E Aaere Tamou na te Marama e te Aroa
Te au Akataka Anga a Tai Ioane
KO Iehova te Tumu o te marama e te aroa. Kia akara tatou ki te Atua no te marama i te pae vaerua. (Salamo 43:3) E ko te aroa tetai i rotopu i te au ua o tona vaerua tapu.—Galatia 5:22, 23.
Te marama, te aroa, e tetai atu au mea ka uriuriia te reira i roto i te reta mua a te apotetoro ko Ioane tei akauruia, te akaraanga e kua tataia i roto me kore i te pae ia Ephesia vaitata i te 98 T.N. Tetai tumu maata i tataiaʼi te reira ko te paruru i te au Kerititiano mei te akaruke anga i te akarongo e te tauturu ia ratou kia tamou i te aaere na te marama. I te mea te aro nei tatou i te au akaao anga ki to tatou tu aroa, te akarongo, e te tiratiratu ki te tuatua mou, papu e ka puapingaia tatou mei te uriuri anga i teia reta.
‘Aaere na te Marama’
Kua akapapu a Ioane e kia aaere te au Kerititiano akono meitaki na te marama i te pae vaerua. (1 Ioane 1:1–2:29) Kua tuatua aia: “E mārama te Atua, e kare rava e poiri [kare e mea kino, tau kore, tika kore, me kare tapu kore] o roto iaia.” No te mea i te au Kerititiano akatainuia ki te vaerua e ‘aaere ra na te marama,’ e “tau anga” ta ratou ki te Atua, te Mesia, e tetai ki tetai. Pera katoa kua tamaia ratou mei te tu ara e te toto o Iesu.
Noatu e e au Kerititiano akatainuia tatou ma tetai manakonakoanga no te rangi me kore te akara ra tatou ki mua ki te oraanga mutu kore i runga i te enua nei, ka rave ua atu rai tatou kia puapinga mei te atinga o Iesu me aroa anake ua tatou i to tatou au taeake kare i to teianei ao. Kia kopae katoaia tatou mei te akakeuia anga e te aronga tei akaruke i te akarongo, mei te “Akakakore Mesia ra,” tei pikikaa i te Metua e te Tamaiti. E auraka rava tatou e akangaropoina e ka mataora uaia te oraanga mutu kore e te aronga te kapiti atura ki te tuatua mou e te taangaanga ra i te tuatua tika.
Akaari te Tamariki a te Atua i te tu Aroa
I muri mai kua akakite a Ioane i te tamariki a te Atua. (3:1–4:21) Okotai mea, te rave ra ratou i te tuatua tika ra. Te akarongo katoa ra ratou i te akauenga a te Atua ko Iehova ‘tei ia ratou te akarongo na roto i te ingoa o tana Tamaiti ko Iesu Mesia, e te aroa ra tetai e tetai.’
Tetai ua atu tangata i “kite i te Atua” kua kite aia i to Iehova au akakoroanga e akapeea Tona aroa i te akaariia anga. Ka tau kia tauturuia teia peretana kia akaari i te tu aroa. E tikai, “ko tei kore e aroa ra, kare ïa i kite i te Atua; ko te Atua oki te aroa.” Kua akaariia te tu aroa no te atua mai i to te Atua “tono [anga] mai i tana Tamaiti ei tarangaara i ta tatou nei ara.” I te mea kua aroa maata mai Iehova ia tatou, te anoanoia ra tatou kia aroa tetai e tetai. Ae, tetai ua atu e tuatua ra e te aroa ra i te Atua kia aroa katoa i tona taeake i te pae vaerua.
Ko te Akarongo i ‘Vi ei Teianei Ao’
Te akakeu ra te tu aroa i te tamariki a te Atua kia aru i tana au akauenga, inara na roto i te akarongo e ‘vi ei ratou i teianei ao.’ (5:1-21) No to tatou akarongo ki te Atua, ki tana Tuatua, e ki tana Tamaiti i raukaʼi ia tatou i te ‘vi i teianei ao’ na te kopaeanga i te au manako e te au mataara tarevake e na te akonoanga i ta Iehova au akauenga. Kua oronga mai te Atua ki te ‘aronga vi i teianei ao’ i te manakonakoanga o te oraanga mutu kore e te akarongo ra i ta ratou au pure te rotai ra ki tona anoano. No te mea tetai ua atu “ta te Atua i anau” ra kare ia e rave putuputu ana i te ara, kare a Satani e mou piri ki runga i teia tu peretana. Inara te aronga akatainuia e te au tavini o Iehova e manakonakoanga to ratou no te enua kia akamaara ratou e ‘te vai nei to te ao ravarai i raro ake i te vaerua kino.’
[Pia/Tutu i te kapi 29]
E Atinga Tarangaara: A Iesu “koia oki te [atinga, NW] tarangaara i ta tatou nei ara [te aronga akatainuia]; kare oki i ta tatou anake ra, i ta to te ao katoa nei ra,” te toenga o te tangata nei. (1 Ioane 2:2) Tona matenga e “tarangaara” (Ereni, hi·la·smosʹ, te aiteanga “ei ravenga akamerengoanga” tetai “tapoki anga ara”) inara kare e ko ta te Atua ravenga te reira no te akameitakianga i te au manako ngakau taitaia. Inara na te atinga o Iesu i akamerengo me kore i merengo, i te au maro anga no te akavaanga no te atua mai. Akapeea? Na te orongaanga mai i te tango tuatua tika e te tika no te akakoreanga i te ara, e raukaʼi i te Atua “kia tika tana tuatua, ka akatika mai ei aia i te tangata [tei iri mai te tu ara] i akarongo ia Iesu ra.” (Roma 3:23-26; 5:12) Na te orongaanga mai i te ravenga no te akatupuanga i te merengo anga ki katoa no te au ara a te tangata nei, kua akatupu to Iesu atinga i te tarangaara, me kore te marekaia no te tangata nei kia kimi e te ariki i te akaoki anga mai ki te pirianga tau kia Iehova. (Ephesia 1:7; Ebera 2:17) Mei teaa i reira tatou katoatoa kia akameitaki no teia!