Na te Akameitakianga a Iehova e Akaapinga
“Te akameitakianga a Iehova—na te reira e akaapinganui, e kare aia e kapiti mai i te mamae i te reira.”—MASELI 10:22, NW.
1-3. I te mea e manganui te manako ua ra no te au apinga kopapa, eaa te tika no runga i te apinga nui i te pae kopapa te ka tau te katoatoa kia kite?
KARE tetai papaki tangata e akamutu te tuatua anga no te moni—me kare no to ratou ngere i te reira. E mea mataora kore no ratou, i eia au mataiti i topa ua akenei e maata ta ratou i uriuri ana no runga i te reira. Noatu i te 1992 ko te tuanga apinganui o te Opunga ra o teianei ao kua kite i te topa anga te moni e ko te aronga akaaere pera katoa te aronga angaanga kua ngere ratou uaorai i te angaanga. E manganui kua manako e me ka kite akaou ratou i tetai tuatua e tamou ei te puapinga anga.
2 E tarevake ainei kia akamanako no runga i to tatou puapinga i te pae kopapa nei? Kare, i tetai tuanga e mea matau uaia te reira. I reira katoa oki, e tumu anga mou tetai te ka tau tatou kia kite no runga i te apinganui. I te akamata anga, no ko mai te au apinga kopapa ravarai i Tei Anga maira. Koia “te Atua ra ko Iehova, . . . ko tei totoa oki i te enua, e tei tupu ki rungao ra; ko tei oronga mai i te aʼo no te au tangata i rungao ra, e te vaerua no te aronga e aaere i reira.”—Isaia 42:5.
3 Noatu rai e kare a Iehova i akakoro mua mai e koai te ka apinganui e koai te ka putaua, pouroa tatou e apainga ta tatou no te akatereanga i ta tatou tuanga i “te enua, e tei tupu ki rungao ra.” Me ka akono tatou i ta tatou apinga ei tumu no te tutara anga ki rungao ia etai ke ra, ka tuku mai a Iehova i te apainga na tatou. E ko tetai ua atu te ka tavini no te au apinganui kare ra no Iehova ka kite aia e “ko tei irinaki ki tana apinga, ka inga ïa.” (Maseli 11:28; Mataio 6:24; 1 Timoteo 6:9) Ko te puapinga maata i te pae kopapa kare i kapitiia i tetai ngakau kauraro ia Iehova ra ka kore ona puapinga i te openga ra.—Koheleta 2:3-11, 18, 19; Luka 16:9.
Te Apinga Puapinga Maata Rava
4. Eaa ra te puapinga anga i te pae vaerua i meitaki atu ei i to te maata o te apinga kopapa ra?
4 Kapiti atu ki te puapinga i te pae kopapa, te tuatua katoa ra te Puka Tapu no te puapinga i te pae vaerua. Ko teia tikai te tu meitaki atu. (Mataio 6:19-21) E piri anga merengo anga ma Iehova to te puapinga i te pae vaerua e ka vairai te reira e tuatau ua atu. (Koheleta 7:12) Pera katoa oki, ko te au tavini o te Atua ra tei apingaia i te pae vaerua kare e ngere i te au akameitakianga tau no te pae kopapa ra. I roto i te ao ou, ka kapiti katoaia te apinganui i te pae vaerua ma te puapinga anga i te pae kopapa. Ka rekareka oki te aronga tiratiratu i te tinamou anga i te pae kopapa tei kare i rauka mai na te taemoemo anga pakari me kare te tuku atinga anga i te ora e te mataora, te tupu putuputu nei i teia tuatau. (Salamo 72:16; Maseli 10:28; Isaia 25:6-8) Ka kite ratou e i te au tu ravarai “te akameitakianga a Iehova . . . e akaapinganui, e kare aia e kapiti mai i te mamae i te reira.”—Maseli 10:22, NW.
5. Eaa te taputou no runga i te au apinga kopapa ta Iesu i oronga maira?
5 Noatu rai i teia tuatau nei ko te aronga e manako ra i te au apinga i te pae vaerua te kite ra i tetai tu maru tikai no te pae i te apinga kopapa ra. E tika, te angaanga ra ratou ei tutaki i ta ratou au pira e te angai i ta ratou anau. E penei ka ruti tetai papaki i ta ratou angaanga i te tuatau topa anga te moni ra. Inara kare ratou e manamanata roa i te reira au manako anga. Kareka ra, te irinaki ra ratou i ta Iesu taputou i tana tuatua anga: “Auraka kotou e apiapi ua, ka na ko ei ra, Eaa ua ta matou kia kai? e, Eaa oki ta matou kia inu? e Eaa to matou kakau kia kakau? . . . Kua kite oki to kotou Metua i te ao ra e, kia rauka taua au mea katoa ra ia kotou e tikaʼi. E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.”—Mataio 6:31-33.
Apinganui i te Pae Vaerua i Teia Tuatau
6, 7. (a) E akataka mai i etai au tu o te puapinga o te au tangata o te Atua ra i te pae vaerua. (e) Eaa te totou te akatupuia nei i teia tuatau, e eaa te au uianga ta te reira e akatu maira?
6 E no reira, kua iki te au tangata o Iehova kia tuku i te Patireia na mua i to ratou oraanga, e mei teaa ra to ratou akameitaki angaia! Te rekareka ra ratou i te puapinga maata o ta ratou angaanga akariro anga tangata ei au pipi. (Isaia 60:22) Te apiiia ratou e Iehova, te rekareka ra i te tere anga mutu kore mai o te au mea meitaki i te pae vaerua na roto mai i “te tavini akono meitaki e te pakari” ra. (Mataio 24:45-47; Isaia 54:13) Pera katoa oki, tei runga te vaerua o Iehova ia ratou ra, i te akaputuanga ia ratou ki roto i tetai taeake anga marekaia i te pa enua ravarai.—Salamo 133:1; Mareko 10:29, 30.
7 E puapinga tikai teia i te pae vaerua, e apinga ia kare e peke i te moni i te oko. E akatupuanga taka meitaki ia no ta Iehova ra taputou: “Ka apai mai na kotou i te ngauruanga o te au apinga ravarai ki roto i te are vairanga kia mangaia taku are nei, ei timata anga te reira iaku nei i tenana, te tuatua mairā Iehova Sabaota ra; i te kore anga au i te kiriti anga i te au māramārama o te rangi ra, ka riringi atu ei i te apinga maata ua atu, kare e ngai e o ei, ei meitaki no kotou.” (Malaki 3:10) E tika rai, kua kite tatou i teia tuatau nei i te akatupu angaia teia taputou. Inara, eaa a Iehova, koia te Tumu o te apinganui ravarai, i pati ei i tona au tavini kia apai mai i te ngauruanga, me kare te taite? Koai te ka puapingaia i te taite ra? Ei pau anga i eia au uianga, e akamanako ana e eaa a Iehova i tuatuaʼi i teia au tuatau na roto ia Malaki ra i te rima o te anere mataiti M.T.N.
Te Au Taite e te Au Atinga
8. Kia tau ki te Ture koreromotu ra, te vaira ki runga i teaa to Iseraela puapinga i te pae kopapa ra?
8 I te tuatau ia Malaki ra kare to te Atua ra au tangata i puapingaia. Eaa i kore ei? Ko tetai tumu no te au atinga e te au taite katoa oki. I te reira tuatau, i raro ake a Iseraela i te Ture koreromotu a Mose ra. I ta Iehova ra papau anga i taua koreromotu ra, kua taputou aia e me ka akono to Iseraela i ta ratou tuanga o te reira, ka akameitaki aia ia ratou i te pae vaerua e te pae kopapa katoa oki. Ko te aite anga, ko to Iseraela ra puapinga te vaira ki rungao i to ratou tu tiratiratu.—Deuteronomi 28:1-19.
9. I te tuatau o Iseraela i taito ra, eaa a Iehova i umuumu ei kia tutaki to Iseraela i te au taite e kia apai mai i ta ratou au atinga?
9 Ko tetai tuanga o ta Iseraela ra apainga i raro ake i te Ture ko te apai mai i te au atinga ki te iero e te tutaki anga i te taite. Kua tutungiia tetai tuanga o te au atinga ra kia pou ki runga i te atarau o Iehova, ko etai kua tuaia na te kautaunga e na te aronga katoa oki na ratou ra i oronga mai i te atinga, e ko etai au tuanga taka ke tei atingaia na Iehova ia. (Levitiku 1:3-9; 7:1-15) No runga i te au taite, kua na ko atura Mose ki to Iseraela: “E te tuanga ngauru katoa o te enua, to te ua o te enua, e te kai no te au rakau ra, na Iehova ïa kua akatapuia na Iehova.” (Levitiku 27:30) Kua orongaia te taite ki te aronga rave angaanga i te puakapa ra e i te iero i muri iora. E pera katoa, kua oronga to te ngati Levi kare ra i te kautaunga i tetai tuanga ngauru o ta ratou i rauka mai ki te kautaunga o te kopu o Aarona ra. (Numero 18:21-29) Eaa ra a Iehova i umuumu ei kia tutaki te au taite to Iseraela ra? Ko te mea mua, kia raukai ia ratou i te akaari na roto i te tu kitea meitakiia to ratou ariki anga no to Iehova ra meitaki. Ko te rua, kia raukai ia ratou i te tauturu i te turu anga i to te ngati Levi, e tau ei ia ratou i te rave i ta ratou apainga ma te manako anga tau, kapiti katoa oki te apiianga i te Ture ra. (2 Paraleipomeno 17:7-9) Na teia mataara kua turu katoaia te akamori anga ma, e kua puapingaia te katoatoa.
10. Eaa tei tupu i te kore anga to Iseraela e apai mai i te au taite e te au atinga oki?
10 Noatu rai e i muri mai kua taangaangaia e te ngati Levi te au taite e te au atinga, e apinga oronga uaia ia na Iehova e e mea tika oki ei meitaki anake ratou, kia tau ia Iehova ra. (Levitiku 22:21-25) Eaa tei tupu i te kore anga to Iseraela i apai mai i ta ratou au taite me kare i ta ratou apai mai anga i te au atinga tau kore ra? Kare e akautunga anga tei akatakaia mai i te Ture ra, inara e au tupuanga etai no te reira mai. Kua arai a Iehova i tana akameitakianga, e kua ngere te ngati Levi i te tauturu i te pae kopapa, kua akaruke i ta ratou au angaanga i te iero ra kia raukai ia ratou i te tauturu ia ratou uaorai ra. E no reira, kua mamae katoa to Iseraela ra.
“Ka Akamaaraara Ana i [to] Kotou na Au Aerenga”
11, 12. (a) Eaa tei tupu i to Iseraela kore anga e akono i te Ture? (e) Eaa te angaanga ta Iehova i oronga na to Iseraela i tana akaoki mai anga ia ratou mei Babulonia?
11 I te tuatau o te tuatua enua o Iseraela, e akaraanga meitaki etai i te tautaanga i te akono i te Ture, kapiti katoa i te tutaki anga i te tuanga ngauru. (2 Paraleipomeno 31:2-16) Inara, ko te mea matauia, e mako kore taua iti tangata ra. E putuputu ua ratou i te aati anga i te koreromotu ma Iehova ra, tae roa kia tuku aia i te openga kia inga ratou e, i te 607 M.T.N., kua akaateaia atu ki Babulonia.—2 Paraleipomeno 36:15-21.
12 E ako anga ngata te reira, inara i muri ake i te 70 mataiti kua akaora atura a Iehova i tona au tangata ki to ratou enua kainga ra. E manganui te au totou no te Parataito ia Isaia ra tei akapapaia kia tupu akamatamata ua i muri ake i taua oki anga ra. (Isaia 35:1, 2; 52:1-9; 65:17-19) Inara ko te tumu maata i akaoki atu ei a Iehova i tona ra au tangata, kare e kia akatupu i tetai enua parataito, mari ra kia akatu akaou i te iero e kia akaora i te akamori anga mou. (Ezera 1:2, 3) Me ka akarongo to Iseraela ia Iehova, ka aru maira te puapinga i te pae kopapa, e na te akameitaki anga a Iehova e akariro ia ratou kia apingaia i te pae vaerua e te pae kopapa katoa oki. E kia tau ki te reira, i te 537 M.T.N., i to ratou tae atu anga ki to ratou enua kainga, kua akamata viviki atura te au ngati Iuda i te patu i tetai atarau ki Ierusalema e kua akamata i te rave i te akatu i te iero ra. Inara, kua rokoia ratou e tetai patoianga ketaketa e kua akamutu ratou i te angaanga. (Ezera 4:1-4, 23) E ko tei tupu, kare to Iseraela i rekareka i ta Iehova ra akameitakianga.
13, 14. Eaa tei tupu i te kore anga to Iseraela ra i patu akaou i te iero ra? (e) I akapeea te akaoti anga i te patu i te iero ra, inara eaa etai atu ngere anga o Iseraela tei akakiteia maira?
13 I te mataiti 520 M.T.N., kua akatu maira a Iehova i nga peroveta ia Hagai raua ko Zecharia ei raurau i to Iseraela ra kia oki akaou i te rave i te akatuanga i te iero. Kua akaari maira a Hagai e e manamanata to taua iti tangata ra i te pae o te au apinga e kua akapiriia atu te reira ki to ratou ngere i te maroiroi no te are o Iehova ra. Kua tuatua aia: “E tenana, te na ko mairā Iehova Sabaota ra: Ka akamaaraara ana i [to] kotou na au aerenga. E maata ta kotou i ruru, e iti ra tei apaiia mai; kua kai kotou, kare ra i merengo; kua inu kotou, kare ra kotou i ki i tei inumia ra; kua kakau kotou i te kakau, kare ra tetai i maana; e tei rauka iaia te tutaki ra, i rauka ïa no te pute motumotu ra. Te na ko mairā Iehova Sabaota ra: Ka akamaaraara ana i to kotou na au aerenga. E aere ki runga i te maunga, e apai mai i te rakau, ka patu ei i te are, kia mareka au i te reira, e kia akakakāia au.”—Hagai 1:5-8.
14 I te akamaroiroi anga a Hagai raua ko Zecharia ra, kua akamaaraara ra to Iseraela i to ratou au aerenga, e kua akaoti i te patu anga i te iero ra. Inara, i etai 60 mataiti i muri iora, kua aere atura a Nehemia ki Ierusalema e kua kite atura e kua topa akaou a Iseraela kia manako kore i te Ture a Iehova ra. Kua akatikatika atura aia i te reira. Inara i te rua o te aere atu anga, kua kite aia e kua topa akaou te tu o te au apinga i reira. Kua akakite maira aia: “Kite atura oki au i ta te au ngati Levi au tuanga kare i orongaia atu kia ratou: kua oro anake oki te au ngati Levi, e te aronga imene, ko tei rave i te angaanga ra, ki tona kainga ki tona kainga.” (Nehemia 13:10) E kua akatikatikaia te reira manamanata, e “kua apai maira to Iuda katoa ra i te ngauru o te sitona, e te wina ou, e te inu, ki roto i te au are uipa anga ra.”—Nehemia 13:12.
Keiaanga i ta Iehova Ra
15, 16. No teea au tarevake i ako atu ei a Iehova ra i to Iseraela, na roto ia Malaki?
15 Penei, no taua tuatau rai ta Malaki totouanga, e te akakite maira te peroveta kia tatou i etai atu tu tiratiratu kore o Iseraela. Kua tata aia i ta Iehova ra au tuatua kia Iseraela: “E Metua au nei, teiea taua akangateitei noku ra? e e Atu oki au ra, teiea au i te mataku angaia, ko ta Iehova Sabaota ïa tuatua ia kotou, e te kau taunga, ko tei akavaavaa i toku nei ingoa.” Eaa tei tarevake? Kua akataka maira a Iehova: “E kia apai kotou i te matapo ei atinga, kare ainei i te mea kino? e kia apai kotou i te pirikoki e tei makiia, kare ainei i te mea kino?”—Malaki 1:6-8.
16 Na teia tu akataka anga meitaki, te akaari maira a Malaki e i te apainga mai a to Iseraela ra i ta ratou au atinga, te akakite maira te tu tau kore o te reira i te akangateitei kore tikai. Kua tata katoa oki a Malaki e: “Mei te au rā maira oki o to kotou ai metua ra to kotou ariu ke anga i taku ra au akonoanga, e kare i tāpu i te reira. E ariu mai kotou kiaku, e naku e ariu atu kia kotou, te tuatua mairā Iehova Sabaota ra.” Kua ekoko to Iseraela e eaa tikai ta ratou ka rave, e no reira kua ui atura ratou: “E oki atu matou ki te aa?” Kua pau atura a Iehova: “E keia ainei te tangata nei i ta te Atua? Kua keia maira kotou i taku ra.” Akapeea e raukai i to Iseraela ra i te keia i ta Iehova, koia te Tumu o te au apinga ravarai? Kua pau atura a Iehova: “I te ngauruanga o te apinga e te au atinga.” (Malaki 3:7, 8) Ae, na te kore anga e apai mai i ta ratou au taite e te au atinga ra, te keia ra to Iseraela i ta Iehova!
17. Eaa te akakoroanga o te au taite e te au atinga i Iseraela ra, e eaa te taputou ta Iehova i tuatua no runga i te au taite ra?
17 Te akaari maira teia tu no muatangana ra i te puapinga maata o te au taite e pera katoa te au atinga i Iseraela ra. E akakite anga te reira i te ariki anga, a te aronga oronga ra i ta ratou apinga. E kua tauturu ratou i te turu anga i te akamori mou na roto i te pae o te apinga ra. E no reira, kua rave ua atu a Iehova i te akamaroiroi ia Iseraela ra: “Ka apai mai na kotou i te ngauruanga o te au apinga ravarai ki roto i te are vairanga.” I te akaari atu anga e eaa te ka tupu me ka rave ratou i te reira, kua taputou atura a Iehova: “Ka riringi atu ei [au] i te apinga maata ua atu, kare e ngai e o ei, ei meitaki no kotou.” (Malaki 3:10) Na Iehova te meitaki e apingaʼi ratou ra.
Na “te Atu Mou ra” i Akava
18. (a) No toai aereanga mai ta Iehova i akamatakite maira? (e) I naea tetai aereanga mai ki te iero ra, koai tei o atu ki te reira, e eaa te tupu anga ki to Iseraela?
18 Kua akamatakite katoa oki a Iehova na roto ia Malaki e ka aere mai aia ka akava i tona au tangata. “I na, e tono au i taku karere, e nana e akamaka i te ara i mua iaku, e te Atu ta kotou e kimi na, ko te ka tae vave mai ïa ki tona ra nao, koia oki te karere a te koreromotu ta kotou e rekareka na: i na, e tae mai aia.” (Malaki 3:1) I naea i tupu ei taua aere mai anga ki te nao, tei taputouia maira? Ia Mataio 11:10, kua taiku maira a Iesu i te totou a Malaki no te karere te ka akapapa i te ara e kua akapiri atura i te reira kia Ioane Papetito ra. (Malaki 4:5; Mataio 11:14) No reira i te 29 T.N., kua tae mai te tuatau no te akavaanga! Koai ra te rua o te karere, koia te karere o te koreromotu te ka kapiti atu kia Iehova, ko “te Atu mou ra,” ki te nao ra? Ko Iesu uaorai ia, e i nga atianga e rua kua aere aia ki te nao i Ierusalema e kua tama takiri atura i te reira, ma te tuaruanga i te aronga koi moni tiratiratu kore ra. (Mareko 11:15-17; Ioane 2:14-17) No runga i taua tuatau akavaanga o te anere mataiti mua ra, kua ui totou atura a Iehova e: “Ka tika ra iaai ra kia akakoromaki i te rā e aaere mai ei aia ra? e koai te ka mou kia mama mai aia ra?” (Malaki 3:2) Ko te tika ra, kare to Iseraela i mou. Kua tutakaia ratou, e kua kitea e te ngere ra, e i te 33 T.N., kua akaateaia atu ratou kia kore i te iti tangata ikiia o Iehova ra.—Mataio 23:37-39.
19. Na teea tu te oki anga tetai toenga kia Iehova i te anere mataiti mua ra, e eaa te akameitakianga i rauka ia ratou ra?
19 Inara, kua tata katoa a Malaki e: “Ka noo mai [a Iehova] mei te tamā e te akameitaki i te ario ra; ka akameitaki aia i te au tamariki a Levi, e ka tamā aia ia ratou mei te auro, e mei te ario ra, kia apai oki ratou i te atinga tuatua-tika kia Iehova ra.” (Malaki 3:3) Kia rotai atu ki te reira, noatu rai e manganui te aronga tei karanga e te tavini ra ratou ia Iehova i te anere mataiti mua ra kua akaateaia ki vao, kua tamaia tetai papaki e kua aere maira kia Iehova, ma te oronga anga i te au atinga tau. Koai ma? Ko te aronga tei akarongo ra ia Iesu, koia te karere o te koreromotu ra. Ia Penetekote 33 T.N., e 120 o te reira aronga akarongo ra tei akaputuia ki tetai pia i runga i Ierusalema ra. I te akamaroiroi anga a te vaerua tapu ra, kua akamata ratou i te oronga i te atinga oronga uaia ma te tuatua tika, e kua viviki te tupu anga to ratou numero. Kare i roa ana, kua totoa atu ratou takapini i te Patireia o Roma ra. (Angaanga 2:41; 4:4; 5:14) E no reira, e toenga tetai tei oki akaou atu kia Iehova ra.—Malaki 3:7.
20. I te akapou angaia a Ierusalema e te iero katoa ra, eaa tei tupu ki te Iseraela ou o te Atua ra?
20 Ko teia toenga o to Iseraela, tei tau ra kia tuatuaia e kua kapiti katoaia ki te Au Kenitara paʼuia atura, ki roto i taua tumu o to Iseraela ra, te “Iseraela [ou] o te Atua,” e iti tangata Kerititiano tei akatainuia i te vaerua ra. (Galatia 6:16; Roma 11:17) I te 70 T.N., kua tae maira “te rā, te ka tu a umu i te ka anga” ki runga i te Iseraela kopapa ra i te akapou angaia a Ierusalema e tona iero e te nuku vaeau o Roma. (Malaki 4:1; Luka 19:41-44) Eaa tei tupu ki te Iseraela vaerua o te Atua ra? Kua “akaperepere [a Iehova] ia ratou, mei te tangata e akaperepere i tana uaorai tamaiti kia tavini atu kiaia ra.” (Malaki 3:17) Kua akarongo te putuputuanga Kerititiano akatainuia ra i ta Iesu totou akamatakite anga. (Mataio 24:15, 16) Kua ora ratou, e kua rave tamou marie ta Iehova ra akameitakianga i te akariro anga ia ratou kia apinganui i te pae vaerua.
21. Eaa te au uianga te vaira no runga ia Malaki 3:1 e te 10 katoa oki?
21 Mei teaa ra te akatika anga ia Iehova ra! Inara, akapeea te akatupu angaia a Malaki 3:1 i teia tuatau nei? E eaa te akono tau na te Kerititiano i te akamaroiroi anga ia Malaki 3:10 ra kia apai mai i te taite katoa o te au apinga ravarai ki roto i te are vairanga? Ka uriuri manakoia te reira i roto i te atikara i muri akenei.
Ka Rauka Ainei ia Koe te Akataka?
◻ Koai te Tumu o te au apinganui katoa ra i te openga?
◻ Eaa i meitaki atu ei te puapinga i te pae vaerua ra i to te apinganui i te pae kopapa?
◻ Eaa te akakoro anga o te au taite e te au atinga i Iseraela?
◻ I naea a Iehova, “te Atu mou ra” te aere anga mai ki te iero no te akava ia Iseraela, e eaa te tupu anga?
◻ Koai ma tei oki mai kia Iehova i muri ake i tona aere anga mai ko tona iero i te anere mataiti mua T.N.?
[Tutu i te kapi 10]
Ko te karere o te koreromotu ra ko Iesu, te komonoanga ia Iehova, aere mai ki te iero no te akavaanga i te anere mataiti mua o te T.N.