Te Au Mapu Kerititiano​—Kia Ketaketa i Roto i te Akarongo

“KIA tae mai te katoatoa.” Ko te reira te tuatua akakite anga. Kua anoanoia te au tamariki apii katoatoa i roto i tetai apii i Tiapani ki tetai akaputuputuanga noa ua nei i roto i te otitoriomi. Kare tetai mapu apii Kerititiano i akatika ki tetai o te au manako i roto i te imene a te apii. “Ina,” i manako ei aia “kua kite au e ka akatangiia te imene a te apii. Inara kare e manamanata. Ka noo ua au ki muri mei tei matauia.”

Te tomo anga te mapu e Kite no Iehova ki roto i te otitoriomi, kua kite aia e te noo ra te au mema pouroa o te apii ki te pa noo anga i muri. No reira, kua noo aia ki mua ia ratou. Te tu anga tetai atu au tamariki apii ki runga no te imene a te apii, kua noo ua aia ki raro ma te tau. Inara kua riri te au puapii i teia. Kua tauta pakari tikai ratou i te maro iaia kia tu. Ka rauka ainei ia koe i te akamanako ia koe uaorai i roto i te reira turanga? Eaa taau ka rave i reira?

Eaa ka Anoanoiaʼi te Akarongo Pakari

E mea memeitaki me ka akaruke ua te au tangata i te au Kerititiano e te tuku ua ia ratou kia noo i tau ki to ratou uaorai akava ngakau tei akamatauia e te Puka Tapu. Inara, e maata te taime, ka aro atu te au Kerititiano i te au turanga taitaia. Kare teia e tapoitirere ia tatou, no te mea kua tuatua te Tamaiti uaorai a te Atua: “I takinga-kino ana ratou iaku ra, e takinga-kino katoa ratou ia kotou.” (Ioane 15:20) I te pae i te takinga kino pu ua, te aro atura te au tavini o Iehova i te au timata anga tukeke o te akarongo.

E maata te taime te anoano ra te au mapu Kerititiano i te akarongo pakari no te aro atu i te au timata anga tei araveiia i te apii. Penei ka maroia atu ratou ki roto i tetai piri anga ma te au taeake apii te taangaanga ra i te au reo viivii me kore te au tu kare e akangateitei ra i te Atua. Penei ka aro atu te au Kerititiano ki te au akatumu anga maata ki runga i te akapaapaa pa enua e te taomi anga kia o atu ki roto i te au karapu, te poritiki i te apii, me kare tetai atu au angaanga te ka riro ei takino anga i te pae vaerua. Penei ka tauta te au puapii me kore te au taeake apii i te tuku i te taomi anga ki runga i te au mapu Kerititiano kia oki i te aati i ta ratou taputou. No reira, kia irinaki te au mapu tu atua ki runga i te vaerua o Iehova no te akarongo te ka anoanoia no te oronga mai i tetai paruru anga papu i to ratou manakonakoanga.​—Mataio 10:19, 20; Galatia 5:22, 23.

‘Kia Papa i te Oronga Atu i Tetai Pauanga’

Te tau ra ta te apotetoro ko Petero ako no te au Kerititiano mapu e te mamaata. Kua tuatua aia: “[Kia] papa ua rai i te oronga atu i tetai pauanga ki mua i te katoatoa tei maro mai ia koe i te tumu no te manakonakoanga mei ia koe na, inara te rave kapiti anga ma tetai tu maru e te kauraro oonu.” (1 Petero 3:15, NW) Eaa te ka tupu kia papa ei no te oronga atu i teia pauanga? Te mea mua, kia marama koe i ta te au Tuatua Tapu e apii maira. Te rave i tetai turanga ketaketa i te apii no runga i te au mea mei te akapaapaa pa enua, te poritiki, te takino anga apinga akakona, me kore te au tu akono, kia marama koe na mua i te tumu no te turanga o te Kerititiano e kia irinaki tikai i te reira.

Ei akaraanga, kua akakite te apotetoro ko Paulo ki te au taeake Kerititiano: “Auraka e akavareia. Te takino ra te au piri anga tau kore i te au tu memeitaki.” (1 Korinetia 15:33, NW) Te akatika ainei koe i te reira? Mei ta Paulo i akakite, e mea ngoie ua kia arataki keia i roto i te piri anga taeake. Penei ka akaraanga oaoa tetai peretana e te akatika ua. Inara me kare aia e piri mai ki taau manako anga i te angaanga a Iehova me kare te irinaki i te au taputou a te Puka Tapu, e taeake tau kore aia. No teaa ra? No te mea kua akatumuia tona oraanga ki runga i te kaveinga tukeke, e te au mea puapinga rava atu ki tetai Kerititiano penei e mea meangiti ua kiaia.

Kare teia i te mea poitirere, no te mea kua tuatua a Iesu i tana au pipi: “Kare ratou i to teianei ao, mei iaku nei rai oki, kare i to teianei ao.” (Ioane 17:16) Kare e rauka i tetai peretana kia riro mai ei Kerititiano mou e i taua taime rai ei tetai tuanga o teianei ao, koia oki ko Satani te atua. (2 Korinetia 4:4) Te kite ra ainei koe e akapeea teia tu takake anga mei teianei ao i te paruru anga i tetai Kerititiano mei te takino angaia e te taumaroro te tamanata ra i te manganui i teia ra? Me koia ia, ka rauka i reira ia koe i te marama e no teaa e kia tamou koe i toou tu takake anga, noatu e kare e rauka ia koe i te piri atu ki etai o te au raveanga a te apii.a

Kua akaariia mai te puapinga o te vai ketaketa anga i roto i te akarongo e te akonoanga i te au inangaro o te Patireia na mua i roto i te oraanga i tetai raveanga o tetai mapu tamaine Kerititiano. (Mataio 6:33) Te akakiteia anga tana apiipii karatuati anga, kua kite mai aia e ka raveia i te ra tikai o te akaputuputuanga kotinga a te au Kite o Iehova tana i akanoo no te aere atu. Kua tata aia i tetai reta ma te ngateitei i te akamaramaanga e eaa aia i kore ei e tae atu ki te apiipii anga e kua oronga atu ki tona puapii i mua ake i te pupu apii anga. I muri i te pupu apii, kua kapiki mai te puapii iaia e kua pati atu kia akamarama akaou mai e eaa aia i kore ei e tae mai ki te apiipii anga. Kua tuatua te tamaine: “Kua inangaro aia i te kite e me te aiteite ra rai taku au tuatua. Ko teia ainei toku manako, me e au tuatua anake ua teia na toku mama? Te kite anga i taku tuatua papu uaorai no runga i te reira, kare aia i patoi mai ana iaku.”

“Oronga atu i Tetai Pauanga ki Mua i te Katoatoa”

Te maata anga o te taime e kite ana te au mapu Kerititiano me rave ratou i to ratou turanga kia kite papuia te reira e te au mema o te apii e te au tamariki apii i mua ake ka tupu ei tetai maro anga, kare te au taomi anga e pakari rava ana me tupu ake te au manamanata no te aro atu. Kua akakite tetai mapu Kerititiano Tiapani e i tona 11 mataiti anga, kua umuumu tana apii e kia aere pouroa te au tamariki apii ki tetai tamataora anga Keritimeti. Kua tuku te au tamariki apii i te taomi anga ki runga iaia no te piri atu, inara kare aia i aere ana, e kua marama ua tona puapii i tona turanga. No teaa ra? No te mea i te akamata anga o te mataiti apii, kua aravei ana te Kite e tona nga metua i te puapii e te akamarama atu i te au tu tukeke i to ratou turanga ei Kerititiano.

Ia ratou e rave ra i te angaanga orometua, e mataku ana etai au mapu Kerititiano i te araveianga i to ratou au taeake apii me kare te au puapii. Te manako ainei koe mei teia? Me koia ia, kore i reira e rave i te mea tau te akakite i toou au taeake apii e e tutu aere ana koe mei tera are i tera are e eaa koe ka rave ei i te reira. Kua ripoti tetai Kite o Iehova e 14 ona mataiti: “Kua kite pouroa te katoatoa i te apii i toku turanga ei Kerititiano. E tikai, kua kite meitaki tikai ratou, e me aravei au i tetai o toku au taeake apii iaku e rave ra i te angaanga orometua, kare au e akama. Te maata anga o te taime e akarongo mai ana te au taeake apii, e manganui te taime e ariki ana ratou i te au puka Puka Tapu.” Kua ripoti tetai e 12 ona mataiti e e akara ana aia ki mua no te araveianga atu i tona au taeake apii me piri atu aia ki roto i te angaanga orometua. Kare aia i akama i te manako anga i teia, e apiipii tamou ua ana aia i tana ka tuatua me tupu ake te reira. No reira, te papa ua ra aia no te oronga i te au tumu tau no tona akarongo.

I te au apii e manganui, kua tuatuaia e e mea ikiia te au raveanga i muri ake i te ora apii. Inara te tika anga tikai, te tuku ra te au puapii e te au tamariki apii i te taomi anga maata ki runga i te aronga tatakitai no te piri mai ki roto i teia au raveanga. Kua kite mai tetai Kerititiano e 20 ona mataiti i tetai mataara meitaki no te autu atu i teia taomi anga. Kua tuatua aia: “Kua tavini au ei painia tauturu i toku mataiti katoa i te apii teitei. Kua kite pouroa te katoatoa e e maata rava taku angaanga i roto i taku angaanga akonoanga no te piri ki roto i tetai atu au mea.” Kua aru katoa rai te teina o teia Kite i teia kaveinga. E aere ana etai au mapu Kerititiano mei te angaanga painia tauturu i te tuatau o te au mataiti apii ki roto i te angaanga painia tamou ei aronga akakitekite i te Patireia tamou me akamutu ta ratou apii.

Auraka rava e akangaropoina i te au tu meitaki o toou tu akono memeitaki e taau akakite anga raumaiti. I te mea e ka muteki ua, kare te reira e akaari e te ketaketa ra koe i toou akarongo na te tuatua ngateitei anga ma te papu? Ko te reira tei raveia e tetai tamaine Iseraela tei opunaia e tei peke mai i te ngutuare tangata o te rangatira Suria ko Naamana. (2 Ariki 5:2-4) Kua akapaapaaia te ingoa o Iehova no te mea no te manako kite o te reira tamaine mapu. Mei te mea, e akarongo aiteite toou mei teia ka apai katoa mai i te akangateitei anga ki te Atua e penei ka tauturu atu i tetai pae no te tu atu ki to ratou turanga ei aronga akapaapaa i tona ingoa.

Te tika ra e kare e rauka ia tatou i te aati i ta tatou taputou no to tatou akarongo e kia vai rai ei au Kerititiano. Kua tuatua a Iesu: “Ko te katoatoa i reira, tei aaki ma te taokotai mai kiaku ra ki mua i te tangata ra, ka aaki ma te taokotai katoa rai au iaia i mua i toku Metua i te au rangi ra; inara ko tei akaruke iaku ra i mua i te tangata ra, ka akaruke katoa rai au iaia i mua i toku Metua i te au rangi ra.” (Mataio 10:32, 33, NW) Te tu ketaketa i roto i te akarongo ei pipi na Iesu e apainga tika tikai teia, kare ainei?

Te Vaira te Tauturu

E raukaʼi te tu ketaketa ei tetai o te au Kite o Iehova, ka anoano koe i te akarongo pakari. E raukaʼi te reira, kia aruaru koe i te apii i te Puka Tapu, kia aere ki te au uipaanga Kerititiano e te piri atu ki te angaanga orometua. Me te manako rai ra koe e te ngere ra koe i etai mea, eaa te ka rauka ia koe i te rave? Kua tuatua te pipi a Iakobo e: “Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai ma te patoi kore; e e orongaia mai tana.” (Iakobo 1:5) E tuatua kia Iehova na roto i te pure no runga i toou manamanata; nana e akamaroiroi mai ia koe no te aro atu i te au tamata anga me kare te au timata anga i toou akarongo.

Eaa atu te ka rauka i tetai mapu Kerititiano i te rave? Te akakite maira te puka a Maseli kia tatou: “E akarongo mai i to metua tane i anau ei koe ra, e auraka e akavaavaa i to metua vaine me ruaine aia ra.” (Maseli 23:22) Kua turu te apotetoro ko Paulo i teia ako, no te mea kua tuatua aia: “E te au tamariki e, e akarongo i to kotou au metua i te au mea katoa nei, e mea mareka te reira na te Atu.” (Kolosa 3:20) Ka rauka i te au metua Kerititiano i te tauturu ia kotou kia tu ketaketa i roto i te akarongo. E akarongo ki ta ratou au oronga anga manako. Ma ta ratou tauturu, te kimi anga i te au Tuatua Tapu e te au puka Puka Tapu, te kimianga i te au manako, te ako, e te au kiteanga. Ka rekareka kapipiti kotou e to kotou au metua i teia, e ka tauturu teia ia koe no te aro atu i te tu akama me kore te mataku.​—2 Timoteo 1:7.

E rave maata i te au apinga ta te Atua ko Iehova i oronga mai na roto i te putuputuanga Kerititiano. E akateateamamao meitaki no te au uipaanga. E tuatua ki te aronga pakari akataoongaia e tetai pae atu tei na roto ana i te au kiteanga tei aiteite ki ta kotou e aro atura i teianei. Kua tuatua a Solomona: “E riro te tangata pakari i te akarongo, e e tupu te kite, e rauka te kite tikai i te tangata akono meitaki.” (Maseli 1:5) No reira e apii mei teia aronga pakarikari ake. Ka apii katoa koe, mei te au mapu Kerititiano te manuia ra i te autu i to ratou au manamanata mei toou rai.

Apai Mai te Tu Akono Meitaki i te Au Akameitakianga

Na te tu ketaketa anga i roto i te akarongo, ka taangaanga i reira koe i te ako a Paulo “kia maroiroi kotou, auraka e ngaueue, kia maata nei te rave anga i te angaanga a te Atu.” (1 Korinetia 15:58) Kua kite a Iehova e te marama ra i te au manamanata ta tatou e aro atura. Me irinaki i te Atua, nana e turu mai ia koe, no te mea kua tuatua te tata salamo e: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.”​—Salamo 55:22.

Kua tata a Paulo: “Ei akava-ngakau meitaki to kotou; e ta ratou i akakino mai ia kotou na, mei te mea e, e aronga rave tuatua kino ra, kia akama ratou ko tei tapepe pikikaa ua mai i ta kotou tuatua meitaki i te Mesia ra.” (1 Petero 3:16) Me patoi i te tuku ua atu i te aati i te taputou no runga i te au ture e te au kaveinga tuatua tika a te Atua, ka rauka ia koe te akava ngakau meitaki, koia oki e akameitakianga no ko mai ia Iehova. Tei maata atu, ka tuku koe i tetai akaraanga meitaki no te au mapu Kerititiano tei apikepike to ratou akarongo. (1 Timoteo 4:15, 16) Penei ka akamaroiroi toou tu akono ia ratou i te tauta kia tu ketaketa i to ratou akarongo e raukaʼi i te akakoromaki i to ratou timata anga.

Penei ka rauka ia koe i te tauturu i te aronga te patoi tikai ra i toou turanga Kerititiano. E akamaata i teia au tuatua manakonakoanga ma te akauruia: “Ei te popongi ka ruru ei i taau ua, e ei te aiai auraka e tāpu ua i to rima: kare oki koe i kite i te ka tupu, me ko teia, me ko tera, peneiake ko te meitaki kapipiti katoa ra.” (Koheleta 11:6) Koai te ka kite mai i te au tupu anga meitaki mei taau ruruanga i te au ua meitaki na roto i taau au angaanga akono meitaki?

I rotopu i te au akameitakianga maata rava atu ka kokoti koe i tetai turanga marekaia e Iehova. Te tika anga tikai, ko te tu ketaketa i roto i te akarongo ka tupu mai te reira ki te oraanga mutu kore. (Ioane 17:3; akaaiteia atu kia Iakobo 1:12.) Kare tetai akaangaroi anga poto ua tei rauka mai mei te tuku ua atu anga i te aati i te taputou i pauna no te ngereanga i te reira apinga tei oronga ua ia mai.

Akapeea te mapu tei taikuia atu i te akamataanga o teia atikara? Kua akakoromaki aia i tona manata. Te akamutu anga te akaputuputuanga apii i muri ake, kua tauta aia i te akamarama ma te mako meitaki i tona turanga ki te au puapii. Noatu e kare tana au tuatua i akarongoia mai, kua rauka iaia te merengo i te kiteanga e kua akarekareka aia i te ngakau o Iehova. (Maseli 27:11) Kua tamou ua atu aia i te paruru i tona akarongo e akaoti ua atu tana apiianga. I reira kua riro mai aia ei painia. Kia riro toou akakoromaki anga akono meitaki mei teia te tu mataora. Ka pera ia, me tu ketaketa koe i toou akarongo.

[Au Tataanga Rikiriki i Raro]

[Pia i te kapi 25]

TE VAIRA TE TAUTURU

◻ E akarongo ki te tu pakari o to kotou au metua tei mataku i te Atua.

◻ E rave maata i te au apinga vaerua tei orongaia mai i roto i te putuputuanga Kerititiano.

◻ E tuatua ki te aronga pakari e tetai atu tei tupu ana teia au manamanata kia ratou.

◻ E tuatua ki tetai atu au mapu Kerititiano te autu ra ma te manuia i te au manamanata mei teia.