UIANGA 7

Eaa Taku ka Rave me Māroia Mai Kia Rave i te Pirianga Ainga?

TUMU I PUAPINGA AI

Ka riro te au ikianga taau ka rave no te pirianga ainga ei akakeu i toou oraanga no te tuatau ki mua.

**EAA TAAU KA RAVE?**

Akamanako ana i teia akaraanga: E rua marama te aere kapiti anga a Heather raua ko Mike. Mei te mea rai kua roa to raua kite anga i tetai e tetai. E tuku karere ua ana raua, roa me puka i runga i te tereponi e na tetai e akaoti i te tuatua a tetai! Teianei, e apinga ke atu ta Mike e inangaro ra.

E rua rai marama, ka mou rima ua raua e te ongiongi. Kare a Heather e inangaro i te rave i tetai apinga ke. Kare katoa aia e inangaro kia akaruke a Mike iaia. Kare e tangata ke atu tei tuatua e e tamaine manea e te akaperepereia. Tuatua aia kiaia uaorai, ‘E āka inangaro to maua ko Mike . . . ’

Me aite toou turanga ki to Heather, e kua papa koe no te aere kapiti ma tetai tane me kore vaine, eaa taau ka rave?

TĀPU E AKAMANAKO!

Akariroia tetai kakau ei kakau tamā — Apinga aroa te pirianga ainga mei te Atua na te aronga akaipoipo anake. Ka riro te pirianga ainga i mua ake i te akaipoipo ei takino i teia apinga aroa. Aite te reira me rave koe i tetai kakau manea ta tetai tangata i oake mai e kua akariro ei kakau tamā

Me ka rere mai koe mei tetai ngai teitei, ka tupu te kino kia koe. Ka tupu katoa te kino me aati koe i te akauenga tei na ko e: “Kia kore kotou e akaturi.”—1 Tesalonia 4:3.

Eaa te ka tupu me kare koe e akarongo ki teia akauenga? Karanga ra te Pipiria: “Ko te tangata ra i akaturi ra, kua takinga-kino ïa i tona uaorai kopapa.” (1 Korinetia 6:18) Akapeea ra?

Kitea mai e te aronga kimikimi e ka tupu teia au kino ki te au mapu me rave i te pirianga ainga i mua ake ka akaipoipo ei.

TAITAIA. Karanga te maataanga o te au mapu tei rave i te pirianga ainga e kua tataraapa ratou i muri mai.
IRINAKI KORE. Muri ake i te pirianga ainga, ka ekoko te nga tokorua e, ‘Koai ua atu tana i piri ana?’
MATAORA KORE. Maata te au tamaine e inangaro ana i tetai tane kia paruru ia ratou, kare kia takino ia ratou. Maata rai te au tamaroa kare e inangaro ana i tetai vaine tei tuku ua mai ki ta ratou māro anga.
Teia te turanga: Me rave koe i te pirianga ainga i mua ake ka akaipoipo ei, kua taviivii koe ia koe uaorai na te takinokino anga i tetai apinga akaperepereia. (Roma 1:24) E mea akaperepere maataia toou kopapa i te taviivii atu!

Akaari e e tu maroiroi toou “kia kore [koe] e akaturi.” (1 Tesalonia 4:3) Me akaipoipo koe, ka akatikaia koe kia rave i te pirianga ainga. Ka mataora koe, kare e manamanata, kare e tataraapa, e kare e taitaia mei tei tupu ki te au mapu tei rave i te pirianga ainga i mua ake ka akaipoipo ei.—Maseli 7:22, 23; 1 Korinetia 7:3.

EAA TOOU MANAKO?

Me inangaro tikai tetai ia koe, ka takinokino ainei aia ia koe i te pae kopapa e te pae manako?
Me inangaro tikai tetai ia koe, ka timata ainei aia ia koe kia takino i toou pirianga ki te Atua?—Ebera 13:4.