Akatotoaanga i te Aunga Kakara o te Kite i te Atua

“Kia akameitakiia ra te Atua, ko tei akaupokotu mai ia matou i te Mesia kare e tivata, ko tei akakite aere oki i te aunga i te kite iaia ia matou nei, e kare e ngai toe!”​—2 KORINETIA 2:14.

1. Eaa te aunga kakara ta tatou e uriuri nei i konei, e eaa te manako tau no te taoonga rave i te akatotoaanga i te reira?

E ONGI, e ongi! M-m-m-m! Te ongi ra ainei koe i te aunga reka? Kare tatou e taiku ana i teianei i te aunga no te pua tiare, mari ra, i te aunga akatutuia te aere maira mei te au tataanga meitaki roa i te enua nei. Kare teia au tataanga i akamataia mai e te tangata ua nei mari ra ko te ruru tiare akatutuia tei akauruia e Tei anga katoa maira i te tiare kakara te akamanea ra i te enua nei. E taoonga maata te akatotoaanga i teia aunga kakara no te kite i te Atua ra. Ae, e angaanga puapinga maata tona​—kare te katoatoa i tu i te reira, kare te au tangata ravarai i ariki ana.

2. I naea te au pipi a te Mesia i akamataʼi i te akatotoa i tetai aunga kakara akatutu anga, e eaa tei tupu?

² Kua orongaia teia taoonga oko maata ki te au pipi a te Mesia ra ia ratou i akaungaiaʼi kia rave i tetai angaanga na te Atua ko Iehova i te ra Penetekote i te mataiti 33 o to tatou Tuatau Noa Nei. I te ki anga i te vaerua tapu, kua akamata ratou i te akatotoa i te aunga kakara akatutuia maira, na te akakitekiteanga i te “peu taka ke a te Atua.” (Angaanga 2:1-4, 11) Na roto ia ratou te aunga kakara o te kite i te Atua ra i te aere atu anga ki etai ke ra, kare ki te ngati Iuda peritomeia anake ua mari ra ki te pa enua peritome koreia, te au kopu, te au iti tangata, e te au reo katoa. (Angaanga 10:34, 35) Kua manako te au tavini mou i teia angaanga e ei apinga maata atu i te au apinganui katoatoa te ka rauka i te tangata i te akaputu no ratou uaorai.

3. Eaa te maata o te angaanga akatotoaanga i te kite i te Atua ra tei raveia, e eaa te uianga ka tau tatou kia ui ia tatou uaorai?

³ I teia tuatau, te raveia ra te angaanga meitaki no te akatotoaanga i te aunga kakara o te kite i te Atua i te ao katoa nei​—na te tu maata roa atu i tei raveia i mua ana i te tuatua enua o te tangata nei. Te kapiti ra te reira i te akakitekiteanga ki te au tangata ravarai i te Patireia o te Atua tei akanooia i teianei i raro ake i tana Ariki i akataoonga ra, koia a Iesu Mesia. (Mataio 6:10; Angaanga 1:8) Te manako ra ainei koe i te angaanga akakitekite aere i te Ariki e tona Patireia ei taoonga oko maata? Ko Iesu Mesia, nana ra i akamata i te arataki i te tutu aere anga i te nuti meitaki o te reira Patireia, kua ariki tikai aia i te reira tu, e kua akanoo i te akatauanga.​—Mataio 4:17; 6:19-21.

Akakakaraanga i te Mataara no te Akaupokotu Anga

4. Kia tau ki ta 2 Korinetia 2:14 ra, akapeea ta te Atua aratakianga i tona au tavini i te enua nei i teianei, e te taiku ra ta Paulo au tuatua ki teea ravenga i taito ra?

⁴ Eaa te tavini anga i te Atua i tau ei ei apinga akaperepereia? Ko tetai tumu no te mea noatu i teianei ko te aronga te tavini ra ia Iehova e turanga marekaia to ratou i te riro anga na te Atua e arataki ki roto i te upokotu anga meitaki. Kia tau ki te New International Version, te karanga ra ia 2 Korinetia 2:14 e: “E akameitaki i te Atua, ko tei arataki tamou ia tatou i te aerenga upokotu i te Mesia ra e na roto ia tatou te akatotoa anga i te aunga kakara o te kite iaia [“te akariro kia totoa to tatou kite iaia takapini te ao katoa mei te akakakara meitaki rai!” Phillips].” I te akara anga ko te reira au tuatua a te apotetoro ko Paulo te taiku ra i tetai ravenga taito no te au aerenga upokotu ra.a

5, 6. (a) Eaa tei raveia i te tuatau o te aerenga upokotu o Roma i taito ra, e te aite anga o te aunga reka ra ki tetai papaki? (e) Eaa te aite anga i te pae vaerua o te akatutu anga ia 2 Korinetia 2:14-16?

⁵ I te tuatau o te kavamani ripapuriki o Roma ra, ko tetai akangateitei anga maata a te Pupu Maani Ture kua akatika kia akonoia e te rangatira tei autu ra, te aerenga upokotu maata te moni akapouia. Kua aere marie atu te reira aerenga na te Via Triumphalis e kake atu na te mataara mingi aere e tae atu ei ki te iero o Iupita i te take o te Maunga Capitoline. Te ui ariki, te aronga mana, e te ui rangatira tei akatuikaaia i te tamaki, ma ta ratou tamariki e to ratou au tavini, kua aratakiia ma te tapekaanga vivi, e putuputu te aere ra kare e kakau, ei taakaaka ia ratou kia akama.

⁶ I te na roto atu anga te aerenga i te oire o Roma ra, kua titiri te au tangata i te au tiare ki mua i te kariota o tei autu ra, e kua tutungi ei akakakara i te reira mataara. Na teia aunga akakakara i akakite mai i te ngateitei e pera katoa te oraanga maata atu te tinamou no te au vaeau tei autu ra. Inara kua akakite mai te reira i te mate no te au tuikaa kare e rauka kia akakoreia ta ratou apa ko ratou te ka tamateia i te openga o te aerenga. Na teia e akamarama mai i te aite anga i te pae vaerua no ta Paulo akatutu anga ia 2 Korinetia 2:14-16. Te akakite maira te reira tutu ia Paulo e tona au taeake Kerititiano ei au tangata akamori anake i te Atua, “i te Mesia,” te aru katoa ra i to te Atua pupu autu ra e Nana i arataki i taua aerenga upokotu maata ra na te mataara tei akakakaraia ra.

Aunga Kakara no te Ora me kare te Aunga no te Mate

7, 8. (a) Akapeea ta te au Kite o Iehova ra akatotoaanga i te aunga reka o te kite i te Atua? (e) I ta te au Kite akatotoaanga i te aunga kakara akatutuia maira, eaa te manako o te aronga te akaoraia ra? (ng) Eaa te manako o te aronga te mate atura?

⁷ Na te akatotoaanga ki te au ngai ravarai i te au tuatua mou no te Puka Tapu no runga i te Patireia o te Atua i raro ake i te Mesia ra, te akatotoa ra te au Kite o Iehova, te akakite ra, e te akamarama ra i te au ngai katoatoa i te aunga reka i te kite i te Atua aroa na tana tuatua mou ra i tatara mai ia ratou mei roto i te akonoanga pikikaa. Te aere upokotu ra ratou i te angaanga na Iehova. Te aite ra ta ratou oronga anga ei au Kite nona e no tana Ariki katoa oki mei te akakakara akamareka ra ia Iehova. No reira, ka manako ariki tatou i te aite anga o ta te apotetoro i tuatua ra: “E aunga kakara tatou ki te Atua i te Mesia i rotopu i te aronga te ka akaoraia e i rotopu i te aronga te mate atura; ki teia aronga o muri nei e aunga no te mate mai ki te mate ra, ki te aronga mua ra e aunga no te ora mai ki te ora [“tetai aunga kakara puapinga te ka apai mai i te ora,” The New English Bible; “te aunga kakara oraora no te ora uaorai,” Phillips].”​—2 Korinetia 2:15, 16, NW.

⁸ Ka kite rai te aronga mei te mamoe rai te tu i te reka o te kite ia Iehova tei akatotoaia e tona au Kite. Kia ratou e aunga ora meitaki e te oraanga te angaanga ei kite, e ora anga, e tuatua mou oronga ora mai. Te akameitaki ra ratou kia Iehova e tana Ariki, te kapiti atura ratou ki ta raua aerenga upokotu, e kua kapiki ma te reo maata: “No to tatou Atua te ora, tei noo ki rungao i te terono, e no te Punua-mamoe.” (Apokalupo 7:10) Te uti ra ratou i te aʼo no te tuatua mou o te Patireia, ei aunga kakara akapumaana no te oraanga te ka taki atu ki te ora. Inara kua akaariu ke a Satani e tana au temoni i te mana ongi o te aronga te mou ra ki te akonoanga pikikaa, no reira kua mou ratou i to ratou iu e kua kopae e te aviri i te tuatua mou. Ki “te aronga te mate atura,” te akatotoa ra te tuatua mou e te aronga apai tiratiratu i te reira, i te aunga mate te ka taki atu ki te mate. Me kare mei ta te New International Version i tuatua ra: “Ki tetai e aunga tatou no te mate.” Te uriia maira te reira e te Phillips e: “Ki te aronga o muri nei te aite ra te reira ki te aunga mate no te akapouanga.”

9. Eaa ta Paulo i ui maira i teianei, e akapeea koe me pau, e no teaa ra?

⁹ “E koai oki tei tau no teia au mea nei?” ta te apotetoro ia i ui i reira. (2 Korinetia 2:16, NW) Koia oki, “koai te ka tau no te angaanga mei teianei?” (The Jerusalem Bible) “E no teia tu angaanga koai tei tau?” (Weymouth) Te pauanga no te Tuatua Tapu mai: ko te au Kite o Iehova! No teaa ra? No te mea ko te aronga akatapu anake ia tei tiratiratu, tei ngakau tae, e kare e kimi i te meitaki nona kare e noinoi i te apinga e ko ratou tei akakite i te tuatua mou, ma te taka meitaki e kare e vare i te akonoanga pikikaa, ko ratou tei tau no teia angaanga akatotoaanga i te aunga kakara no te kite i te Atua ra.​—Kolosa 1:3-6, 13; 2 Timoteo 2:15.

10. Eaa ra ka kore ei e tau te au orometua no te rave i te akatotoaanga i te aunga kakara no te kite i te Atua ra?

¹⁰ Kare e tau te au orometua o Kerititome, te kimi ra i te turanga meitaki ma to teianei ao, kare katoa ratou e tika no teia angaanga noinoi kore. No teaa ra? No te mea kare e rauka ia ratou tei umuumuia ra e ta Paulo i tuatua maira: “Kare matou i te aronga okooko aere i te tuatua a te Atua mei tetai papaki e manganui, mari ra no te ngakau tae, ae, na te Atua i tono mai, i raro ake i to te Atua ra manako, kapiti katoa ma te Mesia, ta matou ia e tuatua nei.” (2 Korinetia 2:17, NW) Me kare mei ta te New International Version e tuatua ra: “Kare mei te aronga e manganui ra, kare matou e okooko i te tuatua a te Atua ei akaputu moni. Kare rava ia, i roto i te Mesia te tuatua nei matou i mua i te aroaro o te Atua ma te ngakau tae, mei te au tangata rai tei tonokia mai e te Atua ra.”

11, 12. (a) Eaa te au Kite i kore ei i “te aronga okooko i te tuatua a te Atua” no te mea te rave ra i te moni tauturu? (e) Ei tuke anga ki te manako iroia o te akonoanga Kerititiano tei okoia maira e te aronga e manganui, eaa ta te au Kite o Iehova e oronga ra?

¹¹ Na te Atua ra i tono mai i te au Kite o Iehova, e te rave ra ratou i ta ratou angaanga akakitekite aere i raro ake i to te Atua manako. Ia ratou e oronga ra ki te au peretana tei inangaro i te au puka puapinga maata e etai katoa au puka te akataka ra i te Tuatua a te Atua e te rave ra i te au moni tauturu oronga uaia mai no te angaanga tutu aere i te Patireia kako rava ake te ao katoa, kare te reira i te ravenga okooko me kare iro anga i te Tuatua a te Atua ra. Ko te tika, ko te reira au moni tauturu e tauturu ua i te akatotoaanga i te kite i te Atua ki etai katoa atura.

¹² E manganui roa atu i teia tuatau, te oko kite ra me kare kite kore ua ra i tei iroia e e akonoanga Kerititiano, no te mea te tau ra no to ratou anoano noinoi apinga e kare to ratou tu oraanga e piritiaia. Te irinaki ra ratou e te ariki ra te Atua ia ratou no ratou i tuatua e te inangaro ra to ratou ngakau iaia. Inara, kia akakiteia atu e te patoi ra te Tuatua a te Atua i ta ratou i irinaki e to ratou tu akono, kua akamingi ratou i te au Tuatua Tapu ei akateitei i to ratou uaorai manako ki runga ake i te akamaramaanga a te Puka Tapu ra. (Mataio 15:8, 9; 2 Petero 3:16) Inara ko te au Kite o Iehova te oronga ra i te tuatua mou ma e te iro koreia no te Puka Tapu mai, na te reira i akatupu i te aunga reka ta te Atua ka ariki e pera katoa te aronga akamori mou iaia ra. Na reira ta ratou akakore atu anga i te au ikuiku anga katoatoa a te au akonoanga atua e te au arairai anga kia kore te kite mou i te Atua ra.

13. Koai ma, i te pae atu i te au Kerititiano akatainuia ra, tei roto katoa i to te Atua ra aerenga upokotu, e eaa ta ratou e rave ra i te au ngai ravarai ta ratou e aere ra?

¹³ E tika tikai, ko te kapiti anga ki roto i te aerenga upokotu a te Atua ma te Mesia katoa e rave anga aite koreia te rekarekaia kare no te au Kerititiano akatainuia anake ua mari ra no te “urupu maata” katoa oki o te au mamoe ke atu ra i teianei, no te mea kua vaitata to te Patireia upokotu anga. (Apokalupo 7:4, 9; Ioane 10:16) Ia tatou e tapapa atu nei i etai atu upokotu anga o to tatou Ariki te akavi aere ra, ka akatotoa tatou i te kite i te Atua tei oronga ora maira, mei te kakara rai, i te au ngai ravarai ta tatou ka aere, me kare mei te akakakara oko maata ra, ki te aronga katoa te umuumu ra to ratou au ngakau i te tuatua mou e te tuatua tika. Mei teaa ra te meitaki te reira na te aronga tau no teia angaanga takake!​—Ioane 17:3; Kolosa 3:16, 17.

Akamanaia ei Au Tangata Kakara

14. Eaa ra i kore ei e anoanoia tetai pepa akamana mei te tangata mai no te aronga te akatotoa ra i te aunga kakara o te kite i te Atua ra?

¹⁴ Inara te anoanoia ra ainei tetai pepa akakite me kare akatika na te tangata nei, no te aronga akatotoa aere i te aunga kakara o te kite i te Atua e tona Patireia? Kare! Kua oti ke ana tatou i te akaungaia, me kare akataoongaia, ei au Kite no Tei Teitei i te ao katoa e pini ua ake. No reira, auraka tatou e ekoko i te aere atu ki vao e akatotoa aere i te aunga kakara o te nuti meitaki o te Patireia o te Atua. E tamou i te manako e ko Iehova te arataki nei ia tatou. I rave a Iesu i tana angaanga orometua ma te akakoromaki i te “tu akakino a te aronga rave ara.” (Ebera 12:3) Inara, ko te tataanga i ta Iesu angaanga tutu aere, te kitea ra i te Puka Tapu, te vai mou ra, e te akakite ra tana angaanga tutu aere i te akameitaki anga nona e te turu ra i te tika e e orometua mou aia no te Atua ko Iehova.

15. Akapeea ta te apotetoro ko Paulo akakite anga e kare te au Kerititiano mou e anoano i te “reta no te akatika anga”?

¹⁵ Kua aravei te apotetoro ko Paulo i te akaaoanga mei te reira te tu i tona tuatau ra, na te akakiteanga i teia taumaro anga: “E oki ainei e akameitaki akaou matou ia matou uaorai? e ei leta akameitaki aina ta matou ia matou uaorai ia kotou na, mei ta tetai papaki ra, e tau ei, e te leta akameitaki ia matou no ko na mai ia kotou na? Ko kotou oki ta matou leta, i tataia i roto i to matou ngakau, kua kitea e kua tatauia e te tangata katoa. Kua akakite puia oki kotou e, ko te leta ïa a te Mesia i angaia e matou, kare ra i tataia i te inika, na te Vaerua ra o te Atua ora ra; kare ra i runga i te papa toka, i runga ra i te papa tangata ra i te ngakau.”​—2 Korinetia 3:1-3.

16. Eaa te tu reta ta te au Kite o Iehova e oronga ra ei akakite papu i te tika e ko ta ratou angaanga tutu aere no ko mai i te Atua ra?

¹⁶ Kare te aronga mana o teianei ao e akatika i to tatou taoonga ei Kite no Iehova. Inara e tuku na ta tatou angaanga akatotoa aere i te aunga kakara o te kite ia Iehova e akakite papu i te reira tika! Kare teia angaanga e rauka kia akakoreia, noatu rai kare tetai papaki tangata e tatau i teia reta akapapu i ta tatou angaanga tutu aere. Te oronga ra te au orometua i ta ratou au pepa no te akatikaanga no ko mai i te au pupu tutara ra. Inara, e aenga pepa ua te reira, e tuatua na te tangata ua. Kapiti atu ta te au Kite o Iehova taikuanga no te Tuatua a te Atua, te tu ra ratou ei akakite anga tika e kopapa e te toto. Ko te urupu maata o te au mamoe ke atu tei itaeia e te nuti meitaki o te Patireia kua akaputu katoaia ki te pae katau o te Ariki a Iehova ra. (Mataio 25:33, 34) Pouroa ratou e reta no te akatika anga ia matou, e reta ta matou ta te au Kite o Iehova e rave ra i roto i to matou ngakau e to matou manako katoa oki e ka rauka kia akakitea ma te manako papu. Ko te aronga te ka mou i te turanga no to te Atua ra ngateitei i te ao katoa e pini ua ake e ka rave kapiti i te angaanga a te Atua ma te au Kite o Iehova ra e reta ia ratou uaorai no te akatika anga te ka kore e tika kia kore e tatauia e kia kitea oki e te tangata katoatoa.

17. Akapeea ta tatou “reta no te Mesia” i te tata anga, e eaa a Paulo i karangai e kua taraiia ki runga i te papa ngakau?

¹⁷ Tera ra, ka akariri teia i te aronga o te akonoanga pikikaa e ka vareae me tatau ratou. Kareka ra, ko te urupu maata o te mamoe ke atu te tupu nei kia maata e reta akatika anga no ko mai ia Iesu Mesia ra, koia te Tiaki Mamoe Meitaki, tei taangaanga ra i te au Kite ravarai a Iehova i tana angaanga angai anga mamoe. Ko tatou te peni, no te tata i teia reta, me kare te taoonga tangata, tana e taangaanga nei no te tata i teia reta. Kare teia reta i tataia i te inika te ka rauka i te takore atu, mari ra kua taraiia i te mana rave angaanga, me kare vaerua, o te Atua ra, te angaanga ra i roto ia tatou nei. Kare mei te tuatau ia Mose ra i te tata anga i te ture o te au Akauenga e Tai Ngauru ra e te rima o te Atua ra ki runga i nga papa toka e rua. Te tataia ra ta matou reta ki runga i te papa ngakau o te tangata, i te mea te taui ra ta matou angaanga i te pae vaerua i te manako e te ngakau o te aronga tei rauka ia ratou te nuti meitaki aunga kakara ra.

18. Eaa te tupu anga te akariro ra i tei rauka iaia te nuti meitaki e ei reta akatika anga?

¹⁸ Kua akatupu ta tatou angaanga i te Tuatua a te Atua, i te manako ki runga i te aronga tei mou ariki i te nuti meitaki e kua akatupu katoa i te au taui anga meitaki tikai. Kua akapapu ta ratou iki anga kia tavini atu i te Atua e kare i te turanga tupu poitirere ua no etai manako ngakau tei akakeuia e tetai tangata evangeria tei manako ngakau. Kareka ra, te oronga maira i tetai taui anga tamou i to ratou oraanga tei akatumuia ki rungao i te tuatua mou areare o te Puka Tapu ra. No te inangaro i te Atua mou, koia a Iehova, na te reira i akakeu ia ratou kia ‘kiriti i to ratou tangata taito i tei kino i te anoano pikikaa e kia aoao i te tangata ou ra,’ te akaari maira i “ta te Vaerua e akatupu.” (Ephesia 4:20-24; Galatia 5:22, 23) No reira, na tei tupu mai, e akariro ia ratou ei reta akatika anga. E taka meitaki ua atu tana tuatua i ta tetai ua atu reta i tataia i to tatou rima me kare na tetai ua atu akaaerenga akara mataia e rauka kia tuku mai kia tatou nei.

19. Akapeea ta Paulo akataka anga i te tika no te “au orometua o te koreromotu ou ra,” e eaa te tupu anga no ta ratou angaanga ki runga i te urupu maata ra?

¹⁹ Kua tata ua mai a Paulo ia 2 Korinetia 3:4-6 e: “Ko te tu ïa o to matou manako i te Atua i rauka i te Mesia ra. Kare ra mei te mea e, e tau ia matou uaorai kia manako e, e tika tetai mea ngiti ia matou anake uaorai; no ko maira i te Atua ra to matou tika; Ko tei akatau katoa ia matou [ei orometua] i te koreromotu ou nei.” Noatu rai e ko te aronga anake o te toenga o tei akatainuia ra e “orometua i te koreromotu ou nei,” kua akatuke ra ta ratou angaanga i te urupu maata o te au mamoe ke atu ra, e ka akatuke e tini ua atu te aronga o te mamoe ke atu te vaira kia akaputuia mai. Ko teia te manako papu te mou ra te au Kite o Iehova ravarai na roto ia Iesu Mesia i te Atua ia Iehova ra. Te akamaroiroi akameitaki ra te toenga i te urupu maata o te mamoe ke atu kia rave ma te ngakau katoa ra i te angaanga ‘tataanga reta’ ta Iesu Mesia i totou maira ia Mataio 24:14 e Mataio 28:19, 20.

20. (a) Eaa te akakiteia maira i te Yearbook no runga i te aronga te akatotoa ra i te aunga kakara o te kite i te Atua ra? (e) Eaa te ka rauka ia tatou katoatoa kia tuatua no runga i to tatou tika anga no te tataanga reta no te angaanga tutu aere ra?

²⁰ Ko ta ratou ia i rave ana, mei te kitea ra i te tataanga 1990 Yearbook (Puka Mataiti 1990) i akakiteia maira e te akatotoa ra te au Kite o Iehova i te aunga kakara o te kite i te Atua ra i e 212 au enua. Kua tere atu i te 3,787,000 te aronga tutu aere, e i teia mataiti anake i topa kua rave ratou e vaitata e 835,000,000 ora i te tutu aere anga i te nuti meitaki o te Patireia. I te Oroa Aiai a te Atu i te mataiti i topa e, 9,479,064 te aronga i akono ana. Ka tau katoa ra te toenga o tei akatainuia ra e pera katoa te au mema o te urupu maata o te au mamoe ke atu ra kia karanga: “No ko maira i te Atua ra to matou tika.” Me kare mei ta te The Jerusalem Bible i tuatua ra: “No ko mai i te Atua ra to matou tika ravarai.”

21. Eaa te mea tau na tatou ravarai kia rave, e no teaa ra?

²¹ No reira, e akatotoa i te aunga reka, te aunga kakara o te kite i te Atua i te au ngai ravarai no te oronga anga i te ora! E akariro kia teiaa te reva o te tuanga o toou putuputuanga i te aunga kakara o te kite ia Iehova. I reira, ei Rangatira upokotu i te tutara anga, ka arataki aia ia koe i tona aerenga autu i te uapou anga tona au Kite katoatoa i te angaanga i teia tuatau i te tutu aere anga!

[Au Tataanga Rikiriki i Raro]

Akapeea Koe Me Pau?

◻ Eaa te akatutu anga ta Paulo i akono ia 2 Korinetia 2:​14-16?

◻ Eaa te tupu anga ki etai ke ra no te akatotoa anga i te aunga kakara o te kite i te Atua ra?

◻ Koai ma anake ua tei tika no teia angaanga, e no teaa ra?

◻ Eaa ra i kore ei e anoanoia te reta akatika anga no te au tangata akakakara aere no ta ratou angaanga e rave ra?