Akatakaanga i te Vaerua Tapu
KUA kite ainei koe e ka tukia to tatou oraanga katoatoa e te vaerua tapu? Kua kite katoa ainei koe e rauka i te reira kia akamaata atu i te au puapinga i roto i toou oraanga? Penei ka poitirere koe. Papu ka ui koe e: ‘Koai me kare eaa oki te vaerua tapu?’
Mei te mea e tei roto koe i tetai ua atu o te au akonoanga o Kerititome, kua rongo ana koe i reira i tetai tangata orometua i te papetito i tetai pepe “i roto i te ingoa o te metua e te Tamaiti e te vaerua tapu.” (Mataio 28:19, The New English Bible) Me uiia kia akataka mai i te vaerua tapu, te maata anga o te au orometua ka viviki i te pau: ‘Te vaerua tapu ko te toru ia o te peretana o te irinaki anga toru tai, koia oki tei aiteite i roto i te au mataara ravarai ki te Atua te metua e ki te Atu ko Iesu Mesia.’
Inara, kare teia irinakianga e te turu anga i roto i te anere mataiti mua o to tatou Tuatau Noa nei. Ei akatutuanga: I roto i te mataiti 381 T.N.—mei te toru anere mataiti i muri ake i te mate anga o te au apotetoro a Iesu Mesia—ko Gregory o Nazianzus kua tata e: “Kua tamanako tetai papaki e ko [te vaerua tapu] ko te mana ia (energeia), etai e mea ora, etai ko te Atua ia, ki etai kare takiri i tuku e ko teea tikai.”
I teia tuatau, te maata anga o te au akonoanga i roto ia Kerititome kua ariki i te irinaki anga toru tai i te vaerua tapu. Inara ko te reira ainei ta te Puka Tapu i turu? Me e manako ua te reira tei akatumuia ki runga i te peu tupuna? Te tika oki, kare rava te Puka Tapu i tuatua i te vaerua tapu mei te tu rai i tuatua mai i te Atua me kare ia Iesu. Ei akaraanga, i roto i te Puka Tapu, kare oki o te vaerua tapu ingoa nona uaorai.
Me e tumu rikiriki ua ainei te reira? Kare, e mea puapinga te au ingoa i roto i te Puka Tapu. Kua akakite pu tikai te Atua i te puapinga o tona uaorai ingoa i tona tuatua anga e: “Ko au ko Iehova; o toku ïa ingoa; kare au e oronga i toku ra kakā no tetai ke, e te akameitaki iaku ra no te au idolo akatikitikiia ra.” (Isaia 42:8) Te puapinga o te ingoa o Iesu Mesia kua akataka atea ia te reira i mua ake i tona anauanga i to te angera akakite anga kia maria: “E naau e tapa i te ingoa ia Iesu.” (Luka 1:31) Mei te mea e e puapinga maata te nga ingoa o te Metua e to te Tamaiti, eaa i reira i kore ei o te vaerua tapu ingoa nona uaorai? E mea papu, e ko teia tumu okotai ka akakeu te reira i tetai ua atu peretana kia manako e me e aiteite tikai te vaerua ki te metua e te Tamaiti.
Te au Tuatua Tapu e te Vaerua Tapu
I roto i te au Tuatua Tapu Epera, me kare te “Koreromotu Taito,” e au akakiteanga tetai no te “vaerua tapu” e ki te “vaerua o toku [Atua].” (Salamo 51:11; Ioela 2:28, 29, NW) Ka tatau tatou e ka ki tetai tangata i te vaerua tapu, ka aere mai ki runga iaia, e ka tatomo mai iaia. (Exodo 31:3; Te au Akava 3:10; 6:34) Tetai papaki o te vaerua tapu o te Atua e rauka te reira i te apai mei tetai peretana e kia oronga ia ki tetai atu. (Numero 11:17, 25) Ka riro katoa oki i te vaerua tapu i te angaanga ki rungao i tetai ua atu, e rauka atura iaia kia rave i te angaanga ma te maroiroi e te umere tikai.—Te au Akava 14:6; 1 Samuela 10:6.
Eaa i reira tei rauka mai mei teia au akakiteanga tuatua? Papu e kare mei te mea e e peretana te vaerua tapu. Akapeea oki tetai tuanga o tetai peretana e raukai kia apiia mei tetai ua atu e kia orongaia ki etai atu? Tetai katoa, kare rava e akairo e ia Iesu i runga i te enua nei, kua akariro te au ngati Iuda akarongo i te vaerua tapu ei peretana tei aiteite ki te metua. Kare rava oki ratou i akamori i te vaerua tapu. Mari ra, ko ta ratou akamori anga kua tuku tika ia atu kia Iehova, koia ta Iesu uaorai i kapiki e “toku metua ra” e “toku Atua.”—Ioane 20:17.
Mei tei kapikiia e ko te Koreromotu Taito, te tuanga o te Puka Tapu tei karangaia ko te au Tuatua Tapu Kerititiano Ereni, me kare te “Koreromotu Ou,” kua tuatua e ka rauka i te vaerua tapu i te ‘akaki’ i tetai peretana me kare ki “runga” iaia. (Angaanga 2:4; Luka 2:25-27) Te vaerua tapu kua ‘oronga’ ia, kua ‘riringiia ki rungao’ e kua ‘tuaia.’ (Luka 11:13; Angaanga 10:45; Ebera 2:4) I te ra Penetekote o te 33 T.N., kua rauka oki i te au pipi “etai o” te vaerua o te Atua. (Angaanga 2:17) Kua tuatua katoa te Puka Tapu i te papetito ki te vaerua tapu e te akatainuia anga ki te reira.—Mataio 3:11; Angaanga 1:5; 10:38.
Ko te reira au tuatua a te Puka Tapu kua akapapu mai te reira e kare te vaerua tapu i te peretana. Kua akapapuia teia tika me kite tatou e kua tukuia te vaerua tapu ki roto i te akapapaanga i te au mea kare i te peretana. Ei akaraanga, kua tuatua te Puka Tapu ia Setephano e kua “ki i te Vaerua Tapu e te akarongo.” (Angaanga 6:5) E kua tuku tikai te apotetoro ko Paulo iaia uaorai ei orometua no te Atua “i te viivii kore, i te kite, i te akakoromakianga roa, i te takinga-meitaki, i te Vaerua Tapu, i te aroa pikikaa kore.”—2 Korinetia 6:4-6.
E tika rai, i etai au taime e akatutu peretana ana te vaerua tapu iaia. Ei akaraanga, kua tuatua a Isaia i etai au aronga taitoito ‘e kua akariri i tona vaerua tapu.’ (Isaia 63:10) Kua tuatua a Paulo e ka rauka katoa kia ‘akataitaiaia.’ (Ephesia 4:30) E maata katoa te au tuatua tapu tei tuatua e ka apii te vaerua tapu, ka arataki, ka tuatua, e ka akakite i te tika. (Ioane 14:26; 16:13, 14; 1 Ioane 5:7, 8) Inara kua akatutu peretana katoa te Puka Tapu i etai au mea kare e ora ana mei te pakari, te mate, e te ara. (Maseli 1:20; Roma 5:17, 21) Ko teia, te mataara marama tikaʼi na te Tuatua Tapu i te akakite i te au mea i tetai au taime.
I teia tuatau, te tuatua nei tatou i te Puka Tapu i roto katoa i te reira tu ia tatou i tuatuaʼi e kua karanga mai me kare kua apii i tetai apiianga tumu. I te taangaanga anga i te reira au akakiteanga, kare oki tatou e karanga ana e e peretana te Puka Tapu, kare rava? Kare katoa ta te Puka Tapu aiteanga e ko te vaerua tapu e peretana ia me rave mai te reira i tetai au akakiteanga aiteite.
Eaa, i reira, te vaerua tapu? Kare oki i te peretana. Mari ra, ko to te Atua uaorai mana maroiroi, tei taangaangaia e ia ei akatupu i tona ra anoano. (Genese 1:2) Akapeea nei ra oki to tatou oraanga i te akakeu anga ia e te vaerua tapu? E akapeea tatou uaorai e puapinga maata ei mei tana rave angaanga?