Te Au Mapu​—Kare e Ngaropoina ia Iehova ta Kotou Angaanga!

“Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na, ko kotou i matuapuru i te aronga tapu, e te matuapuru ua ra oki kotou.”​—EBERA 6:10.

1. Akapeea te au puka Pipiria o Ebera e Malaki i te akaari anga e te ariki maira a Iehova i taau angaanga?

KUA rave ainei koe i tetai angaanga meitaki no tetai oa e oti kare i oronga mai ana i tetai akameitaki anga? E oonu tikai te mamae me kare e manakoia mai ana te angaanga takinga meitaki me kare, ko tei kino roa atu, kua akangaropoina takiriia. Inara, mei teaa ra te tuke o te reira, me oronga tatou ma te ngakau katoa i te angaanga kia Iehova! Te karanga ra te Pipiria e: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na, ko kotou i matuapuru i te aronga tapu, e te matuapuru ua ra oki kotou.” (Ebera 6:10) E akamanako ana e eaa te aite anga o te reira. Te manako tikai maira a Iehova i te reira ei angaanga tuatua tika kore i tana tuanga ra​—ei ara​—me kua ngaropoina iaia e eaa taau i rave ana e taau ka rave ua atu i roto i tana angaanga. Ko tetai Atua tu ariki ua ra!​—Malaki 3:10.

2. Eaa ra i riro ei te tavini anga ia Iehova ei mea takake tikai?

² E tuatau takake toou kia akamori e kia tavini i teia Atua mareka ra. I te mea e te vaira e ono mirioni ua o to au taeake irinaki ko tei akaaiteia atu ki etai ono pirioni tangata i te ao katoa, e tuke tikai toou akameitakianga. Pera katoa, ko te tika e te akarongo ra e te ariu ra koe ki te tuatua no te tuatua meitaki te akapapuia ra e te manako maira a Iehova ia koe. No te mea, te karanga a Iesu e: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.” (Ioane 6:44) Ae, te tauturu ra a Iehova i te au tangata tataki tai kia rave ma te tau i te au akameitaki i to Karaiti atinga.

Ariki Anga i Taau Akameitakianga Maata

3. Akapeea te au tamariki tamaroa a Kora i te akakite anga i te arikianga no te akameitakianga i te tavini anga ia Iehova?

³ Mei tei uriuriia i te atikara i mua akenei, tei roto koe i te turanga takake i te akariro anga kia akarekareka i to Iehova ngakau. (Maseli 27:11) Ko tetai apinga teia kare rava e tau ia koe kia akakore. I roto i tetai o ta ratou tata taramo akauruia, kua akakite mai te tamariki tamaroa a Kora i to ratou arikianga i te akameitakianga i te tavini anga ia Iehova. Ka tatau tatou: “E meitaki maata to te rā okotai i roto i te au paepae noou ra, i to te au rā e tausani ua atu. E anoano maata toku i te tiaki i te ngutupa i te are o taku Atua, i te noo i te au puakapa o te aronga kino ra.”​—Salamo 84:10.

4. (a) Penei e eaa te akariro ra i etai i te manako anga i te akamori ia Iehova ei kotinga anga? (e) Na roto i teea mataara to Iehova akaari mai anga iaia uaorai e te manako maira e te tutaki ra i tona au tavini?

⁴ Te manako akapera ra ainei koe no runga i taau akameitakianga i te tavini anga i toou Metua i te rangi ra? Ma te tika, i tetai au taime penei i te akara anga te akamori anga ia Iehova te kotinga ra i toou rangatira. E tika te reira e ko te aru tau anga i te au kaveinga Pipiria te umuumuia ra tetai akaatinga ia koe uaorai. Inara, tei maata atu, noatu eaa ta Iehova e pati maira ia koe e puapinga ia noou. (Salamo 1:1-3) Tei kapitiia atu, te akara maira a Iehova i taau au tauta anga e te akaari mai anga i tona arikianga i toou tu tiratiratu. E tikai, kua tata a Paulo e ko Iehova “koia tei tutaki mai i te aronga i kimi tikai iaia.” (Ebera 11:6) Te kimi ra a Iehova i te au tuatau i te rave i teia. Kua akakite mai tetai peroveta tuatua tika i Iseraela taito ra e: “Te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.”​—2 Paraleipomeno 16:9.

5. (a) Eaa tetai au mataara meitaki rava atu ka rauka ia koe i te akaari e e tika toou ngakau kia Iehova? (e) Penei eaa ra i akaraanga ngata ei i te tuatua atu ki tetai no runga i toou akarongo?

⁵ Ko tetai mataara meitaki rava atu ka rauka ia koe i te akaari e e tika toou ngakau kia Iehova koia oki kia tuatua atu ki tetai ra no runga iaia. Kua rauka ainei ia koe i te tuatua atu ki tetai o toou au oa apii no runga i toou akarongo? I te akamataanga, penei i te akara anga ko te raveanga i teia e ngataia, e penei te akatupu ra taua manako i tetai manga tamataku anga. ‘Akapeea ra me ka kata ratou iaku?’ penei ka ui koe. ‘Akapeea ra me manako ratou e e akonoanga tuke taku?’ Kua akakite mai a Iesu e kare te katoatoa e akarongo ki te tuatua no te Patireia. (Ioane 15:20) Inara, kare te aite anga o teia e te ki ra toou oraanga i te taitoito e te kopaeanga. Ei tukeanga, e manganui te au mapu Kite tei kite i te au taringa akarongo e kua rauka katoa te akangateiteianga maata mei to ratou au oa no te akarongo anga ki ta ratou au irinaki anga.

“Na Iehova e Tauturu ia Koe”

6, 7. (a) Akapeea tetai tamaine e 17 mataiti i te tuatua anga ki tona au oa i te pupu apii? (e) Eaa taau i kite mei to Jennifer tupuanga?

⁶ Inara akapeea e rauka ai ia koe i te mataku kore kia tuatua no runga i toou akarongo? Eaa ka kore ei e akapapu e kia tiratiratu e te tuatua tika anga me ui mai te au tangata kia koe no runga i taau akonoanga? E akamanako ana i te tupu anga o Jennifer e 17 mataiti. “Te kaikai ra au i te apii. Te uriuri manako ra te au tamariki tamaine i toku kaingakai no runga i te akonoanga, e kua ui mai tetai o te tamariki tamaine kiaku e eaa taku akonoanga,” i nana ei. Kua ru ainei a Jennifer i te oronga atu i tetai pau anga? “Ae,” i akakite mai ei aia, “no te mea kare i papu ana iaku e eaa te tu o te pau anga te ka orongaia mai kiaku.” No reira eaa ta Jennifer i rave? “Kua akakite atu au ki te au tamariki tamaine e ko au tetai o te Au Kite o Iehova,” tana i tuatua atu. “I te akamata anga kua poitirere ratou. I te akaraanga, i to ratou manako anga e au tangata tuke te Au Kite o Iehova. Kua akakeu teia ia ratou kia ui mai i te au uianga kiaku, e kua rauka iaku i te akamarama atu i tetai au manako tarevake tei manako ana ratou. E tae ua atu i muri ake i taua ra, kua aravei mai tetai o te au tamariki tamaine iaku mei tetai taime ki tetai taime ma tetai uianga.”

⁷ Kua mii ainei a Jennifer no te rave anga i te tuatau kia tuatua atu no runga i tona au irinaki anga? Kare rava! “E manako meitaki tikai toku no runga i te reira te oti anga te tuatau no te kaikai anga,” i karanga ei aia. “I teianei e au manako meitaki to taua au tamariki tamaine e koai ma tikai te Au Kite o Iehova.” E ngoie ua ta Jennifer ako anga i teianei: “Me te kite ra koe i te tu ngata i te tuatua atu ki te au oa i te pupu apii me kare ki te au puapii, e rave viviki i te pure. Na Iehova e tauturu ia koe. Ka rekareka koe e kua taangaanga meitaki ana koe i toou tuatau kia oronga i tetai tuatua.”​—1 Petero 3:15.

8. (a) Akapeea te pure i te tauturu anga ia Nehemia i te aro atu anga aia i tetai turanga kare i tapapaia ana? (e) Eaa etai au turanga i te apii penei ka anoanoia koe kia oronga atu i tetai pure muteki, e te poto ua kia Iehova?

⁸ E akara ana e kua oronga mai a Jennifer e ‘kia rave viviki i te pure’ kia Iehova me tupu tetai uaorai tuatau kia oronga atu i te tuatua no runga i toou akarongo. Ko teia tikai ta Nehemia, e tangata apai kapu na te Ariki Peresia ko Aretekasaseta, i rave i tona aro atu anga i tetai turanga kare i tapapaia ana. Kua kite a Nehemia i te taitaia no te mea kua akakiteia mai kiaia te tumatetenga maata o te ngati Iuda e kua rongo ana e te vai ngaangaa ua ra te patu e te au ngutupa o Ierusalema. Kua kite atu te ariki e akaraanga taitaia to Nehemia, no reira kua ui atu aia kia Nehemia e eaa te manamanata. I mua ake ka pau ei, kua pure a Nehemia no tetai aratakianga. No reira kua pati mataku kore atu aia kia akatikaia kia oki ki Ierusalema e kia tauturu i te patu akaou i te oire tei vai tanea ia. Kua akatika a Aretekasaseta i ta Nehemia pati anga. (Nehemia 2:1-8) Te apiianga? Me te ru ra koe me tupu mai tetai tuatau kia oronga atu i te tuatua no runga i toou akarongo, auraka e akaruke i toou tuatau kia oronga i tetai pure muteki. “E uri i to kotou tumatetenga katoa ki runga [ia Iehova],” i tata ei a Petero, “koia oki te tiaki mai ia kotou.”​—1 Petero 5:7; Salamo 55:22.

‘Kia Tika Ua Rai kia Akakite Atu’

9. Akapeea e rauka ei ia Leah e 13 mataiti ra i te oronga anga e 23 kopi o te puka Young People Ask?

⁹ E akamanako ana i tetai atu tupu anga. Ko Leah, e 13 mataiti, te tatau ra i te puka Questions Young People Ask​—Answers That Worka i te tuatau kaikai i te apii. “Te akarakara ua maira tetai iaku,” i nana ei, “e kare i roa ana kua tu ua mai tetai pupu i te akarakara mai mei muri i toku pakuivi. Kua akamata ratou i te ui mai e no runga te puka i teaa.” Te tae anga i te openga o te ra, e a tamaine kua pati kia Leah i tetai kopi o te puka Young People Ask. Kare i roa ana kua oronga teia au tamaine i te puka ki tetai atu, e oti kua inangaro katoa ratou i tetai kopi. Kua tere atu te au epetoma i aru mai, kua tua a Leah e 23 kopi o te puka Young People Ask ki tona au oa apii e ki to ratou au taeake. E ngoie ainei ia Leah i te tuatua ki tetai atu i te akamata anga i te ui mai no runga i te puka tana e tatau ra? Kare rava! “I te akamata anga, kua ru au,” i akatika mai ei aia. “Inara, kua pure au, e kua kite au e tei iaku a Iehova.”

10, 11. Akapeea e rauka ai i tetai tamaine meangiti ngati Iseraela i te tauturu anga i tetai rangatira vaeau i te kite ia Iehova, e eaa te au taui anga tana i rave i muri maira?

¹⁰ Penei te akamaara maira te tupu anga o Leah kia koe no tetai turanga aiteite te aro atura tetai tamaine ou ngati Iseraela tei apainaia atu ei tuikaa ki Arama. Ko Naamana, e rangatira no te nuku vaeau Arama, e repera ra. Penei e na tana vaine i akamata i te tuatua atu i te akakeu anga i teia tamaine meangiti kia tuatua no runga i tona akarongo. “Naringa toku pu i tae ki te peroveta i Samaria ra e!” i karanga ei aia. “Ka ora oki tona lepera ra iaia.”​—2 Ariki 5:1-3.

¹¹ Tei tupu no te mataku kore o teia tamaine ou nei, kua kite atura a Naamana e “kare rava e Atua i te ao katoa nei, mari ra i Iseraela nei.” Kua akapapu katoa rai aia e ‘kare aia e apai akaou i te atinga karakaratio, e te atinga katoa, ki te au atua ke, mari ra kia Iehova anake.’ (2 Ariki 5:15, 17) Kua akameitaki tikai a Iehova i te mataku kore o taua tamaine meangiti ra. Ka rauka e ka rave rai aia i teia no te aronga ou i teia tuatau. Kua kite a Leah e e tika te reira. Kare i roa ana, kua aravei atu etai o tona au oa apii iaia e kua tuatua e kua tauturu te puka Young People Ask ia ratou i to ratou tu. “Kua rekareka au,” i na Leah ei, “no te mea kua kite au e kua tauturu au i tetai kia maata atu i te kite ia Iehova e te tauturu anga ia ratou i te taui i to ratou oraanga.”

12. Akapeea koe e akamaroiroiia ai kia tika ua rai i te akakite atu i toou akarongo?

¹² Ka rauka ia koe te au tupu anga te aite ra mei to Jennifer e to Leah rai. I muri mai i te akoanga a Petero, tei tata e e mea tau ia koe ei Kerititiano ra kia “tika ua rai ia kotou kia akakite atu ki te tangata katoa e ui mai ia kotou i te manako i roto ia kotou na, ma te maru e te kauraro marie atu.” (1 Petero 3:15) Akapeea koe me rave i te reira? E aru i te aerenga o te au Kerititiano o te anere mataiti mua tei pure kia Iehova e ka tauturu mai aia ia ratou kia tutu aere “ma te mataku kore.” (Angaanga 4:29) I reira kia mataku kore i te tuatua ki tetai atu no runga i toou au irinaki anga. Penei ka poitirere koe i te au tupu anga. Tei maata atu, ka akariro koe i to Iehova ngakau kia rekareka.

Au Vitio e te Au Angaanga Takake

13. Eaa te au tuatau kua rave tetai au mapu i te akameitaki anga kia oronga atu i tetai akakite anga? (E akara i nga pia i te kapi 20 e te 21.)

¹³ E manganui te au mapu kua akakite no runga i to ratou akarongo ki te au oa apii me kare ki te au puapii na te taangaanga anga i te au vitio. I tetai au taime, kua akatupu te au angaanga apii i te tuatau kia oronga i te akapaapaa anga kia Iehova. Ei akaraanga, e rua nga tamaroa e 15 mataiti, e ko raua e Au Kite o Iehova, tei orongaia mai tetai angaanga ei tuanga no ta ratou apii tuatua enua o te ao kia tata i tetai ripoti no runga i tetai au akonoanga o te ao. Kua kapiti taokotai mai raua i te tata i ta raua ripoti no runga i te Au Kite o Iehova, i te taangaanga anga i te puka Jehovah’s Witnesses​—Proclaimers of God’s Kingdom ei tumu anga na raua.b Kua oronga katoa raua i tetai ripoti tuatua e rima miniti. I muri ake, e maata te au uianga a te puapii e te aronga apii e kua tere atu e 20 miniti o nga tamaroa ki mua i te pupu apii. No tetai au epetoma i muri mai, kua rave ua atu to raua au oa i te pupu apii i te ui mai i te au uianga no runga i te Au Kite o Iehova!

14, 15. (a) Eaa ra i ii ei i te mataku i te tangata? (e) Eaa ka tau ei kia manako irinaki koe no te oronga anga i toou au irinaki anga ki tetai atu?

¹⁴ Mei ta te au tupu anga i mua akenei e akakite maira, ka kiteaia te au akameitaki anga maata na te akakite anga ki tetai i toou au irinakianga e te au akapapuanga e ko tetai o te Au Kite o Iehova. Auraka e tuku i te mataku i te tangata kia akangere ia koe i te akameitakianga e te rekareka i te tauturu anga i tetai kia kite ia Iehova. Te karanga ra te Pipiria e: “E rokoia e te ii tei mataku i te tangata ra: ko tei irinaki ia Iehova ra, e ora ïa.”​—Maseli 29:25.

¹⁵ Kia maara e, ei mapu Kerititiano, e apinga taau te anoano uaia ra e toou au oa​—te oraanga meitaki atu i teianei e te taputou no te oraanga mutu kore no te tuatau ki mua. (1 Timoteo 4:8) Ma te tau, i Marike​—penei e ngai te manako ra koe e ko te au tangata maromaroa me kare te manako angaanga​—kua akaari mai tetai tare anga e vaitata e apa o te au mapu te manako pakari ra i te akonoanga, e toru tuanga te karanga ra ko te akarongo akonoanga “te akakeu anga puapinga maata roa atuia” i roto i to ratou oraanga. Penei te aite ra te turanga ki tetai atu au ngai e manganui o te ao. No reira, penei e meitaki te reira, e te rekareka ra toou au oa i te apii i te akarongo mai i taau e tuatua ra no runga i te Pipiria.

Ei Mapu, e Akavaitata Atu kia Iehova

16. Eaa te o maira i te akamareka anga ia Iehova i te pae atu i te tuatua anga ki tetai atu no runga iaia ra?

¹⁶ Ae, e maata atu te piri maira i te akarekareka anga i to Iehova ngakau i te tuatua ua anga no runga iaia. Te anoano katoa ia ra koe kia akatano i toou tu ki tona au turanga. Kua tata te apotetoro ko Ioane e: “Teia oki te inangaro i te Atua, ko te akono i tana au akauenga; kare oki tana au akauenga i te mea teiaa.” (1 Ioane 5:3) Ka kite koe i teia e tika me akavaitata atu koe kia Iehova. Akapeea koe me rave i te reira?

17. Akapeea koe i te akavaitata atu anga kia Iehova?

¹⁷ E rave i te tuatau i te tatau i te Pipiria e te au puka tei akatumuia ki runga i te Pipiria. Te maata atu i taau i kite no runga ia Iehova, ka ngoie ua i reira i te akarongo atu kiaia e te tuatua anga ki tetai atu no runga iaia. “E tuku mai te tangata meitaki i te mea meitaki no roto i te putunga meitaki i roto i tona ngakau,” i na Iesu ei, “no te ki oki o te ngakau i tuatuaʼi te vaa.” (Luka 6:45) No reira e akaki i toou ngakau ma te au mea meitaki. Eaa i kore ei e akanoo i te au akakoroanga no teia? Penei ake ka rauka ia koe i te akamako mai i te akapapa anga no te au uipaanga putuputuanga a teia epetoma e aere mai nei. Ko taau akakoroanga ka aru mai kia o atu na te oronga anga i tetai pau anga poto e te ngakau tae. Ae, e mea puapinga kia tamou ngakau katoa koe i te au apinga taau e apii ra.​—Philipi 4:9.

18. Noatu e ka mamae koe no etai patoianga, ka irinaki koe no runga i teaa?

¹⁸ Te au akameitaki anga te aere maira i te tavini anga ia Iehova e ope koreia​—koia tikai, e mutu kore. E tika, penei i tetai taime ka kite koe i tetai patoi anga pakari me kare i te taitoito no te riro mai anga ko tetai Au Kite o Iehova. Inara e akamanako ana ia Mose. Te karanga ra te Pipiria e “te akono marie ra oki aia i te tutaki ra ei oko.” (Ebera 11:24-26) Ka rauka katoa ia koe te irinakianga e ka tutaki mai a Iehova ia koe no te au tauta anga tei rave koe i te apii no runga iaia e te tuatua anga no runga iaia. E tikai, kare rava e ‘ngaro iaia ta kotou angaanga i rave, e to kotou anoano, i tona ingoa i akakite puia e kotou na.’​—Ebera 6:10.

[Au Tataanga Rikiriki i Raro]

Maara Ainei ia Koe?

• Eaa ka rauka ai ia koe kia papu e te mareka maira a Iehova i taau angaanga?

• Eaa te au ravenga no te akakiteanga i te apii ta etai i kite ei puapinga anga?

• Akapeea koe e akamaroiroiia ai kia tuatua atu ki te au oa i te pupu apii?

• Akapeea e rauka ai ia koe i te akavaitata atu kia Iehova?

[Pia/Au Tutu i te kapi 20]

Akapaapaa Katoa Rai te Au Mapu Ou ia Iehova!

Kua rauka katoa i te au mapu ou i te oronga i tetai akakiteanga i te apii. E akamanako ana i teia au tupu anga.

Ko Amber e tai ngauru mataiti i roto i te pupu rima te tatau ra i tetai puka no te akakino anga Nazi i runga i te ngati Iuda i te tuatau o te Tamaki II o te Ao. Kua iki a Amber i te apai i te vitio Purple Triangles ki tona puapii. Kua poitirere te puapii i te kite e kua takinokino katoaia te Au Kite o Iehova i raro ake i te tutara Nazi. Kua akaari te puapii i te vitio ki te katoa anga o te pupu.

I te varu mataiti, kua tata a Alexa i tetai reta ki tona pupu i te akataka anga e eaa aia i kore ei e piri atu ki roto i ta ratou akonoanga i te Kiritimiti. Kua reka tikai tona puapii e kua tuku atu aia ia Alexa kia tatau mai i te reta ki tona uaorai pupu e pera katoa ki tetai nga pupu ke e rua. “Kua apiiia au e kia akangateitei i tetai ke tei tuke to ratou au irinakianga i toku,” i tuatua ei aia i te openga anga, “e te akameitaki atu nei au ia kotou no te akangateitei mai anga i taku ikianga no te kore ei e akono i te Kiritimiti.”

I muri poto ua ake i te akamata anga te pupu mua, kua apai atu a Eric i te My Book of Bible Stories ki te apii e kua pati atu me ka akatikaia kia akaariia te reira ki tona au taeake apii. “E manako meitaki toku,” i na tona puapii ei. “Kore oki koe e tatau i tetai tua ki te pupu?” Kua akapera rai a Eric. I muri ake, kua pati aia i te katoatoa te inangaro ra i tetai kopi o te puka kia tuku i to ratou rima ki runga. E 18 tamariki​—kapiti atu te puapii​—i te pera anga! I teianei te manako ra a Eric e e ngai akakiteanga takake tana uaorai.

Kua ariki rekareka a Whitney e iva mataiti ra no te poroutia Jehovah’s Witnesses and Education.c “E oake ua ana toku mama i teia poroutia ki toku au puapii i te au mataiti ravarai,” i karanga ei aia, “inara i teia mataiti naku uaorai i rave i te reira. Ma te tauturu a taua poroutia, kua iki toku puapii iaku e ‘tamaine apiipii no te epetoma.’”

[Tataanga Rikiriki i Raro]

[Pia/Au Tutu i te kapi 21]

Au Turanga ta Etai i Taangaanga no te Akakite i to Ratou Akarongo

Me orongaia atu tetai ripoti apii me kare te angaanga, kua iki etai i tetai tumu tuatua te ka akatika ia ratou i te oronga i tetai akakiteanga

Kua oronga tetai au mapu ki to ratou puapii i tetai vitio me kare i tetai puka tei tau ki runga i tetai tumu tuatua te ka uriuriia i roto i te pupu apii

Ko etai au mapu ia ratou e tatau ra i te Pipiria me kore tetai puka tei akatumuia ki runga i te Pipiria i te tuatau akaangaroi kua araveiia mai e tetai au mapu tei ui i te au ui anga

[Tutu i te kapi 18]

Ka rauka i te aronga tei kite i te tauturu i te tereni i te au mapu kia tavini ia Iehova