Au Uianga a te Aronga Tatau
◼ Eaa ra a Iesu i akatumu ei i te Akamaara Anga mate au apotetoro anake ua e kare tetai atu au pipi tei tukunaia ki roto i te koreromotu ou?
Te akaraanga e kua akatumuia teia uianga ki runga i te manako tarevake e kua akaputuputu mai a Iesu i tana au apotetoro i te reira aiai no te akatumu i te Kaikai Oroa Aiai a te Atu ki te putuputuanga Kerititiano o te aronga akatainuia tei roto takere i te koreromotu. Inara, ia Nisana 14, 33 T.N., kare te putuputuanga Kerititiano i akatupuia ake, e kua taokotai mai a Iesu e tana au apotetoro no te kaikai Pasa a te Ngati Iuda i te mataiti.
E tikai, e au pipi ke atu ta Iesu i te 12 ua tei kapikiia ko te au apotetoro. I te mataiti i mua ake i tona matenga, kua tono aia ki vao ie 70 au pipi i tetai tere tutu aereanga. I muri ake i tona tuakaou anga, kua “kitea aia e te au taeake e rima katoa anere e e ara, okotai rai kite anga.” E te vaira e “okotai anere e rua ngauru” au pipi tei akaputuputuia i te ra Penetekote. (1 Korinetia 15:6; Angaanga 1:15, 16, 23; Luka 10:1-24) Inara ki akamanako tatou i te pupu ia Iesu i tona akatumu anga i te oroa mataiti tei kapikiia ko te Kaikai Aiai a te Atu.
Ia Luka 22:7, 8 te oronga maira i te akanoo anga o te taime, te tuatuaanga: “E tae akera te rā akaopue koreia e ko ei i te pasa ra, Kua tono atura aia ia Petero raua ko Ioane, na ko atura, Ka aere, ka akonokono i te pasa, kia kai tatou.” Te tuatua ra te papaanga e: “Ka karanga atu ei korua ki te pu o te are, Te ui maira te Orometua kia koe, Teiea to te manuiri pia, kia kai au i te pasa e taku au pipi katoa?” I te reira aiai tei ko a Iesu i te toko 12 no tetai oroa Ngati Iuda. Kua akakite aia kia ratou: “E anoano maata toku i te kai i teianei pasa, ko au e ko kotou katoa, ka mate atu ei au.”—Luka 22:11, 15.
Mei tona akamata anga i Aiphiti, kua riro te Pasa ei oroa ngutuare tangata. Te akatumuanga i te Pasa, kua akakite te Atua kia Mose e kia taiaia tetai mamoe i te au ngutuare tataki tai. Me e meangiti rava tetai ngutuare tangata no te kai i tetai mamoe katoa, ka rauka kia patiia tetai ngutuare tangata i te pae mai kia piri mai ki te kaikai anga. No reira, e mea tau e no te Pasa o te 33 T.N., kua akaputuputu atu te maata anga o ta Iesu au pipi ki to ratou uaorai au ngutuare tangata no teia kaikai anga.
Inara kua “anoano maata” a Iesu i te tika openga o te Pasa, e te po openga i mua ake i tona matenga, kia akono aia ki tana au pipi piri vaitata, tei tutaka aere ma ia katoa i te tuatau o te maata anga o tana angaanga orometua. I te openga o tana kaikai anga Pasa, kua akakite a Iesu kia ratou no tetai oroa ou te ka raveia e tana au pipi ravarai i te tuatau ki mua. Te uaina o te reira oroa Kerititiano i te tuatau ki mua ka komono ia i te toto o “te koreromotu ou” te ka komono i te koreromotu o te Ture.—Luka 22:20, NW.
Inara, i te aiai o Nisana 14, 33 T.N., kare te koreromotu ou e no te atinga tika—ko Iesu—kare ia i orongaia ake. Te vaira rai te koreromotu o te Ture. Kare i patiaia ake ki runga i te rakau tamamae anga. Tei maata atu, kare te reira e tika kia tae rava ki te ra Penetekote e komonoiaʼi te koreromotu taito kia Iseraela kopapa e te koreromotu ou kia Iseraela vaerua.—Galatia 6:16; Kolosa 2:14.
No reira, kare te au apotetoro e 11 e kare katoa tetai ua atu au pipi i roto i te koreromotu ou i te reira aiai. E kare a Iesu i akaari ana i tetai ua atu mareka kore anga o tetai atu au pipi ngati Iuda na te tukuanga ia ratou kia akaputuputu ki to ratou au ngutuare tangata no te akono i te Pasa.