E Tavini ia Iehova ma te Rekareka o te Ngakau

“Ka rokoia mai koe e teia katoa nei au kino . . . No te mea kare koe i akamori i to Atua ra ia Iehova, ma te pereperekavana, e ma te rekareka o te ngakau ra.”​—DEUTERONOMI 28:45-47.

1. Eaa te akakite maira e te aronga katoa e tavini ra ia Iehova te rekareka ra, i te ngai katoa ta ratou e tavini ra iaia?

TE REKAREKA nei te au tavini o Iehova, me te rave ra ratou i tona anoano i te rangi me kare i runga i te enua nei. Kua imene rekareka ua te “au etu popongi” angera ra i te akatumuanga i te enua nei, kare e ekoko anga kua rave te au raungauru angera o te rangi ra i ‘te akono i ta te Atua akauenga,’ ma te rekareka. (Iobu 38:4-7; Salamo 103:20) E “pu angaanga,” rekareka te Tamaiti anau tai a Iehova ra i te rangi e kua kite katoa aia i te mareka i te raveanga i te anoano tu Atua ei te tangata ko Iesu Karaiti i runga i te enua nei. Pera katoa, “ko tei akakoromaki i te satauro, kare i akono i te akama, i te [“rekareka,” NW] i tukuia mai ki mua i tona aroaro, e te noo ra i teianei i te pae katau i te terono o te Atua ra.”​—Maseli 8:30, 31, NW; Ebera 10:5-10; 12:2.

2. Na teaa i akataka e me ka kite to Iseraela ra i te au akameitakianga me kare i te au kino?

² Kua kite to Iseraela i te rekareka i to ratou akamareka anga i te Atua ra. Inara ka peea me kare ratou i akarongo atu kiaia? Kua akamatakiteia ratou: “E ka vai tamou rai taua au kino nei ki runga ia koe, e ki runga katoa i toou uanga, ei akairo, e ei vavaranga. No te mea kare koe i akamori i to Atua ra ia Iehova, ma te pereperekavana, e ma te rekareka o te ngakau ra, i te maata oki o te au mea katoa ra; E teianei, ei tavini koe no toou ra au enemi, ta Iehova e tono mai e rave ia koe ra, ma te pongi, e te kaki vai, e te putaua, e te ngere i te au mea katoa ra: ka tuku oki aia i te zugo auri ki runga i to kaki, e kia mate rava atu koe iaia.” (Deuteronomi 28:45-48) Na te au akameitakianga e te au kino ra i akataka koai ma e koai kare i te au tavini no Iehova. Kua akapapu katoa taua au kino ra e kare e tau te au ravenga ngere i te tu ngateitei i ta te Atua ra au kaveinga e tana au akakoro anga, kare katoa oki e tau kia manako kore ua i te reira. No te akakore anga to Iseraela e akarongo i te au akamatakite anga a Iehova no te akatanea anga e te tuikaaanga, kua riro maira Ierusalema “ei taumaa i te au enua katoa o te ao nei.” (Ieremia 26:6) No reira e akarongo tatou i te Atua e e rekareka i tana akaperepere. Ko te rekareka tetai o te au akameitakianga tu Atua e manganui te kiteia ra e te aronga akono i te Atua ra.

Akapeea te Tavini ma te “Rekareka o te Ngakau”

3. Eaa te ngakau akatutuia ra?

³ Kua anoanoia to Iseraela kia tavini ia Iehova “ma te pereperekavana e ma te rekareka o te ngakau.” Ka tau katoa oki kia pera te au tavini o te Atua i teia tuatau. Kia rekareka koia oki “kia mataora; kia ki i te rekareka.” Noatu rai e te taikuia ra te ngakau kopapa i roto i te au Tuatua Tapu, kare te aite anga tikai e te manako ra me kare te uriuri manako ra ia. (Exodo 28:30) Ko tana angaanga maata e pamu i te toto ei akamatutu i te au teera o te kopapa. Inara, i te maata anga o te taiku anga i te ngakau te tuatua ra te Puka Tapu no te ngakau akatutu anga, e tere atu ia i te vairanga inangaro, akakeu anga, e te kite oki. Kua tuatuaia ia e ko “te tuanga rotopu ia, ko roto tikai, e no reira ko te tangata roto te akakite maira iaia uaorai i tana au angaanga katoatoa tuke tuke ra, i tona au anoano, au inangaro, au manako ngakau, au inangaro roto ra, au akakoro anga, tona au manako, au kite anga, au akatutu anga, tona pakari, kite, karape, tona au irinaki anga e tona manakoanga, tona maaraara e tona kite i tetai tu.” (Journal of the Society of Biblical Literature and Exegesis, 1882, kapi 67) Te o atura ki to tatou ngakau akatutu anga to tatou au kite manakoanga e te au manako ngakau, kapiti katoa te rekareka.​—Ioane 16:22.

4. Eaa te ka tauturu ia tatou kia tavini atu i te Atua ko Iehova me te rekareka te ngakau ra?

⁴ Eaa te ka tauturu ia tatou kia tavini atu ia Iehova ma te rekareka o te ngakau? Te manako papu e te ariki anga i to tatou au akameitakianga e te au angaanga orongaia mai e te Atua ra e tauturu ia. Ei akatauanga, ka rauka ia tatou i te tamanako rekareka i ta tatou angaanga raveanga i te “akamori” i te Atua mou ra. (Luka 1:74) Te vai katoa ra te angaanga apaianga i to Iehova ra ingoa ei Au Kite nona. (Isaia 43:10-12) Ka rauka ia tatou i te kapiti atu ki teia te rekareka no te kiteanga e na te aruanga i te Tuatua a te Atua te akamareka ra tatou iaia. Mei teaa ra te rekareka te vaira i te tamanakoanga i te marama i te pae vaerua e na te reira te tauturuanga i te aronga e manganui kia aere mai ki vao i te poiri!​—Mataio 5:14-16; akaaite ia 1 Petero 2:9.

5. Eaa te tumu no te rekareka tu Atua ra?

⁵ Inara, ko te tavinianga ia Iehova ma te rekareka o te ngakau kare ia i tetai manakoanga papu ua. E mea puapinga ia kia papu te manako anga. Inara ko te rekareka tu Atua kare ia i tetai apinga te ka akatupu tatou na roto i te akatupu anga i tetai tu takake. E ua ia no te vaerua o Iehova ra. (Galatia 5:22, 23) Me kare ia tatou taua tu rekareka ra, penei ka tau tatou kia rave i te au akatikatika anga kia raukaʼi te kopae ke i te manakoanga me kare te raveanga i tetai tu kare i tau i te tuatua tapu te ka akariri atu i te vaerua tapu o te Atua ra. (Ephesia 4:30) Inara, ei aronga akono i ta Iehova, auraka tatou e mataku e ko te ngere i te ngakau rekareka i etai atianga e akakite anga i etai mareka kore anga tu Atua. E aronga apa ua tatou e te rokoia ra e te mamae, te mii, e pera katoa te maromaroa i etai taime, inara te kite ra Iehova ia tatou nei. (Salamo 103:10-14) E no reira e pure tatou no tona vaerua tapu, ma te maaraanga e ko tona ua no te rekareka na te Atua ia e oronga mai. Ka pau mai to tatou Metua aroa i te rangi i taua au pure ra e ka rauka ia tatou i te tavini atu kiaia ma te rekareka o te ngakau.​—Luka 11:13.

Me te Ngere ra i te Rekareka

6. Me te kore ra te rekareka i roto i ta tatou tavini anga i te Atua ra, eaa ta tatou ka tau kia rave?

⁶ Me te ngere ra i te rekareka i ta tatou tavini anga, penei ka topa aere to tatou maroiroi i te tavinianga ia Iehova ra me kare penei ka tiratiratu kore kiaia. No reira, ka riro ei mea pakari kia akamanako taakaaka e ma te pure i to tatou au akakoro anga e kia akono i te au akatikatika anga tau. E raukaʼi te rekareka orongaia mai e te Atua ra, ka tau tatou kia tavini atu ia Iehova ma te aroa e ma to tatou ngakau katoa, te meta katoa, e te manako katoa. (Mataio 22:37) Auraka tatou e tavini ma tetai tu manako taemoemo, no te mea kua tata a Paulo: “E te ora nei tatou i te Vaerua ra, e aru tatou i ta te Vaerua ra. Eiaa tatou e akateitei puapinga kore ua, i te akaongoongo anga tetai ki tetai, e te vareae anga tetai ki tetai.” (Galatia 5:25, 26) Kare e rauka ia tatou te rekareka mou me te tavini ra tatou no te mea te anoano ra tatou kia teitei ake tatou i etai ke ra me kare te kimi ra i te akapaapaaanga.

7. Akapeea tatou me akamaroiroi akaou i te rekareka o te ngakau ra?

⁷ E rekareka ra to te akatupuanga kia tau ta tatou akatapuanga kia Iehova. I to tatou akatapu ou anga ki te Atua ra, kua rave maroiroi tatou i te mataara oraanga o te Kerititiano ra. Kua apii tatou i te au Tuatua Tapu e kua akono putuputu i roto i te au uipaanga. (Ebera 10:24, 25) Kua rekareka tatou i te rave anga i te angaanga orometua. Inara, ka peea me kua topa aere to tatou rekareka? Ka tau te apii Puka Tapu, te aere ki te uipaanga, te rave i te angaanga orometua​—e tika oki, te rave anga katoa i te au tu ravarai o te akonoanga Kerititiano ra—​kia oronga mai i te tu ngaueue kore ki to tatou au oraanga i te pae vaerua e kia akatupu akaou i to tatou inangaro mua ra e to tatou rekareka o te ngakau i mua ana. (Apokalupo 2:4) Ei reira kare tatou e riro mei tetai papaki te reka kore ra e te putuputu ra te anoano i te tauturu anga i te pae vaerua. Te mataora ra te aronga pakari i te tauturu atu, inara ka tau tatou tataki tai kia akono i ta tatou uaorai akatapu anga ki te Atua. Kare e rauka na tetai ke atu e rave teia no tatou. No reira e rave tatou i ta tatou akakoro anga kia aru i te papaanga tau no te Kerititiano kia akono i ta tatou akatapuanga kia Iehova e kia rauka te rekareka mou.

8. Eaa i puapinga maataʼi te akava ngakau meitaki me te anoano ra tatou kia rekareka tatou?

⁸ E raukaʼi ia tatou taua rekareka e ua ra ia no te vaerua o te Atua, e mea tau kia ma to tatou akava ngakau. Ia Davida Ariki o Iseraela ra i tautaʼi kia uuna i tana ara, kua tupu te tu maromaroa kiaia. Ko te tika, kua akara anga maro te tu mauu o tona oraanga, e penei kua riro aia kia makiia i te pae kopapa. Mei teaa ra te ora maata nona i te rave anga i te tataraara e te aaki anga oki! (Salamo 32:1-5) Kare rava tatou e rekareka me te uuna ra tatou i tetai ara kino. Penei ka akariro te reira ia tatou kia noo ma tetai oraanga taitaia. E tika tikai, kare te reira i te mataara e kite ei i te rekareka anga. Inara na te aaki anga e te tataraara ka apai mai i te ora e te akaouanga i te vaerua rekareka anga.​—Maseli 28:13.

Tapapaanga ma te Rekareka

9, 10. (a) Eaa te taputou tei orongaia kia Aberahama ra, inara i akapeea te timata angaia tona akarongo e tona rekareka? (e) Akapeea tatou ka puapingaiaʼi i te au akaraanga a Aberahama, a Isaaka, e ta Iakoba oki?

⁹ E apinga tikai tetai kia rekareka i to tatou kite mua anga i te akakoroanga tu Atua ra, inara e apinga ke ia kia tamou marie te rekareka anga me topa aere te au mataiti ra. Ka rauka kia akatutuia teia i te tu o Aberahama tiratiratu ra. I muri ake i tona tamata anga kia oronga i tana tamaiti ia Isaaka i ta te Atua akauenga ra, kua oronga atura tetai angera i teia tuatua: “Te tuatua nei a Iehova, Kua taputou au iaku uaorai, no te mea kua pera mai koe, e kare akenei koe i karapii i to tamaiti, i to tamaiti okotai roa ra, iaku; E akameitaki roa au ia koe na, e akamaata rava au i toou uanga, mei te etu o te rangi ra, e mei te onetea i taatai ra; e ka rauka te ngutupa oire o to ratou au enemi i toou ra uanga; E ka meitaki te pa enua katoa o te ao nei i toou ra uanga; ko koe i akarongo mai i toku reo nei.” (Genese 22:15-18) Kare e ekoko anga, kua rekareka maata a Aberahama i teia taputou.

¹⁰ Penei kua manako a Aberahama e ko Isaaka te “uanga” na roto mai iaia te au akameitakianga taputouia ra. Inara i te topaanga te au mataiti e kare e apinga umere i tupu na roto mai ia Isaaka penei kua timataia te akarongo e te rekareka o Aberahama e tona ngutuare tangata oki. Na ta te Atua tuatua akapapu anga kia Isaaka e i muri maira ki tana tamaiti kia Iakoba i akakite papu atu kia ratou e te vaira te aerenga mai o te Uanga i te tuatau ki mua, e na teia i tauturu ia ratou kia tamou marie i to ratou akarongo e te rekareka. Inara, kua mate atu a Aberahama, a Isaaka, e Iakoba kare i kite i te tupu anga o te au taputou a te Atua ra kia ratou, inara kare ratou i te au tavini reka kore no Iehova ra. (Ebera 11:13) Pera katoa oki tatou nei ka rauka kia tavini tamou marie ia Iehova ma te akarongo e te rekareka i te tuatau e tatari nei i te tupu anga o tana au taputou.

Rekareka Noatu te Takinga Kinoanga

11. Eaa ka raukaʼi ia tatou kia rekareka noatu te takinga kinoanga?

¹¹ E au tavini no Iehova, ka rauka ia tatou te tavini atu ia Iehova ra ma te rekareka o te ngakau, noatu rai e ka mamae tatou i te takinga kinoanga. Kua tuatua a Iesu e ao to te aronga takinga kinoia nona ra, e kua tuatua katoa te apotetoro ko Petero e: “E rekareka ra, i te mea te rave katoa ra kotou i te au mate o te Mesia: e kia akakiteia mai tona kakā, kia rekareka katoa kotou i te pereperekavana maata. Kia akakinoia kotou i te ingoa o te Mesia ra, e ao to kotou; no te mea te noo ra te Vaerua kakā, te Vaerua o te Atua, ki runga ia kotou.” (1 Petero 4:13, 14; Mataio 5:11, 12) Me te akakoromaki marie ra koe i te takinga kino e te mamae anga no te tuatua tika, tei ia koe te vaerua o Iehova e tona mareka anga, e ka akatupu te reira i te rekareka.

12. (a) Eaa ka raukaʼi ia tatou kia akakore i te au timataanga no te akarongo ma te rekareka? (e) Eaa te apiianga tumu te ka kite tatou mei te tu o tetai ngati Levi tuikaaia ra?

¹² Ka rauka ia tatou i te akakoromaki i te au timataanga no te akarongo ma te rekareka no te mea ko te Atua to tatou Akapuanga. Te akakite tikaia maira teia i nga Salamo 42 e te 43. No etai tumu, kua riro tetai ngati Levi ei tuikaa. No te maata tona maromaroa i te ngere i te akamori anga i te ngai tapu o te Atua ra kua riro aia mei tetai aili kaki ra i te vai i tetai ngai maro e te motutaa. Kua “kaki,” aia me kare kua inangaro, ia Iehova e no te tika kia akamori i te Atua i Tona ngai tapu ra. (Salamo 42:1, 2) Ka tau teia tupu anga ki te reira tuikaa ei akakeu ia tatou kia akaari i te akameitaki anga no te taokotai anga ta tatou e rekareka ra ma te au tangata o Iehova. Me ka araiia tatou na te reira turanga akataka keanga ei takinga kinoanga no te tuatua poto kia kore e piri atu kia ratou, e tamanako tatou i te au rekareka anga kua topa i te kapitianga i te angaanga tapu ra e ka pure ei no te akakoromaki marieanga ia tatou “e tatari ra i te Atua” kia akaora ia tatou i te angaanga putuputu ma tona aronga akamori iaia ra.​—Salamo 42:4, 5, 11; 43:3-5, NW.

“E Akamori ia Iehova ma te Pereperekavana”

13. Akapeea ta Salamo 100:1, 2 akaari mai anga e ka tau te rekareka ei tuanga no ta tatou tavini anga ki te Atua ra?

¹³ Ka tau te rekareka ei tuanga no to tatou tavini anga i te Atua. Kua akaariia mai teia i tetai imene akameitaki anga i imene ei te tata taramo e: “Kia rekareka te enua katoa ia Iehova. E akamori ia Iehova ma te pereperekavana; e aere mai ki mua i tona aroaro ma te imene.” (Salamo 100:1, 2) E “Atua mataora” a Iehova te anoano ra kia rekareka tona au tavini i te akonoanga i to ratou akatapu anga kiaia. (1 Timoteo 1:11, NW) Ka tau te au tangata o te pa enua ravarai kia akateitei ia Iehova, e ka tau katoa oki ta tatou au tuatua akapaapaa anga kia maroiroi, mei te ‘kapiki anga rekareka’ o tetai nuku vaeau autu ra. I te mea e akapumaana anga to te tavini ia Iehova ra, ka tau ia kia kapitiia ki te pereperekavana. No reira, kua raurau maira te tata taramo i te au tangata kia aere mai ki mua i te aroaro o te Atua ra ‘ma te imene rekareka.’

14, 15. Akapeea te piri anga o Salamo 100:3-5 ki te au tangata rekareka o Iehova i teia tuatau nei?

¹⁴ Kua tuatua katoa maira te tata taramo e: “Kia kite [akatika] kotou ko Iehova anake ra te Atua: nana tatou i anga, e nona oki tatou: e aronga tangata nona, e te mamoe no tana ra koro.” (Salamo 100:3) I te mea na Iehova tatou i Anga mai, nana tatou nei mei te tiaki ra i tana au mamoe. No te meitaki o ta te Atua ra utuutu anga ia tatou e kua akapaapaa meitaki tatou iaia. (Salamo 23) Kua imene katoa te tata taramo ra ia Iehova: “E tomo ki tona au ngutupa ma te akameitaki; tona ra au paepae ma te imene akameitaki: e akapaapaa katou iaia, e akameitaki i tona ingoa. E meitaki oki to Iehova; e tona aroa, ka tu ïa e rimua: e tana ra tuatua-mou, ki tera uki ki tera uki.”​—Salamo 100:4, 5.

¹⁵ I teia tuatau nei, te tomo maira te au tangata rekareka no te pa enua ravarai ki roto i te au paepae o te ngai tapu o Iehova kia oronga i te akameitaki anga e te akapaapaa. Ka akameitaki rekareka tatou i te ingoa o te Atua ra na te tuatuaanga meitaki no Iehova, e tona au tu mekameka te akakeu ra ia tatou kia akapaapaa atu iaia. E meitaki katoa anga tona ra, e ko tona aroa takinga meitaki me kare manako inangaro no tona au tavini ka rauka kia irinaki tamouia, no te mea ka vairai te reira e tuatau ua atu. Mei “tera uki ki tera uki,” e tiratiratu a Iehova i te akaarianga aroa ki te aronga e rave ra i tona anoano. (Roma 8:38, 39) E mea tika tikai, i reira, e tumu meitaki to tatou kia “akamori ia Iehova ma te pereperekavana.”

E Rekareka i Toou Manakonako Anga

16. Eaa te au manakonako anga e te au irinaki anga te ka rauka i te au Kerititiano kia rekareka i teianei?

¹⁶ Kua tata a Paulo: “E rekareka i te manakonako anga.” (Roma 12:12) Te rekareka ra te au pipi akatainuia a Iesu Karaiti i te manakonako anga kaka no te ora mate kore ki te rangi ta te Atua i akatuera ra no ratou na roto i tana Tamaiti. (Roma 8:16, 17; Philipi 3:20, 21) Te au Kerititiano ma te manakonako anga no te ora mutukore ki roto i Parataito i te enua nei e tumu katoa oki to ratou no te rekarekaanga. (Luka 23:43) Pouroa te au tavini tiratiratu o Iehova e tumu to ratou no te rekareka i te manakonako anga Patireia, no te mea e tuanga ratou no taua kavamani o te rangi ra me kare ka noo ki tona tuanga i te enua nei. Mei teaa ra te akameitakianga rekareka!​—Mataio 6:9, 10; Roma 8:18-21.

17, 18. (a) Eaa tei totouia maira ia Isaia 25:6-8? (e) Akapeea teia totou a Isaia i te akatupu anga i teianei, e pera katoa i te tuatau ki mua ra?

¹⁷ Kua totou katoa maira Isaia i tetai tuatau rekareka ki mua no te au tangata akarongo. Kua tata aia: “Ei reira Iehova Sabaota ra e rave ei na te tangata katoa, i teianei maunga, i tetai pokai, e kai memeitaki ra, te kaingakai wina i runga i te ota; e kai matu roa ra, te wina i runga i te ota i akaareare meitakiia ra. E ei teianei maunga aia e akakore ei i te tapoki i tapokiiaʼi te mata o te tangata katoa ra, e te vai i rarangaia i rungao i te au enua katoa ra. Nana e akakore rava i te mate e tuatau ua atu; e na te Atu ra na Iehova e orei i te roi-mata i te au mata ravarai; e akakore aia i te akakino i tona iti-tangata i te enua katoa nei: na Iehova oki teia i tuatua nei.”​—Isaia 25:6-8.

¹⁸ Te kaikai anga vaerua ta tatou e rave nei i teia tuatau ei aronga akamori ia Iehova e pokai rekareka tikai ia. Ko te tika, te ki maringiringi nei to tatou rekareka ia tatou e tavini toto mapu atu nei i te Atua i te manakonako atu anga i te pokai no te au apinga meitaki tikai tana i taputou maira no te ao ou. (2 Petero 3:13) Na runga i te tumu anga o to Iesu atinga, ka akakore atu a Iehova i “te vai i rarangaia” te tapoki nei i te au tangata no te ara a Adamu ra. Mei teaa ra te rekareka kia kite i te akakore anga o te ara e te mate! Mei teaa te mareka anga kia turou i te aronga akatuakaouia ra, kia kite i te kore anga te au roimata, e kia noo ki runga i te enua parataito, te ngai e kore ei te au tangata o Iehova e akakinoia mari ra ka orongaia atu e te Atua tetai pauanga ki Tei patoi maata ra, koia Satani te Tiaporo!​—Maseli 27:11.

19. Eaa te manako tau no tatou i te au manakonako anga ta Iehova i akanoo mai ki mua ia tatou ei Au Kite nona ra?

¹⁹ Kare ainei e akaki ia koe ma te rekareka e te akameitaki anga kia kite eaa ta Iehova ka rave no tona au tavini? E tika rava, ka tauturu taua au manako anga maata ra i te rekareka anga no tatou! Pera katoa, ka akariro to tatou au manakonako anga meitaki ia tatou kia akara ki to tatou Atua mataora, aroa, e te maoraora ma te au manako anga mei teia: “I na, ko to tatou Atua teia; kua tapapa tatou kiaia, e ka akaora aia ia tatou: ko Iehova teia; ta tatou i tapapa na; e rekareka tatou, e kia pereperekavana oki i te ora nana.” (Isaia 25:9) Ma to tatou manakonako anga meitaki tei tamou ngaueue koreia ki roto i te manako ra, e akatika maroiroi atu tatou i te au tauta anga ravarai kia tavini atu ia Iehova ma te rekareka te ngakau.

Akapeea Koe me Pau?

◻ Ka akapeea tatou i te tavini anga ia Iehova ma te “rekareka o te ngakau”?

◻ Eaa ta tatou ka rave me te kore ra te rekareka i ta tatou tavini anga i te Atua ra?

◻ Eaa ra ka rekarekaʼi te au tangata o Iehova ra noatu rai te takinga kinoanga?

◻ Eaa te au tumu no tatou e pereperekavanaʼi i to tatou manakonako anga?

[Au Tutu i te kapi 17]

Na te raveanga i te au tuanga ravarai o te oraanga Kerititiano ra ka akatupu kia maata to tatou rekareka