Au Uianga a te Aronga Tatau

Mei te mea e kare te au Kerititiano e peti moni ana, ka ariki ainei ratou i te au tiketi me kore te piri atu ki roto i te ruruanga e penei ake e vini mai ratou i te au re?

E ui anga teia tei tupu mai no tetai tuatau roa, no reira kua akakite takereia atu te reira i roto i ta tatou au puka. I roto i etai au reo, kua rauka atu ia matou te au puka papaanga tumu tuatua o ta tatou au puka, mei te Watch Tower Publications Index 1930-1985 (aiteite katoa ki te tuatau 1986-1990). Me e puka papaanga tumu tuatua ta tetai Kerititiano i tona reo, ka riro teia ei mea puapinga tikai no te kimianga i te au pau anga viviki ma te merengo.

Ka riro te uianga tei uiia i runga ake nei ei akaraanga. Te akaraanga i te Index no te 1930-1985 i raro ake i te tumu manako “Au Uianga a te Aronga Tatau,” ka kite tetai i te tumu tuatua “‘au ruruanga,’ ka ariki ainei te Kerititiano i te tiketi?” Ka takiia atu te tangata tatau ki te tuanga “Au Uianga a te Aronga Tatau” i roto i The Watchtower o Peperuare 15, 1973, kapi 127.a E manganui te Au Kite e voriumu vai maro ta ratou (me kore te au itiu tataki tai) o The Watchtower no te 1973, me kore ka rauka te reira i te akaraia i roto i te ngai vairanga puka o te au Are Uipaanga Patireia e manganui.

Te uriuri anga tei neneiia i te 1973 kua akakite mai te reira e e kopae takiri te au Kerititiano i tetai ua atu koianga me kore ruruanga tei o maira te okoanga tianiti (mei te au tiketi ravera [raffle]) me kore te tukuanga i te moni no tetai tianiti kia vini etai re. Me akakite ngoie uaia, ka kopae tatou i te pereanga, koia oki e akaari anga tikai ia no te tu noinoi.​—1 Korinetia 5:11; 6:10; Ephesia 4:19; 5:3, 5.

Inara penei ka taangaanga tetai are toa me kore tetai pitiniti, i te au ruruanga ei ravenga no te akakitekiteanga. Te apinga ua rai ta tetai tangata ka rave koia ko te tuku i tona ingoa me kore te tuku i tetai pepa me kore tetai tiketi, ma te kore e oko i tetai ua atu mea. E tuanga te ruruanga no te rave anga akakitekiteanga; kua akariroia te reira ei ravenga takake no te akaraanga e koai ma te ka orongaia te re me kore te au re. Penei ka manako tetai au Kerititiano e ka rauka ia ratou i te ariki i te re i roto i tetai ruruanga tei kore ra i o mai te pereanga, mei tera te tu ka rauka ia ratou i te ariki i tetai au apinga tamatamata ua kare e tutaki me kore tetai atu au apinga aroa ta tetai pitiniti me kore ta tetai are toa ka taangaanga i roto i tana porokarama akakitekiteanga.

Inara, ka kopae etai au Kerititiano i tetai ua atu mea mei teia te tu, te kore anga e inangaro i te akatatipake me kore te akaoripu ua i tetai atu e te kimi katoaanga i te akamamao anga mei tetai ua atu akavare anga no te irinaki i tei kapikiia ko te Vaine Manuia. Mei ta Isaia 65:11 (akaaite NW) e akaari maira, kare to te Atua au tavini e akapiri atu ia ratou uaorai ki “te atua o te Manuia Meitaki” me kore “te atua o Tei Tuatuaia.” Penei ka manako katoa ratou e kare ratou e inangaro kia riro mai ei tuanga no tetai ua atu akakitekite anga te ka anoanoia te aronga tei vini ra kia piri atu ki roto. Ko te aronga ra tei manako mei teia te tu kare tikai ratou e tau kia akaapa i tetai Kerititiano me kore au Kerititiano i te mea e kua akatika to ratou akava ngakau kia o atu ratou ki roto i te ruruanga.​—Akaaite Roma 14:1-4.

[Au Tataanga Rikiriki i Raro]