Au Uianga a te Aronga Tatau

◼ Eaa ta te ngutuare tangata Kerititiano ka rave me ka tau kia aere ta raua tamaiti ki tetai apii, te raveia ra te apii anga akonoanga?

Kare te au metua Kerititiano e inangaro kia apiiia te akonoanga pikikaa ki ta ratou tamariki. Inara tetai taime kare e akatikaia te tamariki kia akakore i te apii anga akonoanga, noatu rai, e kare ratou e kapitiia atu ana i te rave anga te akonoanga pikikaa me kare te au angaanga akamaaraanga.

Kua akanoo a Aberahama te oa o te Atua i tetai akaraanga memeitaki i te apii anga akonoanga no te tamariki. Kua akono aia i tana tamariki i Kanaana, te ngai e takapiniia ra ratou ma te au apii anga akonoanga tarevake e te au raveanga “tapu” kino tikai. (Akaaiteia atu kia Exodo 34:11-15; Levitiku 18:21-30; Deuteronomi 7:1-5, 25, 26; 18:9-14.) Tera ra, koia te tumu o te apii anga akonoanga no tona ngutuare tangata. Kua kite papu te Atua e ka “ako rai aia [Aberahama] i tana tamariki, e tona ngutuare katoa, kia akono ratou i te tuatua a Iehova a muri atu, i te rave anga i te tuatua-tika.”​—Genese 18:19.

I tona ou anga, kua puapingaia a Iesu mei te apii anga i te akamori tika no ko mai i te ngutuare tangata e te putuputuanga. E no reira kua “tupu aturā Iesu i te maata anga e te pakari, e te akaperepereia mai e te Atua e te tangata katoa.”​—Luka 2:52.

I te tuanga maata o te pa enua, kua rauka mai te apii anga a te au mapu Kerititiano i te apii no te katoatoa. Kare te katoa anga o tei apiiia ra i tano tikai ki te tuatua mou a te Puka Tapu e te au tika papu ra. No te akatauanga e manganui te au uki o te au mapu Kerititiano e apai mei te taeneti e te paeoreti ei tuanga no ta ratou apiianga noa ua nei. No reira ko te maata anga i o ratou te kite ra i te au manako o te tupu ua mai anga e te manako ekoko anga tei kapitiia ra ki te manako no runga i te akamataanga “natura” o te ora anga ki runga i te enua.

Inara, kare teia kite anga, i taui te irinaki anga o te au mapu Kerititiano i te tupu ua mai anga o te atua kore. Eaa ra? No te mea i te kainga e te au uipaanga Kerititiano, kua rauka takere te akakite anga tika tikai tei akatumuia e te Tuatua Tapu a te Atua, tei tauturu i te akamatau ia ratou kia “kite ei to ratou ngakau i te meitaki e te kino.” (Ebera 5:14) Kua apii ia te au metua e manganui ma ta ratou tamariki i te akakiteanga tau o te tupu ua mai anga i roto i te voriumu tei akaketaketa i te akarongo Life​—How Did It Get Here? By Evolution or by Creation?a No reira ma teia puka, kare teia au tamariki apii e irinaki ana i te apii anga no runga i te tupu ua mai anga ei mea tika. Mari ra kua rauka ia ratou i te akaari ma to ratou rave anga apii e te au tarere, e kua akarongo ratou e ka rauka i te apii te tuatua tataki tai te ka tukuia. Kua tupu mai te tuatau no etai kia tuku i te akakiteanga manako ke no runga i te au tuatua tika i roto i te Puka Tapu no ko mai i Tei Anga Mai i te tangata.​—1 Petero 3:15.

Akapeea, i reira, i te au tuatau apii tei tuku ia ki te apii anga no runga i te au akonoanga maata i te reira ngai me kare te au akonoanga ua nei?

E tikai, kare te au akakite anga i tukuia kia neutera, ia e ei mea akakitekiteanga ua. Penei kua iki te puapii i te reira akonoanga e no reira kua rave aia i te akakeu te manako e te ngakau o te au tamariki apii. E no reira kua inangaro te Au Kite o Iehova kia akaateaia ta ratou tamariki mei te au apii anga akonoanga. Penei ka tauturu teia i ta ratou tamariki kia taangaanga i teia tuatau kia puapinga maata ratou ma te akaoti i te au rave anga no tetai au apii me kare kia apii i roto i te ngai vairanga puka.

Inara i etai au ngai, kare ratou i akatika te au patianga; penei kua inangaroia te apii me kare te au akaaere no te katoatoa kia aere e akaoti i tetai apiianga no runga i te akonoanga me ka inangaro ratou kia karatuatiia. Na te ngutuare tangata tataki tai e iki eaa ta ratou ka rave i teia atianga.

I tetai tuatau i topa ake nei ko etai tavini o te Atua tei o atu ki roto i te au turanga tei kare ratou i iki te ngai i akakoromaki ei ratou te maeu angaia ki te au apiianga akonoanga me kare te rave anga i te reira taime rai kia vai tiratiratu ki te Atua mou. Kua tika teia kia Mose. Kua akono ia mai aia ei mokopuna na Pharao o Aiphiti, e kua “apiiia iorā Mose i te au tuatua pakari a to Aiphiti.” (Angaanga 7:20-22) Penei kua kapiti atu ki te reira tuanga te irinaki anga e te rave anga akonoanga tei matauia i Aiphiti. Kua paruruia a Mose e te apii anga teitei no ko mai i tona kopu tangata e penei etai au Epera.​—Exodo 2:6-15; Ebera 11:23-26.

E akamanako katoa te akatauanga o te nga mapu Epera e toru, te au taeake o Daniela, tei oronga atu tetai apii anga takake i Babulonia e kua rave ra te angaanga a te kavamani. (Daniela 1:6, 7) Kare ratou e matara no te rave ma te rave kore ra i ta ratou i inangaro. I tetai atianga kua akaueia mai ratou e te Ariki ko Nebukanesa e kia akaputuputu ma tetai atu au opita i te ngai o te itoro auro tana i akatu i te mataataa o Dura, te ngai ka rave ia te akamorianga pae enua. Eaa ta te nga Epera e toru i rave? Kua papu tikai ia tatou e kare ratou e inangaro kia aere ki reira, inara kare e rauka i te akapera.b Inara kua vai tiratiratu ratou ki to ratou irinaki anga e ki te Atua Mana Katoatoa. Kua akatikaia to ratou akava ngakau atua kia tae ki reira inara kare ratou e rave tikai me kare e kapiti atu i tetai rave anga o te akonoanga pikikaa.​—Daniela 3:1-18.

Me e tau ainei kia raveia no te au tamariki apii katoa kia aere ki te apii akonoanga e penei kia apii ki te ngai ka pati i te au tarere no te katoatoa, ka akatika te tamariki no te ngutuare tangata Kerititiano mou kia aere, mei te toko toru i te akaueanga a Nebukanesa. Tera ra ka tuku te au mapu Kerititiano ia Iehova ki mua. Kare ratou e anoano i te akaaoanga te au tuatua tarevake me kare te au irava tataki tai tarevake te ka irinaki ia e etai ke, mei to nga Epera e toru ra, kare ratou e tamanamanata tetai atu aronga tei tupou ki raro i te itoro auro. Tera ra, kare te au mapu Kerititiano tikai i rave taokotai i te angaanga akamori, te au pure taokotai, te au imene akonoanga, e tetai atu.

Ka anoanoia teia au mapu e kia akamaroiroi ia ratou uaorai i etai atu taime ka rauka te ‘kite pakari no ko mai te au tata tuatua tapu te ka tauturu ia ratou kia pakari no te ora na roto i te akarongo i te kapiti atu kia Iesu Karaiti.’ (2 Timoteo 3:15) Na roto i te akakitekite manako ma ta raua tamariki, ka akara tau tikai te nga metua i te au taime katoa i te apii ta ratou e apiiia ra. Ka tauturu teia aronga pakari Kerititiano kia kite i te au tarevake te ka anoanoia e kia akatanotanoia me kare kia akamaramarama ia no ko mai i te Puka Tapu no te mea kia kore ei ta ratou tamariki kia riro ei oripu ua me kare e arataki ke ia.

[Au Tataanga Rikiriki i Raro]