Eaa te Roa e Ope ei te Tu Akakoromaki o te Atua?

I ETAI 3,000 mataiti i topa akenei, kua tata tetai tangata kite: “Kua taomi te tangata i te tangata ki tona uaorai kino.” (Koheleta 8:9, NW) Mei te taime i maani ei aia i te reira akara anga, kare rai te au turanga i meitaki mai. I te tuatua enua i aereia mai, kua noinoi te au tangata tataki tai me kare te au pupu i te mana akaaere, ko tetai i muri i tetai, te taomianga e te taangaanga anga i tetai au tangata. Kua akakoromaki marie tikai te Atua ko Iehova i teia.

Kua akakoromaki ana a Iehova koi tono ei te au kavamani i te mirioni ua atu ki to ratou mate i roto i te tamaki e kua akatika ua i te au tika kore pakari i te pae o te moni. I teia tuatau, te taangaanga nei rai aia i te akakoromaki i te au tangata e takore ra i te ariki otone e te akataero i te mareva e te tai. Mei teaa atura i te mamae kiaia te kite i te enua meitaki i te takore angaia e te akapou tau kore anga o te au vao rakau e te au mea ora i roto!

Eaa ra te Atua i Akakoromaki Ei?

Penei na tetai akatutu anga ngoie ua e tauturu ia tatou i te pau i teia uianga. E tamanako ana i te ka tupu ki tetai pitiniti me tae reiti ua mai rai te tangata angaanga. Eaa ta te tangata ona ka tau kia rave? Penei na tetai tika akatumuia e maro mai e kia akaatea viviki aia i te tangata angaanga. Inara penei ka maara iaia te materi Puka Tapu: “Ko tei kore e riri vave ra, e kite maata tona: ko tei rapurapu ra te ngakau ra, kua akateitei ïa i te tuatua neneva.” (Maseli 14:29) Penei na te tu kikite e akatupu iaia kia tiaki i mua ake ka rave atu ei. Penei ka manako aia i te tuku taime no tetai komono kia akamatauia kare i reira te pitiniti e tamanamanata maataia atu.

Penei na te manako taeake katoa anga e akatupu iaia kia tiaki. Akapeea te akamatakiteanga i te tangata angaanga mako kore kia kite e akapeea aia i te taui anga i tona au tu? Kore i reira e tuatua kiaia kia kite e me kua akatupuia tona tu reiti ua e tetai manamanata te ka rauka i te rapakauia me kare kua akatupuia e tetai tu kino kare e rauka i te rapakauia? Koi manako ei te ona o te pitiniti i te taangaanga i tona tu akakoromaki, kare i reira tona tu akakoromaki i kotingaia. E tau i reira kia taui te tangata angaanga me kare ka akaateaia atu aia i te openga. Ko te reira anake ua te mea tau no te pitiniti uaorai e ki te aronga angaanga te aru ra i te au ture.

Na roto rai i tetai tu mei teia, te taangaanga ra te Atua ko Iehova i te tu akakoromaki me aravei atu i te au rave anga tarevake e raukaʼi i te tuku taime kia angaanga tetai tuku anga tika ki tetai au manamanata. Tei maata atu, te oronga maira tona tu akakoromaki i tetai tuatau no te aronga rave tarevake kia taui i to ratou au mataara e kia rauka te au puapinga mutu kore. No reira, te akamaroiroi maira te Puka Tapu ia tatou kia kore e maromaroa i to te Atua tu akakoromaki? Mari ra te tuatua ra: “E tamanako ana i te akakoromaki o to tatou Atu ra ei ora.”​—2 Petero 3:15, NW.

Tetai Akaraanga i to te Atua Tu Akakoromaki

Kua akakoromaki ana te Atua ko Iehova i mua ake i te Vaipuke maata ra i to Noa tuatau. Kua akakiia teianei ao i te reira tuatau ki te ta ua e kua kino pakari tikai. Ka tatau tatou: “E kite akerā Iehova, e kino maata to te tangata i te enua nei, . . . Kua tuatua akerā Iehova, ‘E akapou au i te tangata i angaia e au i runga i te enua nei.’” (Genese 6:5, 7) Ae, kua manako takere a Iehova i tetai pau anga tikai ki te manamanata o te kino i te reira tuatau: koia oki te akaatea anga i te au tangata kino. Inara kare aia i rave viviki atu ana i te reira. No teaa ra?

No te mea kare te katoa anga o te tangata i kino ana. I mua i to te Atua aroaro e tuatua tika a Noa e tona ngutuare tangata. No reira e puapingaʼi ratou kua tiaki a Iehova ma te akakoromaki i te tuku ua i tetai au tangata tuatua tika kia rave i te au akateateamamao anga no te ora. Tei maata atu, kua riro te reira tiaki anga roa ei tuatau no Noa ei “tangata i ako i te tuatua-tika ra” te orongaanga i te tuatau no te aronga kino kia taui i to ratou au tu. Kua tuatua te Puka Tapu: “Ko tei kore i akarongo i muatangana, i te akakoromaki anga roa o te Atua, ka tatari ei aia i te tuatau ia Noa ra, i te tarai anga i te araka ra, i oraʼi e tokotai puke tangata i te vai, koia oki nga tangata toko varu ra.”​—2 Petero 2:5; 1 Petero 3:20.

Eaa te Atua i Akakoromaki ei i Teianei

I teia tuatau, te aiteite ra te turanga. Kua kite teianei ao i te ta ua. Mei te tuatau o Noa ra, kua akava takereia teianei ao e te Atua, koia oki te tuatua ra te Puka Tapu, “kia tae ki te rā akavaanga, e te mate o te aronga akono kore i te Atua ra.” (2 Petero 3:7) Me tupu te reira, kare e takoreanga akaou o te mareva, te takinokino anga o te aronga apikepike, me kare te rave noinoi anga ma te mana akaaere.

No teaa i reira, te Atua i roaʼi i te takore i te au tangata atua kore? No te mea te vaira te au maro anga no te akaoti e te akanoo anga i te au mea puapinga. E tikai, te neke ra a Iehova ki mua ki tetai tuku anga papu tikai ki te manamanata o te kino koia oki te au mea e manganui, kapiti mai te akaoraanga i te au tangata ngakau tika mei te tuikaa anga o te maki e te mate.

Ma te manako anga i te ka tupu te ka akakiteia atu i te ope, kua akakoro a Iehova i te oronga mai i tetai Akaora te ka oronga mai i tetai oko no ta tatou au ara. No runga iaia, te tuatua ra te Puka Tapu: “Kua aroa maata maira te Atua i teianei ao katoa i oronga mai ei aia i tana Tamaiti anau tai, kia rauka i te katoatoa te taangaanga i te akarongo kiaia e kia kore e takoreia inara kia rauka te ora mutu kore.” (Ioane 3:16, NW) Kua pou e tauatini ua atu au mataiti no te akateateamamao i te mataara no Iesu kia aere mai i te oronga i tona oraanga ei atinga no te tangata nei. I te reira au mataiti ravarai, kua akakoromaki tikai te Atua ma te aroa. Inara kare ainei te reira tu oronga ua i pauna te taime te tiaki anga?

Kua oronga mai a Iesu i te oko no te au tangata nei e vaitata rai i te rua tauatini mataiti i topa akenei. No teaa i reira te Atua i taangaanga ei i te akakoromaki e nei? Te tumu mua, kua riro to Iesu matenga ei akairo no te akamataanga o tetai angaanga apiipii. Kua tau kia apii te tangata nei i teia oronga anga aroa e kia orongaia te tuatau no te ariki i te reira me kare te kopae i te reira. Ka pou te tuatau, inara ka riro ia ei tuatau tuku meitakiia. Kua tuatua te Puka Tapu: “Kare ua te Atu i akaroaroa i tana i tuatua maira, mei ta tetai pae e karanga ra e, e akaroaroa; e akakoromaki maata ra tona ia tatou, kare rava i anoano e kia mate atu tetai, kia rauka katoatoa ra te tataraara.”​—2 Petero 3:9.

Te Maro Anga o te Kavamani

Ka pou katoa te taime no tetai akaou mea puapinga atu. Kua anoanoia i te rapakau i te manamanata o te kavamani a te tangata nei. Te akamata anga, no raro ana te tangata nei i te kavamani no te atua mai. Inara i roto i te aua o Edene, uri ke to tatou nga metua mua i te reira. Kua iki raua i te uri ke mai mei te Atua, te inangaroanga i te tutara ia raua uaorai. (Genese 3:1-5) E tikai, noatu e kare te tangata i angaia no te tutara iaia uaorai. Kua tata te peroveta Ieremia e: “Kua kite oki au, e Iehova e, e kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.”​—Ieremia 10:23; Maseli 20:24.

Noatu rai, mei te taime i tuatuaiaʼi te maro anga o te kavamani, kua akakoromaki a Iehova i te tuku taime no te rapakau atu i te reira. E tikai, kua oronga ua aia i te tuku e tauatini ua atu mataiti no te tangata i te tamata i te au tu kavamani te vaira. Ma teea tupu anga? Kua tika e kare atu e kavamani a te tangata nei e rauka i te akaatea i te takinokino anga, te aiteite kore, me kare tetai atu au mea tei akatupu i te mataora kore.

E tikai, te manako anga i te tuatua enua o te tangata nei, ka rauka ainei i tetai ua atu i te tuatua tikai e e tika kore te Atua me akakite aia i tona manako i te akaatea anga i te au kavamani ravarai a te tangata e te komono ia ratou ki tetai o tana uaorai? Kare rava! Te turou nei tatou ma te papu i te akatupu anga o teia totou Puka Tapu: “E i te au rā o taua au ariki ra, e akatupu ei te Atua no te rangi i tetai basileia, te ka kore rava e akakoreia e tuatau ua atu.”​—Daniela 2:44.

Te Ariki i te rangi ra o te reira Patireia ko Iesu tei akatuakaouia ra. Te akateateamamaoanga iaia no te reira taoonga​—pera katoa te ikianga i te au tangata te ka piri atu kiaia i te tutara ma ia katoa​—kua pou te tuatau. I te tuatau o te reira taime, kua taangaanga te Atua i te akakoromaki.

Kia Puapinga i Teianei Mei te Tu Akakoromaki o te Atua

I teia tuatau, e mirioni ua atu au tangata ie 212 au enua te puapinga ra mei te tu akakoromaki o te Atua. Kua taokotai mai ratou i to ratou anoano i te akarongo ki te Atua e te tavini i tona kavamani i te rangi. Me aravei ratou ma te taokotai i to ratou au Are Uipaanga Patireia, kua apii ratou e mei teaa atura te meitaki atu i te taangaanga i te au kaveinga a te Puka Tapu i to ratou oraanga. Kare ratou e piri atu ana ki te au poritiki vee anga o to teianei ao, noatu e te kauraro ra ratou uaorai ki te au kavamani a te tangata koi akatika ei te Atua ia ratou kia angaanga.​—Mataio 22:21; Roma 13:1-5.

Teia tu taokotai anga i rotopu i te au tangata e manganui, te akamaata ra ia Iehova ko Tei rauka i te apai mai i te tu rotai ki rotopu i te iti tangata ma te anoano matara ua tei apii i te inangaro iaia e tei inangaro i te tavini iaia. Kare e ekoko anga e kua aravei koe i teia aronga ia ratou e rave tamou ra i taua angaanga rai ta Iesu uaorai i akamata, koia oki te tutu aereanga i te tuatua meitaki o te Patireia o te Atua. Kua akakite a Iesu i te take o teia angaanga i tona tuatua anga: “E kia tutu aereia teia tuatua meitaki o te patireia ki te au enua tangataia ei kite ki te au pa enua ravarai; i reira e tae mai ei te openga.”​—Mataio 24:14, NW.

Kare e Roa Atu Ana!

Te akapapu maira te au tika te kitea ra e te vaitata ra i te akaoti te au akanoo anga no te kavamani tika a te Atua i te rave i te tutara anga o te au ra i te enua nei. I muri ake i te akatutuanga i te au tupu anga kino o te poka anga o te kavamani a te tangata nei e kua kite ana tatou i te tuatau o teia anere mataiti, kua tuatua a Iesu e: “Kia akara kotou i taua au mea nei i te tupu anga, kua vaitata ïa te basileia o te Atua, kia kite oki kotou.”​—Luka 21:10, 11, 31.

Kare e roa ana ka akaatea te Atua i te kino ra mei te tutu o teia enua nei. E taangaanga tikaiia i reira te au tuatua a te tata taramo: “Ka riro oki te aronga i rave i te kino ra i te tipu keia . . . E roa poto ake, e kare ua te tangata kino ra, koia tika rai, ka akara koe i tona ngai, e kare ua!” (Salamo 37:9, 10) Ka rauka ainei ia koe i te tamanako i tetai ao kare e kino? Koai ma te ka akaaere i te au mea i reira? Te tuatua ra te Puka Tapu: “I na, e tutara mai tetai ariki [Karaiti ra ko Iesu tei akateronoia i te au rangi] ma te tuatua-tika ra, e e tutara oki te ui ariki ra [tona aronga tiratiratu tei akataoongaia i te enua nei] ma te tuatua-tau. E ko ta te tuatua-tika angaanga, ko te au ïa; e te openga o te tuatua-tika ra, ko te pekapeka kore ïa, e te mataku kore, e tuatau ua atu. E noo oki toku ra iti-tangata ki roto i te are au nuingangare, e te nooanga mataku kore e te ngai kanga koreia mai.”​—Isaia 32:1, 17, 18.

No reira, ka akamatara ta te Atua kavamani i te rangi i te au tu kino o ta te tangata nei raveanga tarevake e te akaaere i te aronga te tapapa ra Iaia ki roto i tetai totaiete tangata te rotai ra. Te akatutuanga i teia tu rotai, kua tuatua te Puka Tapu: “E ka vai tikai te ruko no tetai manga taime ki te toa punua mamoe, e ma te punua puakanio ra ka moe te nemera uaorai ki raro, e te punua puakatoro ra e te riona ou ma te rauru roroa e te au animara angai meitakiia te kapiti katoa anga; e na tetai tamaiti e arataki ia ratou . . . Kare ratou e rave ua atu i tetai takino anga me kare te akatupu i tetai ua atu takore anga i toku maunga tapu ravarai; no te mea ka akaki tikaiia te enua ki te kite o Iehova mei te au vai ra te tapokianga i te tai.”​—Isaia 11:6-9, NW.

Mei teaa atura i te umere i teia tupu anga umere mei ta te Atua taangaanga anga i te tu akakoromaki? No reira, i te mea e ka akaapaapa no tei tiaki te Atua no tetai tuatau roa, kore i reira e akapou i tona tu akakoromaki no te kauraro ia koe uaorai ki tona Patireia? E apii mei te Puka Tapu e eaa tana au turanga e te aru atu i te reira. E piri atu ki tetai pae te rotai ra i te kauraro kiaia. I reira, no to te Atua tu akakoromaki ka tupu te reira ei au akameitakianga mutu kore noou.