Akapeea te Vaerua o te Atua te Akakeu Anga ia Koe

“I MUATANGANA ra, kua anga iora te Atua i te rangi e te enua. Te vai utonga kore ua te enua, kare e marikonga, e te poiri oki ki rungao i te moana. Kua akakoukou iora te Vaerua o te Atua ki rungao i te kiriatai.” (Genese 1:1, 2, Revised Standard Version) Ko teia akakiteanga Tuatua Tapu kua akaari mai te reira i etai mataara atea tei riro te katoatoa rava e ora ra kia puapinga mei te vaerua tapu. Te angaanga maroiroi ra te vaerua i te tuatau o te angaia anga ra, e kia akameitakiia te angaanga maroiroi, kua riro mai oki te enua ei kainga manea no te tangata nei.

Inara ka maata atu te puapinga te ka rauka mai no te au tangata mei te vaerua tapu. Kua tuatua te maseli tei akauruia e: “E ariu mai kotou i taku e ako atu nei: i na, e riringi ua atu au i taku vaerua ia kotou, e akakite pu tikai au ia kotou i taku nei tuatua.” (Maseli 1:23) I to tatou tuatau ta te Atua au “tuatua” akaputuia te vai nei te reira i roto i te Puka Tapu, tei tataia e te au tangata “ta te Vaerua Tapu i tuku mai ia ratou ra.” (2 Petero 1:21; Mareko 12:36; 2 Timoteo 3:16) Me tatau ana tetai peretana tu akaaka i te Puka Tapu, ka puapinga aia mei te vaerua tapu.

Vaerua Tapu e te Angaanga Tutu Aere

Me aere atu tetai o te au Kite o Iehova ki toou ngutuare kia tuatua atu i te tuatua meitaki o te patireia, ka akakeu te vaerua tapu i toou oraanga i roto i tetai ravenga ke atu. Akapeea tatou e kite ei? Ina, i to Iesu Mesia akamataanga i te tutu i te tuatua meitaki, kua akaari aia ki runga iaia uaorai te au tuatua a te peroveta ko Isaia, i te tuatua anga e: “Tei rungao iaku te Vaerua o Iehova, no te mea kua akatainuia au kia akakite i te tuatua meitaki ki te putaua, . . . kia tutu i ta Iehova mataiti inangaroia.” (Luka 4:18, 19, NW; Isaia 61:1, 2) Ae, kua akatainuia a Iesu ki te vaerua tapu kia tutu aere i te tuatua meitaki.

Tetai katoa, kua totou a Iesu e ka aere ua atu te tutu anga o te tuatua meitaki i muri ake i tona matenga. Kua totou aia e: “E tutu aere ia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) I tetai taime poto i mua ake ka oki ei a Iesu ki te rangi, kua oronga a Iesu ki tana au pipi i teia akauenga: “Ka aere . . . e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te vaerua tapu; Ma te apii atu ia ratou, kia akono i te au mea katoa taku i akaue atu kia kotou.” (Mataio 28:19, 20) I muri ake i to te Mesia okianga ki te rangi, i reira, kua rave tamou atu tana au pipi i te angaanga tei akakeuia e te vaerua koia te tutu aere e te apiianga. Te aru nei te au Kite o Iehova i te reira au pipi mua i te tutu anga i te tuatua meitaki i te ao katoa.

Papetito Anga e te Vaerua Tapu

Me ariu maoraora mai tetai ki te tuatua meitaki, kua tuatua a Iesu e e mea tau aia kia papetitoia “i te ingoa o te Metua, e no te Tamaiti, e no te vaerua tapu.” No reira ka akakeu akaouia atu te au pipi e te vaerua tapu. Te akaaere anga tuatua e i roto “i te ingoa o” te aiteanga tikai, “na te mana o” me kare “kiteanga i te turanga o.”a No reira, kia papetitoia ki roto i te ingoa o te Metua ko te aiteanga, koia oki te arikianga ma te ekoko kore i te ngateitei o te Atua i roto i to tatou oraanga. Te papetito anga i roto i te ingoa o te Tamaiti ko te aiteanga koia oki te ariki anga ia Iesu e Oko, Akaraanga, e ei Ariki. E te papetito anga i roto i te ingoa o te vaerua tapu, koia oki ko te irinaki e te kauraro anga ki te mana o te reira.b

Te Vaerua Tapu i Roto i Toou Oraanga

Te mea maromaroa, te pikikaa, te akaturi, te meameaau, e te tu akono kore i te ture ta tatou e kite nei i roto i te au enua “Kerititiano” e kua tapikikaa i te mea e te maata anga o te aronga tei karanga e, e Kerititiano kua kopae tika i te vaerua tapu. Te aronga ra tei kauraro ki te reira kua maata tikai te akameitaki anga. Tetai tumu, te rave matatio nei ratou ia ratou e tatau nei i roto i te Puka Tapu tei akauruia e te vaerua e kua taangaanga i te reira ki roto i to ratou au oraanga. No reira, te pakari, te kite tau, tuku tika tau, te kikite, kite, e te manako meitaki. (Maseli 1:1-4) E au mea puapinga tikai teia i roto i to tatou au tuatau manamanata.

Ka tauturu katoa te vaerua tapu i etai aronga kia autu i to ratou au manamanata. I te tuatau taito, kua akaari te Atua ki tona iti tangata e ka akapeea ratou e raukai kia rave ngoie ua i tetai angaanga teimaa tikai. Kua tuatua a Iehova e ka rauka te reira i te rave, “kare i te ririnui, kare rai i te mana, na [toku] vaerua ra.” (Zekaria 4:6) Me kauraro tatou ki te Atua e tona vaerua tapu, ka tauturu katoa ia tatou kia rave e te akaoti i tetai au angaanga e kia autu atu i tetai au arairai anga penei ka riro tikai ei manata maata no tatou.​—Mataio 6:33; Philipi 4:13.

Tetai rai, ka tauturu te vaerua o te Atua ia tatou kia mataora i te au tikai tei kore to te ao katoa i kite. Kua tata te apotetoro ko Paulo e: “Te ngai tei reira te vaerua o Iehova, tei reira katoa te rangatira.” (2 Korinetia 3:17, NW) Te aronga tei kauraro ki te vaerua o te Atua ka au tikai te mataora i te tu rangatira mei te akonoanga pikikaa, te mataku taukore, te mataku i te tuatau ki mua, e te manganui ua atu o te au mea no te puereere anga. Te mana o te meitaki, ko te vaerua tikai ia o te Atua! Ka rauka te reira i te taui i te tangata. Kua tou atu te Puka Tapu ki teia i te tuatua anga e: “Te ua o te vaerua, te aroa, te rekareka, te au, te akakoromaki, te takingameitaki, te meitaki, te akarongo, te maru, te akono meitaki. Kore takiri e ture i patoi i te reira au mea.” (Galatia 5:22, 23, NW) Mei teaa atura te tuke maata o teia ao, mei te mea e ka kauraro e kia akakeuia te katoatoa rava i te vaerua o te Atua!

Ei pupu okotai, te rekareka nei te au Kerititiano tika i “te taokotaianga a te vaerua ra i te ruru o te au.” (Ephesia 4:3) Te taokotai e te au e nga mea ngere te reira i teia tuatau. Te vai nei ra te reira i te ngai te angaanga maroiroi ra te vaerua o te Atua. Tika rava, i rotopu i te au Kite o Iehova te tatua taokotai o te vaerua tapu kua apai mai te reira i te au tangata o te iti tangata ravarai, te reo ravarai, te pa enua ki roto i te “kapitianga o te au taeake” tika.​—1 Petero 2:17, NW.

To te Atua Vaerua e Koe

Te kite ainei koe i te puapinga kia rauka te pakari na te Atua i oronga mai e kia rekareka i te tu rangatira tika? Kare aina e, e mea vavaria kia rauka te tauturu no te Atua mai kia akakore i te au manamanata e kia akatupu i te aroa, te rekareka, te au, te akakoromaki, te takinga meitaki, te meitaki, te akarongo, te maru, e te akono meitaki? No reira e kauraro ki te mana o to te Atua vaerua tapu. Ka akapeea nei ra tetai peretana kia rave i te reira?

E tuku i te Tuatua a te Atua, te Puka Tapu, kia akakeu i toou manako e toou ngakau e kapiti atu ki te aronga te tuku ra i te vaerua tapu kia akakeu i to ratou au oraanga. E rave i te au takai anga i teianei kia kite e kia rave i to te Atua anoano. Oti akera, “kia akakiia mai kotou i te rekareka ravarai e te au i te akarongo anga, e te Atua e raukaʼi te irinakianga; kia maata to kotou irinaki i te mana o te vaerua tapu ra.”​—Roma 15:13.

[Au Tataanga Rikiriki i Raro]