Au Uianga a te Aronga Tatau
◼ Eaa “te meitaki” tei kare i rauka i te apotetoro ko Paulo i te rave, mei tana i taiku ia Roma 7:19?
Tei tau, te tuatua ra a Paulo i tei kare i rauka iaia i te rave i te au mea meitaki ravarai tei papaia i roto i te Ture a Mose. E aka angaanga tikai te reira ia Paulo e tetai atu, kapiti katoa ia tatou, no te mea e tu tiama kore to tatou e te ara ua. Inara kare e anoanoia kia taitaia. Na to Karaiti atinga i akatuera i te mataara kia akakoreia e te Atua ma tetai turanga meitaki ma Ia katoa.
Te tatau ra a Roma 7:19: “Ko te meitaki oki taku e anoano ra, kare ïa au e rave; kareka te kino anoano koreia e au ra, ko taku ïa e rave nei.” Te akaari maira te putunga tuatua e te tuatua tikai ra a Paulo no runga i te “meitaki” i te tu ra i tei maroia e te Ture. I te Roma 7 irava 7 kua tuatua aia: “Te kino ra aina te ture? Kare rava ïa. Auraka te ture ra, kare oki au e kite i te kino; kare oki au e kite e, e ara te morimori, auraka te ture i tuatua mai e, ‘Auraka rava koe e morimori.’” Ae, te papu ra i te Ture e mei te mea e kare e rauka ia ratou i te akono takiri tikai i te reira, kua ara pouroa i reira te au tangata.
Kua taiku atu a Paulo e “i ora na oki au i muatangana i te ture kore ra.” I naea te reira i tika ei? Iaia i roto rai i te taukupu o Aberahama i mua ake ka orongaʼi a Iehova i te Ture. (Roma 7:9; akaaiteia atu kia Ebera 7:9, 10.) Noatu e e tiama kore a Aberahama, kare ake rai te Ture i orongaia ake, no reira kare tona tu ara i akamaaraia atu kiaia i tona poka anga i te akono i te reira au akauenga e manganui. Ko te aite anga ainei i te oronga angaia te Ture e te kitea angaia te tu tiama kore o te tangata, e kua orongaia mai te au tupu anga kino? Kare. Kua tuatua ua atu a Paulo: “E teianei e mea tapu te ture, e mea tapu oki te akauenga, e te apa kore, e te meitaki.”—Roma 7:12.
E akara e kua akatutu a Paulo i te Ture ei “tapu” e te “meitaki.” I te au irava ka aru mai, kua akamarama aia i te “mea meitaki”—koia oki te Ture—te akakapu maira e e tangata ara aia, e na teia ara i tau ei aia kia mate. Kua tata a Paulo: “Ko te meitaki oki taku e anoano ra, kare ïa au e rave; kareka te kino anoano koreia e au ra, ko taku ïa e rave nei. Te rave nei au i te mea anoano koreia e au ra, kare ïa au tei rave, ko te kino ra e vai i roto iaku nei.”—Roma 7:13-20.
I roto i teia papaanga tuatua, kare a Paulo e tuatua ra no te tu meitaki ua nei, me kare te au angaanga takinga meitaki ua nei. (Akaaiteia atu kia Angaanga 9:36; Roma 13:3.) Te tuatua ra aia no runga tikai i te raveanga (me kore kare te raveanga) i te au mea tei tau ua rai ki te Ture meitaki a te Atua. I mua atu kua taangaanga aia ma te maroiroi i te akonoanga ngati Iuda e me—akaaiteia ki tetai pae—kare e “apa i te reira.” Noatu rai, i tona manako e tavini angaanga pakari aia ki te reira Ture meitaki, kare rai aia i rave ana i te reira ma te tau. (Philipi 3:4-6) Kua akaata te Ture i te au turanga tiama a te Atua, te akaarianga te apotetoro i tona turanga kopapa e e tuikaa rai aia ki te ture a te ara e kua akaapaia kia mate. Inara, kua akameitaki tikai a Paulo e na roto i te atinga o Karaiti kua akakiteia aia e tuatua tika—kua akaoraia mai aia mei te ture o te ara e tona turanga tau, ko te akautunga anga o te mate.—Roma 7:25.
I teia tuatau kare te au Kerititiano i raro ake i te Ture a Mose, no te mea kua patitiia te reira ki te rakau tamamae anga. (Roma 7:4-6; Kolosa 2:14) Inara te meitaki ra tatou i te kite e kare ia i te ture teiaa e e ngari ake tatou i te akangaropoina. Kare, te tika anga tikai te meitaki ra te Ture. E tumu i reira ta tatou no te tatau i te au puka Puka Tapu tei roto i reira te Ture e te apii anga e eaa tei anoanoia i te au Iseraela. Kare e roa atu ana ka rave te Au Kite o Iehova takapini i teianei ao, te tamouanga i te tatau i ta ratou Puka Tapu i te au epetoma ravarai.
Ia tatou e tatau ra i te Ture, e tau tatou kia akaata ki runga i te au kaveinga te akatakaanga i tona au papa ture rikiriki e te au puapinga tei rauka mai i te iti tangata o te Atua ia ratou e tauta ra i te aru i taua au akaueanga meitaki. E tau tatou kia ariki rai, e e aronga tiama kore tatou e no reira kare e rauka i te aru takiri i te meitaki ta tatou e apii ra i roto i te Tuatua na te Atua. Inara koi tamaki atu ei i te ture o te ara, ka rauka ia tatou i te rekareka i te manakonakoanga o te akaora angaia mai na roto i te taangaanga anga i te atinga o Karaiti no tatou.