Kua Taangaanga a Iehova na te “Neneva” e Akaora i te Aronga Akarongo

“No te mea, i te pakari o te Atua, kare to te ao i kite i te Atua i to ratou uaorai pakari, kua kite te Atua i te meitaki na roto i te neneva o te mea i tutuia ra ei akaora i te aronga akarongo ra.”​—1 KORINETIA 1:21, NW.

1. Na teea tu ta Iehova taangaanga i te tu “neneva,” e akapeea tatou i kite ei e i te pakari o teianei ao kare ratou i kite i te Atua ra?

EAA? Ka taangaanga ainei a Iehova i te neneva? Kare tikai! Ka rauka ra iaia, e te taangaanga ra aia i tei manakoia e neneva e to te ao nei. Te rave ra aia i te reira ei akaora i te au tangata te kite ra e te inangaro ra iaia. Kare to te ao nei e kite i te Atua na roto i tona uaorai pakari. Kua akataka meitaki mai a Iesu Karaiti i teia i tana pure anga: “E taku Metua tuatua-tika e, kare rai oki to te ao i kite ia koe.”​—Ioane 17:25.

2. Akapeea i riro ei te akara anga e te aiteite ra te aerenga o ta Iehova au mataara e to te ao katoa nei tetai e tetai, inara eaa te au tika?

² Te akakite maira ta Iesu au tuatua e e tuke to Iehova ra mataara i to teianei ao. I runga ua i te reira penei ka akara anga aiteite ua te aerenga o ta te Atua ra akakoroanga ma to teianei ao tetai e tetai. Penei ka manakoia e te akameitaki ra te Atua i te au akakoroanga o teianei ao. Ei akatauanga, te karanga ra te Puka Tapu e ka akatu mai te Atua i tetai kavamani tuatua tika te ka apai mai i te oraanga au, mataora, e te puapinga ki te au tangata katoa i te enua nei. (Isaia 9:5, 6; Mataio 6:10) Pera katoa oki, te akatangi nei teianei ao i tana pu no tana akakoroanga kia oronga i te au, te puapinga, e te kavamani meitaki ki te au tangata na roto i tetai akatereanga ou o te ao. Inara kare e aiteite ana ta te Atua ra au akakoroanga ma to teianei ao. Ta Iehova ra akakoroanga kia akatikaia aia uaorai e ko tei Ngateitei Rava no te ao katoa e pini ua ake. Ko teia ka rave aia na roto i tetai kavamani no te rangi te ka takore takiri atu i te au kavamani katoatoa o te enua nei. (Daniela 2:44; Apokalupo 4:11; 12:10) E no reira, kare o te Atua ra pirianga ma teianei ao. (Ioane 18:36; 1 Ioane 2:15-17) No reira te Puka Tapu i tuatuaʼi no nga tu pakari e rua​—“te pakari o te Atua” e “te pakari o teianei ao.”​—1 Korinetia 1:20, 21, NW.

Te Tumu Tarevake i te Pakari o Teianei Ao

3. Noatu rai te akara anga meitaki ra te pakari o teianei ao, eaa ka kore ei e merengoanga i te akatereanga ao ou ta te tangata e taputou maira?

³ Ki te aronga kare na te pakari o te Atua ra e arataki ana, te akara anga meitaki ua ra te pakari o teianei ao. Te vaira te au apiianga tangianga teitei o teianei ao te akariro ke ra i te manako. E au tauatini ua atu te au akaaerenga no te apiianga teitei te oronga maira i te au akakiteanga mei ko mai i ta te aronga e manganui e manako ra e ko te aronga kite maata o te au tangata nei. Te ki ra te au ngai akapapa anga puka i te au kite akaputuia o te au tangata nei no te au anere ua atu mataiti katoa. Inara, noatu rai te reira, ko te akatereanga ou o te ao ta te au tutara o teianei ao e akakite mai nei e tutara ua ia na te au tangata apa ua, tei ki ra i te ara, e te mate atura. E no reira, ko taua akatereanga ra e apa ua ia, te rave akaou ra i te au tarevake e manganui e kare rava e akamerengo i te au mea katoa te anoanoia ra no te tangata nei.​—Roma 3:10-12; 5:12.

4. Eaa te apinga tei raro akera te akatereanga ao ou akakoroia e te tangata nei, e eaa te tupu anga i te reira?

⁴ Tei raro ake ta te tangata akatereanga ou o te ao kare i te tu apikepike anake ua o te tangata nei i raro ake ra i te mana o te au vaerua kikino ra​—ae to Satani te Tiaporo e tana au temoni katoa. Kua akamatapoia e Satani te manako o te au tangata kia kore ratou e irinaki i “te tuatua meitaki kaka no runga i te Karaiti.” (2 Korinetia 4:3, 4, NW; Ephesia 6:12) E no reira, te mamae nei teianei ao i tetai maki i muri ake i tetai ra. Te tamaki ra e te tae ra te toto i tana tauta anga kia tutara iaia uaorai ma te kore ta te Atua ra tauturu e ma te kore katoa oki e manako no to te Atua ra anoano. (Ieremia 10:23; Iakobo 3:15, 16) E no reira rai, mei ta te apotetoro ko Paulo i tuatua ra, “kare to te ao i kite i te Atua i to ratou uaorai pakari.”​—1 Korinetia 1:21, NW.

5. Eaa te tumu tarevake i te pakari o teianei ao?

⁵ Eaa i reira, te tumu tarevake i te pakari o teianei ao, kapiti katoa atu tana au parani no tetai akatereanga ou o te ao? Ko teia ia, te kopae ke nei teianei ao i te apinga kare e rauka kia puapingaia i te kopae keanga​—koia to te Atua ko Iehova ra tu ngateitei rava. Te akakore ra i te kite i te tu ngateitei o te Atua. Te akaruke akakoro ra teianei ao ia Iehova ki vao i tana akamanako anga katoatoa e te irinaki ra ki rungao i tona uaorai kite e tana au ravenga. (Akaaiteia atu kia Daniela 4:31-34; Ioane 18:37.) Te akataka meitaki maira te Puka Tapu e “ko te akamataanga o te pakari ra, ko te mataku ïa ia Iehova.” (Maseli 9:10; Salamo 111:10) Tera ra, kare to teianei ao i kite ake i teia umuumu anga tumu tikai no te pakari. Me kare ta te Atua ra turuanga, i reira, akapeea e puapingaiaʼi te reira?​—Salamo 127:1.

Tutuanga Patireia​—E Neneva me e Tau?

6, 7. (a) Eaa ta te aronga te aratakiia ra e te pakari o te Atua e tutu aere nei, inara eaa te manako o teianei ao no ratou? (e) Te tau ra ki toai pakari ta te au orometua o Kerititome e ako nei, e eaa te tupu anga?

⁶ I tetai tua, te aronga tei kite ra i te Atua te akaari ra i te pakari o te Atua e te iki ra na te reira e arataki ia ratou. Mei ta Iesu i totou ra, te tutu aere nei ratou i “teia tuatua meitaki o te patireia ki te au enua tei tangataia.” (Mataio 24:14, NW; Mataio 28:19, 20)E mea tau ainei te reira tutuanga i teianei, i te mea e te ki nei to tatou enua i te kino, te viivii, te putaua, e te mamae nei te au tangata? I te manako anga o te aronga pakari o teianei ao e akara anga neneva ua taua tutuanga i te Patireia o te Atua ra, te ngere ra i te tu tau. Te manako ra ratou i te aronga tutu aere i te Patireia o te Atua ra e ei apinga akateiaa ua i te pai o te Enua e te akariro ra kia marie roa tona tupuanga kia riro ei kavamani poritiki meitaki roa. No teia te turuia ra ratou e te au orometua o Kerititome, tei tutu ra kia tau ki te pakari o teianei ao e kare e akakite atu ki te au tangata i te apinga anoanoia no ratou kia kite no runga i te ao ou e tona kavamani Patireia, noatu rai e ko teia ta Karaiti apiianga maata.​—Mataio 4:17; Mareko 1:14, 15.

⁷ Kua akamaara maira te tata tuatua enua ko H. G. Wells i teia tu ngere o te au orometua o Kerititome. Kua tata aia: “E mea umere ra e i maata ta Iesu ra akakitekite anga e te apiianga i tana i karanga ra e ko te Patireia o te Rangi, e e meangiti ua te rave anga e te apiianga i te reira i te maataanga o te au akonoanga Kerititiano ra.” Tera ra, e oraʼi te au tangata o teianei uki, ka tau e na mua ratou i te akarongo i te tuatua no te Patireia o te Atua kua oti ra i te akanooia, e no reira ka anoanoia tetai kia tutu aere i te tuatua meitaki no te reira.​—Roma 10:14, 15.

8. Eaa i tau ei te tutuanga i te tuatua meitaki a te Atua ra i teia tuatau nei, inara eaa te rave anga kare e puapinga tinamou?

⁸ E no reira, ko te tutuanga i te tuatua meitaki a te Atua ra, ko te apinga maata ia te tau ra kia raveia i teia tuatau nei. E tika teia no te mea te oronga maira te tuatua no te Patireia i tetai manakonako anga tika tikai te akaki nei i te au ngakau tangata i te rekarekaanga i teia tuatau openga te ‘tupu nei te kino e te raveanga ngata kia akono atu.’ (2 Timoteo 3:1-5; Roma 12:12; Tito 2:13) Inara ko te oraanga i teianei ao e tau kore e te poto ua, ko te oraanga ki roto i te ao ou a te Atua ra ka riro ei mea mutukore, i roto i te tu rekareka, te apinga maata, e te au i konei tikai i te enua nei. (Salamo 37:3, 4, 11) Mei ta Iesu Karaiti i tuatua ra, “eaa te puapinga ki tetai tangata me ka rauka iaia teianei ao katoa e ka kore atu ei tona meta? me kare eaa ta te tangata ka oronga ei mono no tona meta?” Me ka kore te tika no tetai tangata kia ora ki roto i te ao ou a te Atua, eaa te puapinga i reira o teianei ao te takake nei? Kua riro mai to tetai rekareka anga i teianei i te au apinga kopapa nei ei mea neneva, e puapinga kore, e te rere ke atura.​—Mataio 16:26, NW; Koheleta 1:14; Mareko 10:29, 30.

9. (a) I te pati anga tetai tei patiia ra kia aru ia Iesu ei pipi kia tiaki a Iesu no tetai tuatau, eaa ta Iesu i akaue atu iaia kia rave? (e) Eaa te tupuanga tau kia tatou no ta Iesu pauanga ra?

⁹ Kua karanga tetai tangata ta Iesu i pati atura kia aru mai ei pipi nana: “E tuku ua ake koe iaku kia aere ana au e tanu i taku metua tane.” Eaa ta Iesu i akaue atu iaia kia rave? I te kiteanga e ka akakore taua tangata ra i tetai angaanga puapinga maata ka tatari ei kia ope roa te oraanga o tona nga metua, kua karanga atura a Iesu kiaia: “Vaio atu, na tei mate e tanu i to ratou i mate ra; e aere ra koe e tutu aere i te basileia no te Atua.” (Luka 9:59, 60) Ko te aronga tei akaari ra i te tu pakari na te akarongoanga ia Karaiti kare e tapae ke mei te akatupuanga i ta ratou angaanga kia tutu aere i te tuatua no te Patireia. Te akamatakite maira te pakari no ko mai i te Atua ra e te ngaro ke atu ra teianei ao ma tona au tutara katoa. (1 Korinetia 2:6; 1 Ioane 2:17) Te kite ra te aronga turu i to te Atua ra ngateitei e ko te manakonako anga mou anake ua no te tangata nei te vaira ki roto i ta te Atua rave ke atu anga, e tana tutara anga. (Zekaria 9:10) I te mea e kare te aronga tei ia ratou ra te pakari o teianei ao e akarongo i te Patireia o te Atua e kare e anoano i taua kavamani o te rangi ra, ko te au tangata te aratakiia ra e te pakari no te atua maira te rave ra i te ka apai mai i te puapinga tikai ki to ratou au oa tangata nei, te teateamamaoanga ia ratou no te oraanga mutu kore i roto i to Iehova ao ou tei taputouia maira.​—Ioane 3:16; 2 Petero 3:13.

“E Mea Neneva ia ki te Aronga te Mate Atura”

10. (a) I te riro anga a Saula o Tareso ra ei Kerititiano, eaa tana i rave, e akapeea tona manako no te reira? (e) Eaa te mea tei matauia te au Ereni taito ra, inara eaa to te Atua ra manako no to ratou pakari?

¹⁰ Kua rave a Saula o Tareso i teia angaanga akaoraanga, kua riro mai aia ko Paulo te apotetoro na Iesu Karaiti. E mea tau ainei kia manakoia e i ta Iesu Karaiti akariro anga ia Saula ei pipi, te akataoonga ra Aia iaia kia rave i tetai angaanga neneva? Kare a Paulo i manako akapera. (Philipi 2:16) I te reira tuatau te akamanakoia ra to Ereni e ko te aronga kite rava atu o teianei ao. Kua akaparau ratou i to ratou aronga apii maata e to ratou au tangata pakari. Noatu rai e kua tuatua a Paulo i te reo Ereni, kare ra aia i aru i te peu Ereni e ta ratou apiianga. No teaa ra? No te mea ko te pakari o teianei ao e mea neneva ia i te Atua ra.a Kua kimi a Paulo i te pakari no te atua maira, tei akakeu ra iaia kia tutu aere i te tuatua meitaki mei tera are ki tera are. Kua akanoo te Tangata Tutu maata rava atu o te au tuatau katoa ra, koia a Iesu Karaiti, i te akatauanga e kua apii atura iaia kia rave i taua angaanga rai.​—Luka 4:43; Angaanga 20:20, 21; 26:15-20; 1 Korinetia 9:16.

11. Eaa te aiteanga o ta Paulo i tuatua ra no tana angaanga tutu aere e te pakari o teianei ao?

¹¹ Kua tuatua a Paulo i teia no tana angaanga kia tutu aere: “I tono a Karaiti iaku . . . kia aere ra e akakitekite i te tuatua meitaki, eiaa ma te pakari tuatua, kia kore e akariro i te rakau tamamae anga o Karaiti ei mea puapinga kore. Ko te tuatua oki no te rakau tamamae anga [atinga oko o Iesu] e mea neneva ia ki te aronga te mate atura, kia tatou ra te akaoraia nei ko te mana ia o te Atua. Kua oti oki i te tataia: ‘E akariro au kia kore te pakari o te au tangata pakari ra, e ka kopae ke atu au i te kite o te au tangata kite ra.’ Teiea te tangata pakari [mei te aronga apii ra]? Teiea te tata tuatua? Teiea te tangata taumaro o teianei akatereanga o te au mea nei? Kare aina te Atua i akariro i te pakari o teianei ao ei mea neneva? No te mea, i te pakari o te Atua, kare to te ao i kite i te Atua i to ratou uaorai pakari, kua kite te Atua i te meitaki na roto i te neneva o te mea i tutuia ra ei akaora i te aronga akarongo ra.”​—1 Korinetia 1:17-21, NW.

12. Eaa ta Iehova e akatupu ra na roto i “te neneva o te mea i tutuia ra ei akaora i te aronga akarongo ra,” e eaa ta te aronga e inangaro ra “i te pakari no runga maira” ka rave?

¹² I te akara anga e mea ngata roa kia irinakiia, ko te aronga tikai ta teianei ao e karanga ra e neneva ko ta Iehova ia e akono ra ei aronga tutu nana. Ae, na roto i te tu neneva o te angaanga a teia aronga tutu aere, te akaora ra te Atua i te aronga akarongo ra. Te akanoonoo nei a Iehova i te au tumu kia kore taua aronga tutu aere i teia tu “neneva” e akakaka ia ratou uaorai, e kare katoa oki etai atu tangata ke e tika kia akakaka i taua aronga i na roto maira ia ratou te akarongo anga i te tuatua meitaki. Ko teia tu “kia kore ravaʼi te tangata e akatietie ki mua i te aroaro o te Atua.” (1 Korinetia 1:28-31, NW; 1 Korinetia 3:6, 7) E tika, e tuanga puapinga ta te tangata tutu aere i rave ana, inara ko te tuatua tana i akaueia ra kia tutu aere na te reira i rave te ora no te tangata me ka akarongo aia i te reira. Ko te aronga inangaro i “te pakari no runga maira” kare ratou e akavaavaa i te tuatua a te tangata tutu ra, no te mea i te akara anga e neneva e e akaaka, kua takinga kinoia, e te aere ra mei tetai are ki tetai are. Kareka ra, ka akangateitei te aronga maru i tei akakitekite ra i te Patireia ei tangata tutu aere tei tonokia mai e Iehova ra e te aere maira na roto i te ingoa o te Atua. Ka akaperepere maata ratou i te tuatua ta te tangata tutu aere i apai atura na te tuatua o te vaa e na te puka tataia oki.​—Iakobo 3:17; 1 Tesalonia 2:13.

13. (a) Eaa te manako o te ngati Iuda e te Ereni i te tutuanga i to Karaiti patiti angaia i te rakau ra? (e) Kare i maata te au tangata tei kapikiia no teea au pupu ei pipi na Iesu, e no teaa ra?

¹³ I te rave ua atu anga i tana uriuri anga no ta te Atua au mataara, kua na ko maira a Paulo: “Te pati ra te ngati Iuda i te akairo e te kimi ra te Ereni i te pakari; inara te tutu aere nei matou ia Karaiti i patitiia i te rakau ra, ei turorianga ia ki te ngati Iuda mari ra e mea neneva ia i to te pa enua; inara, ki te aronga tei kapikiia ra, te ngati Iuda e te Ereni, ko Karaiti te mana o te Atua e te pakari o te Atua ra. No te mea ko tetai apinga neneva a te Atua ra e pakari atu ia i te tangata nei, e ko tetai apinga apikepike a te Atua ra e maroiroi atu ia i te tangata nei. Te kite na oki kotou i tana kapiki anga ia kotou, e te au taeake, kare i manganui te aronga pakari i te pae kopapa tei kapikiia, kare i manganui te aronga mana, kare i manganui te aronga ngateitei te anau anga; mari ra kua iki te Atua i te au apinga neneva o teianei ao, ei taakama atu i te aronga pakari; e kua iki te Atua i te au apinga apikepike o teianei ao, ei taakama atu i te au apinga maroiroi ra.”​—1 Korinetia 1:22-27, NW; akaaiteia atu kia Isaia 55:8, 9.

14. (a) Me ka uiia atu eaa to ratou pepa tataia ra, eaa ta te Au Kite o Iehova ka tou atu? (e) Eaa a Paulo i kore ei e akamareka atu i to te Ereni na te akaari anga i te pakari o teianei ao?

¹⁴ Ia Iesu i runga i te enua nei, kua pati te ngati Iuda i tetai akairo mei te rangi maira. (Mataio 12:38, 39; 16:1) Inara kare a Iesu i akatika kia oronga atu i tetai akairo. Pera katoa te Au Kite o Iehova i teia tuatau nei kare e akakite atu i tetai apinga mei te akairo tataia ra. Kareka ra, ka tou atu ratou ki to ratou akamana angaia kia tutu aere i te tuatua meitaki, tei tataia i te au irava Puka Tapu mei ia Isaia 61:1, 2; Mareko 13:10; e ia Apokalupo 22:17. Kua kimi to Ereni i taito ra i te pakari, e te apii teitei i au mea o teianei ao. Noatu rai i apiiia a Paulo i te pakari o teianei ao, kare rava aia i akatika kia akamareka atu i to Ereni na te akaari anga i te reira. (Angaanga 22:3) Kua tuatua aia e kua tata oki i te reo matauia o te au tangata Ereni noa ua, kare i te reo o te pupu Ereni teitei ra. Kua akakite a Paulo ki to Korinetia e: “Iaku oki i aere atu ia kotou na, e te au taeake, kare au i aere atu ma te tuatua akamanea e te pakari, i te tuatua anga atu kia kotou i te tuatua-akakite a te Atua. . . . Kare oki taku tuatua e taku ako anga i te tuatua tarekareka no te pakari o te tangata nei, i te akakite pu tikai ra a te Vaerua e te mana; Kia kore to kotou akarongo e akatumuia i te pakari o te tangata nei, i te mana ra o te Atua.”​—1 Korinetia 2:1-5.

15. Eaa ta Petero i akamaaraara atu ki te aronga akaapa i te tuatua meitaki ra, e eaa te tu aiteite i te turanga o teianei ki to Noa tuatau ra?

¹⁵ I teia tuatau openga nei, te akamaaraia atura e te apotetoro ko Petero, te aronga akaapa i te tuatua meitaki o te ao ou a te Atua te aere mai nei e te vaitataanga te openga o teianei ao, e ko te ao o te tuatau ia Noa ra “kua akapouia i te tapoki angaia e te vai.” (2 Petero 3:3-7, NW) I te aro atu anga i taua openga tumatetenga ra, eaa ta Noa i rave? E manganui te au tangata te manako ra iaia e e tangata patu araka ua. Inara te tuatua ra a Petero e i ta te Atua ra tuku anga mai i te Diluvi ki runga i taua ao taito ra, kua “akaora iora ra [Aia] ia Noa i te tangata i ako i te tuatua-tika ra, ma etai e tokoitu ra.” (2 Petero 2:5) I to ratou pakari no teianei ao, kare e ekokoanga e kua aviri taua aronga akono kore i te atua ra i mua ake i te Vaipuke ra, i ta Noa i ako ra e kua karanga iaia e e neneva, kare i te tika, e e tau kore. I teia tuatau, te aro atu nei te au Kerititiano mou i tetai turanga mei te reira rai, i te mea kua akaaite atu a Iesu i to tatou uki ki to te tuatau ia Noa ra. Inara noatu tera aronga aviri, e mea maata te tutuanga i te tuatua meitaki o te Patireia i te tuatua ua nei. Mei te tutuanga ta Noa i rave ra, te riro maira te reira ei ora no tei ako ra e no te aronga katoa oki tei akarongo atu iaia!​—Mataio 24:37-39; 1 Timoteo 4:16.

‘Riroanga ei Neneva kia Riro Mai ei Pakari’

16. Eaa te ka tupu ki te pakari o teianei ao me tae kia Aramakito, e koai ma te ka ora atu ki roto i to te Atua ra ao ou?

¹⁶ Kare e roa atu, ia Aramakito, ka takore atu a Iehova i “te pakari o te aronga pakari” katoatoa ra. Ka kopae ke atu Aia i “te kite o te aronga kite ra” tei totou ra e akapeea ta ratou akatereanga ao ou i te apai mai anga i te au tu meitaki no te tangata nei. Ka riro na “te tamaki i taua rā maata o te Atua mana katoatoa ra” e tutungi atu i te au maroanga pikikaa katoatoa, te apiianga, e te pakari katoa o teianei ao. (1 Korinetia 1:19; Apokalupo 16:14-16) Te aronga anake te ka ora i taua tamaki ra e ka rauka kia ora ki roto i te ao ou a te Atua ra ko te aronga tei akarongo i ta teianei ao i karanga ra e e neneva​—ae, te tuatua meitaki no te Patireia kaka o Iehova ra.

17. Akapeea te Au Kite o Iehova i riro ei ei ‘neneva,’ e eaa ta te aronga tutu aere i te tuatua meitaki a te Atua ra te akakoro ra kia rave?

¹⁷ Kare te Au Kite o Iehova, te aratakiia nei e tona vaerua e akama i te tutu aere i ta teianei ao e karanga nei e e neneva. Kare e tamata kia riro ei aronga pakari no teianei ao, kua riro ratou ei ‘neneva’ ua. Na ea ra? Na te raveanga i te angaanga tutu aere i te Patireia kia riro mai ratou ei pakari, mei ta Paulo i tata ra: “Te manako ra tetai tangata i roto ia kotou na e, e tangata pakari aia i teianei ao, kia riro aia ei neneva, kia pakari aia.” (1 Korinetia 3:18-20) Kua kite te aronga tutu a Iehova ra i te tuatua meitaki i te puapinga o ta ratou tuatua no te akaoraanga tangata, e ka rave ua atu i te tutuanga kare e tuku e tae roa ki te openga o teianei ao e tona pakari i te tamaki ia Aramakito. Kare e roa atu ana, ka akatika te Atua ko Iehova i tona ngateitei i te ao katoa e pini ua ake e ka apai mai i te ora mutu kore ki te aronga katoatoa te akarongo ra i teianei, e te rave ra “te neneva o te mea i tutuia ra ei akaora i te aronga akarongo ra.”

[Au Tataanga Rikiriki i Raro]

Eaa Taau Au Pauanga?

◻ Eaa nga tu pakari e rua ra?

◻ Eaa te tumu tarevake i te pakari o teianei ao?

◻ Eaa te tutuanga i te tuatua meitaki i tau ei e ko te apinga tika roa ia kia rave?

◻ Eaa te ka tupu kare e roa atu ana, ki te au pakari katoa o teianei ao?

◻ Eaa te Au Kite o Iehova ka kore ei e akama kia tutu aere i ta te ao e karanga ra e e neneva ia?

[Tutu i te kapi 23]

Kua kimi te au Ereni i te pakari no teianei ao e e putuputu te manako anga i ta Paulo tutuanga e neneva ia