E Angaanga Orometua Naau Ainei?

KUA akaari a Iehova i tona tu oronga ua na te akapuapinga anga ma te tiama i te enua kia mataora to ratou oraanga. Kua oronga ua mai aia i te au puapinga pera katoa i muri ake i to Adamu e to Eva patoi anga. Eaa tei maata atu, kua akaari aia i tona aroa meitaki rava atu na te tukuanga mai i tana Tamaiti no te akaora i te au tangata irinaki mei te mate o te ara.​—Mataio 5:45; Ioane 3:16.

Akapeea e raukaʼi ia tatou i te ariu atu ki teia tu aroa? Kua karanga a Iesu e kia aroa tatou i to tatou Atua ko Iehova ma to tatou ngakau, meta, manako, e te maroiroi katoa. Te akakite maira teia e te ou ra tatou i ta tatou akamori e te akono akaaka e e tau kia noo tatou i te au oraanga kia rotai ki tona anoano.​—Mareko 12:30; 1 Petero 4:2.

Inara eaa te o atura ki roto i te raveanga i to te Atua anoano? Te vaira ainei tetai angaanga te ka rauka ia tatou i te rave nana​—ko tetai angaanga orometua te tau ra kia piri atu tatou ki roto?

Te Anoano no te Au Orometua

Kua akaoripu te au ekaretia i te au tangata e akapeea te akamori e te tavini i te Atua. Inara, te akaari maira te Puka Tapu e te vaira okotai anake akonoanga tika, “okotai Atu, okotai akarongo, okotai bapetizo, Okotai Atua, ko te Metua ïa no te tangata katoatoa, tei rungao i te tangata ravarai.” Kua karanga a Iesu e: “E akamori ei i te Metua te aronga akamori tika ra, ma te vaerua e te tuatua-mou.” No reira kua akoia ratou: “E ei tuatua okotai ta kotou ravarai, e auraka ei pae ke i roto ia kotou na.”​—Ephesia 4:3-6; Ioane 4:23; 1 Korinetia 1:10.

Kua akamata te oripu anga e eaa te akonoanga tika i Edene ra te akaao anga a Satani i te tika anga o to Iehova tu ngateitei rava na te patoianga i te tutara a te Atua. (Genese 3:1-6, 13) I teianei te rave ra a Satani i teia patoi anga ki te Atua na roto i te au apiianga pikikaa tei akatotoaia e te au orometua akonoanga pikikaa tei “akatutu tavini tona au tavini no te tuatua-tika.” No reira te karanga ra te Puka Tapu: “E aku au akaperepere e, auraka e akarongo atu i te au vaerua ravarai, . . . no te mea e manganui te peroveta pikikaa i aere atu na na te ao nei.”​—2 Korinetia 11:14, 15; 1 Ioane 4:1.

Ma te rekareka, kua rave te Atua i te au takainga no te akaoti i teia maro anga no te tutara. Te tono anga i tana Tamaiti no te oko mai i te tangata nei, kua maani aia i teianei ia Iesu ei Ariki no te Patireia o te Atua i te rangi, ma te mana no te takore ia Satani e tana au peroveta, me kare au orometua. Na teia e akapapu e kua raveia to te Atua anoano i te enua nei, ki te akameitakianga mutu kore no te au tangata akarongo.​—Daniela 7:13, 14; Ebera 2:9.

Kua arai a Satani i teia au tuatua mou. (2 Korinetia 4:4) No reira, te anoanoia ra tatou kia tavini ei au orometua no te Atua, te akakiteanga i te au pikikaa a Satani e te tutuanga ei au kite no te tuatua mou. Kare a Iehova e maro ia tatou ki roto i tana angaanga. Te inangaro ra ia tatou, mei ia Iesu rai, kia oronga puareinga ua ia tatou uaorai no to tatou tu ariki iaia e no tana i rave no tatou.​—Salamo 110:3; Ebera 12:1-3.

Te Angaanga Orometua Kerititiano

Kua “aere atura [Iesu] na roto i te au oire, e te au vila katoa, i te tutu aere anga i te tuatua meitaki i te basileia o te Atua.” (Luka 8:1) Kua akamatau katoa aia i tana pipi kia riro mai ei au orometua mei iaia rai e kua tuku ia ratou ki vao no te tutu aere. (Mataio 10:1-14, 27) I muri mai, kua tono aia ia ratou kia rave ua atu rai i te angaanga orometua ki te au ngai mamao o teianei ao.​—Mataio 28:19, 20; Angaanga 1:8.

Te vaira teia tono anga ki runga i te au Kerititiano mou, e te akakeu ra to te Atua vaerua ia ratou kia tutu aere. Mei tei tupu i Penetekote o te 33 T.N., ko te katoatoa tei ariki i te tuatua meitaki ra ka apai ratou i te apainga o te akakite anga i to ratou akarongo ki te katoatoa.​—Angaanga 2:1-4, 16-21; Roma 10:9, 13-15.

Inara, kare te maata anga o te au tangata e kite ana ia ratou uaorai ei au orometua. Kua karanga a Petero, ko tetai o te Au Kite o Iehova e: “Te maata anga o te taime, te manako ra te au tane o Tiamani e e mea ngateitei kore no ratou i te tuatua no runga i te akonoanga. ‘Na te au orometua te reira angaanga,’ i karangaʼi ratou.” I tau kia Tony, e tangata angaanga evangeria no tetai ngauru ua atu mataiti, kua karanga te au tangata o Engarani e: “Taau e tuatua ra e meitaki ia, e i toku manako e au tangata memeitaki te Au Kite o Iehova. Inara no te aere mei tera ngutupa ki tera ngutupa​—kare rava e rauka iaku i te rave i te reira.” Kua apii a Ben i te Puka Tapu no tetai manga taime ki tetai tangata Naiteria tei karanga kiaia e: “Kare e rauka iaku i te akaari iaku uaorai na te tutu aereanga ki te katoatoa mei tera are ki tera are; inara ka rauka iaku i te oronga moni ki ta kotou putuputuanga no te tauturu i te aronga tei anoano i te rave i te reira.” Ae, te ngere ra te maata o te au tangata i te akarongo e te irinaki tikai tei anoanoia no te angaanga orometua Kerititiano.

Noatu rai, e apainga te tutu aereanga na te katoatoa i roto i te putuputuanga Kerititiano, noatu e eaa te mataiti me kare e tane me kore e vaine. Kare anake ua te reira na te aronga pakari e te au tavini orometua, tei ‘arataki,’ mari katoa ra no te au Kerititiano noa ua nei. Te akamaroiroiia ra te katoatoa: “Apai i te atinga ra, i te akameitaki i te Atua, eiaa e tivata, koia oki ta te vaa nei, i te akapaatu anga i tona ingoa. . . . E akarongo i to kotou au arataki, e kauraro atu kotou.”​—Ebera 13:15, 17.

Te tuatuaanga ki tetai urupu kairo ua i roto i tana Ako i te Maunga ra, kua karanga a Iesu e: “Kare te aronga e tuatua mai iaku e, E te Atu, e te Atu, e ope katoatoa i te tae ki te basileia ra ki te ao; ko tei akono ra i te anoano o taku Metua i te ao ra.” I tetai atianga kua akaari aia e na te raveanga i to te Atua anoano ka kapiti mai te tutu aereanga ki te aronga irinaki kore. Te raurau ra tana au pipi iaia kia akaruke i te tutu aereanga ki etai au Samaria e raukaʼi i te kai manga, inara kua karanga atu aia: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.”​—Mataio 7:21; Ioane 4:27-38.

E Tau Ainei ei Angaanga Naau?

I tetai taime e inangaro ake te au tangata i te aruaru i te au kai o te kopapa e te apinganui. Inara i te akamata anga i roto i te Ako i te Maunga, kua ako a Iesu i tona aronga akarongorongo te aruaruanga puapinga kore ua i te reira au mea. Kua karanga aia, “ka akaputu ra i te apinga na kotou ki runga i te rangi, . . . E na mua ra kotou i te kimi i te basileia o te Atua, e te tuatua-tika nana ra.”​—Mataio 6:20, 33.

Te aiteanga o te kimianga i te Patireia na mua kia kore e tuku i tetai atu au inangaro kia tapoki i ta tatou angaanga orometua. Inara, kare te aiteanga e na te raveanga i teia ka kopaeia tetai atu mea ravarai. Ei akaraanga, te akamaroiroi maira te Puka Tapu ia tatou auraka e akangaropoina i te au apainga ngutuare tangata tikai. E au apainga anake teia na te au tangata ravarai. Te akangaropoina ia ratou te rave ra i reira i tetai mataara tei patoi i te akarongo Kerititiano. (1 Timoteo 5:8) Noatu rai, e tau tatou kia rave katoatoa i ta tatou ka rauka i roto i te angaanga orometua koi raverave atu ei i tetai atu au apainga na roto i te mataara tau.

Kua karanga a Iesu e: “E kia tutu aereia teia tuatua meitaki o te patireia . . . ei kite ki te au pa enua ravarai; i reira e tae mai ei te openga.” (Mataio 24:14, NW) Te tuku ra te aerenga tuatua o te reira totou i te akatupu anga ki to tatou tuatau. Mei te 1914 mai ko teia te tuatua meitaki koia oki kua akaririnuiia te Patireia kia rave ei akatika i te tu ngateitei rava o Iehova e te patoi ia Satani e tona ao katoa. (Apokalupo 11:15-18) Kia akamanako tikai tatou no runga i te au akakite anga no teia. Ka tae mai te openga, e kia akaoti tatou i te angaanga tutu aereanga i mua ake i te reira. Te tumatetenga ra te au oraanga; ka rauka ia tatou i te tauturu no te akaora i te manganui ia ratou.

E Itae Kia Maata Atu te Angaanga Orometua

E manganui o te Au Kite o Iehova te akapou ra e tai ngauru au ora me kare ra e maata atu i te marama okotai te tuaanga i te tuatua meitaki ki tetai pae atu. E tauatini ua atu te akapou ra e rua me kare e maata te au ora i te ra okotai te tutu aereanga ei au painia tauturu, e te tavini ra tetai pae ei au painia tamou e te takake. Te ariki ra ratou i te ngakoikoi anga o teia angaanga e te inangaro ra kia piri maata atu i te ka rauka kia akaoti i te reira i mua ake ka tae mai ei te openga o teianei ao mataora kore.

E Kite maroiroi ainei koe no Iehova? E itae i reira kia rave maata atu ki roto i te angaanga. E akamako meitaki atu i toou tu kite i roto i te tutu aereanga e te apiianga, te tautaanga i te akatupu kia maata atu i roto i te angaanga orometua. I te mea tei roto koe i tetai turanga kia riro mai ei painia, e rave atu i te reira. Me kare tikai toou au turanga e akatika ia koe no te reira, e akamaroiroi atu i reira i te aronga te ka rauka i te itae atu i te reira angaanga.

Me kare koe i tetai Kite akatapuia o Iehova, auraka e tuatua e kare te angaanga orometua noou. Kua patoi pakari tikai tetai atu tangata tona ingoa ko Petero, e enitinia maani matini, i tana vaine te tuaanga i te tuatua meitaki ki tetai pae atu. “Akapeea au i te tuku anga i taku vaine kia tutu aere i tera are i tera?” i ui ei aia. I muri ake i te au mataiti te kiteanga i tona irinaki anga ngaueue kore no runga i te tuatua mou o te Tuatua na te Atua, kua manako rai aia i te apii i te Puka Tapu. I teianei, mei tana vaine rai, kua akatapuia aia, e orometua papetito no te tuatua meitaki.

No reira auraka e arai ia koe uaorai mei teia akameitaki anga o te tavinianga ia Iehova. Te akamaroiroi nei matou ia koe kia apii i te Puka Tapu e te piri atu ki te au Kerititiano mou i ta ratou au uipaanga. Na teia e tauturu ia koe kia komirimiri i toou oraanga kia rotai ki te tuatua tika a te Atua e te patu i te akarongo ketaketa ki roto i tana au akakoroanga. Me rave koe kia tere ki mua i roto i teia, ka tau rai koe ei orometua no te Atua. Ka akameitakiia i reira koe kia piri atu ki te apaianga i teia akauenga a Iesu: “Ka aere kotou, e akariro i to te pa enua katoa ei pipi; . . . Ma te apii atu ia ratou, kia akono i te au mea katoa taku i akaue atu kia kotou.”​—Mataio 28:19, 20.

Ae, te vaira te angaanga orometua penei ka piri atu koe ki roto, e te ngakoikoi maata atu ra kia rave koe i te reira.

[Pia i te kapi 25]

Kua karanga tetai neti ma te ngutuare tangata i te akono e: E aere ua ana au ie okotai ora i te au ra ravarai ki te are maki te ngai e angaanga ra au, no reira kua manako au e kare e rauka iaku i te painia tauturu. Inara kua akanoo meitaki au i taku au angaanga no te piri atu ki te angaanga tutu aere i te akamata anga o te au popongi katoatoa i mua ake ka aere ei au ki te angaanga, i te tuatau akaangaroi, e i toku ra noo ki te kainga. Kua rekareka tikai au, i te openga o te marama, kua pou iaku e 117 au ora no te tutu aereanga! Kua tua au e 263 au makatini, e 22 au makatini tutaki takereia e kua rauka i te akamata e 3 au apii Puka Tapu.”

[Pia i te kapi 27]

E itu a Michael tamariki rikiriki, e e ngai angaanga apainga maata tana i roto i te apii teitei Naiteria. E tangata pakari katoa aia i roto i te putuputuanga Kerititiano o te reira ngai. Te mou ra aia i te manako o te tauatini ua atu Au Kite:

“E manako ana au i te angaanga orometua ei ngai angaanga naku e ka maara ua rai iaku i ta Paulo i karanga: ‘kua tanu au, na Apolo i pipi, inara na te Atua i akatupu i te reira.’ Te ‘tanu’ ra maua ko taku vaine i te tuatau uriuri anga poto ua o te tuatua meitaki mei tera are i tera are. Te pipi ra maua na te oki akaouanga atu ki te aronga tei inangaro kia apiiia ratou mei te Puka Tapu, mei ta Iesu i karanga e kia pera tatou. Na roto i te au apii Puka Tapu i te kainga i te au epetoma kua tauturuia tetai numero maata​—i etai au turanga ko te ngutuare katoa—​kia kite i te tuatua mou.”