Ripoti a te Aronga Tutu Patireia
Ka Akameitaki te Tu Tiratiratu i ta Tatou Angaanga Orometua
E TUMU umuumuia te tu tiratiratu no te au Kerititiano. Kua tata te apotetoro ko Paulo ia Ebera 13:18 e: “Kia kite tikai oki matou e, te tika nei to matou akava-ngakau i te akakoro anga e, ei akono meitaki ta matou i te au mea katoa nei.” Ta tatou akono anga i te tu tiratiratu, ‘ka akamanea i te tuatua a te Atua, to tatou Ora ra, i te au mea katoa ra.’ (Tito 2:10) Te oronga maira te tu tiratiratu, pera katoa te tutu aereanga i te Patireia, o etai nga Kerititiano i Apatonga Patipika o te Patireia o Tonga i tetai kite anga ririnui tikai. Te akakite maira te opati manga o te Totaiete Punanga Tiaki i Amoa Opunga e:
“No tetai au mataiti kua tuatua atu tetai nga Kite tokorua ki te au tangata o tetai au oire e a i to raua airani no runga i te Patireia o te Atua inara kare e au tupu anga meitaki. I reira, i te maki anga tana tane, kua riro na te vaine e akono i ta raua one kai, te tipu e te tamaro i te kopara, ta raua ravenga kimi moni anake. I te tae anga te tuatau no te aronga oko i te tutaka i te kopara, kua kairo mai ta tetai tangata ke pute ma tana au pute e rima. Kua raurau atu te au tangata o te vira iaia kia rave i te pute e kia akara atu i te reira e ei akameitakianga mei ko mai i te Atua. Inara, kua patoi te tuaine, noatu rai e kua tutakiia mai no nga pute e ono kua ariki ua i te tutaki tei tau kiaia. Kua kiteaia tona tu tiratiratu.
“I muri mai, i te tae anga te taime no te tane i te apai i tetai terepu ki tetai airani ke, kua pati atu te tiaki toa iaia kia oko mai i tetai au apinga nana. Kua rave te Kite i tei patiia atu kiaia e kua akaoki atu i te toenga o te moni ki taua tangata ra. Kua umere tikai taua tangata ra. Kua karanga aia e ko te taime mua te reira i akaoki mai ei tetai tangata i te tieni. Etai pae tana i pati atu kia oko mai i te au apinga kua rave ua rai i te tieni. I tetai atianga, te inangaro anga te Kite i tetai apinga mei te toa o taua tangata ra, kua oronga atu taua tangata ra i te taviri o te toa kiaia, te ikuikuanga atu kiaia kia apai i tana i inangaro e kia akaruke i te tutaki i roto i te toa. Kua ui atu i reira etai pae i te tiaki toa e eaa aia ka oatu ei i te taviri ki te Kite e kare e kia ratou. Kua akamarama atu te ona o te toa e ko te Kite anake tana ka irinaki i roto i te oire.
“Kua tuatuaia te tu akono meitaki o teia nga tokorua i rotopu i te au tangata o te vira. Kua kiteaia te Au Kite no to ratou tu tiratiratu, to ratou turanga neutara no runga i te poritiki, e ta ratou akakitekiteanga i te Patireia o te Atua, tei akaari mai i te tuke i rotopu i te au irinaki anga o te au tangata o te vira e te au apiianga a te Puka Tapu. I teianei me tupu mai tetai au uianga no runga i te Puka Tapu, kua putuputu te au tangata i te aravei atu i te Au Kite no te au pauanga. Kua akaruke katoa te tane i tona roi i te po, kua aere atu ki tetai uipaanga na te oire, e kua pau atu i tetai au uianga tei uiia mai no runga i tetai tumu tuatua o te Puka Tapu. Me aere atu ki tetai au tanumanga ki roto i te vira, e putuputu te taime kua patiia aia kia akaari atu e eaa ta te Puka Tapu i akakite no runga i te mate, e kua arikiia tana au akamarama anga.”
No reira, te tu tiratiratu o teia nga Kite tokorua e ta raua tutu aereanga i te Patireia te oronga ra i te akakitekite anga meitaki ki runga i teia airani manea i te Apatonga Patipika. Te manakonako nei raua e kia apii etai pae i te Puka Tapu e kia tu atu no te tuatua mou. Me rave ratou i te reira, e mea papu e ka akameitaki te Atua ko Iehova ia ratou.—Ioane 8:32.