Te Au Mapu Tei ‘Irinaki kia Iehova’

E KARE o te au mapu akaaereanga ki runga i te tu manea, e kare katoa te tu pakari i akono akaaereia e te aronga pakari. (Akaaite Maseli 11:22; Koheleta 10:1.) Mari ra, ko te aronga te akono ra i te manea mutu kore e te tu pakari tinamou ko ratou teia te irinaki ra kia Iehova e ko tei tavaitai ra ma te tae o te ngakau i te tuatua anga iaia: “Ko koe taku Atua.”​—Salamo 31:14; Maseli 9:10; 16:31.

I te takapinianga i te ao katoa te tupu maata ra te au tangata manea, te au mapu e te pakari, tei akaari i to ratou tu pakari na te tavini anga i te Atua e pera te tutu aereanga i te tuatua meitaki o te Patireia o te Atua. Ei akaraanga, ka tamanako ia Sabrina e varu ona mataiti.

E noo ana a Sabrina ki Tiamani e tei roto ia te pupu rua. E koia te mea mua o te Au Kite o Iehova tei aere atu ki tana apii. Ei taitaia anga, koia ta tona au oa i te apii e akakino ana e tae ei i te ra i pati ei te puapii ki te au tamariki kia apai mai i ta ratou puka e reka ana ki te apii. Kua tamanako a Sabrina e ka apai mai aia i tana puka My Book of Bible Stories. Te po i mua atu, e no te mea te ru ra, kua akapapa meitaki aia no te apii. E no te mea e 26 tamariki i roto i tona are apii, kua kite aia e kare e maata tona taime. Inara kua tauta pakari aia kia kore etai ke e tamanamanata i tana akakiteanga tua e kua papu e ka tauturu a Iehova iaia. I te ra i ikiia, kua ui te puapii e koai ma tei apai mai i ta ratou puka e koai te mea mua te ka inangaro i te akaari i tana puka. Ei poitirereanga, ko Sabrina ua tei apai mai i tana puka. Kua tu aia i mua i te pia are apii e kua akamata i te tuatua, e te tatau anga e te akaarianga i te au tutu mei roto mai i te puka e te akamaramaanga i te au mea e kua akatumuia te reira ki runga i te Puka Tapu. I te akamutuanga kua ui aia e: “Koai ia te anoano ra i te inangaro i teia puka?” Kua oronga aia e tai kopi ki tona puapii, e tera atura au ra, kua oronga aia e tai ngauru au puka ki etai ona au oa. Te akameitaki anga a tona puapii ki runga i tana akakiteanga tua e: “Kare roa au i kite ana i tetai mea mei teia rai.” Kua oronga aia kia Sabrina i te maka teitei e A no tana apii.

E te mea, e manganui te Au Kite mapu e papuritia mataora no te tuatua meitaki i te apii. Ko etai akaraanga ko Erika e papuritia no Meiko mai e 11 ona mataiti. Kua apiiia aia mei te pepe anga mai kia inangaro ia Iehova. E meitaki rava ana aia i tana au apii. Ko etai ana apii kia akapapa mai i etai tuatua no runga i te AIDS e te kakianga o te avaava e pera te kava. Kua akapapa tamou aia, i te taangaanga i te Awake! makatini, e te orongaia anga te maka teitei rava atu. Kua ui tona puapii vaine e noea tana au tuatua aere e kua orongaia te makatini e te au atikara no runga i te reira tumu manako kiaia. I muri maira, kua taangaanga te puapii i te reira au makatini no te uriuri i te tumu manako ki te katoatoa i roto i te are apii. No to Erika tu tau, e tana akangateitei ki tona au puapii, e tana au maka teitei, kua tano aia ki te au apinga oronga, te au tiporoma, e te au apii anga tuangaia. Inara, kua papu iaia e ko tana au mea maata rava atu i rauka koia oki kua rauka iaia i te akataka iaia uaorai e ko tetai o te Au Kite o Iehova, e kua rauka ana iaia i te akaruke i te au puka Puka Tapu, e kua akapaapaaia te ingoa o te Atua.

E ina tena a Shannon e tamaroa e tai ngauru ona mataiti e noo ana ki Nu Tirani. E tai ona mata meitaki; e tetai kua ngaro ia te reira ki te maki kaneta i tona pepe anga. I to Shan­non itu anga mataiti, kua akamata tona metua vaine i te apii i te Puka Tapu ki te Au Kite o Iehova. Inara, kare i roa i muri mai i te akamataanga aia i tana apii Puka Tapu, kua akamata aia i te noo kapiti ki tetai tangata kare i anoano ana kia akaipoipo e kua manako aia e ka akamutu i tana apii. Kua pati akatenga a Shannon kia rave ua atu aia i tana apii Puka Tapu. Kua akatikaia tana patianga. Kua putuputu te aravei anga a te Au Kite, e i te openga iora kua apii te ngutuare tangata e toru ra i te Puka Tapu e kua akamaata atu i to ratou kite i te pae vaerua. I te akaipoipo anga kia tau i te ture ra i muri mai ra, kua papetito te metua vaine o Shannon e tona metua tane angai.

I tetai ra kua angaanga te vaine a te akaaere kotinga raua ko Shannon i runga i te angaanga tutu aere. Kua ui te tangata ngutuare kia Shannon e: “Kua aa oki toou mata?” “Kua piri ia e te kaneta, e kua kiritiia ki vao,” i pau atu ei aia. “Inara te vai ra te tuatau ka oronga mai a Iehova i tetai mata ou noku i roto i te Parataito, e no reira maua i tae mai ei i te akakite kia koe i te reira.”