Ka Tau Ainei kia Papetitoia Koe?

E VAITATA i te okotai mirioni te aronga tei papetitoia e te Au Kite o Iehova i nga mataiti e toru kua topa akenei. Kua riro mai te reira e 824 avereti i te au ra tataki tai, me kare e 4 tangata tei papetitoia i nga 7 miniti ravarai. E tutu ua ainei teia no te maroiroi o te akonoanga i te 15 e te 16 anere mataiti ra?

Kare, kare teia aronga tataki tai i papetitoia na roto i te opara angaia, ei tuanga no tetai akaariu mai anga i tetai urupu, me kare ei tupuanga no tetai patianga akatae i te ngakau na tetai vaa tuatua akonoanga. Kua papetitoia ratou no te mea kua akaue atura a Iesu Karaiti, koia te Pu e te Arataki o te au Kerititiano ra, kia raveia te reira. Kua aru ratou i te au takainga e te au ravenga ta Iesu i akapapa maira e kua raveia te reira e te au apotetoro tana uaorai i iki ra e i tereni ra.

I muri io i to Iesu tuakaouanga e i mua ake i tona kake anga ki te rangi, kua oronga atu aia i teia akauenga openga ki tana au pipi: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; ma te apii atu ia ratou, kia akono i te au mea katoa taku i akaue atu kia kotou: e i na, tei vaitata ua ra au ia kotou, e tae ua atu ki te openga o teianei ao.” (Mataio 28:19, 20) Mei tera tuatau mai rai, kua riro ko teia anake ua te papetito anga i te vai te akamareka ra i te Atua.

E no reira, te akakite maira te Puka Tapu kia tatou e kua riro taua au pipi mua a Karaiti ra “ei kite [no Iesu] i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.” (Angaanga 1:8) Mei ta Iesu rai i totou maira, ka tupu te papetito anga o te aronga akarongo ra te ka riro katoa ei pipi na Karaiti na ta ratou angaanga tutuanga e te apiianga oki.

Kua tupu te akatauanga mua tei tataia no teia i Ierusalema i te ra Penetekote i te 33 T.N. I taua tuatau ra kua tu akera te apotetoro ko Petero “ki runga e te ngauru ma tai katoa ra” e kua tuatua atura ki te aronga tini tei akaputu ki reira no runga ia Iesu te Mesia ra. Te akakite maira te tataanga kia tatou e ‘puta atura to ratou ngakau,’ e kua ui maira ratou eaa ta ratou ka rave. “E tataraara, e kia bapetizoia, kotou ravarai, i roto i te ingoa o Iesu Mesia, kia matara te ara,” ta Petero i karanga atura kia ratou. Ko tei tupu e ko “te aronga katoa i āriki marie i tana tuatua, bapetizoia iora ïa; e kapiti katoaia maira kia ratou e toru katoa paa tausani i taua rā ra.” (Angaanga 2:14-41) Te au tataanga tei aru maira kua akapapu katoa e ko te papetitoanga o te au pipi ra no muri io i to ratou akarongo anga i te tuatua Kerititiano ra, te irinaki anga i te tuatua meitaki, e te tataraara anga oki.​—Angaanga 8:12, 13, 34-38; 10:34-48; 16:30-34; 18:5, 8; 19:1-5.

Na Teea Tu?

Inara akapeea teia au pipi ou i te papetito angaia ki te vai? Na te tamauu anga ainei (pipianga ki te vai), na te riringi anga (riringianga ki runga i te upoko), me kare na te taruku (takiri anga ki raro i te vai)? Eaa ta te tataanga a te Puka Tapu e akaari maira? I te mea kua akaruke maira a Iesu i te akaraanga na tatou kia aru “i tona takainga vaevae,” na roto i teea tu i reira tona ra papetito angaia?​—1 Petero 2:21.

Te akakite maira te Puka Tapu e i papetitoia a Iesu i Ioridana, e kauvai maata ia. I te oti anga te papetito anga iaia, kua kake maira aia “ki runga mei raro mai i te vai.” (Mareko 1:10; Mataio 3:13, 16) No reira kua taruku ravaia a Iesu ki raro i te vai i te Kauvai i Ioridana ra. Na Ioane i papetito iaia, kua kimi tikai aia i tetai ngai tau no te rave i te papetitoanga, kua iki aia i tetai ngai i te O i Ioridana i vaitata ki Salima “no te mea e manganui to reira vai.” (Ioane 3:23) Ko te tika e e taruku takiriia ki raro i te vai te tu papetito anga tei raveia i rotopu i ta Iesu au pipi ra te kiteia ra i te au tuatua a te eunuka no Etiopia ra. I tona akatika anga i ta Philipa apiianga, kua karanga aia: “I na e vai teia, eaa au nei e kore ei e bapetizoia?” Ka akara tatou i reira e “eeke atura raua ki raro i te vai” e i muri iora kua “tae maira raua ki runga mei raro mai i taua vai ra.”​—Angaanga 8:36-39.

Te tou katoa maira ainei te au tuatua enua ki te ravenga no te papetito anga na te taruku anga ki raro i te vai i rotopu i te au Kerititiano? Kua pera tikai ia. E mea meitaki oki kia kite e e manganui te au pa mamaata tei tau ra no te papetito anga taruku anga te vaira i etai au enua. “Te akakite papu maira te aronga keri i te tika e e taruku anga te tu papetito anga matauia i te tuatau o te tai ngauru anere mataiti mua ra tae mai ki te tai ngauru ma a anere mataiti,” ta te makatini Ministry ia i akakite mai. Te akakite kapiti katoa maira: “I rotopu i te au ngai o te au Kerititiano mua ra, e pera katoa oki i te au are pure taito te vaira te pure anga i reira, te rauka ra te akara i te tuatua enua no te papetito anga Kerititiano i reira. Te au penianga i roto i te au ana tanumanga e te au are pure, te au taua toka, te au paruru, e te au auvaro oki, te au akairo anga, e te au toroa anga i roto i te au tataanga rima i roto i te Koreromotu Ou kua taito ra i teianei te kapiti katoa ra i te au akatikaanga i teia tuatua enua nei . . . Te kapiti katoa atu nei teia ki te akapapu anga te kitea ra i roto i te au tataanga a te au metua o te ekaretia e ko te taruku anga te tu matauia o te papetito anga a te au ekaretia mua ra.”

Te akatika ra te New Catholic Encyclopedia: “Te papu ra e ko te papetito anga i te ekaretia mua na te tarukuanga ia.” Kare i te mea poitirere, i reira, te kite nei tatou i te au tumu tuatua akamataanga o te nutipepa mei teia: “Te Akaoki Mai Nei te Au Katorika i te Papetito Anga Taruku Anga” (The Edmonton Journal, o Kanata, Tepetema 24, 1983), “Te Raveia Ra te Papetito Anga na te Taruku Anga ma te Au Katorika i Konei” (St. Louis Post-Dispatch, Aperira 7, 1985), “E Manganui te Au Katorika te Iki Ra i te Papetito Anga na te Taruku Anga” (The New York Times, Mati 25, 1989), e te “Au Papetito Anga Taruku Anga te Rekareka Ra i te Ora Akaou Angaia” (The Houston Chronicle, Aukute 24, 1991).

No Teaa te Akakoro Anga?

Eaa a Iesu i umuumu ei kia papetitoia tana au pipi? No te mea, e akatutu anga tau ia no to ratou akatapu anga i to ratou oraanga ma te ngakau katoa ki te Atua ra. Kua akakoroia kia tutu aereia te “tuatua meitaki” kako rava ake te ao katoa, e kia akariroia “to te pa enua katoa” ei pipi. (Mataio 24:14, NW; Mataio 28:19) Kua riro te aite anga o te reira e kare te Atua e akono i te iti tangata ngati Iuda anake ua ra, ko ratou ra te aronga tei akatapuia ra kiaia mei te anau anga mairai. Ko Korenelio e tona ngutuare te au Kenitara mua, e kare i to te ngati Iuda, tei ariki i te tuatua mou no runga ia Iesu Karaiti e kua papetitoia ratou.

I te taruku anga ki raro i te vai te akaari maira e ko te aronga tei papetitoia ra kua mate i to ratou tu ora anga tei akonoia ra kia ratou uaorai. Ko to ratou akatu anga mai mei raro i te vai te akatutu ra e kua ora mai ratou i teianei kia rave i te anoano o te Atua ra e kua tuku i te reira ei mea mua i to ratou oraanga, mei ta Iesu i rave ra. (Mataio 16:24) Ko te papetito anga “i te ingoa o te Metua, e no te Tamaiti e no te Vaerua Tapu” te akakite maira e kua kite ratou e kua ariki oki i te tuatua mou no runga i aua nga mea tataki tai ra e kua kite eaa ta ratou ka rave. (Mataio 28:19; akaaiteia atu kia Angaanga 13:48.) Ko te takainga mua ua te papetito anga no te akarongo anga i te Atua ra e te kauraro anga ki tona anoano.

Kare te au Tuatua Tapu e turu ana i te manako maata o te au akonoanga e e takarameta te papetito anga, koia oki, e ravenga na te akonoanga ei oronga anga meitaki​—aroa ua, tapu, me kare puapinga i te pae vaerua—​ki tei papetitoia ra. Ei akatauanga, kua taikuia mai i te pepa a Pope Eugenius IV i te atikara i mua akenei te na ko maira no te papetito anga e: “Ko te tupuanga o teia takarameta (sacrament) ko te akakoreanga i te ara katoatoa, to mua ana e to teianei; pera katoa oki te au akautunga ravarai no te ara. E no reira, kare e kapitiia mai te merengoanga no te au ara kua topa ra ki runga i te aronga kua papetitoia ra; e me ka mate ratou i mua ake i te rave anga i tetai ua atu ara, ka aere tika atu ratou ki te patireia o te rangi ra e ki mua oki i te orama a te Atua ra.”

Inara, kua papetitoia a Iesu noatu rai e koia “tei kore roa i rave i te ara.” (1 Petero 2:22) Pera katoa oki, kia tau ki te au Tuatua Tapu ra, ka rauka mai te akakoreanga ara na roto anake i te atinga oko o Iesu Karaiti. Kua raurau atura a Anania ia Saula o Tareso e: “Ka tu, kia bapetizoia koe, e orei ke atu i taau au ara, i te kapiki anga atu i te ingoa o [Iesu] ra.” (Angaanga 22:12-16) Ae, e rauka anake te ora na roto i te toto akamaringiia o Iesu ra e na ‘te kapiki anga i tona ingoa’ na roto i te akarongo.​—Ebera 9:22; 1 Ioane 1:7.

Ka peea, i reira, ta Petero au tuatua ia 1 Petero 3:21 ra? I reira te na ko ra aia: “Ko tei tau i te reira ra, ko te bapetizoia ïa e ora katoaʼi tatou i teianei, (eiaa i te kopae anga i te viivii o te kopapa nei, i te tuatua ra i te akava-ngakau meitaki ra i te Atua,) i te tuakaouanga o Iesu Mesia ra.” Kua akaaite maira a Petero i te papetito anga ki ta Noa i kite ra i te na roto mai anga i te au vai o te Vaipuke ra. (1 Petero 3 Irava 20) Kua akakite maira a Noa i te akarongo ki, i te Atua ra, kua patu i te araka no te akaora anga i tona ngutuare tangata. (Ebera 11:7) Mei te reira katoa oki, na te akonoanga i te akarongo i te Atua ra ia Iehova e tana ravenga no te ora na roto ia Iesu Karaiti, ka rauka i te akaora i te au tangata i teia tuatau mei teianei ao kino nei. Ka tau katoa oki ratou kia akono na runga i taua akarongo ra. Na te tataraara, e te ariu ke anga mei te aerenga tarevake ra, e te rave anga i te akatapuanga arai koreia ki te Atua ra ko Iehova na roto i te pure, kua tukuia te patianga ki te Atua ra no te akava ngakau meitaki. Inara na roto ia i te tuku anga o te atinga o Iesu ra, e tona tuakaouanga i raukai iaia i te oronga i te puapinga o tana atinga ki te Atua i te rangi ra, i akakoreiaʼi te au ara e i raukai te ora.​—1 Petero 3:22.

Eaa Taau ka Rave?

Ko koe ainei tetai kua roa te kapitianga ma te Au Kite o Iehova? Penei kua akono ke ana koe i te au taui anga tau i toou oraanga kia tau ki te au kaveinga o te Puka Tapu inara kare i rave ake i te au takainga no te akatapu anga e te papetito anga. Penei te inangaro ra koe i te rave i to te Atua ra anoano tera ra te mataku ra koe e ka riro e apainga naau me ka papetitoia koe. E no reira, penei kua iki koe kia kopae ke i te reira apainga e te tuatua anga no tetai tuatau. E vaitata i te 11.5 mirioni tangata tei akaputuputu mai i te akono i te Oroa Aiai a te Atu i te mataiti kua topa akenei. Inara, ko te numero take o te aronga rave i te angaanga tutu aere i te tuatua meitaki i taua mataiti ra i raro ake i te 4.5 mirioni katoa ia. Ko te aite anga o teia nei e e vaitata i te itu mirioni te aronga tei akaari mai i te ariki anga i te tuatua mou a te Atua ra, noatu rai e kare ratou i papetitoia ei Au Kite no Iehova ra. Tera ra, ko tetai papaki o taua aronga ra e au tamariki ou e te aronga ou oki te ariki mai anga. Pera katoa oki, ko tetai papaki o te aronga te rave ra i te angaanga tutu aere kare ake rai i papetitoia. E no reira e manganui te au tangata kua apii i te kite tika tikai i te Puka Tapu inara kare i akono kia papa meitaki ratou uaorai i te apinga a te Atua no te ora na te papetito angaia.

Ko tetai tumu maata kia manakoia e ko te kite e eaa ta te Atua e umuumu maira ia koe na te reira e akakite mai i taau ka rave. “E teianei ko te tangata i kite i te rave i te mea meitaki, e kare i rave, kua riro ïa ei ara nana,” ta Iakobo 4:17 i tuatua ra. Te akaari maira a Ezekiela 33:7-9 e ko te tangata tei akakiteia atu kiaia ra ta te Atua au akauenga e te au apiianga e apainga nana te rave anga i te reira. E no reira ko te uianga e me e inangaro tikai tona i te Atua e te anoano tikai kia akamareka iaia ra. Ko te tangata e inangaro tikai tona e te anoano katoa ra i tetai pirianga taka ke ma te Atua ko Iehova ra, kare aia e tapupu i te akatapu ua anga i tona oraanga kiaia ra. Ko te papetito anga e akairo anga ia no vao, i taua akatapuanga ra. E takainga tau ia kia tae atu ki te ora. Ka papetitoia ra te aronga irinaki tika tikai.​—Angaanga 8:12.

Te au manakonako anga meitaki ta te Atua e mou maira no te aronga tiratiratu, te aronga tataki tai tei akatapuia ra i te ao ou te aere maira ka maata roa atu i tetai ua atu puapinga meitaki ta teianei akatereanga kino taito o te au mea nei te ka oronga mai no te tuatau poto nei. Ka ngaro ke atu te mataku a te au tangata nei me ka akamanako tatou i te rima mana o te Atua ra. (1 Korinetia 10:22; 1 Petero 5:6, 7) E tika tikai, ko teia te tuatau no te ui kia koe uaorai, mei ta te eunuka Etiopia i ui kia Philipa ra: “Eaa au nei e kore ei e bapetizoia?”

[Tutu i te kapi 7]

Mei te eunuka Etiopia ra, te ui ra ainei koe kia koe uaorai e: “Eaa au nei e kore ei e bapetizoia?”