“Ko te Tangata e Oronga ma te Rekareka ta te Atua e Inangaro”

KO IEHOVA te tu tikai o te oronga anga. E tikai, te tuatua ra te Pipiria e koia Tei Oronga i te “au mea memeitaki i o maiia ra, e te au mea tika ravarai.” (Iakobo 1:17) Ei akaraanga, e akamanako ana, i te au mea ta te Atua i anga. Kua maani aia i te au kai reka, kare e kia reka kore; te au tiare karakara, kare e kia maratea; te au opunga ra manea, kare e kia kore te manea. Ae, te oronga ra etai au tu o ta Iehova anga anga i te kite anga o tona aroa e te tu oronga ua. (Salamo 19:1, 2; 139:14) Pera katoa, e peretana Oronga rekareka ua a Iehova. E rekareka ana aia i te rave i te meitaki no tona au tavini.​—Salamo 84:11; 149:4.

Kua akaueia a Iseraela kia akaata i to te Atua tu oronga ua na roto i ta ratou akono anga tetai e tetai. “Auraka koe e akamārokiakia i toou ngakau, e e topiri i to rima, i to taeake apinga kore ra,” i akakite ei a Mose kia ratou. “E oronga tikai koe i te apinga nana, e auraka to ngakau e noinoi.” (Deuteronomi 15:7, 10) I te mea e ka aere mai te oronga anga mei te ngakau, kia rekareka to Iseraela i te oronga anga.

Kua oronga katoaia ki te au Kerititiano tetai ako anga mei te reira rai. E tikai, kua karanga a Iesu e ka vai te “meitaki i te oronga atu.” (Angaanga 20:35) E au akaraanga tau te au pipi a Iesu i te oronga rekareka anga. Ei akaraanga, te ripoti ra te Pipiria e i roto ia Ierusalema ko tei riro mai ei aronga irinaki “kua oko atura oki ratou i to ratou kainga e te apinga, e tua iora oki na ratou ravarai, e tau katoatoa akera.”​—Angaanga 2:44, 45.

Inara kua topa atu teia au Iudea oronga ua ki roto i te putaua. Kare te Pipiria i akataka mai e e akapeea teia i te tupu anga kia ratou. Kua tuatua etai aronga kimi kite e ko te onge te taikuia ra ia Angaanga 11:28, 29 penei ko te reira te tumu. Noatu e eaa te tu, tei roto te au Kerititiano Iudea i te manamanata maata, e kua inangaro a Paulo i te akapapu meitaki e ka akonoia ta ratou i anoano ra. Akapeea aia me rave i te reira?

Tetai Akaputu Anga no Tei Anoano Ra

Kua pati tauturu atu a Paulo i te au putuputuanga mamao atu ia Makedonia, e kua akapapa aia i tetai akaputu anga kia raveia no to ratou au taeake Kerititiano putaua i Iudea. Kia Korinetia, kua tata a Paulo: “Ko taku rai oki i poroaki i te au ekalesia i Galatia ra, e pera katoa kotou. Kia tae ki te rā mua o te ebedoma ra, e vaio ake kotou ravarai i tetai papaki moni ki roto i te vairanga ra, kia tau i ta te Atua akamanuia anga mai iaia ra.”a​—1 Korinetia 16:1, 2.

Kua anoano a Paulo e kia tukunaia atu teia au tauturu ki te au taeake i Ierusalema, inara kua marie a Korinetia i te ariu mai anga ki ta Paulo ako anga. Eaa ra? Kua manako kore ainei ratou i te tumatetenga o to ratou au taeake i Iudea? Kare, kua kite oki a Paulo i to Korinetia e te “maata ra te au mea katoa nei ia kotou na, i te akarongo ra, i te tuatua ra, i te kite ra, e te maroiroi katoa ra.” (2 Korinetia 8:7) Papu e, te maroiroi ra ratou i te manako atu i tetai au tumu puapinga ta Paulo i akakite atu i roto i tana reta mua kia ratou. Inara i teianei e rapurapu anga tikai te turanga i Ierusalema. No reira kua tuatua atu a Paulo i te reira i roto i te rua o tana reta ki to Korinetia.

Patianga kia Oronga Ua

Te mea mua, kua akakite a Paulo kia Korinetia no runga ia Makedonia, e akaraanga tau to ratou no te angaanga tauturu ra. “E kua maringi ua to ratou rekareka,” i tata ei a Paulo, “maata ua rai to ratou putaua, e te mate maata, i te maata o to ratou oronga.” Kare i anoanoia to Makedonia e kia aruaruia ra. Tei tuke, kua tuatua a Paulo e “te tuatua raurau anga mai ia matou e rave i taua apinga ra, e ei ia matou katoa te tuku atu i taua apinga ra i te aronga tapu ra.” E mea umere tikai te tu oronga rekareka anga o to Makedonia ra me akamanako tatou e “maata ua rai to ratou putaua.”​—2 Korinetia 8:2-4.

I te akapaapaaanga i to Makedonia ra, te akatupu ra ainei a Paulo i te tu taemoemo i roto ia Korinetia? Kare, kua kite aia e kare ko teia te mataara tau no te akakeu anga. (Galatia 6:4) Pera katoa, kua kite aia e kare i anoanoia e kia taakamaia a Korinetia kia rave i te mea tau. Mari ra, kua irinaki papu aia e te inangaro ra to Korinetia ra i to ratou au taeake Iudea e te inangaro ra i te tauturu ia ratou. “I te aronga i te akamata i muatangana i te rave,” i akakite ei aia kia ratou, “kare oki te reira anake ra, kua rapurapu ua ra mei tetai mataiti mairai.” (2 Korinetia 8:10) E tikai, i tetai turanga o te angaanga tauturu, e akaraanga tau tikai a Korinetia uaorai. “Kua kite oki au i te tika o to kotou ngakau, i akapaatu ei au ia kotou i to Makedonia ra,” i na Paulo ei kia ratou, te tuatua anga: “E manganui tei maroiroi katoa i taua maroiroi no kotou na.” (2 Korinetia 9:2) I teianei, kua anoanoia to Korinetia ra kia taangaanga i to ratou maroiroi e te tika o to ratou ngakau.

No reira, kua akakite atu a Paulo kia ratou: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.” (2 Korinetia 9:7) To Paulo akakoro anga, i reira, kare e kia maro i to Korinetia ra, e kare tetai tangata e rekareka i te oronga me ka maroia aia. I te akaraanga, kua manako a Paulo kua vai te akakeu anga tau, e kua akakoro tetai i te oronga. Kapiti mai, kua akakite atu a Paulo kia ratou: “Te vai ra oki te tika i te ngakau, e ārikiia ïa ta te tangata i rauka ra, kare i tei kore i rauka iaia ra.” (2 Korinetia 8:12) Ae, me te vai ra te tika o te ngakau​—me akakeuia tetai tangata e te aroa​—ko tana ka oronga ka arikiia e te Atua, noatu me e meangiti te reira.​—Akaaite ia Luka 21:1-4.

Aronga Oronga Rekareka i Teia Tuatau

Te oronga maira te tauturu no te au Kerititiano Iudea i tetai akaraanga meitaki no tatou i teia tuatau. Te rave nei te Au Kite o Iehova i tetai oroanga tutu aereanga i te ao katoa, te apai mai anga i te kai meitaki ki te au mirioni tei onge i te pae vaerua. (Isaia 65:13, 14) Te rave nei ratou i teia i te akarongo anga i ta Iesu akauenga: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou . . . ma te apii atu ia ratou, kia akono i te au mea katoa taku i akaue atu kia kotou.”​—Mataio 28:19, 20.

Te akatupuanga i teia akauenga kare ia i te angaanga ngoie. Te o maira i te akonoanga i te au kainga mitinari e pera i te maata atu i te anere au are manga i te ao katoa. Te kapiti katoa maira te akatuanga i te au Are Uipaanga Patireia e te au Are Akaputuputuanga e raukai i te aronga akamori ia Iehova tetai ngai uipa anga e te akamaroiroi anga tetai e tetai. (Ebera 10:24, 25) I tetai taime, e oronga katoa ana te Au Kite o Iehova i te tauturu i te au ngai tei takinokinoia e te au tumatetenga natura.

E akamanako katoa, te maata o te au moni i pou no te neneianga. I te epetoma tataki tai, ei averiti, te tere atura i te 22,000,000 kopi o Te Punanga Tiaki me kare i etai 20,000,000 kopi o te Awake! te neneiia ra. Kapiti mai ki teia oronga anga putuputu i te kaikai vaerua te au mirioni puka, poroutia, te au tepe, e te au tepe vitio te maaniia ra i te mataiti tataki tai.

Akapeea teia angaanga i te turu anga ia? Na roto i te au oronga anga tauturu. Te orongaia nei teia, kare e kia rongoia, me kare ma tetai akakoro anga noinoi, mari ra kia akamaata i te akamori anga mou. No reira, te apai maira taua oronga anga i te mataora ki tei oronga, kapiti mai i to te Atua akameitakianga. (Malaki 3:10; Mataio 6:1-4) E pera te au tamariki e Au Kite o Iehova kua akaari ia ratou uaorai ei aronga oronga rekareka e te maoraora. Ei akaraanga, i muri ake i te rongoanga i te takinokino anga a tetai uriia i tetai tuanga ngai o Marike, kua oronga atu a Allison e a mataiti e $2. “Ko teia ua te moni i roto i taku pangika,” i tata ei aia. “Kua kite au e kua ngere te tamariki i ta ratou au apinga kangakanga e te au puka e te au pepe rakau. Penei ka rauka ia kotou te akapou i teia moni i te oko i tetai puka na tetai tamaine meangiti mei toku mataiti rai.” Kua tata a Maclean, e varu mataiti, kua mataora aia kare etai o te au taeake i mate i roto i te uriia. Kua kapiti mai aia e: “Kua rauka iaku e $17 i te okookoanga i te au arai uira ma toku papa. Ka aere tikai au ka oko i tetai apinga i taku moni, inara kua manako mai au i te au taeake.”​—Akara katoa i te pia i runga akenei.

E tikai, te rekareka ra to Iehova ngakau i te kite anga i te aronga ou e te pakari e tuku ra i te au mea Patireia na mua na te ‘akangateiteianga ia Iehova i taau ra au apinga.’ (Maseli 3:9, 10) E tikai, kare e rauka i tetai i te akapuapinga ia Iehova, no te mea nana te au mea ravarai. (1 Paraleipomeno 29:14-17) Inara na te turuanga i te angaanga e akameitaki anga ia te oronga ra i tei akamori i te tuatau kia akaari i te aroa no Iehova. Te rekareka nei matou i te aronga katoatoa tei akakeuia to ratou ngakau kia rave akapera.

[Tataanga Rikiriki i Raro]

[Pia i te kapi 26, 27]

Au Ravenga ta Etai e Iki ra no te Oronga Akaputu Anga no te Angaanga i Teianei Ao

E manganui te akapae ra, me kore te akapapa ra, i tetai moni no te tuku ki roto i te au pia akaputu anga tei akairoia: “Akaputu Anga no te Angaanga a te Taiate i Teianei Ao​—Mataio 24:14.” I te au marama katoatoa e tuku ana te au putuputuanga i teia au moni ki te opati maata o teianei ao i Brooklyn, New York, me kore ki te opati manga o te reira ngai.

Kia tuku tika katoaia te au moni tauturu tei oronga uaia ki te Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, me kore ki te opati o te Taiate e akono ra i toou enua. Ka tau te au apinga akamanea me kore tetai atu au apinga puapinga kia oronga katoaia. Kia aru mai tetai reta poto ua i te au akaputu anga no te akakite i teia apinga aroa tikai.

Akanoo Anga i te Turanga no te Tauturu

Penei ka orongaia te moni ki te Taiate Punanga Tiaki na roto i tetai akanoo anga takake i roto i te reira, me e anoano takake to te tangata oronga, ka akaokiia atu te moni oronga ua kiaia. No tetai akakite anga maata atu, e tata ki te Treasurer’s Office i te ngai noo anga i akakiteia i runga ake nei.

Orongaanga Paraniia

I te pae i te au moni aroa oronga ua e te au moni tauturu akaturangaia, te vaira tetai atu au ravenga orongaanga no te akapuapinga i te angaanga Patireia i teianei ao. Ka kapiti mai te:

Insurance: Penei kia tukuia te ingoa o te Taiate Punanga Tiaki e ko tei puapingaia mei tetai tika anga insurance ora me kore tetai akapapa anga akaangaroi anga/moni pakari.

Akapapa Anga Pangika: Penei kia tukuia te au akapapa anga pangika, te au pepa tuku anga, me kore te au akapapa anga akaangaroi no tetai tangata ki roto i te tataanga irinakiia na me kore tei maaniia kia tutakiia me mate ake ki te Taiate Punanga Tiaki, kia tau ki te au ikuiku anga a te pangika o te reira ngai.

Apinga Akaputuia e te Poni: Penei ka orongaia te au apinga akaputuia e te poni ki te Taiate Punanga Tiaki ei apinga aroa me kore i raro ake i tetai akanoo anga ka aere ua rai te puapinga ki tei oronga mai i te reira.

Enua: Penei ka orongaia te au enua e te au are ka rauka i te oko ki te Taiate Punanga Tiaki ei apinga aroa me kore na te akono anga i tetai pepa koreromotu ki tei oronga mai i te reira, te ka rauka iaia i te noo ki roto i te tuatau e ora ra aia. Kia araveiia atu te Taiate i mua ake ka akamanaiai tetai ua atu enua ki te Taiate.

Au Koreromotu e te Au Tataanga Irinakiia: Penei ka oronga tikaia te apinga me kore te moni ki te Taiate Punanga Tiaki na roto i tetai koreromotu tikaia e te tataia, me kore kia tukuia te ingoa o te Taiate te ka puapingaia no tetai tataanga koreromotu irinakiia. Tetai tataanga irinakiia tei orongaia ki tetai akaaerenga akonoanga ka riro te reira ei au puapinga i te pae o te tero i tetai taime.

Mei ta te tuatua “orongaanga paraniia” e taiku ra, ka anoanoia kia paraniia teia au ravenga oronga moni tauturu i te tua o te tangata oronga. Ei tauturu i tetai te inangaro ra i te akapuapinga i te Taiate na roto i tetai tu orongaanga paraniia, kua akapapa te Taiate i tetai poroutia reo Engarani te ingoa Planned Giving to Benefit Kingdom Service Worldwide. Kua tataia te poroutia ei pau i te au uiui anga e manganui tei rauka i te Taiate no te au apinga aroa, au koreromotu, e te au tataanga irinakiia. Te kapiti katoa maira i tetai akakite anga puapinga no runga i te enua, pae moni, e te parani anga i te tero. Kua akanooia te reira ei tauturu i tetai i Marike te parani ra i te oronga i tetai apinga aroa takake ki te Taiate i teianei me kore no te akaruke i tetai koreromotu i te mateanga kia iki i tetai ravenga meitaki rava e te mako i te manako anga i to ratou uaorai turanga e te pamiri.

I muri ake i te tatauanga i te poroutia e te tuku anga ki te Planned Giving Desk, kua rauka i te manganui te tauturu i te Taiate e i taua taime rai, kua akameangiti i te au puapinga o te tero no te akapera anga. Ka tau kia akakiteia ki te Planned Giving Desk no runga e te rauka anga tetai kopi o etai pepa tau no runga i etai o teia au akanoo anga. Ko te aronga te inangaro ra i te poroutia me kore i etai o teia au akanoo anga orongaanga paraniia ka tau kia aravei i te Planned Giving Desk, na te tataanga me kore na te terepaoni anga, i te atereti tataia i raro ake nei me kare i ko i te opati o te Taiate e akono ra i toou enua.

Planned Giving Desk

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (914) 878-7000

[Pia i te kapi 28]

E Aronga Oronga Rekareka Katoa te Au Tamariki!

Te inangaro nei au i te oronga kia kotou i teia kia maata te puka na tatou. Kua akaputu au i teia moni mei te tauturu anga i toku papa. E meitaki maata no te angaanga pakari ta kotou e rave nei.​—Pamela, e itu mataiti.

Te tuku atu nei au kia kotou e $6.85 ei tauturu i te akatu ma te maata i te au Are Uipaanga Patireia. Kua rauka mai te reira iaku i teia tuatau maana i te okookoanga i te vai remene.​—Selena, e ono mataiti.

Te angai ra au i tetai moa mei te reira kua rauka mai te toa moa e tetai moa. Kua akatapu au i te mea openga kia Iehova. I te openga ra kua anau mai te reira e toru moa, kua okonaia e au. Te tuku atu nei au i te katoa anga no te angaanga a Iehova.​—Thierry, e varu mataiti.

Ko teia ua rai taku moni! E akapou meitaki i te reira ine. E mea ngata i te akaputu i te reira. Teia te $21.​—Sarah, e tai ngauru mataiti.

Kua peke iaku te re mua i roto i tetai angaanga apii, no reira kua aere atu au ki te tarere anga oire. Kua peke iaku te re mua i reira e oti te rua i te tapere. Pouroa i teia, kua rauka iaku te moni. Te inangaro nei au i te oronga i etai o teia moni ki te Taiate. Te manako nei au e kua peke iaku i teia re no te au tereni anga tei rauka iaku i roto i te Apii Orometua Teokaratiki. Kua papu tikai au i te oronga anga i taku ripoti ki te aronga akava.​—Amber, pupu ono.

Te inangaro nei au i te oronga i teia kia kotou na Iehova. E ui kiaia e eaa te ka raveia ki te reira. Kua kite aia i te au mea ravarai.​—Karen, e ono mataiti.

[Au Tutu i te kapi 25]

Te turuia ra te au angaanga a te Au Kite o Iehova e te au tauturu oronga ua