Kare e Roa Kare e Maki Akaou me Kore te Mate!

KARE tetai ua atu e reka ana i te maki, kare katoa te tangata e inangaro ana kia mate aia. Kua tuatua tetai tangata kite o te vairakau e te tu tangata: “Te kimi anga no te oraanga roa te akaraanga e i teianei ao e pini ua ake i te au tuatua enua i aereia mai e i roto i te maata anga o te au totaiete. Kua piri atu te reira ki te anoano tumu uaorai o te akaora anga . . . ko Ponce de Leon anake ua tei rongonui rava atu o te au tangata tei akapou i tona taime no te kimi i te oraanga kia roa atu. Te maata anga o te au kimi anga kite i te pae o te vairakau kua akatapuia te reira no te akonoanga i te oraanga kia roa na roto i te tamakianga atu i te au maki kikino e te mate.”

Te maata anga o te taime te akatupu ra te matenga i te mamae ki roto i to tatou tu natura e me rokoia ake te reira ki to tatou au taeake e te au mema o te ngutuare tangata, ka tauta tatou i te rave natura i te tameangiti mai i tona raveanga. Kua akara te puka Funeral Customs the World Over: “Kare atu e pupu, noatu te taito ra tikai i tetai tua e te ou ra i tetai tua, te akaruke iaia uaorai e kia rauka ua i te reira, kare ia e akapae atu i te au kopapa o tona au mema ma te tetai akono anga. . . . Te akamerengo ra i te au raurau anga oonu i teianei ao e pini ua ake. Te rave atu i te reira te akaraanga e e mea ‘tau,’ e te kare e rave i te reira, te aronga tikai tei piri atu ki te ngutuare tangata, te manako ngakau, te noo kapiti anga, te au kite anga matauia me kore tetai atu au tapeka anga, te akaraanga e kua ‘tarevake,’ ko tetai akaruke anga natura kore, e mea te ka tau kia tuatua tataraara atu me kore kia akamaia. . . . E mea te [tangata] tei tanu i tana mate ma tetai akono anga.”

Te Akamata Anga o te Maki e te Mate

Ko te manako anga e ka takoreia te maki e te mate a tetai ra, e patianga ririnui teia, inara e tumu ainei tetai no teia tu irinaki anga? E tikai, te vaira, e te tau meitaki ra, te papu ra, e kare e pikikaa. Ko te Tuatua akauruia a Tei Anga ia tatou​—ko te Puka Tapu.

Te akamarama papu maira te reira puka i te akamata anga o te au taitaia o te tangata. Te akakite maira kia tatou i te tangata mua, ia Adamu, e kua angaia e te Atua e kua tukuia ki roto i tetai kainga parataito i tetai ngai i te tua Itinga Ra i Rotopu. Kua angaia a Adamu ma te tiama; kare aia i kite i te maki e te mate. Kare i roa kua piri mai tetai vaine tiama aiteite kiaia e kua rekareka kapipiti raua i te manakonakoanga o te ora mutu kore i te enua nei.​—Genese 2:15-17, 21-24.

Kare teia turanga manea i roa ana. No teaa ra? No te mea kua iki noinoi ua a Adamu i tetai oraanga na te mataara tei takake mai i te Atua. Te angaanga pakari, te mamae, te maki, e i te openga kua tupu te mate. (Genese 3:17-19) Kua iri mai te tu oraanga mataora kore ta Adamu i iki ra ki runga i tana uanga. Te akamarama maira a Roma 5:12: “E teianei no te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” Kua tapiri atu a Roma 8:22: “Kua kite oki tatou e, te ngunguru anake nei te au mea katoa i angaia mei te mamae anau ra e tae rava akenei i teianei rā.”

I te Enua Ainei me Kore i te Rangi?

Noatu rai, te akapapu maira te Puka Tapu kia tatou e kare e roa ka akaoki mai te Atua i te au tangata akarongo ki te turanga mataora ta Adamu raua ko Eva i ngere. Kua karanga a Apokalupo 21:3, 4: “E e noo te Atua ki rotopu ia ratou, ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” E aiteite rai ta tetai peroveta i taito ra i kite i te tuatau “kare oki to reira e karanga e, Kua maki au.”​—Isaia 33:24.

Ka rauka ainei ia koe i te tamanako i tetai ao ma te kore e are maki, te au motuari, e te au menema? Ka rauka ainei ia koe i te akamanako te nooanga e tuatau ua atu, te matara anga mei te kino o te mamaeanga e te mate? Ae, te pakia ra to tatou au manako ngakau oonu i roto ia tatou katoatoa no ta te Atua taputou. Inara, akapeea tatou e papu e ko teia manakonakoanga manea no to tatou paraneta ko te Enua​—kare no te rangi? Ka akara ana i te putunga tuatua o te au irava tei taiku takereia atu. Te tuatua ra te au irava mua o Apokalupo pene 21 no “te rangi ou e te enua ou.” Kua tukuia te tuatua papu e ka vai te Atua ki te tangata nei e ka riro ratou ei iti tangata nona. Te taputou i roto i te puka a Isaia e kare tetai ua atu e maki tei aru mai i te reira ko te tuatua ki ‘te au tangata e noo ra i te enua,’ tei “apai keia ta ratou au ara.”

No reira te tuatua ra teia au taputou akamaroiroi i te oraanga i te enua nei! E te rotai ra ki ta Iesu pure ki tona Metua: “Kia tupu toou anoano i te rangi, pera katoa i te enua nei.”​—Mataio 6:10, NW.

Eaa ka Vave Ei?

Kua tauturu te au Kite o Iehova i te mirioni ua atu kia kite e ka akatupuia teia au taputou i te tuatau ki mua. Inara no runga i teea tumu, ka manako papu ei ratou i teia? I runga i te tumu o te tika maata e te noo nei tatou i roto i “te au ra openga” o te akatereanga i teianei, me kore te akanoo anga, o te au mea i te enua nei. (2 Timoteo 3:1-5, NW) Kua ui te au pipi a Iesu no tetai akairo e aea te openga o te au mea nei. Te ariu anga atu kua akakite tikai a Iesu i te au raveanga e tupu viviki nei i teianei ao tei tupu ana mei te akamata anga o te Tamaki Mua o Teianei Ao i te 1914.a E oti kua tapiri atu aia: “Koia katoa kia kite kotou i taua au mea katoa nei, kua vaitata ïa, tei te pae ngutupa, kia kite oki kotou. Koia mou taku e karanga atu kia kotou na, Kare e ope teianei uki, e ope ei teianei au tuatua ravarai i te tupu.” E no reira, ka kite etai uki tei ora ra i te 1914 i te openga o teia nei akatere anga i te ao katoa.​—Mataio 24:33, 34.

Ka akaunga te Atua ko Iehova i tana Tamaiti, ko Iesu Mesia, kia aere kia takore i te au mea ravarai tei akatupu i te mamae e te taitaia mei runga i teia paraneta manea ko te Enua. Kua tuatua te Puka Tapu no te takore anga i te kino e ko “te tamaki i taua rā maata o te Atua mana katoatoa ra” ia Aramakito.​—Apokalupo 16:14, 16.

Te maata anga o te au tangata tei mataku i te Atua ka ora atu i teia tupu anga umere e ka ora atu i te kite i te tutara anga au a Iesu Mesia i te akamata anga. (Apokalupo 7:9, 14; 20:4) Noatu e no te rangi mai tana tutara anga, ka rekarekaia tana au tupuanga puapinga e te aronga katoatoa te noo ra i te enua nei​—te aronga tei ora mai i te tamaki o Aramakito e te au mirioni e mirioni ua atu te ka akatuia mai mei te mate. Ka riro i reira te taputou ei tika: “E iaia [te Mesia] oki te au, e kia ope rava te au enemi katoa i te tukuia e ia ki raro ake i ona vaevae. E taua enemi openga ra, ko te mate, e akakoreia ïa.”​—1 Korinetia 15:25, 26.

No reira ka papu ia tatou i te tuatua: “Kare e roa kare e maki akaou me kore te mate!” Kare teia i te manakonakoanga maani ua, kare katoa ia i te manakoanga inangaro ua. E taputou papu teia na te Atua ko Iehova, “ta te kore e tika kia pikikaa.” Ka tuku ainei koe i toou irinaki ki roto i teia manakonakoanga? Ka puapingaia koe e mutu kore ua atu!​—Tito 1:2.

[Au Tataanga Rikiriki i Raro]

[Tutu i te kapi 7]

Te maki e te mate kare e roa ka komonoia te reira ki tetai oraanga oraora e te ora mutu kore