Ripoti a te Aronga Tutu Patireia

◻ KUA riro te “takinga kino maata” i te patoi i te putuputuanga Kerititiano i mua ana i te akapueurikiriki i te maata anga o ta te Mesia au pipi. (Angaanga 8:1, NW) Tera ra, kua akaoki akaouia mai teia takinga kino no te mea te aronga tei pueurikiriki “kua aere atura na roto i te au enua i te akakitekite aere i te nuti meitaki o te tuatua.” (Angaanga 8:4, NW) Kua tamou ua atu rai a Philipa i te tutu aere, e “rotai maira te urupu tangata i te akarongo.” (Angaanga 8:6, NW) I te akaoki anga mai te takinga kino i te tai anere mataiti, kua tupu katoa i tetai oire meangiti i te tua tokerau o Tairani (Thailand).

Kua akamata tetai painia takake o te au Kite o Iehova i te tutu aere i tetai oire meangiti, inara i te taime mua kare te aronga i te reira oire meangiti e akarongo. Te tuatua anga aia ki te tangata tutu aere i te reira ngai, kua taokotai mai te au tangata no te akarongo. Kua kite mai tetai pae e e kite atu teia Kite i tana Puka Tapu i to ratou orometua, no reira kua akamata ratou i te apii i te Puka Tapu ki te painia noatu ta tetai pae tamanamanata anga ia ratou. Kua taiaia tetai pae o ta ratou au mokora, kua tamatakuia te oraanga o teia Kite e kua tutungiia te are o tetai tangata tei inangaro. Kua tuatua te reira tangata e: “Ka rauka ia ratou i te tutungi i toku are, inara kare e rauka ia ratou i te tutungi i toku ngakau.” E mamao te ngai ta te aronga e apii ra ki te Kite e na runga ana i te patikara takatakai kia piri atu ki te au uipaanga i te Are Uipaanga Patireia. E a ia ratou tei papetitoia, e e ono te aere nei rai ki te au uipaanga ma ratou.

Te Tutaki no te Tu Tiratiratu

◻ Kua akatupu te au taeake i Tamipia (Zambia) tetai tu meitaki no te tu tiratiratu, e kua tupu mai teia ei au akameitakianga no ratou, e kua tauturu katoa teia i tetai pae kia kite i te tuatua mou. Te aere ra tetai tangata pakari, e painia tamou, na runga i te apinga akaoro tari tangata e kua akarongo atu aia i tetai Kite e tuatua ra ki tetai pae no runga i te tuakaouanga. Kua ui atu tetai patete kiaia: “Eaa ra kotou e te au Kite i tuatuaʼi e na kotou ua te akonoanga tika?” Kua piri atu te taeake ki te pukapuka anga e kua tuatua atu ki te patete e ka tutaki a Iehova i tona au Kite no te mea te apii ra ratou i te tuatua mou mei te Puka Tapu.

I muri ake i te turuaipo i runga i teia aerenga mamao, kua tae te apinga akaoro tari tangata ki tetai mataara kua araiia. Te ua maata ra oki. Kua tomo mai tetai tangata vaeau ki roto i te apinga akaoro tari tangata e kua ui mai e me e au Kite rai to Iehova i runga i reira. Te vaira e toru. I reira kua tuatua aia: “E tikai, e noo ua te au Kite ki raro, te katoa anga e aere ki vao ma ta kotou au kete.” Kua aere pouroa atu te katoatoa ki vao i roto i te ua, e i muri ake i te tutaka anga, kua oki mai ratou ki roto ma ta ratou au apinga e kua mau to ratou kakau.

I roto i te apinga akaoro tari tangata, kua tuatua te tangata vaeau: “Te tumu i tuku ei au i te au Kite kia noo ua no te mea e au tangata tiratiratu ratou. E maata ta matou au kiteanga e kua kitea mai e ko ratou ua te aronga tiratiratu; me ui matou e eaa to roto i ta ratou au kete, ka akakite mai ratou i te tika kia matou.” I te apinga akaoro tari tangata e aere ra, kua ui atu te taeake: “Ko teea te akonoanga tika?” Kua pau mai tetai peretana: “Ko te mea kare i mauia e te ua.”

Ae, ka tauturu te tu tiratiratu kia kitea te akonoanga tika, e te vaira tikai tana au tutaki!