Tavinianga ia Iehova ma te Rekareka

“E tavini ia Iehova ma te pereperekavana. E aere mai ki mua i tona aroaro ma te maeva i te rekareka.”​—SALAMO 100:2, “NW.”

1, 2. (a) Akapeea te akaari anga i te akataka ke anga te iti tangata i Berlin, i Tiamani ra; inara eaa tei tupu ki te akono anga no tetai “Patireia no te Tauatini Mataiti”? (e) Eaa te tuke anga ki to te 1936 tei kiteia i te Olympia Stadium ia Tiurai 1990, e i tutauia te rekareka anga o te pupu tei akaputu atu no te au pa enua i reira ki teaa?

KO TE Olympia Stadium, i Berlin, taua ngai ra. I te rima ngauru ma a mataiti i topa, kua riro teia ngai tarekareka anga manea ei ngai no te maro anga i ta te tangata akaaere Nazi ko Adolf Hitler te kopaeia i te tangata kerekere oro o Marike tei rauka ra iaia e a metera auro. E moto tikai te reira, i ta Hitler i karanga e e “Uanga Teatea mana maata [Aryan superiority]” to ratou!a Inara i teianei, ia Tiurai 26, 1990, te kerekere, te teatea, te rengarenga​—e au tangata taokotaiia no te au pupu enua e 64, e 44,532 te katoatoa—​kua uipaa ki reira no te Uruoaanga Tapere “Vaa Viivii Kore” o te au Kite o Iehova ra. Mei teaa ra te ki maringiringi te rekareka i taua aiai avatea i te Paraparau ra! I muri ake i te tuatua no te papetitoanga, e 1,018 te aronga tei kapiki, “Ja!” e kapiki akaou, “Ja!” i te akapapuanga i to ratou akatapuanga ki te Atua ko Iehova, kia rave i tona ra anoano.

² E 19 miniti i pou no te aere atu anga teia au Kite ou mei te ngai matakitaki anga e tae atu ei ratou ki te ngai o te vai papetito anga. E i taua au miniti katoatoa ra, e mangungu tikai te tangi anga o te pokarakara takapini i te reira ngai maata. Kare te aronga tei re i te oro anga i te Tarekareka Orimipia i kite i te pokarakara anga mei te turou a teianei aronga e au anere ua atu, no te au pupu enua e manganui, tei akakite maira i to ratou akarongo te ka autu i teianei ao. (1 Ioane 5:3, 4) Kua tutauia to ratou rekareka kia ngaueue kore i te irinaki anga e na te Patireia o te Atua i raro i ta te Mesia tutara e apai mai i te tauatini mataiti no te au akameitakianga kaka ki te au tangata katoa.​—Ebera 6:17, 18; Apokalupo 20:6; 21:4, 5.

3. Eaa te tuatua mou tei akaketaketaia e te irinaki anga o te aronga tei uipaa atura ki reira, e naea?

³ Kare e makitakita anga no te iti tangata me kare no te enua i konei, no te mea te tuatua ra te katoatoa i taua vaa viivii kore ra no te Tuatua a te Atua maira, na te reira te akaketaketaanga i te tuatua mou o ta Petero au tuatua ra: “Kua kite mou atura au e, kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ia e ia.”​—Angaanga 10:34, 35; Zephania 3:9.

4. No raro mai i teea au turanga te maata anga o te aronga tei akaputu ki reira ra i riro ei ei aronga akarongo, e i akapeea te pau angaia ta ratou pure?

⁴ Ko te tuanga maata o teia aronga i te uruoaanga i Berlin kua riro mai ei aronga akarongo i te tuatau roa o te au mataiti o te takinga kinoanga, i te tuatau te tutara ra te Nazi (1933-45) e te tuatau o te totiaretiki kia puapinga tei aru maira i te Itinga Ra O Tiamani, te ngai ia kua akakoreia e te ture te arai anga ia Mati 14, 1990 i runga i te au Kite o Iehova ra. No reira, e manganui i o ratou kua “āriki oki . . . i te tuatua ma te mate maata, ma te rekareka a te Vaerua tapu.” (1 Tesalonia 1:6) Kua maata rava atu i teianei to ratou tu rangatira i te tavini atu ia Iehova, e kare e kotinga ia to ratou rekareka.​—Akaaiteia atu kia Isaia 51:11.

Au Atianga no te Rekareka

5. Eaa ta to Iseraela i rave no ta Iehova ra akaora anga ia ratou i te Tai Muramura?

⁵ Te tuku ua anga i to tatou au taeake i Europa Itinga Ra, e i teia tuatau nei i etai tuanga o Aperika e Atia, te akamaaraara mai nei ia tatou i ta Iehova ra akaora anga i te tuatau kua topa ra. Te maara ra ia tatou ta Iehova angaanga mana i rave i te Tai Muramura ra, e i akapeea ta Iseraela imene akameitakianga i te tae anga ki tona teitei na roto i te au tuatua: “Koai to te au atua e arite kia koe, e Iehova? koai tei arite kia koe, ko tei kakā i te tapu ra, e te mataku roaia kia akameitakiia ra, e te rave i te mea taka ke ra?” (Exodo 15:11) I teia tuatau, kare tatou e rekareka ua atu i te au mea taka ke ta Iehova e rave nei no tona au tangata? Papu te pera ra tatou!

6. Eaa ta tatou ka kite te maeva anga i te rekareka o to Iseraela ra i te 537 M.T.N.?

⁶ Kua puke te rekareka anga i te 537 M.T.N. i to Iseraela akaoki angaia ki tona enua i muri ake i te tuikaa anga i Babulonia. Kua rauka i to Iehova iti tangata te tuatua, mei ta Isaia i totou maira: “I na! Ko te Atua toku ora. Ka irinaki au e kare e mataku; no te mea ko Ia ko Iehova toku ririnui e toku mana, e kua riro ko ia toku nei ora.” Mei teaa ra te akateitei anga! E akapeea ta te iti tangata akakite anga i te reira rekareka? Kua tuatua maira a Isaia: “I te reira ra ka tuatua koe: ‘Ka akameitaki kotou ia Iehova! E kapiki i tona ingoa. E akakite i tana au ravenga ki te au tangata katoa. E akakite e kua akateiteiia tona ingoa. E imene kia Iehova na tana angaanga taka ke.’” Kua rauka ia ratou “te maeva i te rekareka” i teianei i te akakiteanga i tana au ravenga mana “ki te pa enua ravarai,” mei ta te au tavini o Iehova tei akamataraia maira i te tu tuikaa i teia tuatau nei.​—Isaia 12:1-6.

Rekareka Anga i ta Iehova Angaanga

7. Eaa nga akaora anga tei tau ra kia akapaapaaia i te 1919?

⁷ I teia tuatau nei kua akamata te maeva anga i te rekareka o te au tavini o Iehova i te oronga angaia kia ratou te akaora anga taka ke i te 1919 ra. Ia Mati 26 o te reira mataiti, kua tukuia mai te au mema o te Pupu Akaaere o te reira tuatau ra mei roto i te tapekaanga, o te Enua Taokotai te ngai i tapekaiaʼi ratou no nga marama e iva i raro ake i te akaapaanga pikikaa e i patoi i te kavamani. Mei teaa ra te meitaki te reira tuatau i te turouanga ia ratou i te oki mai anga ki Betela i Brooklyn! Pera katoa, ko te toenga o tei akatainuia ra kua pereperekavana ratou no tei akamataraia mai ratou i te pae vaerua mei Babulonia Maata maira, koia te akatereanga o te akonoanga atua ta Satani i ereere atura i to te pa enua ravarai.​—Apokalupo 17:3-6; 18:2-5.

8. Eaa te oronga anga poitirere tei akakiteia mai i te uruoaanga i Cedar Point i te 1919 ra, e eaa te akaue anga tei orongaia mai?

⁸ Kua akakoronaia te au apinga i tupu o te tuatua enua i te 1919 te uruoaanga o te au tangata o te Atua tei raveia i Cedar Point, i Ohio, i Marike ra, ia Tepetema 1-8. I te ra rima o taua uipaanga ra, koia te “Ra o te Aronga Angaanga Kapitiia,” kua tuatua te peretiteni o te Totaiete Punanga Tiaki Anga, ko J. F. Rutherford, ki te aronga e 6,000 i te tuatua akaoraoraanga koia te “Akakitekiteanga i te Patireia.” I muri ake i tana uriuri manako anga ia Apokalupo 15:2 e ia Isaia 52:7, kua akakite atura aia ki te aronga tei akarongo kiaia e e makatini ou tetai, ko The Golden Age ([Te Tuatau Auro] tei matauia i teianei ko te Awake! [E Ara!]), ka neneiia i nga epetoma e rua ravarai, no te tua aere anga. I te akaope anga kua karanga aia: “Te aronga katoa kua oronga i to ratou oraanga ki te Atu; tei mataku kore katoa, e ngakau viivii kore to ratou, tei inangaro i te Atua ma te Atu ko Iesu ra ma to ratou manako katoa, to ratou ririnui, e te meta katoa, ka rave ma te pereperekavana i teia angaanga i te tuatau e raukai kia akono. E pati i te Atu no tana tiaki anga e tana arataki anga kia akariro aia ia koe ei karere mou ei pikikaa kore, e kia mako katoa oki. Ei reira, ma te imene rekareka i roto i toou ngakau, e aere ki vao e tavini atu iaia ra.”

9, 10. Akapeea ta Iehova akapuapinga anga i te au nenei anga i Te Punanga Tiaki Anga e te Awake! makatini?

⁹ Kua akarongorongoia te reira “imene rekareka” takapini te pa enua ravarai! E manganui tatou te aronga, kare e ekoko anga e kua rave katoa i te akatupuanga kia maata te tua anga i te makatini Awake! kia tae ki te 12,980,000 katoa i te nenei anga okotai i te 64 au reo ke ke i teianei. E apinga ririnui no te aratakianga i te aronga tei inangaro i te tuatua mou, te akono ra te Awake! ei tokorua no Te Punanga Tiaki Anga. I tetai enua i Atia, kua poitirere tetai tuaine painia i tana rave putuputu anga i te tua makatini, kua kite aia e i te au taime ravarai i rave atu ei aia i te makatini ou kua oronga mai te tangata o tetai ngutuare i te moni arite atu ki te 7 tara (Marike) ei tauturu i te angaanga a te au Kite o Iehova i te ao katoa nei​—e mea papu e te akaari maira i te ariki anga meitaki no te angaanga Patireia!

¹⁰ I teianei i te akamataanga i 112 mataiti o tona nenei anga, kua tae te tua anga i te makatini Te Punanga Tiaki Anga ki te 15,290,000 i te 111 au reo ke ke, e 59 o teia au makatini te aere taokotai maira i te ao katoa nei ma te au tumu tuatua aiteite. Mei te tuati tiratiratu rai, te rave tamou ra te toenga o tei akatainuia i te oronga ki te aronga tatau rekareka ra i “ta ratou tuanga kai [vaerua] i te tuatau tau ra.” (Luka 12:42) I te 1990 kua ripotiia te au Kite o Iehova e kua tuku e 2,968,309 au tutaki anga ou me kare tutaki akaou anga no nga makatini e rua ra, e 22.7-pasene te tere atu anga i to te 1989.

Tupu Maata te Rekareka

11. (a) Eaa te akaue anga tei orongaia ki te au tangata o te Atua ra i Cedar Point i te 1922? (e) Akapeea te akatotoa anga i te maeva anga i te rekareka?

¹¹ Kua tupu maata katoa te rekareka i te akaputu anga te au tangata o te Atua e 10,000 katoa, no te rua o te uruoaanga i Cedar Point, ia Tepetema 1922, e 361 tei papetitoia i reira. I tana akoanga e “Kua Vaitata te Patireia o te Rangi,” tei akatumuia ra ki runga ia Mataio 4:17 (NW), kua taki atu te Taeake ko Rutherford kia tae atu ki te akaope anga akaoraora koia oki: “Ka tau to te ao katoa kia kite e ko Iehova te Atua e ko Iesu Mesia te Ariki o te au ariki e te Atu o te au atu ra. Ko teia te tuatau o te au tuatau katoatoa. I na, te tutara nei te Ariki! Ko kotou tona au rima rave i te akakitekite aere. No reira, e akakite, e akakite, e akakite, i te Ariki e tona patireia.” Ko te aronga tei maeva mai no te rekareka tei tukuna mai i te reira uruoaanga kua totoa maata roa te numero e kia tae mai ki te 1989 e tere atu i te 6,600,000 tei akaputuia mai ki e 1,210 au uruoaanga o te au Kite o Iehova i te ao katoa nei, e e 123,688 katoa tei papetitoia.

12. (a) Eaa te rekareka anga kare e rauka kia akatakaia te o atura te au tangata o te Atua i teia tuatau nei? (e) Akapeea ta tatou akatau anga i ta tatou angaanga kia Iehova ma te akarongo atu ki te “aronga mana taoonga ra”?

¹² Te akaperepere nei te au Kite o Iehova i to ratou turanga rangatira. I runga ravao, kua pereperekavana ratou i te tupu anga i teia tuatau o te au tuatua a Iesu e: “Ka kite ïa kotou i te tuatua-mou, e na te tuatua mou kotou e akarangatira.” Mei teaa ra te rekareka kia akarangatiraia mei te au mea ngaro e te au manako purepure no te au akonoanga pikikaa! Mei teaa ra te rekareka arite koreia kia kite ia Iehova e tana Tamaiti e kia rave kapiti atu kia raua i te angaanga, ma te manakonako anga i te ora mutu kore! (Ioane 8:32; 17:3; 1 Korinetia 3:9-11) Te manako ariki katoa ra te au tavini o te Atua me ka akatika te “aronga mana taoonga” o teianei ao te noo ra ratou i raro ake, e kia rave ua ratou i te akakitekite i te manakonakoanga kaka o to Iehova ra Patireia i raro ake i te Mesia ma te arai koreia. Te mareka ra ratou i te “apai mari i ta Kaisara kia Kaisara,” e pera katoa ta te Atua ra apinga “e apai ïa ki te Atua.”​—Roma 13:1-7; Luka 20:25.

13. Akapeea te akakite anga a te au Kite o Iehova i to ratou rekareka i te tuku angaia mei roto mai i te takinga kinoanga?

¹³ Inara, me ka tauta te aronga mana taoonga nei kia arairaiia teia apai anga ki te Atua ra, ka paʼu atu te au Kite o Iehova mei ta te au apotetoro rai e: “Ko te Atua ta matou e akarongo e tikaʼi auraka te tangata.” I te reira atianga, i muri ake i te tuku angaia e te aronga tutara te au apotetoro ra, kua “aere atura ratou . . . ma te rekareka.” Akapeea ratou i te akakite anga i to ratou rekareka? “Kare e rā i tukua ia ratou, i te apii anga atu e te tuatua anga atu ia Iesu Mesia, ki roto i te iero ra, e i tera are i tera are.” (Angaanga 5:27-32, 41, 42) Mei te reira katoa, i teia tuatau nei, ka rekareka te au Kite o Iehova kia rauka ia ratou kia tere atu te turanga rangatira no te aruaru i ta ratou angaanga tutu aere. I te au enua e manganui kua akatuera a Iehova i te mataara, e te akakite ra ratou i te rekareka maata na te tuatua marie anga i to Iehova ingoa e te Patireia oki o Iesu Mesia.​—Akaaiteia atu kia Angaanga 20:20, 21, 24; 23:11; 28:16, 23.

Akakoromakianga ma te Rekareka

14. Akapeea te meitaki atu o teia rekareka koia te ua o te vaerua ra, i tei akatakaia maira e te puka tuatua aiteanga?

¹⁴ Eaa teia rekareka akatenga ta te au Kerititiano mou e kite nei? E oonu atu te reira e te tinamou atu i te rekareka poto ua o te re anga i te tarekareka i te Orimipia ra. E ua ia no te vaerua tapu o te Atua, ta te Atua e oronga ra ki te aronga e “akarongo iaia ra [ei tutara].” (Angaanga 5:32) Te akataka maira te puka tuatua aiteanga a Webster’s i te rekareka e ‘e oonu ua atu te akaanga i to te mareka, e tere atu te kaka me kare te kitea anga i to te mataora ua.’ E maata atu rai ki te Kerititiano, te aite anga o te rekareka. E tutau anga ki roto i to tatou akarongo, e tu ririnui, e te akaketaketaanga. “Ko te rekareka ra no ko ia Iehova ra to kotou ïa maroiroi.” (Nehemia 8:10) Te rekareka no ko ia Iehova ra, ta te au tangata o te Atua e tatanu ra, tei runga roa atu i te tu mataora ua tei rauka i te au tangata i te pae kopapa ra, no ko mai i te au tarekareka anga o teianei ao.​—Galatia 5:19-23.

15. (a) I roto i tei tupu ra ki te au Kerititiano pikikaa kore ra, akapeea te kapiti anga te akakoromaki anga ma te rekareka? (e) Akakiteia mai etai irava tuatua tapu ei akamaroiroi i te akapapu anga no runga i te tamouanga i te rekareka?

¹⁵ E akamanako ana i to tatou au taeake i te Ukaraine ra. I te akaatea angaia e te ‘aronga mana’ e au tauatini ua atu o teia au taeake ki Taiperia i te tuanga mua o nga mataiti o te 1950, kua mamae ratou i te au tu ngata maata. I muri akera, i te akatika angaia e taua aronga mana ra kia oki ua ratou, kua akameitaki rai ratou, inara kare te katoa anga o ratou i oki ki to ratou enua kainga. No teaa ra? Kua akamaara mai ta ratou au angaanga i te tuanga o te itinga ra ra ia Iakobo 1:2-4: “E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa; Kua kite oki kotou e, na taua timata anga i to kotou akarongo ra e akatupu i te akakoromaki.” Kua inangaro ratou kia tamou i te akakoromaki anga i te reira kokoti anga rekareka, e mei teaa ra te rekareka i te au uruoaanga o te au Kite o Iehova i teia tuatau ua ake nei i Porani i te turou anga i te au Kite no te ngai mamao o te pae itinga ra no te au pupu o te tua taatai o te Patipika. Kua rave kapiti te rekareka e te akakoromaki i te akatupu anga i teia uua anga. Ka tika, tatou ravarai kia rekareka e te akakoromaki anga i ta Iehova ra angaanga ka tau kia tuatua: “E rekareka ra au ia Iehova e rere ua au i te rekareka i te Atua o toku nei ora, Ko te Atu ra ko Iehova, ko toku ïa maroiroi.”​—Habakuka 3:18, 19; Mataio 5:11, 12.

16. Akapeea nga akaraanga meitaki a Ieremia raua ko Iobu i tau ei ei akamaroiroi mai ia tatou i ta tatou angaanga tutu aere anga?

¹⁶ Akapeea, i reira, e tamou ei to tatou rekareka i te tutuanga i rotopu i te aronga marokiakia? Kia maara e i tamou ana te au peroveta a te Atua i te manako anga rekareka i roto i te turanga mei te reira rai. Kua tuatua maira a Ieremia iaia i timataia ra: “Kua kitea taau au tuatua, e kua kai atura au; e ko taau tuatua, ko toku ïa rekareka anga, e te pereperekavana anga o toku ngakau: kua tapaia oki au i toou ra ingoa, e te Atua Sabaota ra, e Iehova e.” (Ieremia 15:16) Mei teaa ra te meitaki kia tapaia i to Iehova ra ingoa e kia tutu aere i te reira ingoa! Na ta tatou apii anga pakari e te paupau anga i te au uipaanga Kerititiano, e akamatutu ia tatou kia rekareka ua atu i te tuatua mou. Ka akaariia mai to tatou rekareka na roto i to tatou tu akono i te aere anga ki vao e i to tatou katakata no te Patireia. Noatu rai i raro ake i te timata anga kino, kua rauka ia Iobu i te tuatua no tona au enemi e: “Kia katangia atu ratou e au ra, kare ïa ratou i manako e e tika; kare oki ratou i akaruke i te mārama o toku mata.” (Iobu 29:24) Me ia Iobu tiratiratu rai, kare tatou e tau kia akariri me ka akakinoia mai tatou e te aronga patoi ra. E kata ua atu rai! Na to tatou mata e akakite i to tatou rekareka e na reira e raukai te au taringa kia akarongo.

17. Akapeea te akakoromaki anga ma te rekareka e uua mai ei?

¹⁷ I to tatou okioki akaou anga i te ngai tutu aere anga, ka riro na to tatou akakoromaki e te rekareka e akatupu kia akamanako te aronga tuatua tika e ka akamaroiroi ia ratou kia akara matatio i te manakonakoanga kaka ta tatou e mou nei. Mei teaa ra te rekareka kia apii putuputu i te Puka Tapu ma ratou katoa! E ia ratou e tauru ra i te au tuatua mou oko maata o te Tuatua a te Atua ki roto i to ratou ngakau, e mea rekareka tikai no tatou kia riro mai ratou ei oa no tatou i te rave i ta Iehova ra angaanga! Ei reira e raukai ia tatou i te karanga, mei ta te apotetoro ko Paulo i tuatua atu ki te aronga akarongo ou o tona tuatau ra: “Eaa oki to matou irinaki anga, e te rekareka anga, e te korona rekareka anga? Kare aina ko kotou i mua i te aroaro o to tatou Atu ra, ko Iesu Mesia kia tae mai aia ra? Koia ïa, ko kotou to matou kakā e to matou rekareka.” (1 Tesalonia 2:19, 20) E merengoanga rekareka tika tikai, ka kiteia i te aratakianga i te aronga ou ki te tuatua mou o te Tuatua a te Atua e i te tauturuanga ia ratou kia riro mai ei au Kite akatapuia, e kia papetitoia oki.

Te Rekareka te ka Akamou

18. Eaa te ka tauturu ia tatou kia rauka te akono i te au timata anga tuke tuke o teia tuatau nei?

¹⁸ I to tatou oraanga i te au ra tatakitai, e manganui te au turanga te ka anoanoia te akakoromaki anga. Te maki kopapa, te maromaroa, te tu ngata no te pae i te apinga e mea tokoiti ua ia. Akapeea e raukai i te Kerititiano kia tamou i tona rekareka ei akakore atu i te reira au timata anga? Ka rauka teia na te eeuanga i te Tuatua a te Atua no te akapumaana e te arataki anga. Ka rauka te akaangaroi anga i te tuatau timata anga na te tatauanga me kare te akarongoanga i te au tuatua o te salamo. E akamanako i te apii pakari a Davida: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.” (Salamo 55:22) Ko Iehova tikai “Tei akarongo i te pure ra.”​—Salamo 65:2.

19. Mei ia Davida raua ko Paulo rai, eaa te manako papu te ka rauka ia tatou nei?

¹⁹ Te tu teateamamao maira te akaaerenga a Iehova, na roto i tana au puka e tona aronga pakari o te putuputuanga e tauturu ia tatou tangata apikepike nei, ei kukumi atu i to tatou au manamanata. Te ako pumaana maira a Davida: “E uri atu i to aerenga ki runga ia Iehova; e irinaki iaia, e nana e akatupu i te reira.” Kua rauka katoa iaia i te tuatua e: “I vai ou ana au, e teianei kua ruaine; kare ra au i kite i te tangata tuatua-tika i te akaruke angaia, e tona uanga i te pati aere anga i te kai.” I te kapiti anga ma te akaaerenga Kerititiano, ka kite rai tatou e ko “te ora o te aronga tuatua-tika ra, no ko ïa ia Iehova ra, koia to ratou maroiroi i te tuatau tumatetenga.” (Salamo 37:5, 25, 39) E aru tamou tatou i te ako a Paulo e: “I kore ei matou i roiroi; . . . Tatou oki e akono nei, eiaa i te au mea i akaraia ra, i te au mea akara koreia ra: ko te au mea e akaraia nei oki, no teia ua nei ïa tuatau; kareka te au mea akara koreia ra, e tika ïa i te vai ranga.”​—2 Korinetia 4:16-18.

20. Eaa ta tatou e kite nei na te mata o te akarongo, e akapeea ta te reira akakeu anga ia tatou?

²⁰ Te kite nei tatou ma to tatou nga mata o te akarongo e, te vai mai nei ta Iehova ra akatereanga ou i mua te vaitata nei. Mei teaa ra te au rekareka anga aite koreia e te au akameitaki anga i reira! (Salamo 37:34; 72:1, 7; 145:16) I te teateamamao anga no te reira tuatau kaka roa, e akarongo tatou i te au tuatua ia Salamo 100:2 (NW): “E tavini ia Iehova ma te pereperekavana. E aere mai ki mua i tona aroaro ma te maeva i te rekareka.”

[Au Tataanga Rikiriki i Raro]

Akamanako Akaou Anga:

◻ Eaa te autu anga rekareka ki rungao i te akatataka ke anga te iti tangata i teia tuatau nei?

◻ Na teaa i maevaʼi i te rekareka te au tangata o te Atua i taito ra?

◻ Akapeea te tupu anga kia maata te rekareka i teia tuatau nei?

◻ Akapeea te aere kapiti anga te akakoromaki anga e te rekareka katoa?

◻ Eaa te apinga ei akatinamou i to tatou rekareka anga?