Āriki i te Apainga a te Mesia i Roto i ta te Atua Akanoonooanga

“I MUATANGANA ra, kua anga iora te Atua i te rangi e te enua,” e te “meitaki roa ra” te au mea tana i anga. (Gene. 1:1, 31) Kua anga a Iehova i te tangata ma te manakonakoanga umere no te tuatau ki mua. Inara, kua riro te meameaau i Edene ei tamanamanata poto i te turanga mataora o te tangata. Kareka ra, kua vai rai to Iehova akakoroanga no te enua e no te tangata e kare i taui ana. Kua akakite te Atua e ka tae mai te akaora no te uanga o Adamu tei akarongo. Ka akamata akaouia te akamorianga mou e ka takore te Atua i te Tiaporo e tana au angaanga kino pouroa. (Gene. 3:15) I reira ka “meitaki” akaou te au mea ravarai. Ka rave a Iehova i teia na roto i tana Tamaiti ia Iesu Mesia. (1 Ioa. 3:8) No reira e mea puapinga tikai kia āriki tatou i ta Iesu apainga i roto i ta te Atua akanoonooanga.—Anga. 4:12; Phili. 2:9, 11.

TA IESU APAINGA

² Me akamanako tatou i ta Iesu apainga i roto i te akanoonooanga a te Atua, ka kite tatou e e tuke tuke te au tuanga o tana apainga. Koia to tatou Akaora, Taunga Maata, Upoko o te putuputuanga Kerititiano, e te Ariki o te Patireia o te Atua. Na te akamanako oonu anga no runga i teia au apainga e akamaata atu i to tatou akaperepere no te akanoonooanga a te Atua, e e akaketaketa atu i to tatou inangaro no Iesu Mesia. Ko etai teia o te tuanga tuke tuke o ta Iesu apainga e akataka maira te Pipiria.

³ I te tuatau o ta Iesu angaanga orometua i te enua nei, i taka meitaki ei e ka akaau akaouia te au tangata akarongo ki te Atua, na roto ia Iesu. (Ioa. 14:6) Ei Akaora no te tangata nei, kua oronga a Iesu i tona oraanga ei oko no te tangata e manganui. (Mata. 20:28) Te akaari maira teia e e maata atu te ō maira ki tana apainga. Koia tei ikiia ei akatupu i to Iehova akakoroanga no te tangata. Koia anake ua te ravenga e rauka ai ia tatou ta te Atua akaperepereanga. (Anga. 5:31; 2 Kori. 5:18, 19) Kua riro tona mate akaatinga e tona tuakaouanga ei akatuera i te mataara no te aronga akarongo kia rauka te au akameitakianga mutu kore i raro i te tutaraanga o to Iehova Patireia i te rangi.

⁴ Ei Taunga Maata, kua rauka ia Iesu i te “aroa mai ia tatou i to tatou au paruparu nei” e kua oronga iaia ei tarangaara no te ara a tana au pipi akatapuia i te enua nei. Kua akamārama mai te apotetoro ko Paulo e: “Kare oki to tatou i te taunga maata e kore e tika kia aroa mai ia tatou i to tatou au paruparu nei; i rokoia katoa oki aia i te au timataanga katoa, mei ia tatou katoa nei rai, kare rava ra e ara.” E oti kua akamaroiroi a Paulo i te aronga tei tuku i to ratou akarongo ki roto ia Iesu, kia āriki i teia tikaanga kia rauka i te akaau akaou ki te Atua i te na ko anga e: “E teianei e akavaitata ua atu tatou i te terono o te aroa ua ma te mataku kore, kia aroaia mai tatou nei, e kia rauka te meitaki ei tauturu mai ia tatou i te tuatau e tau ei.”—Ebe. 4:14-16; 1 Ioa. 2:2.

⁵ Ko Iesu katoa te Upoko o te putuputuanga Kerititiano. Mei tana au pipi rai i te anere mataiti mua, kare tatou i teia tuatau e anoano i tetai tangata ei tutara ia tatou. E oronga mai ana a Iesu i te aratakianga na roto i te vaerua tapu e na roto i te aronga pakari, no te mea ko ratou tei akamanaia ei tiaki i te anana a te Atua. (Ebe. 13:17; 1 Pete. 5:2, 3) I te tuatua anga no runga ia Iesu na roto i te totou, kua akakite a Iehova e: “I na, kua oronga au iaia ei Kite no te au tangata nei, ei Arataki, e ei Tutara no te au tangata nei.” (Isa. 55:4) Kua akatupu a Iesu i teia totou i te na ko anga ki tana au pipi e: “Auraka kotou kia tapaia i te arataki; okotai o kotou Arataki, ko te Mesia.”—Mata. 23:10.

⁶ I te akakite anga i tona manako e tona inangaro i te tauturu ia tatou, kua oronga mai a Iesu i teia patianga: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua. Te maru nei taku amo, e te māmā nei taku apainga.” (Mata. 11:28-30) Na te akaaere anga i te au angaanga a te putuputuanga Kerititiano na roto i te tu maru e te tu te ka akatupu i te mataora, kua akapapu mai a Iesu e koia “te tiaki mamoe meitaki” mei ia Iehova rai, tona Metua i te rangi.—Ioa. 10:11; Isa. 40:11.

⁷ I roto i tana reta mua ki to Korinetia, kua akamārama mai a Paulo no runga i tetai tuanga ke mai o ta Iesu apainga, i te karanga anga e: “E iaia oki te au, e kia ope rava te au enemi katoa i te tukuia e ia ki raro ake i ona vaevae. E kia tuku tikaia te au mea ravarai ki raro ake iaia ra, ei reira e kitea puiaʼi e, i raro katoa ake te Tamaiti uaorai iaia, i tei tuku i te au mea katoa i raro ake iaia ra; kia riro ko te Atua i rungao i te au mea katoa i te au ngai ravarai.” (1 Kori. 15:25, 28) I mua ake ka aere mai ei a Iesu ki te enua nei, koia te taunga rave angaanga na te Atua, te tama mua o te au mea ravarai ta te Atua i anga. (Mase. 8:22-31) Te tono mai anga te Atua iaia ki te enua nei, kua akono a Iesu i to te Atua anoano i te au taime ravarai. Kua rauka iaia i te akakoromaki i te timataanga kino rava atu e kua vai tiratiratu ua rai aia ki tona Metua e mate ua atu aia. (Ioa. 4:34; 15:10) No te mea kua vai tiratiratu tana Tamaiti e tae ua atu ki te mate, kua akatuakaou te Atua iaia ki te rangi e kua oronga i te tikaanga kia riro mai aia ei Ariki no te Patireia i te rangi. (Anga. 2:32-36) I roto i tera turanga, kua rauka ia Iesu te apainga ngateitei rava atu o te arataki anga i te manotini ua atu o te au angera ririnui kia takore i te tutaraanga a te tangata mei te enua nei, e kia tāma i te au kino pouroa i te ao katoa nei. (Mase. 2:21, 22; 2 Tesa. 1:6-9; Apo. 19:11-21; 20:1-3) I reira ko te Patireia anake ua o te Atua i te rangi, i raro i te tutaraanga a te Mesia, te ka mana ki rungao i te enua katoa nei.—Apo. 11:15.

ĀRIKI ANGA I TANA APAINGA E TE AU MEA E Ō MAIRA

⁸ E tangata apa kore a Iesu, to tatou Akaraanga. Kua akamanaia aia ei tiaki ia tatou. E puapinga ai tatou mei tana tiakianga akaperepere, ka anoanoia tatou kia vai tiratiratu kia Iehova e kia aru i te au tauianga ou e na roto maira i Tona akaaerenga.

⁹ I te anere mataiti mua, kua āriki pu tikai te au pipi a Iesu i tana apainga ei Mesia i roto i te akanoonooanga a te Atua. Kua akaari ratou i teia na te angaanga taokotai anga i raro i te taoonga Upoko o te Mesia, e te kauraro anga ki te aratakianga tana e oronga maira na roto i te vaerua tapu. (Anga. 15:12-21) Kua taiku mai te apotetoro a Paulo i te tu taokotai o te putuputuanga Kerititiano akatainuia i tona tata anga e: “Kia akatika ra tatou i te tuatua-mou ma te aroa, kia tupu te tau iaia, i te upoko, i te Mesia, i te au mea katoa nei: Nona oki te tau meitaki o te kopapa katoa e i piri ei oki, no te meitaki o te au pirianga katoa i te pakari ou o te au ngai katoa kia tau, tupu akera te kopapa i te maata anga o tona uaorai meitaki ma te aroa.”—Ephe. 4:15, 16.

¹⁰ Me taokotai tetai ki tetai i roto i te putuputuanga, e me angaanga rotai te katoatoa i raro i te taoonga upoko o te Mesia, ka uua te putuputuanga e ka tupu te aroa koia oki, te “tatua apa kore.”—Ioa. 10:16; Kolo. 3:14; 1 Kori. 12:14-26.

¹¹ Te akapapu maira te au totou Pipiria e akatupuia nei i roto i teianei ao e mei te mataiti 1914 mai, kua akamanaia a Iesu Mesia ei Ariki no te Patireia. Te tutara nei aia i rotopu i tona au enemi. (Sala. 2:1-12; 110:1, 2) Eaa ta teia e akakite maira no runga i te aronga e noo nei i runga i te enua? Kare e roa atu, ka akatupu a Iesu i tana apainga ei Ariki no te au ariki, e ei Atu no te au atu, me tuku mai aia i te utunga a te Atua ki runga i tona au enemi. (Apo. 11:15; 12:10; 19:16) I reira e akatupuia ai ta Iehova i taputou i te akamataanga o te orureau, kia akaora mai i te aronga i te rima katau o Karaiti. (Mata. 25:34) Te mataora nei tatou e kua āriki tatou i ta te Mesia apainga i roto i te akanoonooanga a te Atua! Kia taokotai ua rai tatou i te akaope takiri anga i ta tatou angaanga orometua i te ao katoa nei, i raro i te aratakianga a te Mesia i teia au rā openga.