Tuatua Akakite

Tauturu no te Au Kumiti o te Pupu Akaaere

E 12 au mema i roto i te Pupu Akaaere o te Au Kite o Iehova i teianei te tamou ua atura i te tavini ma te akarongo i roto i ta ratou tuku anga angaanga. E akameitaki ua ana rai ratou i te au mema akono mou o te “urupu maata” no to ratou tu turu anga maroiroi. (Apokalupo 7:9, 15, NW) Te manako anga i te tupu anga maata i teianei ao katoa, te akara anga e e mea tau i teianei no te oronga i etai atu tauturu ki te Pupu Akaaere. No reira kua manakoia no te pati atu i te au tauturu e manganui, no roto mai tikai i te urupu maata, kia piri atu ki roto i te au uipaanga a te au Kumiti tataki tai o te Pupu Akaaere, koia oki, te au Kumiti o te Aronga Angaanga, te Neneianga, te Tavini Anga, te Apiianga, e te Tataanga. No reira, ko te numero te ka tae atu ki te au uipaanga o teia au kumiti tataki tai, ka akamaataia atu te reira ki te itu me kare e varu. I raro ake i te akatere anga a te au mema kumiti o te Pupu Akaaere, ka piri atu teia aronga tauturu ki roto i te au uriuri anga e ka rave atu i te au tuku anga angaanga tukeke tei orongaia e te kumiti kia ratou. Ka akamata teia akapapa anga ou i roto ia Me 1, 1992.

E manganui te au mataiti i teianei, kua topa ki raro te numero o te toenga o te Au Kite akatainuia, koi tupu ua atu ei te urupu maata ki runga rava atu i ta tatou au tamanako anga maata. (Isaia 60:22) Akameitaki tikai tatou ia Iehova no teia tupu anga maata ma te umere! Te ariki meitaki angaia te ingoa ou, Au Kite o Iehova i te 1931, e 39,372 te take numero o te au papuritia Patireia, te maata anga ia ratou kua akatutu e ko ratou te au taeake akatainuia o Karaiti. (Isaia 43:10-12; Ebera 2:11) E ono ngauru mataiti i muri mai, i te 1991, e 4,278,820 te take papuritia o teianei ao katoa koia oki e 8,850 anake rai tei akatutu e ko te toenga akatainuia. Mei tei tamanakoia i te marama anga i te au Tuatua Tapu, e tere roa atu te numero o te “urupu maata” i teianei i te toenga o te “anana iti” koia oki e tere atu i te 480 ki te 1. (Luka 12:32; Apokalupo 7:4-9, NW) Te akonoanga i te au mea te tupu atura o te Patireia, te anoano tikai ra te toenga e te ariki ra i te tu taokotai e te tu turu anga a te urupu maata.

Mei tei akamaramaia i roto i teia itiu o Te Punanga Tiaki, te vaira tetai pupu te tavini ra ma to Iseraela vaerua i teia tuatau koia oki tei akaaiteia ki te Netini e te au tamariki a te au tavini o Solomona tei oki mai mei te tuikaa anga i Babulonia ma te toenga o te ngati Iuda; te reira aronga kare i te ngati Iseraela e maata atu ratou i te au ngati Levi tei oki mai. (Ezera 2:40-58; 8:15-20) “Te aronga orongaia” mei rotopu i te urupu maata o teia tuatau nei e au tangata Kerititiano pakari teia tei rauka te kite anga maata mei te akonoanga i te akaaere anga i roto i te au manga, i roto i te angaanga tutaka, e i roto i te 66,000 au putuputuanga i teianei tei akatumuia i te au ngai o te enua.

I ou akenei, kua raveia te au Apii Angaanga Orometua Patireia i teianei ao katoa no te apiianga i te au akaaere e to ratou au tauturu orometua tavini. I te Unaite Teite anake ua, e 59,420 au akaaere tei tae mai. No reira kua papa teia “aronga pakari” no te rave i ta ratou au apainga ma te mako maata atu.​—1 Petero 5:1-3, NW; akaaiteia atu kia Ephesia 4:8, 11.

I te au opati maata i Brooklyn o te Au Kite o Iehova, kua tavini ana etai “aronga orongaia” no te au mataiti e manganui. Te kapiti atura te au akaaere pakari i roto i te urupu maata tei rauka te tu kite angaanga e te kite anga maata. No reira, kua iki te Pupu Akaaere i tetai o teia au akaaere nei no te tauturu i te au uipaanga a te au kumiti Pupu Akaaere. Kare e anoanoia teia au tangata nei ei aronga e papaanga roa to ratou no te tavini anga. Mari ra, e aronga pakari ratou, e au tangata mako ma te au tu tau meitaki tei tau ia ratou no te orongaanga i te tauturu i te au tuanga ngai tukeke. To ratou tuku angaia no te angaanga ma tetai kumiti kare te reira e tuku ia ratou ki roto i tetai turanga takake. Mei ta Iesu i tuatua no runga i tana au pipi “e taeake anake oki kotou katoa na.” (Mataio 23:8) Inara, e mea maata te ka orongaia ki teia au tangata nei, e no reira “e mea maata katoa te umuumuia atu” ia ratou.​—Luka 12:48.

Te rekareka nei tatou i ta Iehova akaaerenga te mati anga ki mua i teia tuatau. E tere atu i te tai ngauru mataiti i topa akenei, kua vaitata rai i te 100 patene te tupu anga i roto i te numero o te aronga te angaanga orometua ra i runga i te au koro, te aru anga i te totou no runga i te Davida Maata ra, ko Iesu Karaiti: “I te tupu anga o tona kavamani e te au kare rava ia e ope.” (Isaia 9:7, King James Version) Na roto i taua mataara rai te angaanga kapiti anga te au Netini i te pae i te au kau taunga i te akatu akaouanga i te au patu o Ierusalema, e pera katoa i teia tuatau te akatupuia nei te totou no runga i ta Iehova akaaerenga: “E na te au tamariki a te au tangata ke ra e patu i taau au patu.” (Isaia 60:10; Nehemia 3:22, 26) E tau i reira te aronga Netini o teia tuatau i te akameitakiia no te tu maroiroi ta ratou e akaari ra i te akatuanga i te akamori anga mou ki runga, te tauturuanga i “te kau taunga na Iehova” i roto i tetai ua atu angaanga me kare tavini anga tei tukuia atu i roto i ta Iehova akaaerenga i teianei ao katoa.​—Isaia 61:5, 6.