Au Uianga a te Aronga Tatau

◼ Eaa ra te tatau anga o 2 Petero 1:19 i roto i te New World Translation of the Holy Scriptures i tuke ei mei tetai au Puka Tapu?

I te akamaata atu anga i te puapinga o te tuatua akauruia a te Atua, kua tata te apotetoro ko Petero e: “E teianei kua rauka ia tatou te tuatua totou kia akamaataia; e te meitaki nei koe i te akarongo i te reira mei te ramepa e marama ra i roto i te ngai poiri, kia tae ki te ataao e kia iti te etu ao, i roto i to kotou au ngakau.”​—2 Petero 1:19, NW.

Te kite ra tatou i te potonga tuatua “kia tae te ataao e kia iti te etu ao” kua akairoia e na nga koma. Te maata anga o te au Puka Tapu kare ratou i pera.

Ei akaraanga, te tangata kite ko Dr. James Moffatt kua oronga i te tuanga openga o te irava 2 Peter 1:19: “ . . . kua marama mei te ramepa i roto i te ngai poiri; kia tae mai te Ra ou e te iti anga o te etu ao i roto i to kotou au ngakau.” Te akakiteanga mei teia ka arataki te reira i tetai kia irinaki e te iti o te etu ao ka tupu te reira ki roto i te au ngakau o te aronga akarongo, koia oki, me kite ana ratou i tetai tu marama kaka i te pae vaerua.

Inara, i te tuatau ia Mose, e akakite anga tetai e e ‘etu te ka tae mai mei ko ia Iakoba ra.’ (Numero 24:17; akaaite ia Salamo 89:34-37.) Kua akakite marama mai a Iesu uaorai iaia e ko te “uanga o Davida, e te etu popongi kakā ra.”​—Apokalupo 22:16.

Ko teia akakiteanga o te “etu ao,” me kare “etu popongi,” kua tau ki te marama o te irava i ta te apotetoro ko Petero e uriuri nei. Kua taiku aia i te oroma i tona akatuke angaia tana i kite e 30 mataiti i mua atu. (Mataio 16:28–17:9) Ko te reira oroma marama kua tou te reira ki te tuatau e ‘aere mai ei a Iesu i roto i tona patireia,’ me kare kia akakakaia i roto i te mana o te Patireia. Ia Petero i kite kua akamaata atu te reira i te puapinga o te tuatua a te Atua; no reira, te au Kerititiano i teia tuatau ka anoanoia kia akarongo meitaki ki te tuatua totou.

I te mea e te vai nei te au ngakau o te tangata mei tei matauia​—e te vai nei rai—​i roto i te poiri, kare mei te mea e kia pera katoa te au Kerititiano tika. Te tika mei te mea atura e e ramepa te marama nei i roto i te ngai te tika anga e poiri, to ratou au ngakau. Kua kite a Petero e na roto i te akono i te akarongo ki te tuatua totou marama a te Atua, ka vai araara te au Kerititiano e kia akamaramaia ki te marama o te ra ou. Ko te tuatau teia ka tutara ei te “etu ao” me kare te “etu popongi kakā,” i roto i te mana o te Patireia.

E mea puapinga ra ta E. W. Bullinger i tata no runga ia 2 Petero 1:19: “I konei, e mea papu e e au akamaramaanga tetai, no te mea ko te totou te mori te marama nei, e te Mesia e Tona mama mai anga te etu Ao ia e te ata Ao ia. E mea papu e, kare ko te aiteanga e ka akamaroiroia kia akarongo i te tuatua totou e tae ua mai ki te mama mai anga te Mesia ki roto i to tatou au ngakau! Kare; mari ra kia akamou ki roto i to tatou au ngakau ki teia tuatua totou, e tae ua atu ki te tupu anga i te mamaanga mai o te Mesia​—Tona iti anga mai tei kapikiia ko ‘te Etu Popongi.’”​—Figures of Speech Used in the Bible, 1898.

Te tika i reira, tetai au urianga Puka Tapu kua taangaanga i te au akamaramaanga ia 2 Petero 1:19.a Te New World Translation of the Holy Scriptures kua tamou rai i te akapapaanga tei matauia i te oronga anga i tei kitea i roto i te reo Ereni mua. Kua rave mai ra i te au koma ei akatakake i te putunga tuatua e “kia tae ki te ata ao e kia iti te etu ao” mei te akamaroiroi anga kia akarongo i te tuatua ‘mei te ramepa e marama ra i roto i te ngai poiri, i roto i to kotou au ngakau.’

[Au Tataanga Rikiriki i Raro]