E Akariro na Nga Rima Mate Kore o Iehova e Turu ia Koe

“Ko te Atua mutu kore ra toou ngai nooanga, e i raro i reira nga rima mate kore ra.”​—DEUTERONOMI 33:27, American Standard Version.

1, 2. Eaa ka raukai i to Iehova au tangata kia irinaki papu tikai i tana turu anga?

TE AKONO nei a Iehova i tona au tangata. “Ei akatauanga, i te tuatau katoa o to Iseraela ra taitaia anga, “kua taitaia katoa oki aia”! No tona aroa e te tangi kua “taaki aia ia ratou e kua apai ia ratou.” (Isaia 63:7-9, NW) No reira me e tiratiratu tatou ki te Atua, ka papu ra ia tatou e ka turu aia ia tatou.

² Kua karanga te peroveta ko Mose e: “E punanga te Atua o muatangana ra, e tei raro io i reira nga rima mate kore e tuatau ua atu.” (Deuteronomi 33:27, NW) Te karanga ra tetai atu urianga e: “Ko te Atua mutu kore ra toou ngai nooanga, e i raro i reira nga rima mate kore ra.” (American Standard Version) Inara akapeea nga rima o te Atua ra i te turu anga i tona au tavini?

Eaa i Manganui ei te Au Tu Ngata?

3. Aea ka raukai i te au tangata akarongo katoa ra kia rekareka i “te rangatira meitaki o te tamariki a te Atua ra”?

³ Kare te tavinianga ia Iehova e paruru ia tatou i te au tu ngata te matauia nei e te au tangata apa katoa nei. Kua karanga a Iobu tavini o te Atua ra: “Ko te tangata ta te vaine e anau nei, e iti ua ona puke ra, e te ki oki i te pekapeka.” (Iobu 14:1) Te “au ra o to tatou au mataiti,” e na te tata taramo ei: “Ka tupu ra te taitaia e te au mea tamamae i reira.” (Salamo 90:10, NW) Ka riro rai te oraanga mei te reira te tu e kia tae roa ‘kia akaoraia te au mea angaia nei i te tapeka o te mate e kia rauka te rangatira meitaki o te tamariki a te Atua ra.’ (Roma 8:19-22) Ka tupu te reira a te tuatau o to Karaiti Tutara no te Tauatini Mataiti. Na runga i te akatumu anga o to Iesu ra atinga oko ka kite te au tangata o raro ake i te Patireia a reira i te akaora anga mei te ara e te mate. Kia tae ki te openga o te Tauatini Mataiti ra, ka oti i te Karaiti ratou ko tona au oa ariki taunga ra i te tauturu i te au tangata akarongo katoa ra kia itae i te tu apa kore ua, e ko te aronga te ka vai tiratiratu ki te Atua a te tuatau o te timata openga a Satani ratou ko tana au temoni ra ka tata tamouia to ratou au ingoa ki roto i “te buka ora ra.” (Apokalupo 20:12-15) Ei reira e ki ei to ratou rekareka i te tu rangatira kaka no te tamariki a te Atua ra.

4. Kare e ko te akaapaanga i ta tatou tuanga i te oraanga nei, eaa ra ta tatou ka tau kia rave?

⁴ I teianei, kare ei te akaapaanga i to tatou tu i te oraanga, kia irinaki ra tatou ia Iehova. (1 Samuela 12:22; Iuda 16) E akameitaki katoa tatou no to tatou Taunga Maata, koia a Iesu, na roto atura iaia tatou i te akavaitata atu ki te Atua “kia aroaia mai tatou nei, e kia rauka te meitaki ei tauturu mai ia tatou i te tuatau e tau ei ra.” (Ebera 4:14-16) Auraka roa tatou kia aite atu kia Adamu ra. Kua akaraanga, akaapa tarevake aia ia Iehova no te orongaanga i tetai vaine kino nana ra, i te na ko anga: “Na te vaine taau i o mai ei tokorua noku ra, i oronga mai i to taua rakau kiaku ra, kai iora au.” (Genese 3:12) Te oronga maira te Atua i te au mea memeitaki e kare e apai mai i te au tu ngata ki runga ia tatou nei. (Mataio 5:45; Iakobo 1:17) E putuputu te au tu kino i te tupu no to tatou uaorai ngere i te pakari me kare no te tarevake o tetai ke atura. E penei katoa ka tupu mai kia tatou no to tatou tu ara e te noo anga ki roto i te ao te vai nei i roto i te mana o Satani. (Maseli 19:3; 1 Ioane 5:19) Inara, ka rave tamou rai nga rima mate kore o Iehova ra i te turu i tona au tavini tiratiratu te irinaki ra iaia na roto i te pure e te akono tataki tai ra i te ako a tana Tuatua.​—Salamo 37:5; 119:105.

Akamaroiroiia i te Tuatau Maki

5. Eaa te akamaroiroi anga te ka kitea e te aronga makiia ra ia Salamo 41:1-3?

⁵ Te akatupu maira te maki i te tu maromaroa no te maata anga o tatou i etai tuatau. Inara, kua karanga a Davida e: “E ao to tei akono mai i te tangata putaua ra: ka akaoraia aia e Iehova i te tuatau tumatetenga ra. Na Iehova aia e tiaki, e akaora oki iaia, e akameitakiia aia i te enua nei: auraka ra koe e tuku iaia ki te anoano o tona au enemi. Na Iehova e akamaroiroi mai iaia i tona roi maki ra; e naau e eeu i tona roi katoa i te maki angaia ra.”​—Salamo 41:1-3.

6, 7. Akapeea ta te Atua ra tauturu anga ia Davida iaia i maki ra i runga i te roi, e akapeea ka raukai i teia i te akamaroiroi i te au tavini o Iehova ra i teia tuatau?

⁶ Ka tauturu ra te tangata manako meitaki i tei ngere ra. Ko “te tuatau tumatetenga ra” penei e atianga tumatetenga me kare e tuatau roa no tetai turanga ngata tei akaapikepike ra i tetai. Kua irinaki aia i te Atua kia paruru iaia i tona tuatau makiia, e ‘kua akameitaki tetai papaki iaia i te enua nei’ na te akatotoaanga i te tuatua no to Iehova ra aroa ua i te akonoanga iaia ra. Kua akamaroiroi atura te Atua ia Davida “i tona roi maki ra,” penei no te tuatau pekapeka i to Abasaloma tamaiti a Davida ra kimi anga kia riro iaia te terono o Iseraela ra.​—2 Samuela 15:1-6.

⁷ I te mea kua akaari atu a Davida i te akamanako anga ki te aronga putaua, kua manako aia e ka akamaroiroi te Atua iaia i te tuatau te apikepike ra aia i runga i tona roi maki ra. (Salamo 18:24-26) Noatu rai te kino ra tona maki, kua papu iaia e ‘ka taui te Atua i tona roi,’ kare e na te takoreanga i tona maki na te tu temeio, mari ra na te akamaroiroianga iaia ma te au manako pumaana ra. Mei te mea rai e te taui ra a Iehova i tona roi mei to te maki ki to tei meitaki maira. Mei te reira katoa oki, me te maki ra tatou e tavini ra na te Atua, ka turu to Iehova nga rima mate kore ia tatou.

Akapumaana Anga no te Aronga Maromaroa

8. Akapeea ta tetai Kerititiano te makiia ra akaari anga i tona irinaki anga i te Atua?

⁸ Penei ka akatupu mai te maki i te manako maromaroa. Ko tetai Kerititiano maki tikai, tei ngere i te maroiroi i tetai taime no te tatau, kua karanga aia: “Te akatupu nei teia iaku kia manganui te au manako ngakau maromaroa, te au manako e kua kore oku puapinga, e kua pururu te roimata.” I te kiteanga e te anoano ra a Satani kia akapaii iaia ma te maroiroi kore anga, kua tamaki rai aia i reira, na te matakite anga e kia tauturu mai a Iehova iaia kare roa aia e topa. (Iakobo 4:7) Ko teia tangata e akamaroiroi anga aia kia etai ke ra tei kite e e irinakianga tona i te Atua. (Salamo 29:11) E noatu me tei roto i te are maki, ka ringi atura aia i tei maki ra e etai katoa atu kia akamaroiroi ia ratou i te pae vaerua ra. Kua maroiroi katoa oki aia uaorai na te akarongoanga i te au tepe no te au imene Patireia e etai au atikara no teia tianara nei e tona tokorua te makatini, Awake!, e na te kapiti anga ma te au taeake Kerititiano katoa oki. Kua karanga teia taeake e: “E putuputu au i te tuatua anga kia Iehova na te pure, ma te patianga kiaia kia oronga mai i te maroiroi noku, te arataki anga, te pumaana, e te tauturu kia akakoromaki.” Me ko koe tetai e Kerititiano te manamanata ra no te makiia, e irinaki tamou ia Iehova e akariro oki i tona nga rima mate kore ei turu ia koe.

9. Eaa etai akatauanga te akakite maira e i etai tuatau te tamanataia ra te au tangata akono i te Atua e te manako maromaroa?

⁹ Ko te maromaroa e manata taito ia. I tona timata angaia ra, kua tuatua a Iobu mei tetai tangata tei manako ra e kua akaruke te Atua iaia. (Iobu 29:2-5) Kua maromaroa a Nehemia no te manako taitaia i te tu tanea o Ierusalema e tona paruru, e no te maromaroa o Petero i tona uunaanga i te Karaiti ra, kua aue aia ma te ngakau mamae. (Nehemia 2:1-8; Luka 22:62) Kua maromaroa a Epaperodito no te mea kua rongo te au Kerititiano i Philipi ra e kua mate aia i te maki. (Philipi 2:25, 26) Kua maromaroa tetai papaki o te au Kerititiano i Tesalonia ra, e kua raurau atura Paulo i te au taeake “kia tuatua ma te pumaana ki i te au meta maromaroa.” (1 Tesalonia 5:14, NW) Inara akapeea ta te Atua tauturu i te reira aronga tataki tai?

10. Penei eaa te ka tauturu i te tautaanga kia akakore i te maromaroa o te manako ra?

¹⁰ E mea tau kia tuku i te tika e akapeea te akono i te tu maromaroa kino.a (Galatia 6:5) Kia rava te akaangaroi anga e kia tau te rave angaanga e penei ka tauturu te reira. Eiaa e manako i te au manamanata e manganui ei tetai maromaroa maata katoa ra, penei ka kitea e tetai tei maromaroa ra e meitaki te rave i te takore anga ia ratou e okotai i te taime. E mea puapinga te tauturu akapumaanaanga no ko mai i te aronga pakari o te putuputuanga ra, e maata rava atu oki me te akatupu ra teia manata no te maki manako i te maromaroa no te pae vaerua. (Iakobo 5:13-15) I rungao i te au mea katoatoa, e puapinga maata kia irinaki ia Iehova, ‘ma te urianga i to tatou tumatetenga katoa ki runga iaia, koia oki te tiaki mai ia tatou.’ Ka apai mai te pure tamou e te akatenga i ‘te au o te Atua, ko tei paruru i te ngakau e te manako i te Mesia nei ia Iesu.’​—1 Petero 5:6-11; Philipi 4:6, 7.

Na Iehova e Tauturu ia Tatou kia Akakoromaki i te Mamae Ngakau

11-13. Eaa te ka tauturu i te akakore i te maromaroa no te matenga o tetai tei akaperepereia ra?

¹¹ Ko tetai atu tupu anga taitaia ko te matenga ia o tetai tei akaperepereia ra. Kua aue a Aberahama i te takake anga tana vaine, ko Sara. (Genese 23:2) I te mate anga tana tamaiti koia Abasaloma, kua aue a Davida no te mamae ngakau. (2 Samuela 18:33) Noatu rai ko te tangata apa kore ua ra ko Iesu kua “aue iora” aia i te matenga tona taeake ko Lazaro! (Ioane 11:35) E no reira e tu mii ra tetai me ka mate tetai tei akaperepereia ra. Inara eaa te ka tauturu i te akakore atu i te reira tu mii?

¹² Te tauturu nei te Atua i tona au tangata kia akakoromaki i te mamae ngakau kino rava no tetai tei takake ra. Te karanga ra tana Tuatua e e tuakaou anga tetai. E no reira, kare tatou e “maromaroa, mei ta tetai papaki e rave ra kare o ratou manakonakoanga ra.” (1 Tesalonia 4:13, NW; Angaanga 24:15) Te tauturu ra te vaerua o Iehova ia tatou kia tupu te au e te akarongo e kia tamanako no runga i te taputou umere no te tuatau ki mua i roto i tana Tuatua, no reira kare tatou e tapoki takiriia ki te au manako maromaroa no tetai akaperepereia tei mate ra. Ka rauka katoa oki te pumaana na te tatauanga i te au Tuatua Tapu e te pureanga ki “te Atua nona anake te pumaana” ra.​—2 Korinetia 1:3, 4; Salamo 68:4-6.

¹³ Ka rauka ia tatou te pumaana i te manakonako anga no te tuakaou anga mei ia Iobu akono ra i te Atua, koia tei karanga ra: “Naringa koe [e Iehova] e akapipini iaku ki te vaarua e, angairi koe e uuna iaku, e kia riro ke toou riri, angairi koe e akataka i te taime noku, ka maara mai ei iaku nei! Kia mate te tangata nei, ka ora akaou ainei aia? E tapapa rai au i oku puke rā i akonoia ra e kia ope, e tae rava atu ki toku tu ke anga ra. Naau e kapiki mai, e naku e io atu kia koe: e tangi rai koe ki te angaanga a to rima ra.” (Iobu 14:13-15) Kare oki i te mea matauia kia maata te maromaroa no tei aere tetai taeake akaperepereia i tetai tere, no te mea ka tiaki tatou kia kite akaou iaia ra. Ka meangiti mairai te maromaroa te ka tupu me ka ngaro tetai tei akaperepereia me ka akara tatou i te matenga o tetai Kerititiano tiratiratu mei te reira rai te tu. Me tona manakonako anga no te enua nei, ka tu mai ra aia mei te moe o te mate ki konei i te enua nei a te tuatau o te Tutara o te Karaiti no te Tauatini Mataiti. (Ioane 5:28, 29; Apokalupo 20:11-13) Me ka manakonako tatou kia ora ki runga i te enua nei e tuatau ua atu, penei i konei tatou i te aravei i ta tatou i akaperepere kia akatuia mai aia ra.

14. Akapeea nga vaine takaua Kerititiano e rua ra i te akono anga i te matenga ta raua nga tane?

¹⁴ I muri ake i te matenga o tana tane, kua kite tetai tuaine e e mea tau nona kia akono ua atu i tona oraanga i te tavini anga ki te Atua. Kapiti atu ki tana ‘rave anga angaanga maata na te Atu’ kua rave aia i tetai tivaevae e 800 aenga kakau. (1 Korinetia 15:58) “Ko tetai angaanga meitaki teia,” e nana ei, no te mea i te tuatau katoa iaku e angaanga ra kua rauka iaku i te akarongorongo atu i te au imene no te Patireia e te au tepe Puka Tapu, e kua akaki i toku manako.” Kua maara meitaki iaia tetai aere mai anga o tetai nga tangata pakari kite ma tana vaine. Kua akakite maira aia i te Puka Tapu i to te Atua ra manako tikai no te au vaine takaua. (Iakobo 1:27) Ko tetai atu vaine Kerititiano kare i manako tangi iaia uaorai i te matenga tana tane. Kua ariki aia i te turu anga a te au taeake e kua maata tona manako anga ia etai ke atura. “Kua putuputu taku pure anga e kua akatupu au i te pirianga vaitata kia Iehova,” ko tana ia i tuatua. Mei teaa ra te akameitakianga kia rauka te turu anga no nga rima mate kore o te Atua ra!

Tauturu me ka Apa Tatou

15. Eaa te tumu maata o te au tuatua a Davida ia Salamo 19:7-13?

¹⁵ Noatu rai e te inangaro ra tatou i te ture a Iehova, ka apa ra tatou i etai taime. Kare e ekoko anga ka maromaroa ra tatou i te reira, mei tei tupu ra kia Davida, tei maata atura kiaia i te auro, ta te Atua au ture, tana akamaaraara anga, tana ikuiku anga, e tana au tuku anga tika katoa oki. Kua karanga aia: “Na te reira oki i apii mai i to tavini; tei te akono i te reira te tutaki maata. Koai oki tei kite i tana uaorai au ara? e tamā mai koe iaku i te au ara kitea koreia nei: E tāpu mai koe i to tavini i te ara māro; auraka roa te reira kia kaurunga mai iaku: ei reira au e meitaki ei, kore akera oki te ara maata iaku nei. (Salamo 19:7-13) Ka akara matatio tatou i teia au tuatua nei.

16. Eaa i tau ei kia kopae ke tatou i te rave maro anga i te ara?

¹⁶ E kino roa atu te rave maro i te ara i to te rave ara no te kite kore. Kua kopaeia atu a Saula ei ariki no te rave maro anga i te tuku atinga e no te kore i tamate i te ariki no to Amaleka ko Agaga e te apinga memeitaki katoa ra, noatu e i akaue atura te Atua kia akapou katoaia to Amaleka ra. (1 Samuela 13:8-14; 15:8-19) Kua tupu te maki repera ki te ariki ko Uzia no te rave maro anga i te au angaanga na te kau taunga ra. (2 Paraleipomeno 26:16-21) I te rave atu anga i te aruna o te koreromotu ra ki Ierusalema e kua vaitata i te tauri te pereo i nga puakatoro te kukume ra i te reira, kua ta te Atua ia Uza kia mate no te mea i mou atu aia i taua aruna ra kia kore e ngaueue. (2 Samuela 6:6, 7) E no reira, me kare tatou i kite eaa ta tatou ka tau kia rave e me e tika to tatou kia rave i tetai apinga, ka tau tatou kia akaari i te tu kauraro e kia aravei atu i te aronga e kite to ratou. (Maseli 11:2; 13:10) Inara, me kua rave ana tatou i te ara maro anga, ka tau tatou i reira kia pure kia akakoreia mai e te Atua ta tatou ara e kia tauturuia mai tatou kia paruru atu i te reira tu rave ara maro anga a te tuatau ki mua.

17. Eaa te akatupu anga ki tetai tangata i te ara uunaia ra, inara akapeea e raukai te akakore anga ara e te matara anga oki i te reira?

¹⁷ Te au ara uunaia ka akatupu i te maromaroa. Kia tau ki ta Salamo 32:1-5, I tauta a Davida kia uuna i tana ara, inara kua karanga aia: “Iaku i muteki ua ra, kua kino roa oku au ivi, i te ngunguru anga noku e po ua atu te rā. Te teimaa maira oki to rima i runga iaku i te po e te ao; toku mauu ra, kua riro ïa mei te marō o te tuatau [akaau, NW] ra.” Kua roiroi a Davida i te tamataanga kia tapoki i te akava ngakau apa ra, e kua apikepike aia i te manako taitaia ra mei tetai pu rakau tei ngere ra i te mauu i te tuatau maro me kare vera maro o te akaau ra. Penei kua mamae aia i te manako kino e te kino te kopapa e te ngere i te rekareka no te kore e aaki i tana ara. Na te aaki anga anake ki te Atua ra ka akakoreiaʼi te ara e ka mataraʼi te apa. Kua karanga a Davida: “E ao tona, to te akakoreia tana ara, to tei tapokiia tona kino. . . . Kua aaki atura au i taku ara kia koe ra; e kare au i uuna i taku nei apa: i tuatua akera oki au e, E aaki au i taku ara kia Iehova ra; e kua akakore mai koe i te kino o taua ara naku ra.” Ka inangaroia te tauturu mei ko mai i te aronga pakari Kerititiano ra kia tauturu mai ia tatou i te pae vaerua.​—Maseli 28:13; Iakobo 5:13-20.

18. Eaa te akapapu anga e e roa te vai anga o ta te ara e akatupu mai, inara eaa tetai tumu akapumaana i te reira au turanga?

¹⁸ Penei e roa ta te ara akatupu anga. I akapera ia ia Davida ra, tei rave ra i te akaturi ma Bateseba, i te akapapa anga kia mate tana tane, e ka akaipoipo atu ei i taua vaine takaua tei nui ra. (2 Samuela 11:1-27) Noatu rai e kua akaari atu te Atua i te aroa ua no te koreromotu Patireia ra, te tataraara anga o Davida, e tana akono anga aroa ia etai ke atura, kua tupu ra kia Davida te ‘tumatetenga ki roto i tona uaorai ngutuare.’ (2 Samuela 12:1-12) Kua mate taua tamaiti na te akaturi ra i anauia mai ei. Kua kukumi te tamaiti a Davida koia a Amanona ia Tamara ko tona apa tuaine ia e kua tamateia a Amanona i raro ake i ta Abasaloma ikuiku anga. (2 Samuela 12:15-23; 13:1-33) Kua taakamaia te ingoa o Davida na to Abasaloma pirianga ki nga vaine tavini o Davida ra. Kua tamata katoa aia kia noo aia ki runga i te terono mari ra kua tamateia aia. (2 Samuela 15:1–18:33) Te vaira te tupuanga kino i muri ake i te ara anga. Ei akatauanga, penei ka tataraara tetai tei akaateaia ra ki vao i te putuputuanga no te rave tarevake, e kua akaoki akaouia mai ki roto i te putuputuanga, inara penei ka pou etai mataiti e kore atu ei te akakino anga e te manako ngakau taitaia tei tupu mai no te apa. I teianei, e pumaana tikai ta Iehova akakore anga i te ara e te turu anga a tona nga rima mate kore ra!

Akaoraia Mei te Au Taitaia i Runga ia Tatou

19. Akapeea ta te vaerua o te Atua ra tauturu mai me ka timata pakariia mai tatou?

¹⁹ Kia timata pakariia mai, penei e ngere to tatou i te pakari e te maroiroi no te iki anga e te rave anga i te reira kia oti. I te reira tu, “te tauturu katoa mai nei oki te Vaerua [o te Atua] i to tatou apikepike: kare oki tatou i kite meitaki i te mea e tau kia pure tatou: na te Vaerua uaorai e pati i ta tatou ma te ngunguru e kore e tika kia tuatua ra.” (Roma 8:26) Me ka apai mai a Iehova i tetai akatuke anga, ka tau rai tatou kia akameitaki. Inara, penei ka akaora tona rima ia tatou na tetai mataara ke ra. Me ka pure tatou no te pakari, penei ka akakite mai a Iehova na tona vaerua eaa ta tatou ka tau kia rave e ka oronga katoa mai i te maroiroi tau ei rave i te reira. (Iakobo 1:5-8) Ma tana tauturu, ka rauka ia tatou i te akakoromaki i te ‘taitaia i te au timataanga tu ke ke ra’ e ka autu mai i te reira ma te akarongo tei timataia e tei akamaroiroiia ra.​—1 Petero 1:6-8.

20. Eaa ta tatou ka rekareka me ka akariro tikai tatou na to Iehova nga rima mate kore e turu mai ia tatou?

²⁰ Auraka rava tatou kia roiroi i te ariuanga ki te Atua na roto i te pure. “Te ana ua nei rai toku mata kia Iehova; no te mea e riro aia i te kiriti mai i toku vaevae i te ereere ra,” ta Davida i karanga. “E ariu mai iaku, e aroa mai iaku; e tumatetenga oki toku e te noongata. Kua maata io nei te mamae o toku ngakau: e akaora koe iaku i toku au tumatetenga nei. E akara mai koe i toku mate e toku mamae; e e akakore mai koe i taku au ara katoa nei.” (Salamo 25:15-18) Mei ia Davida rai, ka rekareka katoa tatou i te akaora anga na te Atua ra, i tona aroa, e te akakore anga ara me ka tuku tikai tatou na nga rima mate kore o Iehova ra e turu mai ia tatou nei.

[Au Tataanga Rikiriki i Raro]

Akapeea Koe Me Pau?

◻ Akapeea ta Iehova tauturu anga i tona au tavini tei makiia ra?

◻ Eaa tetai tauturu mai me te tauta ra tatou kia akakore i te manako maromaroa?

◻ Eaa te ka tauturu i te akakore atu i te maromaroa no te matenga o tetai tei akaperepereia ra?

◻ Akapeea e meitaki mai ei te aronga tei uuna ra i ta ratou au ara?

◻ Eaa te tauturu te vai maira me ka timata pakariia te au tangata o Iehova ra?

[Tutu i te kapi 16, 17]

Ka rauka ia tatou te akapumaana anga mei te manakonako anga i te tuakaou anga, mei ia Iobu akono i te Atua rai