ta te au tuatua a Iepheta i roto i Te Au Akava 11:35 e akaari maira no tona akarongo?

¹³ E akamanako ana i tei tupu i te akamata anga o teia atikara. Te oki anga mai a Iepheta mei te tamaki, te tangata mua tei aere mai i te aravei iaia ko tana tamaine akaperepere okotai! Ka tiratiratu ainei a Iepheta ki tana i tia? Ka oronga ainei aia i tana tamaine kia Iehova kia tavini i ko i te tapenakara no te katoa anga o tona oraanga?

¹⁴ E mea papu kua tauturu te au kaveinga i roto i te Ture a te Atua ia Iepheta kia rave i te iki anga meitaki. Penei kua maara iaia te au tuatua i roto ia Exodo 23:19, tei akakite ki te iti tangata o te Atua kia puareinga ua i te oronga i te ka rauka ia ratou kia Iehova. Akakite katoa te Ture, me taputou tetai tangata i tetai tia kia Iehova, “auraka rava aia e akaatikau i tana tuatua, e rave aia i te au mea katoa ta tona vaa i tuatua.” (Numero 30:2) Mei te vaine akarongo mou rai ko Hana, tei ora ana i tona tuatau, kua anoanoia a Iepheta kia akatupu i tana tia, noatu e kua kite aia eaa ta te reira ka akatupu kiaia e tana tamaine. No te mea ka tavini tana tamaine i ko i te tapenakara, kare rava aia e anau tamariki. No reira kare e uanga ei apai i to Iepheta ingoa e tona enua. (Te Au Akava 11:34) Noatu ra, kua akakite a Iepheta e: “Kua tuatua oki toku vaa kia Iehova, kare oki e tika kia akakore.” (Te Au Akava 11:35) Kua āriki a Iehova i te akaatinga maata a Iepheta e kua akameitaki iaia. Ka tiratiratu ainei koe mei ia Iepheta rai?

15. Eaa te tia ta te maata anga i rave, e akapeea tatou me vai tiratiratu?

¹⁵ Te akatapu anga tatou i to tatou oraanga kia Iehova, kua tia tatou e kia rave i tona anoano noatu eaa te ka tupu. Kua kite tatou e kare i te mea māmā ua i te akono i te reira tia. Inara akapeea tatou i te ariu atu anga me patiia tatou kia rave i tetai angaanga kare tatou e inangaro ana? Me autu i to tatou uaorai tu mataku e me akarongo ki te Atua, te akapapu ra tatou e kua tiratiratu tatou ki te reira tia. Penei ka riro ta tatou au akaatinga ei mea mamae, inara e maata atu ta Iehova akameitaki anga. (Malaki 3:10) Akapeea ra te tamaine a Iepheta? Akapeea aia i te ariu anga ki te taputou a tona metua tane?

16. Akapeea te tamaine a Iepheta i te ariu anga atu ki te taputou a tona papa? (Akara i te tutu mua.)

¹⁶ E tuke rai te tia a Iepheta ki ta Hana. Kua tia a Hana i te oronga i tana tamaiti ko Samuela kia tavini i ko i te tapenakara ei Nazira. (1 Samuela 1:11) Kua akatikaia te au Nazira kia akaipoipo e kia anau tamariki. Inara kua oronga takiriia te tamaine a Iepheta “ei atinga karakaratio,” no reira kare rava aia e riro ei vaine na tetai tangata e ei metua vaine. (Te Au Akava 11:37-40) Akamanako ana i teia! Ka rauka iaia i te akaipoipo i tetai tane meitaki rava atu no te mea e arataki tona metua tane i Iseraela. Inara i teianei ka riro aia ei tavini akaaka i ko i te tapenakara. Akapeea teia vaine mapu i te ariu anga atu? Kua akaari aia e ko te tavini anga i te Atua te mea puapinga atu ïa na te akakite anga ki tona metua tane: “E akapera mai koe kiaku mei ta to vaa i tuatua.” (Te Au Akava 11:36) Kua akaatinga aia i tona anoano natura kia kore aia e akaipoipo tane e kia anau tamariki kia rauka iaia i te tavini ia Iehova. Akapeea tatou me aru i tona tu akaatinga iaia uaorai?

17. (a) Akapeea tatou me aru i te akaraanga o Iepheta e tana tamaine? (e) Akapeea te au tuatua i roto ia Ebera 6:10-12 te akamaroiroianga ia koe kia akaatinga ia koe uaorai?

¹⁷ E tauatini ua atu mapu tane e te vaine Kerititiano kare e inangaro ra i te akaipoipo e te anau tamariki, no teia tuatau. Eaa ra te tumu? No te mea te inangaro ra ratou i te tavini maata atu ia Iehova. Maata katoa to tatou au taeake pakarikari te akaatinga ra i to ratou oraanga kia kore e akapou i to ratou taime ki ta ratou tamariki e te au mokopuna. Mari ra, te oronga maata ra ratou i to ratou taime e te maroiroi kia Iehova. Te angaanga ra tetai pae i te akatu Are Uipaanga Patireia, te aere ra ki te Apii no te Aronga Tutu Evangeria, e kua neke ki tetai putuputuanga te anoano maataia ra te au taeake. Kua akamaata atu tetai pae i ta ratou tavini anga ia Iehova i te tuatau o te Akamaaraanga. Kare rava a Iehova e akangaropoina i te tu akaatinga anga o teia aronga akarongo mou. (E tatau ia Ebera 6:10-12.) Akapeea ra koe? Ka rauka ainei ia koe i te akaatinga ia koe uaorai kia tavini tamou ia Iehova?

EAA TE AU APIIANGA TA TATOU I KITE MAI?

18, 19. Eaa ta tatou i kite mai mei te papaanga Pipiria o Iepheta e tana tamaine, e akapeea tatou me aru i to raua tu?

¹⁸ Eaa tei tauturu ia Iepheta kia autu i te au akaaoanga e manganui? Kua tuku aia ia Iehova kia arataki iaia i roto i tana au ikianga. Kare aia i tuku ana kia akakeuia aia e te au tangata takapini iaia. Kua vai tiratiratu ua atu rai aia noatu e kua makitakita mai te au tangata iaia. Kua akameitaki a Iehova ia Iepheta e tana tamaine no to raua tu akaatinga, e kua taangaanga a Iehova ia raua kia turuturu i te akamorianga mou. Noatu e kare tetai pae e rave ra i te mea tika, kua vai tiratiratu ua rai a Iepheta e tana tamaine kia Iehova.

¹⁹ Te na ko ra te Pipiria e: “Ei aru ra i te aronga i rauka tei tuatuaia maira i te akarongo e te akakoromaki.” (Ebera 6:12) Kia aru tatou i te tu o Iepheta e tana tamaine, te kite anga e me tiratiratu ua rai tatou, ka akameitaki mai a Iehova ia tatou.