E Akarongo i ta te Atua Tuatua Totou!

Te au Akataka Anga a Petero Rua

TA Iehova tuatua totou, me kore tuatua, mei tetai ramepa rai e marama ra i roto i tetai ngai poiri, e te anoanoia ra te au Kerititiano mou kia akarongo tika tikai ki te reira. Kare te reira i te mea ngoie i te mea te tauta ra te au puapii pikikaa i te akamaata i te ravenga akaruke i te akarongo. Inara ka rauka teia i te raveia ma te tauturu no ko mai i te atua. E kia aru papa meitaki tatou i ta te Atua tuatua me ka inangaro tatou kia ora atu i te ra o Iehova e vaitata maira.

Ka rauka i te rua o ta Petero reta i te tauturu ia tatou kia akarongo ki te tuatua totou a te Atua. Penei kua tata a Paulo i tana reta mei Babulonia mai i te 64 T.N. I roto i tana reta kua raveia atu aia ei tumutoa i te tuatua na te Atua, te akamatakite anga i te au taeake irinaki i te ra o Iehova e aere maira mei te keikeia rai, e te tauturu ra i tona aronga tatau kia kore e arataki keia e te tu tarevake o te au tangata aati i te ture. I te mea e te vaitata maira te ra o Iehova, ka puapinga maata tatou mei ta Petero au tuatua akauruia.

Irinaki i te Tuatua Totou

Ei au Kerititiano, ka anoano tatou i te taangaanga ia tatou uaorai kia akaari i te au tu o te atua e kia akarongo ki te tuatua totou. (2 Petero 1:1-21) Te kopae kia kore e paruparu me kore uua kore, te anoano ra tatou kia ‘kapiti to tatou akarongo ki te raveanga tuatua tika, te kite, te akaaere iaia uaorai, te akakoromaki, te akono i te atua, te aroa akataeake anga, e te aroa.’ Te kite anga a Petero i to Iesu taui anga e te akarongo anga i te Atua i te tuatua anga no runga i te Mesia i te reira atianga, kua akapapu maata ravaia atu te tuatua totou. (Mareko 9:1-8) Ki te reira tuatua akauruia no ko mai i te atua ka anoanoia tatou kia akarongo.

Paruru mei te Aronga Akaruke i te Akarongo

Na te akarongo tika tikai ki te tuatua totou a te Atua, ka rauka ia tatou i te paruru mei te aronga akaruke i te akarongo e tetai atu aronga pikikaa. (2:1-22) Kua akamatakite a Petero i te au puapii pikikaa te ka tomo mai ki roto i te putuputuanga. Inara, ka oronga a Iehova i te akavaanga pakari te patoi i teia aronga tei akaruke i te akarongo, mei tona akava anga i te au angera akarongo kore, te ao atua kore i to Noa tuatau, e te au oire o Sodoma e Gomora. Kua kopae te au puapii pikikaa i te mana akaaere a te Atua e te akavare i te aronga paruparu kia piri atu ki ta ratou ravenga tarevake. E meitaki ake ia te aronga akaruke i te akarongo kare rava i kite i “te arataa tuatua-tika ra, eiaa e kite ra ka ariu ke atu ei i te tuatua tapu i tukuia mai ia ratou ra.”

Te Aere Maira to Iehova Ra!

Ei aronga akarongo i te tuatua totou i teia au ra openga, auraka rava tatou e tuku ia tatou uaorai kia akakeuia e te aronga akakino tei aviri i te tuatua no runga i to Iesu taeanga mai. (3:1-18, NW) Kua ngaropoina ia ratou e ko te Atua tei akakoro no te takore i teia akatereanga o te au mea nei koia katoa tei takore i teianei ao i mua ake i te Vai Tiruvi. Kia kore to Iehova tu akakoromaki e tamanakoia e e marie aia, no te mea te inangaro ra aia i te tangata kia tataraara. Ka takoreia teia akatereanga i “te ra o Iehova” e ka tupauia ki te ‘au rangi ou e te enua ou te ngai e vai tikaʼi te tuatua tika.’ No reira, kia rave pakari tikai tatou kia “topata kore e te apa kore ma te au.” Kia tupu tatou i roto i te kite ia Iesu Mesia kare kia arataki keia e te au puapii pikikaa.

E akamanako ana tatou i ta Petero au tuatua i to tatou ngakau. Auraka rava e poka i te paruru i te au puapii pikikaa. E noo ma te matakite e te aere maira to Iehova ra. E kia akarongo ua rai ki te tuatua totou a te Atua.

[Pia/​Tutu i te kapi 31]

Titiriia ki Roto ia Tateraiti: “Kare [Iehova] i tapupu mai mei te akautunga anga i te au angera tei ara ra, inara, kua titiri ia ratou ki roto ia Tateraiti, te tuku anga ia ratou ki roto i te au vaarua poiri o te po ra tei akonoia no te akava anga.” (2 Petero 2:4, NW) Kare teia Tateraiti i te manako ua tei komonoia i roto i to Homer Iliad ei ngai i raro ake i te enua, i te ngai i tapekaia te au atua pikikaa e te aite koreia ko Cronus e tetai pae au vaerua Titan. Te Tateraiti i roto i te Puka Tapu ko te tu turanga o te ngai taakaakaia mei te are tapeka anga rai, te ngai i titiri ei te Atua i te au angera akarongo kore i to Noa tuatau. (Genese 6:1-8; 1 Petero 3:19, 20; Iuda 6) Kua tupu mai te “poiri o te po” mei to ratou tipu keia anga mei te marama i te pae vaerua o te Atua ei aronga akatakakeia mei tona ngutuare tangata. Ei aronga akaputuia no tana akavaanga pakari, e akaraanga poiri ua to ratou. E akakite anga ua te reira no te tapeka anga ta Satani e tana au temoni ka kite i mua ake ka akamata ei te Tauatini Mataiti Tutara Anga a te Mesia. Ka tupu to ratou akapou anga i muri ake i to Iesu Tauatini Mataiti Tutara Anga.​—Mataio 25:41; Apokalupo 20:1-3; 7:10, 14.

[Tutu]

Titiri a Zeus i te au atua rikiriki ki roto i tetai Tateraiti tei manako uaia

[Akameitakianga]

National Archaeological Museum, i Athens, Ereni