Au Uianga a te Aronga Tatau

Mei te mea e e maki tetai Kerititiano me kore ra ka aere atu ki tetai ngai e no reira kare e tae atu ki te oroa Akamaara Anga, ka rauka ainei iaia i te akono i te reira i te marama i muri mai?

I Iseraela i taito ra kua raveia te Pasa i te au mataiti ravarai i te ra 14 o te marama mua tei karangaia e ko Nisana (me kore Abiba). Inara te kite ra tatou i tetai akapapaanga takake tei akanooia i roto ia Numero 9:10, 11 (NW): “E tuatua atu ki te tamariki o Iseraela, te nakoanga, ‘Noatu e kua akaviiviiia tetai tangata o kotou na me kore o to kotou au uki e tetai meta me kore ra ka aere i tetai tere mamao, e tau rai iaia i te akateatea mamao i te atinga pasa kia Iehova. I te rua o te marama [tei karangaia e ko Iara, me kore Zifa], i te tai ngauru ma a o te ra i rotopu i nga aiai e rua, e tau ratou kia akateatea mamao i te reira. E e kai ratou i te reira ma te areto akaopue koreia e te au kai raurau kavangu.’”

Kare teia i akatumu e rua nga ra ke no te Pasa (Nisana 14 me kore Zifa 14), no tetai i to Iseraela me kore ngutuare tangata kia iki ua i ta ratou ka rave, tei runga ua i te tuatau tei tau kia raveia. Te akapapaanga o te kaikai anga Pasa i te rua o te marama kua kotingaia me kore no tetai turanga ua, mei te mea e kua akaviiviiia tetai tangata Iseraela i te ra o Nisana 14 me kore ra e mamao tikai mei te ngai e raveia ra te akamaara anga.

Te tupuanga anake tei rekotiia no teia i te taime i rave akaouiaʼi te akamaara anga o te Oroa Areto Akaopue Koreia ra, e te Ariki akarongo ko Hezekia. Kare e taime no te akateatea mamao i te marama mua (i te mea kare te au taunga i papa, kare katoa te au tangata i akaputuputuia mai), no reira kua raveia te reira i te ra 14 i te rua o te marama.​—2 Paraleipomeno 29:17; 30:1-5.

Takake mei tei reira au turanga, kua rave te ngati Iuda i te Pasa i te ra ta te Atua i akataka. (Exodo 12:17-20, 41, 42; Levitiku 23:5) Kua akono a Iesu e tana au pipi mei ta te Ture i umuumu, kare i rave manako kore ua i te reira ra. Kua ripoti a Luka e: “E tae akera te rā akaopue koreia e ko ei i te pasa ra, kua tono atura [Iesu] ia Petero raua ko Ioane, na ko atura, Ka aere, ka akonokono i te pasa, kia kai tatou.”​—Luka 22:7, 8.

I te reira atianga kua akatumu a Iesu i te akamaara anga mataiti ta te au Kerititiano i kite e ko te Oroa Aiai a te Atu. Kare e rauka kia akakite pakariia atu te puapinga no te au Kerititiano kia tae atu ki te reira. Ko teia te mea puapinga rava atu i te mataiti no te Au Kite o Iehova. Te akaari maira te au tuatua a Iesu e eaa te tumu; kua karanga aia e: “E akono ua atu kotou i teia ei manako anga iaku.” (Luka 22:19, NW) No reira, e tau te au tangata tataki tai o te Au Kite o Iehova i te parani no etai au marama i mua ake kia vaio i te ra o te akamaara anga kia va ua mei etai au mea akatakaia. Ka akonoia te Oroa Aiai a te Atu i te Ruirua o Aperira 6, 1993, i muri ake i te opunga ra i toou ngai.

I tetai ua ake taime ka tupu tetai mea kitea koreia, mei te maki me kore te au manamanata o te teretere anga, ka riro ei arai atu i te Kerititiano kia kore e tae atu mei tana i parani ra. Eaa i reira tei tau kia raveia no te reira turanga?

I te tuatau e raveia ra te akamaara anga ka patiia atu te varaoa opue kore e te uaina muramura, e ko te aronga tei akatainuia i te vaerua tapu o te Atua e tei ikiia no te oraanga i te rangi te ka kai i te oroa. (Mataio 26:26-29; Luka 22:28-30) Tetai tangata tei kai ana i te oroa i te au mataiti tataki tai, mei te mea e i teia mataiti kua mou ki runga i te roi maki me tei te kainga me kore tei runga i tetai are maki, ka akanoonoo te aronga pakari o te putuputuanga i te reira ngai no tetai ia ratou kia apai atu i tetai o te varaoa e te uaina ki te tangata maki, te uriuri atu i te au irava Puka Tapu tano tikai no runga i te tumu tuatua, e te oronga atu i te oroa. Mei te mea e kua aere ke atu tetai Kerititiano akatainuia mei tana putuputuanga, e mea tau nona i te akanoonoo kia tae atu ki te putuputuanga i te ngai te reira aia i taua ra.

Te akaraanga i teia, tei raro anake ua i tetai au turanga tuke rava i tau ei no tetai Kerititiano akatainuia kia akono i te Oroa Aiai a te Atu e 30 ra i muri mai (okotai marama), kia tano ki te akaue anga ia Numero 9:10, 11 e te akaraanga ia 2 Paraleipomeno 30:1-3, 15.

Te aronga o te pupu a Iesu, te “mamoe ke atu” ma te manakonakoanga no te oraanga mutukore ki runga i te enua parataito, kare i raro ake i te akaueanga kia kai i te varaoa opue kore e te uaina. (Ioane 10:16) E mea puapinga tikai kia tae atu ki te akamaara anga mataiti, inara kare ratou e kai i te au oroa. No reira me makiia tetai ia ratou me kore ra te teretere aere ra, no reira kare i piri atu ki tetai putuputuanga i te reira aiai, penei e tau iaia kia tatau takake i te au irava tano tikai (kapiti atu te akapapaanga o ta Iesu akatupuanga i te akamaara anga) e ka pure atu no ta Iehova akameitakianga no te reira tupuanga puapinga takapini teianei ao. Inara kare e anoanoia tetai atu akanoonoo anga no tetai uipaanga me kore tetai uriuri anga Puka Tapu takake i te marama i muri mai.