Au Tavini Mapu i te Tuatau Puka Tapu

TE AKAKITE maira te Puka Tapu i te au mapu tei rave i te angaanga na te Atua ma te tau e kua akameitaki maataia no te raveanga i te reira. Noatu e e mapu tatou, me kore ruaine e te inaina, ka rauka i teia au akaraanga Puka Tapu i te oronga mai i te akamaroiroi anga maata.

E 17 ua rai o Iosepha mataiti i tona oko angaia ei tuikaa i Aiphiti. I reira, ma te mamao mei tona ngutuare tangata e te aronga tei kite iaia, kua akaari a Iosepha i te tu akaaka e te tiratiratu. I te tauta anga te vaine a Potiphara i te meameaau ia Iosepha, kua tuatua aia: “Eaa oki au e tikaʼi kia rave i tenana kino maata, e te ara i te Atua?” Noatu i mua i te Pharao mana ra, te ariki ririnui rava atu i tona tuatau, kua kimi a Iosepha i te tuatau i te akarongo ki te Atua no te akamarama anga i te au moemoea a Pharao. Kua akameitaki maataia aia. Kua taangaangaia aia e te Atua no te akaora i te au Aiphiti e tona ngutuare tangata mei te mate e te onge e te apai mai i tona metua tane, a Iakoba, e tona ngutuare tangata ki Aiphiti.​—Genese 37:2; 39:7-9; 41:15, 16, 32.

Mose e Tetai Pae Tei Tiratiratu i te Mapu Anga

Kua apai te tamaine a Pharao ia Mose ei tama nana, inara kua rauka i to Mose metua vaine e te metua tane i te apii iaia no runga i te Atua mou. Te tuatua ra te Puka Tapu e i tona maata anga mai “i kore ei i tika ia Mose, . . . kia tapaia i te tamaiti a te tamaine a Pharao ra; E mea meitaki iaia te rave katoa i te mate i te kapiti anga i te au tangata o te Atua, i te rave i te navenave poto ua o te [ara, NW] ra.” Kua taangaanga te Atua ia Mose no te apai mai i tona iti tangata mei roto ia Aiphiti, kia ariki i te Ture i Sinai ra, e te tata i te tuanga puapinga tikai o te Puka Tapu. Noatu eaa toou mataiti, te akatupu ra ainei koe i te tauta pakari no te tavini i te Atua mei ta Mose i rave?​—Ebera 11:23-29; Exodo 2:1-10.

Te akakite maira te au Tuatua Tapu kia tatou i te “tamariki mea riki” tei kapiti atu ki te katoa anga o te iti tangata i te tatau angaia te Ture a te Atua ki to Iseraela. (Deuteronomi 31:10-13, NW) Kua tu ua mai “te aronga katoa, e kite i te tuatua kia tatauia ra . . . mei te popongi mairai e avatea ua atura” no te akarongo ki te Ture i te au ra o Nehemia. (Nehemia 8:1-8) Noatu e kare te tamariki mea riki i marama i te au mea pouroa, ka ariki ratou e kia aroa, akamori, e te akarongo i te Atua ko Iehova. Noatu eaa toou mataiti, i akarongo ana ainei koe i te au uruoaanga e te au akaputuputuanga te ngai e uriuriia ana te Tuatua na te Atua? Kua apii ainei koe i te puapinga no te akarongoanga iaia, mei te au Iseraela mapu ra i rave?

Davida, Iosia, e Ieremia

Kua iki te Atua ia Davida, te tama meangiti rava o te au tamaroa e varu, no tetai angaanga takake e kua tuatua nona: “Kua kitea e au a Davida, te tamaiti na Iese, e tangata e tau i toku ngakau, e nana e akatupu i toku au anoano katoa.” Kua iki te Atua iaia ei “tiaki” i tona iti tangata, e kua rave a Davida i te reira angaanga, i tona akaari anga i tona aroa no Iehova no te au mataiti e manganui. Kua tata aia e maata atu i te 70 au Salamo e kua riro mai ei tupuna no Iesu Mesia. Noatu e e mapu me kore e ruaine, te ariki ainei koe i to te Atua au tu e te rave ra ainei koe i te au mea tana i anoano, mei ta Davida i rave ra?​—Angaanga 13:22; Salamo 78:70, 71, NW; 1 Samuela 16:10, 11; Luka 3:23, 31.

Kua riro mai a Iosia ei ariki i tona varu mataiti anga. I te vaitata anga ki te 15, “i te vai ou anga aia ra, kua akamata aia i te kimi i te Atua o tona tupuna o Davida.” I mua ake ka 20 ei aia, kua akamata a Iosia i tetai oroanga no te patoi i te akamori anga pikikaa. I muri mai, kua akatu akaou aia i te iero e kua akaoki aia i te akamori anga ma i roto i te enua. Ka tatau tatou: “Kare akerai ratou i akapaki i te aru i te Atua o to ratou ai metua ia Iehova, e ope rava akera ona au rā.” Kare e rauka i tetai ua atu ia tatou kia riro mai ei ariki mei ia Iosia rai, mari ra ka rauka ia tatou i te tavini i te Atua e te tu ngaueue kore i te patoi i te akamori anga pikikaa, noatu eaa to tatou mataiti.​—2 Paraleipomeno 34:3, 8, 33.

Kua akakite te Atua mana katoatoa kia Ieremia: “Kare koe i angaia e au i roto i te kopu, i kite ei au ia koe; e kare koe i topa ki vao i te kopu ra, i akatakaiaʼi koe e au; kua akonoia koe e au, ei peroveta no te pa enua.” Kua patoi a Ieremia no te mea e ou rava aia kia riro mai ei peroveta: “Aue! e taku Atu e Iehova e! I na, kare au i kite i te tuatua: e tamaiti ua oki au nei.” Kua ariu atu a Iehova: “Aua koe e karanga e, E tamaiti ua au: e aere ra koe ia ratou katoa e tonokia koe e au ra; e ko te au mea katoa taku e akaue kia koe ra, ko taau ïa e tuatua.” No tetai 40 mataiti e tere atu kua rave ua a Ieremia na reira, noatu e i inangaro aia i te akaruke, kare e rauka iaia i te akamutu. Te tuatua na te Atua “riro atura ra mei te ai ka . . . kua popaniia ki roto i [tona] ra au ivi.” Kua riro e kia tuatua ua atura aia! Noatu e eaa toou mataiti, te akatupu ainei koe i tetai tu akarongo mei to Ieremia rai, te aere anga atu ki mua i te angaanga a te Atua mei tana i rave ra?​—Ieremia 1:4-8; 20:9.

Daniela, Iesu, e Timoteo

Kare ainei koe i akarongo ia Daniela. Penei tei raro ua ake aia i te 20 i tona apaina angaia ma tetai pae “tamariki” ei tuikaa ki te ngai akavaanga o te ariki o Babulonia, ko Nebukanesa mana ra. Noatu to Daniela tu mapu, kua inangaro pakari aia i te akorongo ki te Atua. Kua patoi a Daniela e tona au taeake i te akataero ia ratou uaorai ki te au kai te ka aati i te Ture a te Atua me kore tei taviiviiia e te au akonoanga etene. E tere atu i te 80 au mataiti, kare rava a Daniela i tukutuku ana iaia, te tamouanga i tona tu tiratiratu e tae ua atu ki te taime i tona tapu angaia i te pure ki te Atua, noatu e ka akatupu teia kia tiriaia aia ki te au riona. Te tamanako ainei koe i taau angaanga ki te Atua e taau au pure ei angaanga tikai? Ka tau koe kia pera.​—Daniela 1:3, 4, 8; 6:10, 16, 22.

I te 12 mataiti, kua kiteia a Iesu e noonoo ra i rotopu i te au puapii akonoanga i te iero i Ierusalema, “te akarongo atura e te ui atura kia ratou. Umere anake iora te aronga katoa i akarongo [kia Iesu meangiti] ra i tona kite e tana tuatua.” Ka manako inangaro ainei koe i tetai uriuri anga Tuatua Tapu na te aronga pakari i te iero mei ia Iesu rai? Ka umere ainei tetai pae i toou kite e taau au pauanga? I teia tuatau, e manganui te au mapu e au Kite tei apii, akarongo meitaki, e te piri atu ki te au uipaanga Kerititiano, e kite Tuatua Tapu to ratou te akapoitirere ra i te aronga pakari.​—Luka 2:42, 46, 47.

Te pera ainei koe mei ia Timoteo rai, i tona tamariki anga kua apiiia “i te au tuatua tapu”? I to Timoteo mapu anga, “kua ripoti meitakiia aia e te au taeake” i roto ie rua putuputuanga. Kua iki te apotetoro ko Paulo ia Timoteo kia teretere ma ia, kare ei tangata amo i tona apinga, mari ra te tauturu ia Paulo te apiianga i tetai pae. Ka ikiia ainei koe no teia au angaanga? Te “ripoti meitakiia” ainei taau angaanga kare ua i roto i taau uaorai putuputuanga mari ra e tetai pae katoa?​—2 Timoteo 3:15; Angaanga 16:1-4, NW.

Eaa te Tu o te Tuatau ki Mua Taau ka Inangaro?

Ka rauka ainei i te au mapu i teia tuatau kia vai tiratiratu mei ia Iosepha, Mose, Davida e tetai pae? Ae, ka rauka. E tika, e manganui te au mapu te inangaro ua ra i tetai tuatau mataora. Inara te taangaanga ra tetai pae i to ratou mapu anga ma te pakari, te apiianga kia kite i te Atua e tona anoano no ratou. Te akatupu ra teia i te totou Puka Tapu: “E puareinga roa to toou ra au [mapu tane, NW], i te rā o toou ra mana. . . . mei te au ïa o te kopu o te popongi.”​—Salamo 110:3.

Ka akaari teia au mapu meitaki i te kite pakari i mua ake i to ratou pakari anga, mei te mea ka rauka i te Atua i te tauturu ia ratou kia mako to ratou oraanga i te reira taime pera katoa te oronga anga i tetai tuatau kaka ki mua no ratou i te ao ou te aere mai nei. (1 Timoteo 4:8) Akapeea ra, e raukaʼi i tetai mapu o teia tuatau i te akatupu i tetai akarongo mei te au tamariki meariki tei taikuia i roto i te Puka Tapu? Me ka inangaro koe i te kite, te pati nei matou ia koe kia tatau i te atikara “Au Mapu Mataora i Roto i ta Iehova Angaanga,” akamata ki runga i te kapi 10 o teia makatini.

[Au Tutu i te kapi 5]

Kare a Mose mapu ra i meameaauia e te apinganui o Aiphiti

Kua tau meitaki tikai a Davida mapu ra ki to Iehova ngakau

[Au Tutu i te kapi 6]

Noatu e kua manako a Ieremia iaia “e tamaiti ua,” kua tutu aere aia i te tuatua kare i rekaia

I te 12 mataiti, kua akaumere a Iesu i te aronga pakari i tona kite i te Tuatua na te Atua

[Tutu i te kapi 7]

I Iseraela kua akarongo katoa rai te tamariki mea riki i te tatau angaia te Ture a te Atua. Te pera ainei koe?