Te Umuumuia ra e te Au Tangata te Kite i te Atua
“Ei reira koe e kite ei i te mataku ia Iehova, e e rauka ia koe te kite i te Atua.”—MASELI 2:5.
1. Eaa i tau ei kia tuatuaia e e akapapaanga tu-Atua karape meitaki maata te ngakau tangata?
TE PANAPANA nei te au ngakau o etai 5,600,000,000 au tangata i runga i te enua nei i teianei tikai. I te au ra ravarai, te panapana ra toou uaorai ngakau e 100,000 taime e te pamu ra i etai 7,600 rita toto na roto i toou kopapa e 100,000 kiro mita akatereanga ngakau e te ara toto. Kare tetai uaua e angaanga maata atu i ta teia akapapaanga tu-Atua karape meitaki maata.
2. Akapeea koe me akataka i te ngakau akatutuia ra?
2 E 5,600,000,000 katoa oki au ngakau akatutuia te rave angaanga nei i runga i te enua. I roto i te ngakau akatutuia te vaira to tatou au manako ngakau, to tatou akakeu anga, e to tatou au anoano. Ko te noo anga ia o to tatou manako, to tatou kite, to tatou anoano oki. Ka rauka kia akaparau me kare kia taakaaka te ngakau akatutuia ra, kia maromaroa me kare kia rekareka, kia poiri me kare kia marama.—Nehemia 2:2; Maseli 16:5; Mataio 11:29; Angaanga 14:17; 2 Korinetia 4:6; Ephesia 1:16-18.
3, 4. Akapeea te itae anga i te au ngakau ma te tuatua meitaki ra?
3 Ka rauka i te Atua ra te tatau i te ngakau. Te tuatua ra Maseli 17:3: “Ko te pani timata to te ario, e te umu to te auro: ko Iehova ra tei timata i te ngakau.” Inara, kare a Iehova e tatau ua i te au ngakau tataki tai e te tuku oki i te akavaanga, te taangaanga ra a Iehova i tona Au Kite kia itae atu i te au ngakau tangata ma te tuatua meitaki. Te rotai ra teia ma te au tuatua a te apotetoro ko Paulo e: “‘Ko te kapiki i te ingoa o te Atu ra, e ora ïa.’ Eaa ua ra te tangata e tikaʼi kia kapiki atu kiaia i tei kore i akarongoia e ratou ra? e eaa oki ratou e kite ei i te akakite kore? Eaa oki ratou e tikaʼi kia akakite kia kore ratou e ungaia? koia oki tei tataia ra e, ‘Ko te manea o te vaevae o te aronga i apai mai i te tuatua reka o te au, ko te apai mai i te evangelia o te meitaki ra e!’”—Roma 10:13-15.
4 Kua mareka a Iehova i te tono anga i tona Au Kite ki te au openga o te enua kia “apai mai i te evangelia o te meitaki ra” e kia kitea te aronga e ngakau ariki to ratou. Kua tae to tatou numero i teianei e tere atu i te 5,000,000—e tuanga e 1 Kite ki etai 1,200 au tangata i te enua nei. Kare i te mea ngoie ua te itaeanga ki te aronga e au pirioni ua atu o te enua nei. Inara ko te Atua te arataki ra i teia angaanga na roto ia Iesu Karaiti e te akavaitata maira i te aronga ngakau tiratiratu. No reira, te akapapuia ra te totou tataia ia Isaia 60:22 e tika ia: “E riro te mea ngiti okotai ei tausani; e ko tei mea ngiti poepoe ra, e riro ïa ei enua maroiroi: naku, na Iehova, e akarapurapu i te reira i tona tuatau.”
5. Eaa te kite, e eaa te ka tau kia tuatuaia no te pakari o teianei ao?
5 Ko teia taua tuatau ra, e okotai apinga te taka meitaki ra—te umuumuia ra te kite no te aronga e au pirioni ua atu i te enua nei. Te akatumu anga, ko te kite e matau anga ia i te au tika tei rauka mai na te tupu anga, te akara anga, me kare te apii anga. E maata te kite ta teianei ao i akaputu ana. Kua tere ki mua i te pae o te apaianga apinga, te rapakau anga, e te komunikeiti anga. Inara ko te kite ainei o teianei ao te umuumu tikaia ra no te au tangata? Kare ia! Te tupu ua atura te tamaki anga, te takinga kino, te maki mate, e te mate ki te au tangata. E putuputu te pakari o teianei ao i te riro mei te one i roto i tetai uriia i te metepara te uri aere ra.
6. No runga i te toto, akapeea ra me akaaite ia to te Atua ra kite ma te pakari o teianei ao?
6 Ei akatutu anga: I te rua anere mataiti kua topa, e mea matauia te akataeanga toto tei manakoia ei rapakau anga. Kua akatae putuputuia te toto o George Washington, koia te peretiteni mua o te Unaite Teite, i te au ora openga o tona oraanga. I tetai tuanga kua tuatua aia: “E tuku uaia au kia aere marie atu; kare e roa toku ora anga.” Kua tika tana, no te mea kua mate aia i taua ra rai—ia Titema 14, 1799. Kare ko te akataeanga toto, i teia tuatau te akaketaketaia ra te pamuanga toto ki roto i te kopapa tangata. Kua akateiaaia teia nga ravenga e rua ma te au manamanata akatupu mai i te mate. Inara, mei mua mai rai, kua tuatua te Tuatua a te Atua e: “Auraka kotou e kai . . . te toto.” (Angaanga 15:29) E tika anake te kite i te Atua ra, e tau kia irinakiia, no teia tuatau katoa oki.
7. Akapeea te kite Tuatua Tapu tikai me akaaite ia ma te pakari o teianei ao i te pae no te akonoanga tamariki?
7 E akamanako katoa i tetai atu akaraanga no te tau kore kia irinaki i te pakari o teianei ao. No etai mataiti roa kua akakite te au tangata no te turanga o te manako kia akatika ua ki ta te tamariki i te akonoanga ia ratou, inara i muri akera kua akakite tetai o ratou e e tarevake te reira. Kua tuatua te Philological Association Tiamani i tetai tuatau e ko te akatika ua “e tumu ia no te au manamanata te tupu nei kia tatou ma te aronga ou ra.” Penei ka ngaueue ua te pakari o teianei ao mei te mea rai e te oparaia ra e te matangi, inara ko te kite tau tikai no te Tuatua Tapu kare e ngaueue. Te oronga maira te Puka Tapu i te ako tau no te akono anga i te tamariki. “E ako atu koe i to tamaiti, e mareka koe iaia i reira: koia rai ïa, e rekareka to ngakau iaia,” ta Maseli 29:17 ia i tuatua. Ka tau te reira ako kia akonoia ma te aroa, no te mea kua tata a Paulo: “Ko kotou oki te aronga metua, auraka e akariri atu i ta kotou au tamariki ra: e apii ra ia ratou kia pakari ma te ako a te Atu ra.”—Ephesia 6:4.
“Te Kite i te Atua”
8, 9. Akapeea koe me akataka i ta Maseli 2:1-6 tuatua no runga i te kite te umuumu tikaia ra no te au tangata?
8 Noatu rai e tangata kite apiiia a Paulo, kua tuatua aia: “Te manako ra tetai tangata i roto ia kotou na e, e tangata pakari aia i teianei ao, kia riro aia ei neneva, kia pakari aia. Te pakari oki o teianei ao, e mea neneva ia i te Atua.” (1 Korinetia 3:18, 19) Na te Atua anake e raukaʼi te oronga mai i te kite te anoano tikaia ra no te tangata nei. No runga i te reira, te tuatua ra a Maseli 2:1-6: “E taku tamaiti, kia āriki mai koe i taku nei tuatua, e kia vaio marie i taku au akauenga ia koe; Kia ariu mai koe i to taringa ki te pakari, e kia kimi marie to ngakau i te kite ra; Kia kapiki nui koe i te kite, e kia akateitei i to reo kia rauka te kite ra; Kia kimi pu tikai koe iaia mei te ario ra, e kia makitoro marie koe iaia, mei te apinga uunaia ra: Ei reira koe e kite ei i te mataku ia Iehova, e e rauka ia koe te kite i te Atua. Ko Iehova oki te oronga mai i te pakari: no roto i tona vaa te kite e te karape.”
9 Ko te aronga te akakeuia ra e te ngakau meitaki ka akamanako i te pakari na te rave tika anga i te kite tei orongaia mai e te Atua ra. Ka ariu atu to ratou ngakau ki te karape, na te paunu matakiteanga i te au tika ta ratou e apii ra. Ko te tika, te kapiki nui ra ratou i te kite, me kare te karape kia kite e akapeea te piri anga o etai au tu ki tetai tumu ke atu ra. Ka angaanga te aronga ngakau tika mei te mea rai e te ko ra ratou no te ario e te kimi ra no te apinga uunaia. Inara eaa te apinga maata te kiteia ra e te aronga ma te ngakau ariki meitaki ra? Ko “te kite i te Atua” ia. Eaa te reira? Ei akataka anga mama ua, ko te kite ia te kiteia ra i roto i te Tuatua a te Atua, koia te Puka Tapu.
10. Eaa ta tatou ka tau kia rave kia rekarekaʼi i te ora anga meitaki i te pae vaerua?
10 E meitaki te kite i te Atua, e ngaueue kore, ei oronga mai i te ora. Ka akatupu i te ora meitaki i te pae vaerua. Kua raurau a Paulo ia Timoteo: “E tapu meitaki i te akonoanga tuatua tikai taau i kite iaku nei ra, ma te akarongo e te anoano i te Mesia ra ia Iesu.” (2 Timoteo 1:13) E akonoanga tuatua to tetai reo. Mei te reira katoa oki, te “reo ma” o te tuatua mou Tuatua Tapu te vaira “te akonoanga tuatua tikai,” tei akatumu maataia ki runga i te tumu o te Puka Tapu i te akatika anga i te ngateitei o Iehova na roto i te Patireia. (Zephania 3:9) Ka tau tatou kia tapu meitaki i te akonoanga tuatua tikai ki roto i te manako e te ngakau. Me ka kopae ke tatou i te maki ngakau akatutuia ra e ka vai ei ma te ora meitaki i te pae vaerua, ka tau tatou kia akono i te Puka Tapu i te oraanga e ka taangaanga katoaʼi i te au apinga vaerua orongaia mai e te Atua ra na roto i “te tavini akono meitaki e te pakari.” (Mataio 24:45-47; Tito 2:2) Kia maara tamou tatou e no te ora meitaki i te pae vaerua, ka umuumu tatou i te kite i te Atua ra.
11. Eaa ra etai tumu i umuumuiaʼi e te au tangata te kite i te Atua ra?
11 E akamanako ana i etai atu tumu i umuumuiaʼi te kite i te Atua e te aronga e au pirioni ua atu o te enua nei. Te kite ra ainei ratou katoatoa i akapeea te akamata mai anga o te enua e te au tangata katoa oki? Kare, kare ratou i kite. Kua kite ainei te au tangata ravarai i te Atua mou e tana Tamaiti? Te matakite ra ainei te au tangata ravarai i te au maroanga ta Satani i akatu mai no runga i te ngateitei tu-Atua e te tiratiratu o te tangata? Kare akaou. E mea matauia ainei e te au tangata eaa tatou i ruaine ei e i mate ei? Pera katoa no teia ka tuatua tatou e kare. Te kite ra ainei to te pa enua ravarai e te tutara nei te Patireia o te Atua i teianei e te noo nei tatou i te tuatau openga? Te matakite ra ainei ratou i te au nuku vaerua kikino? Tei te au tangata ravarai ainei te kite tau kia irinakiia no runga i te tumu e akapeea e raukaʼi tetai oraanga ngutuare tangata mataora? Te kite ra ainei te au urupu e ko te oraanga rekareka i Parataito te akakoro anga a Tei Anga mai ia tatou nei no te au tangata akarongo? No teia au uianga katoa oki ko te pauanga e kare ia. Te taka meitaki ra, i reira, te umuumuia ra te kite i te Atua e te au tangata nei.
12. Akapeea e raukaʼi ia tatou kia akamori i te Atua “ma te vaerua e te tuatua-mou”?
12 Te umuumu katoaia ra te kite i te Atua e te au tangata no ta Iesu i tuatua i tana pure anga i te po openga tona oraanga i te enua nei. Kua akakeu oonuia tana au apotetoro i te akarongo anga i tana tuatua e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Te akonoanga i taua kite ra ko te mataara anake ia no te akamori i te Atua te ka arikiia. “E vaerua te Atua, e te aronga e akamori iaia ra, kia akamori ma te vaerua e te tuatua-mou ra e tikaʼi,” ta Iesu i tuatua. (Ioane 4:24) Te akamori ra tatou i te Atua “ma te vaerua” me ka akakeuia tatou e te ngakau ki i te akarongo e te aroa. Akapeea tatou me akamori iaia ‘ma te tuatua-mou’? Na te apiianga i tana Tuatua e te akamorianga iaia kia tau ki tana tuatua mou akakiteia maira—koia “te kite i te Atua” ra.
13. Eaa te tupu anga tei tataia ra ia Angaanga 16:25-34, e eaa ta tatou ka kite mei te reira maira?
13 E au tauatini ua atu te akamata ra i te akamori ia Iehova i te au mataiti tataki tai. Inara, ka anoanoia ainei kia akonoia te au apii Puka Tapu ma te aronga inangaro no tetai tuatau roa, me kare ka rauka ainei kia viviki atu te akapapa anga i te aronga ngakau tiratiratu no te papetito anga? E akamanako ana i tei tupu ki te tiaki i te are tapekaanga e tona ngutuare tangata katoa tei taikuia maira ia Angaanga 16:25-34. Kua tapekaia a Paulo raua ko Sila i Philipi, inara i te turuaipo, kua akatueraia te au pa o te are tapekaanga e tetai ngaruerue anga maata. I te manakoanga e kua aere ke atu te aronga tapekaia ra ki vao e ka akautungaia aia, te vaitata ra te tiaki i te are tapekaanga i te tamate iaia uaorai kua karanga atura Paulo kiaia e tei reira katoa ratou ra. Kua “tuatua maira [a Paulo raua ko Sila] kiaia, e te aronga katoa i roto i tona are, i te tuatua a te Atu.” Ko taua tiaki i te are tapekaanga ra e tona ngutuare katoa e au Kenitara kare o ratou kite apiiia i te au Tuatua Tapu ra. Inara, i taua po okotai ra, kua riro ratou ei aronga akarongo. E tere atu oki i te reira, “e bapetizoia iora aia e tona katoa ra i reira.” E au turanga tuke roa te reira, inara ko te aronga ou kua apiiia i te au tuatua mou tumu anga e kua apii i etai atu au apinga i te au uipaanga putuputuanga. E mea tau rai kia rauka te rave i tetai apinga mei te reira te tu i teia tuatau nei.
Te Maata Nei te Mou!
14. Eaa ra i umuumuiaʼi kia maata atu te numero o te au apii Puka Tapu meitaki kia akonoia i roto i tetai tuatau poto ua?
14 E mea meitaki ra me ka rauka i te Au Kite o Iehova i te akono kia maata atu te numero o te au apii Puka Tapu meitaki i roto i tetai tuatau poto mai. Te vaira tetai umuumu anga tikai no teia. Ei akatauanga, i te au enua i te Itinga Ra i Europa, ka tukuia te au tangata ki runga i tetai papaanga no te tatarianga apii Puka Tapu. Ko te reira katoa te tu i etai atu ngai. I tetai oire i te Repapuriki Tominika no te maata roa te au patianga ki nga Kite e rima kare i rauka ia ratou i te akono i te apiianga katoatoa. Eaa ta ratou i rave? Kua akamaroiroi atu ratou i te aronga inangaro kia aere mai ki te au uipaanga i te Are Uipaanga Patireia e kia tukuia ki runga i tetai papaanga no te apii Puka Tapu. Te vai ra taua turanga rai i te au ngai e manganui takapini i teianei ao.
15, 16. Eaa te orongaia maira ei akatotoa viviki i te kite i te Atua ra, e eaa etai au tika no runga i te reira?
15 Te au enua mamaata—te au kainga maata no te kokotianga—te akatueraia maira ki te au tangata o te Atua ra. Noatu rai te rave ra a Iehova koia “te Atu o te mou,” i te angaanga kia maata atu te aronga ei rave i te mou, e maata te vaira kia raveia. (Mataio 9:37, 38) No reira, ei akatotoa i te kite i te Atua kia viviki atu, te oronga maira te ‘tavini akono meitaki’ i tetai apinga te ka oronga tika mai i te akakite anga tau tikai kia rauka i te aronga apiiia i te Puka Tapu te tupu anga i te pae vaerua ma te tumu apiianga tataki tai ra. E puka ou teia te ka rauka kia akono vivikiia i te au apii Puka Tapu i te ngutuare—penei i nga marama tokoiti ua. Ka ngoie ua i te apai aere i te reira i roto i ta tatou kiri puka, ta tatou pute moni, me kare i te pute o to tatou kakau! Te mareka ra te au anere ua atu tauatini tei akaputu maira ki te au Uruoaanga Tapere o te Au Kite o Iehova i te “Aronga Akapaapaa Rekareka” i te rauka anga teia puka ou e 192 kapi tei tapaia ko Te Kite te ka Arataki ki te Ora Mutu Kore.
16 Kua teateamamaoia e te aronga tata i te au enua ke ke te materia tei akapapa meitakiia ki roto i te tu openga no te puka Kite. No reira ka tau ia no to te pa enua katoa. Inara ka roa ainei i mua ake ka orongaia mai ei teianei puka ou i roto i te au reo o te au tangata takapini i teianei ao? Kare, no te mea ka rauka ua te puka e 192 kapi i te uri vivikiia i te au puka mamaata ra. Ia Okotopa 1995, kua akatikaia e te Kumiti Tataanga o te Pupu Akaaere te uri anga i teia puka mei te reo Engarani ki roto i te tere atu i te 130 au reo.
17. Eaa etai au tumu tau ei akariro kia ngoie ua te taangaanga i te puka Kite ra?
17 Ka tau kia raukaʼi i te aronga apiiia kia viviki te tupu anga i te pae vaerua no te au tumu taka meitaki i roto i te au pene tataki tai o te puka Kite ra. Te akakite maira te puka i te au tuatua mou no te Tuatua Tapu na roto i tetai tu akamatutuanga. Kare ia e uriuri ana i te au apiianga pikikaa. No te taka meitaki o te reo e te akatupu anga tau ka akariro kia ngoie ua te taangaanga i te puka ra ei akono i te au apiianga Puka Tapu e ei tauturu i te au tangata kia mou i te kite i te Atua ra. I te pae atu i te au tuatua tapu tei tataia ra, te vaira te au irava Puka Tapu tei taiku uaia te ngai te ka rauka i tei apiiia ra te akara i te teateamamao anga no te uriuri anga manako. Penei ka tika kia tatauia te reira i te tuatau te apii ra me ka tika ia i tona taime, inara kare i te mea pakari kia apai mai i etai atu tumu ke te ka akamarama kore i te au tumu maata tikai. Kareka ra, ko te aronga te akono ra i te apii Puka Tapu ka tau kia tauta kia kite e kia oronga ki tei apiiia e eaa ta te puka e akapapu maira i roto i te au pene tataki tai ra. Te aite anga o teia e ka apii tikai te puapii na mua kia taka meitaki i roto i tona manako te au tumu maata i reira.
18. Eaa etai manako te orongaia maira no runga i te taangaanga i te puka Kite ra?
18 Akapeea e raukaʼi i te puka Te Kite te ka Arataki ki te Ora Mutu Kore kia akarapurapu i te angaanga akariro anga i te au tangata ei pipi? Ka rauka kia oti te apii i teia puka e 192 kapi nei i te tuatau poto ua, e ko te aronga “i akonoia no te ora mutu kore” penei ka tau kia rava te kite na roto i te apii anga i te reira kia rave i te akatapu anga kia Iehova e kia papetitoia. (Angaanga 13:48) No reira e taangaanga meitaki tatou i te puka Kite i ta tatou angaanga orometua. Me kua maata te aere anga o te apii i tetai atu puka a tetai tei apiiia ra i te Puka Tapu, penei e mea tika kia apii kia oti te reira. Me kare ia, te akakiteia maira kia tauiia te au apii Puka Tapu ki te puka Kite ra. I muri ake i te otianga teia puka ou, kare e akakiteia mai ana e kia apii akaou ma tei apiiia ra i te puka ke atu. Ko te aronga te ka takave i te tuatua mou ka tau kia akatupu ua atu i to ratou kite na te aereanga ki te au uipaanga a te Au Kite o Iehova ra pera katoa oki na te tatauanga i te au puka Kerititiano ke ke kia ratou uaorai.—2 Ioane 1.
19. I mua ake i te akonoanga i te au apii Puka Tapu na roto i te puka Kite ra, eaa ra ka meitaki ei kia uriuri manako i te au kapi 175 ki te 218 i roto i te puka Organized to Accomplish Our Ministry?
19 Kua tataia te puka Kite ra ma te akakoro anga ei tauturu i te tangata kia pau i te au uianga katoa ta te aronga pakari te ka uiui ma te au papuritia kare ra i papetitoia e te anoano ra kia papetitoia ei Au Kite o Iehova. No reira, i mua ake ka taui ei koe i taau au apii Puka Tapu ki teia puka ou nei, te manakoia ra e kia akapou koe i etai ora tokoiti i te uriuri manakoanga i te au uianga i te au kapi 175 ki te 218 o te puka Organized to Accomplish Our Ministry.a Ka tauturu teia ia koe kia akaketaketa i te pau anga i taua au uianga ra i te tuatau apii Puka Tapu i te puka Kite ra.
20. Eaa taau parani kia rave ma te puka Te Kite te ka Arataki ki te Ora Mutu Kore?
20 E mea tau kia akarongo atu te au tangata i te au ngai ravarai i te tuatua meitaki ra. Ae, te umuumuia ra te kite i te Atua e te au tangata katoa, e e Au Kite to Iehova ei akakite aere i te reira. I teianei e puka ou ta tatou na to tatou Metua aroa i te rangi ra i oronga mai na roto i te tavini akono meitaki e te pakari. Ka taangaanga ainei koe i te reira ei apii i te tuatua mou e kia apai mai i te akangateitei ki te ingoa tapu o Iehova ra? Ka akameitaki tikai a Iehova ia koe i taau tuku anga i te tauta anga ravarai kia oronga i te kite te ka taki atu ki te ora mutu kore ki te aronga e manganui.
[Tataanga Rikiriki i Raro]
a Neneiia e te Watchtower Bible and Tract Society of New York, Inc.
Akapeea Koe me Pau?
◻ Akapeea koe me akataka i te ngakau akatutuia ra?
◻ Eaa te kite i te Atua ra?
◻ Eaa ra i umuumuiaʼi e te au tangata te kite i te Atua ra?
◻ Eaa te puka ou te vai maira, e akapeea taau parani anga no te taangaanga i te reira?
[Tutu i te kapi 10]
E manganui te au tumu i umuumuiaʼi te kite i te Atua e te au pirioni ua atu i te ao nei