Au Orama Umere te ka Akaketaketa i te Akarongo

Te au Akataka Anga a Apokalupo

E TAVINI o Iehova ko Ioane tei runga aia i te enua meangiti ko Patamo, tei te tua opunga i te tapa taatai o Atia Meangiti. I reira oki teia apotetoro kua ruau i kite ei i tetai au mea vavaria​—akaaiteia, etai taime tuke ua ake rai, aiteanga puapinga ra! Kua aere mai oki aia ki te ra o te Atu ra, tei akamata mai mei to Iesu akakorona angaia i te mataiti 1914 e tae ua atu ki te openga o Tona Tauatini Mataiti Tutara Anga. Noatu kua kite a Ioane i te au mea tei tupu te ka apai atu i to te iti tangata ora poiri rava atu, mei teaa atura te umeremere i tana i kite mamao i te Tauatini Mataiti Tutara Anga a te Mesia! Ka rekareka tikai te iti tangata akarongo i te au akameitaki anga a te reira taime!

Kua papa a Ioane i teia au orama i roto i te puka Puka Tapu ko Apokalupo. Kua tataia i te mataiti 96 T.N., ka akaketaketa te reira i to tatou akarongo i roto i te totou a te Atua, ko Iehova, e tana Tamaiti, ko Iesu Mesia.​—No te au akamaramaanga, akara i te puka Revelation​—Its Grand Climax At Hand!, tei neneiia e te Totaiete Punanga Tiaki Anga Puka Tapu e te Pepa Akonoanga o New York, Taokotaiia.

Kua Oronga te Mesia i te Ako Aroa

I mua rava i te Apokalupo mei te Atua na roto i te Mesia kua kitea te au reta ki te nga akaputuputu anga e itu ra o te au taeake tuanga ki te Patireia o Iesu. (1:1–3:22) Te katoa anga, te oronga mai nei te au reta i te akamaroiroi anga, akakite i te au manata, kia oronga i te akatikatika anga e/me kare akamaroiroi anga, e kua akakite i te au akameitaki anga tei rauka no te mea kua akarongo tikai. Noatu e kua akakoromaki te au Ephesia, kua akaruke ra ratou i to ratou inangaro mua. Te putuputu anga apinganui i te pae vaerua ko Semurina kua akamaroiroia ki roto i te akarongo noatu te tumatetenga. Kare oki te takinga kino anga i autu atu ki te putuputuanga o Peregamo, inara kua tuku ua i te tu pae ke. Noatu oki te angaanga maata mai a te au Kerititiano i Tuatira, te tu ia Iezebela te vai ra i reira. Ka anoanoia oki te putuputu anga o Saradi kia ara i te pae vaerua, e ko Philadelaphia kua raurauia aia kia mou ki tana i rauka, e ko te au Laodikea maanaana ka anoanoia kia meitaki i te pae vaerua.

E au tuatua meitaki teia no te akamatauanga ki mua i te au ariki o te rangi ra​—e tika katoa, no te Kerititiano katoatoa! Ei akaraanga, me i riro ana etai ia tatou kia maanaana ua? Ka angaanga i reira! Kia riro ei kapu vai anu akamaroiroia i te ra vera e pera katoa kia akamata i te akaari i te toto mapu vera no Iehova e tana angaanga.​—Akaaiteia atu kia Mataio 11:28, 29; Ioane 2:17.

Kua Vai te Punua Mamoe i te Pokaikai Tuatua

I reira kua kiteaia atu a Iehova i runga i tona terono ma te kaka. (4:1–5:14) Kua koropini ia aia e 24 aronga pakari e e a nga mea ora ra. E pokaikai tuatua tei topiriia ma te itu au akairo tei roto i tona rima. Koai tei tau kia vai i te pokaikai tuatua? Te Punua Mamoe ia, ko Iesu Mesia, tei tau meitaki kia pera!

E au tupuanga umere tei oora mai i te vai anga te Punua Mamoe e ono o te nga akairo. (6:1–7:17) I te vai angaia te akairo mua, kua mama mai te Mesia no runga i tetai oroenua teatea, e tei akaoro i te reira kua orongaia e korona nona (i te 1914) e kua aere atu kia upokotu atu. I te vai angaia e toru akaou au akairo, kua apai mai tetai aronga akaoro oroenua i te tamaki, te onge, e te mate ki te iti tangata. I te vai angaia te rima o te akairo, te aronga tei mate no te akarongo i te Mesia kua kapiki maata atu no te tupau i to ratou toto, e kua orongaia e takitai “i te kakau teatea,” tei kapitiia ra ki te turanga tuatua tika te piri atu ki to ratou tuakaou anga kia riro ei mea vaerua ora mate kore ma te au akameitaki anga ngateitei. (Akaaiteia atu kia Apokalupo 3:5; 4:4.) I te vai angaia te ono o te akairo, te ra riri o te Atua e te Punua Mamoe kua akakiteia na roto i te ngaruerue enua. Kua tapuia ra te “nga matangi e a o te enua,” (NW) tei akatutu mai i te akava anga akapou, kia topiriia te au tavini o te Atua e 144,000. Me akatainuia ratou e te vaerua o te Atua e kia akatamarikiia ei au tamariki vaerua, kua rauka i reira tetai akairo i mua ake​—e akairo anga me kore e tia—​no to ratou tuanga i te rangi ra. I muri ake i te timataanga ka vai tamou rai te topirianga. (Roma 8:15-17; 2 Korinetia 1:21, 22) Kua poitirere oki a Ioane i te kite anga i te “urupu maata” (NW) tei aere mai mei te au iti tangata​—e pupu maata ma te manakonakoanga no te oraanga mutu kore i roto i te enua parataito! Kua aere mai oki mei roto i “te tumatetenga maata” (NW), te tuatau manamanata aiteite kore ia no te tangata nei.

E au tupuanga umere tikai tei tupu i te vai angaia te itu o te akairo! (8:1–11:14) E apa ora muteki, kia rongoia te au pure a te aronga tapu, aru atu i te reira te titirianga i te ai mei te atarau ki te enua. E itu au angera kua akateateamamao i te akatangi i te au pu te akakiteanga i te au mate ki runga ia Kerititome. Kua akatangiia te au pu i roto i te katoa o te tuatau o te openga e tae ua mai te tumatetenga maata. E a pu tei akakite i te au mate ki runga i te enua, te tai, te au vairangi vai inu, e te ra, te marama e te au etu. Te akatangi anga i te rima kua kapiki te reira i te au tapaki tei akatutuia ki te au Kerititiano akatainuia i te aereanga kia rave i te tamaki mei te 1919 mai. I te akatangi anga i te ono o te pu, e nuku vaeau tei kai tamaki atu. I roto i te tupuanga o te reira, te aronga akatainuia tei akamaata ia mai mei te 1935 e te “urupu maata,” kua akakite i te au tuatua akava tamamae ki rungao i te au arataki akonoanga o Kerititome.

I muri ake kua kai a Ioane i te pokaikai tuatua meangiti, tei akakite mai e kua ariki tei akatainuia i te angaanga e kia tiki atu i te au meitaki mei te tuanga o te Tuatua a te Atua tei reira te au akakiteanga o te au akava anga no te Atua mai ta ratou ka akakite atu ki to Kerititome. Kua akaueia te apotetoro kia vaito i te ngai tapu o te iero, tei akatutu mai i te tupu anga o etai a to Iehova au akakoroanga no te rave angaanga i te iero e te au kaveinga na te Atua kia aruia e te aronga tei kapiti atu ki te reira. I reira kua totou te nga “kite e rua” (NW) o te Atua tei akatainuia e tei roto i te kakaupaoa kua tamateia inara kua akatuia. Kua tou teia ki te 1918-19, i te kitea anga e ko ta ratou angaanga tutu aere mei te mea rai e kua tamateia e tei arai mai, inara kua akaora maroiroi a Iehova i tona au tavini no ta ratou angaanga orometua.

Kua Anau te Patireia!

Te akatangianga te itu o te pu kua akakite te reira i te anau anga o te Patireia. (11:15–12:17) I runga i te rangi e vaine tei akatutuia (te akaaerenga a te Atua ko Iehova i te rangi) kua anau te reira i te tama e tamaroa (Te Patireia o te Atua ko te Mesia te Ariki), inara te taae maata ko (Satani) kua tauta kare ra i rauka kia akakore i te reira. Te turanga teitei o te tamaki i te rangi aru mai i te anau anga o te Patireia i te 1914, ko Mikaela tei autu koia a (Iesu Mesia) kua titiri i te taae maata e tana au angera ki runga i te enua nei. E i konei te akatupu tamaki nei rai te taae maata ki rungao i te toenga o tei akatainuia o te uanga a te vaine i te rangi ra.

Aru mai i te reira kua kite atu a Ioane i tetai puaka taae tei angaia mai tetai akatutuanga rikarika. (13:1-18) Ko teia puaka taae poritiki e itu ona mimiti, e tai ngauru ko, kua tupu mai te reira mei raro i “te tai” (NW) te turori anga o te au mea mei te tangata te ngai i raukai te kavamani. (Akaaiteia atu kia Daniela 7:2-8; 8:3-8, 20-25) Noea mai ra te puna o te mana o teia mea ora tei akatutuia? Kare atu e ngai mari ra na Satani, te taae maata! E tamanako ua ana! Ko teia puaka taae porotiki rikarika e rua ko te taae e rua ona mimiti (ko Peritane e Marike te Mana Tutara) kua kitea te reira i te maani anga i tetai “tutu,” tei matauia e ko te Taokotaianga Enua. E manganui tei oparaia kia akamori i te puaka taae e kia ariki i tana “akairo” e ia ratou e rave nei i te au mea na teia mataara te akatika ra ratou kia akaaere i to ratou oraanga. Inara kua kopae pakari te au Kite o Iehova i te akairo tu temoni o te puaka taae!

Kua Rave Angaanga te au Tavini o Iehova

E tukeke te au tavini o te Atua tei kitea e te angaanga ra i te riringi angaia te itu o te kapu o tona riri ki vao. (14:1–16:21) Akarongo ana! I runga i te Maunga ko Ziona i te rangi ra, kua akarongo a Ioane i te 144,000 te imene ra mei te mea ra e e imene ou. E angera te rere ra i te mareva ma te tuatua meitaki kia akakiteia ki te au tangata o te enua nei. Eaa ta teia i akaari mai? Koia oki e tauturu to te au Kite o Iehova ko te au angera te akakitekiteanga i te tuatua o te Patireia.

Kua umere tikai a Ioane i te kite i te rara vine o te enua i te kokoti angaia e te au pa enua ravarai i te roromi angaia e te taviri uaina o to te Atua riri kia takatakaiia. (Akaaiteia atu kia Isaia 63:3-6; Ioela 3:12-14) I ta Iehova akauenga, i reira kua riringi te nga angera e itu i te nga kapu e itu o te riri mei te Atua mai. Te enua, te tai e te au ngai vai inu pera katoa te ra, te terono o te puaka taae, e te Kauvai Eupharati, kua taea katoa ia i te riringi angaia te nga kapu e ono ra. Tamanako ana i to Ioane rere aere ua iaia e kite nei i te akapaapaa anga a te au Temoni i te akaputuanga i te au ariki tangata nei ki te tamaki a te Atua ko Aramakito. Tei tupu e mea rikarikaanga ia mei te riringi anga o te itu o te kapu ki vao i runga i te mareva.

Te Nga Vaine e Rua Tei Akatutuia

E mea papu rava e kua poitirereia a Ioane i te kite anga i te openga o Babulonia Maata, te akonoanga atua pikikaa o to te ao katoa, e kia kite i te ravenga rekareka tei aru mai i tona akapouanga. (17:1–19:10) Kua kona oki aia i te toto o te aronga tapu, e kua kitea ia aia tei runga i te puaka taae muramura e itu mimiti e e tai ngauru ko (te Kapitianga Enua e tona mono, te Taokotaianga Enua). E akapou anga takore tikai te ka tae kiaia me anga atu te au ko ki runga iaia!

Kua rongoia te au reo mei te rangi i te akapaapaaanga ia Ia? no tei takore atu ia Babulonia Maata. E aruru maata i te akameitaki anga no te akakite i te akaipoipo anga o te Punua Mamoe e tana vaine akaipoipo, te aronga akatainuia tei akatuia mai!

Kua Autu te Mesia e Kua Tutara

I teianei kua kiteaia atu te Ariki o te au ariki te arataki nei te nuku vaeau o te rangi ki roto i te akapouanga o ta Satani akatereanga o te au mea nei. (19:11-21) Ae, kua kite atu a Ioane ia Iesu, te “Tuatua a te Atua” (NW), te tamaki ra ki te au enua. Kua kite atu te apotetoro i te puaka taae (te akatereanga poritiki a Satani) e te peroveta pikikaa (te Peritane Marike Mana Tutara o te Ao) te uriia anga ki roto i te “roto ai,” tei akatutu i te akapouanga mutu kore takiri.

Eaa tei aru mai? I na, kua kite a Ioane i te tiria ia anga a Satani ki te vaarua takere kore. Mei reira te akara anga atu i te Tauatini Mataiti Tutara Anga a te Mesia, i reira a Iesu e tona au tutara kapiti tei akatuia ei akava i te tangata ravarai, te apai anga mai i te aronga akarongo ki te tu tangata apa kore! (20:1-10) Ko teia te tuatau no te timata anga openga. Matara anga mei te vaarua, ka aere atu a Satani kia pikikaa akaou i te iti tangata apa kore, inara e akapouanga te ka tae mai ki te turanga o te temoni katoatoa e te au tangata patoi i te Atua.

Te oki anga i roto i te tuatau, te umeremere nei a Ioane i te kite i te katoatoa i te aronga i roto i te mate, ia Ate (te vaarua tanumanga o te tangata), e te tai kua akatuia e kua akava ia i mua i te Atua, te noo ki runga i te terono maata teatea! (20:11-15) Ka autu te aronga tuatua tika e ka rekareka me uriia te mate e Ate ki roto i te roto ai, kare rava e rauka akaou tetai na ratou!

Kia tae mai a Ioane ki te openga o tana orama, kua kite atu aia ia Ierusalema Ou. (21:1–22:21) Ko te reira oire e akatere anga kavamani kua kitea i te ekeanga mai mei te rangi mai e i te apaianga mai i te akakaka anga ki te au pa enua. Te tae mai nei na roto ia Ierusalema Ou tetai “kauvai e vai ora” (NW), tei akatutuia ki te Tuatua Tapu tika e te au mea katoa tei akatumuia ki runga i to Iesu atinga no akaora mai i te au tangata akarongo mei te ora e te mate e ka oronga ei kia ratou e oraanga mutu kore. (Ioane 1:29; 17:3; 1 Ioane 2:1, 2) I te pae o nga tua o te kauvai, kua kite a Ioane i te au pu rakau e rapakau maki te au rau, tei akatutu mai i tetai tuanga o ta Iehova akameitakianga kia orongaia kia rauka te ora mutu kore i te iti tangata akarongo. Te au tuatua akaoti mei te Atua e te Mesia kua taruaia e tetai patianga. E meitaki tikai kia akarongo atu i te vaerua e te vaine akaipoipo i te pati atu i te katoatoa tei kaki i te vai kia ‘aere mai, ka rave ua mai i te vai ora’! E ia tatou e tatau i te au tuatua akaoti ia Apokalupo, kare e ekoko te aiteite nei ta tatou maeva anga ki ta Ioane: “Amene. . . . Ka aere mai, e te Atu, e Iesu.”

[Pia/​Tutu i te kapi 21]

Kia Noo Araara Ua: I rotopu i te au tuatua totou no runga i te tamaki a te Atua ko Aramakito, kua tuatuaia e: “I na, te aere atu nei au [a Iesu Mesia] mei te keia ra. E ao to te tapapa e te tiaki marie i tona kakau, kia kore aia e aere taaka ua, e kua kite atura te tangata i tona akama.” (Apokalupo 16:15) Penei kua tau teia akatutu anga ki te au angaanga a te au tiaki, me kare opita o te iero te maunga i Ierusalema ra. I te tuatau tiaki, ka aere aia na roto i te iero kia kite me te ara ra te au kati Levi me kare te moe ra i to ratou au ngai tiaki. Me kitea tetai kati te moe ra, ka taii aia i tetai takinga kino anga akama. E ia Aramakito e vaitata mai nei, te toenga o tei akatainuia, o te “kautaunga tiratiratu” (NW), me kare te “are vaerua,” ka tauta kia noo araara ua i te pae vaerua. Mei te reira rai te au taeake kapiti, te “urupu maata,” e manakonako anga enua to ratou, no te mea te oronga katoa nei ratou i te angaanga tapu ki te Atua i te iero ra. (1 Petero 2:5, 9; Apokalupo 7:9-17, NW) Koia tika rai te aronga Kerititiano tiaki kia noo ua rai kia tiaki kia kore tetai au mea kino e tupu mai i roto i te putuputuanga. No te mea te noo ara ua nei ratou, te katoatoa rava o te aronga akamori tiratiratu i to te Atua iero vaerua ka vai rai to “vao kakau ra,” tei akaari mai i ta ratou angaanga ngateitei ei au Kite no Iehova.