Akamorianga i te Atua ma te Tuatua Mou

No te akamori anga kia arikiia mai e te Atua, ka tau te reira kia akatumuia ki runga i te tuatua mou. (Ioane 4:23) Te akataka maira te Pipiria i te aronga akamori mou e “ko te ekalesia o te Atua ora ra, ko te pou e te rangorango o te tuatua-mou ra.” (1 Timoteo 3:15) Ko te aronga i roto i te putuputuanga a te Atua kare anake e kua irinaki i te tuatua mou o te Tuatua a te Atua mari katoa ra te noo ra kia rotai atu ki te reira e te paruru ra i te reira, i te akakite aereanga i te reira i teianei ao katoa.​—Mataio 24:14; Roma 10:9-15.

KUA kitea meitakiia te Au Kite o Iehova no ta ratou angaanga apiianga Pipiria, te raveia nei i roto e tere atu i te 200 enua. Te apii ra ratou i te Pipiria e te ako ra i te reira e ko te tuatua mou, ma te kore i te kapitianga te mana ta vai o te au apii anga a te tangata. Kua matau ainei koe i ta ratou au apii anga akatumuia ki runga i te Pipiria? E manganui kua emiemi i te akarongo ki te Au Kite o Iehova no te mea no te au tuatua papu kore te akakiteia ra no runga ia ratou. Inara te patiia atu nei te aronga ngakau tika kia iki no ratou uaorai me ko ta te Au Kite e tutu aere ra e tuatua mou ia e me kare ra. Ka tau taua iki anga puapinga kia kore e akatumuia ki runga i te akarongo taringa ua. E manganui tei rave i ta ratou uaorai kimikimi anga i te au apii anga a te Au Kite o Iehova kua puapinga maata tikai.

Takore te Kite Anga i te Tuatua Mou i te Mataku

Ei akaraanga, e akamanako ana, i to Eugenia turanga. Kua maata mai aia i roto i tetai ngutuare akono pakari i te akonoanga Katorika. Ko tona papa tetai tei akaaere i te atoro anga a te pope ki Meiko i te 1979. Iaia e atoro ra i tona au oa, kua aravei atu a Eugenia i te Au Kite o Iehova. Ma ta ratou tauturu kua akamata aia i te akara meitaki i ta te Pipiria e tuatua ra. Kua maara iaia: “I te akamata anga, kua kitea e au te mataku. Kua kitea e au te tuatua mou! Inara ko te aiteanga kua tarevake te maata anga o taku au irinaki anga i mua ana. Toku ngutuare tangata, toku au oa, te au tangata inangaro ia e au​—pouroa ratou kua tarevake. Kua ru au. Kua ui au kiaku uaorai eaa ra te manako o toku ngutuare tangata no runga i taku i kite ou ra. I te tuatau i topa ra e ma te tauturu a Iehova, kua akamata au i te akatikatika ki teia kite anga maata. I tetai ra kua iki au i te tuatua muna atu ki tetai taeake o te ngutuare tangata, e poropeta apiianga akonoanga. Kua akakite au kiaia i toku inangaro i te kimi i te tuatua mou. I reira kua akakite mai aia, ‘Me ka inangaro koe i te kite i te tuatua mou, e kimi i te Au Kite o Iehova.’”

Mei tei mataku ia e Eugenia, kua tuku tona ngutuare tangata iaia ki vao. Inara, kua tamou ua atu te Au Kite i te oronga i te tauturu i te pae vaerua. Kua tuatua mai aia: “Kua akamaroiroiia au kia tu no te tuatua mou. Kua kite au e apinga puapinga maata te reira kia maro ia atu. Kua puapinga tikai te ariu mai anga a te Au Kite o Iehova kiaku. Kua kite au i te aroa i roto i te putuputuanga Kerititiano. Kua tauturu te akapiri vaitata anga ki ta te Atua akaaerenga iaku kia autu i te mataku kia tu ko au anake.”

E akamanako i tetai atu akaraanga. Kua maata mai a Sabrina e kua matau i te au uriuri anga putuputu a te ngutuare tangata no runga i te Pipiria. Ko te tika, kua akatupu ratou i tetai tu ‘akonoanga ngutuare tangata.’ Kua akono aia i te reira na te kapiti anga ki te au mema akonoanga tuke kia akamaeu i to ratou au tarevake. I te oronga anga tetai o te Au Kite o Iehova i tetai apii Pipiria nana, kua ariki ua aia ma te akakoro anga kia akatarevake i to ratou au irinaki anga. Kua maara iaia: “I muri ake i te apii anga e tere atu i te mataiti, kua mataku au e ka ngere iaku ‘taku tuatua mou.’ Kua ngoie ua iaku i te akamaeu i te tarevake o te au akonoanga e manganui taku i piri ana ki roto, inara kare i teia taime.”

Kua akariro to Sabrina mataku iaia kia akaruke i tana apii Pipiria ma te Au Kite o Iehova. Inara kua kite aia i te ngere anga i te pae vaerua. Kua manako aia no te apii akaou e i te openga kua ariki i teia tuatua mou ou. Kua tere atu a Sabrina e tae ua atu i te inangaro anga i te oronga ki tetai ke i tana e kite ra. Kua pati aia i te aru i te Au Kite i roto i ta ratou angaanga mei tera are ki tera are. Kua akamarama mai a Sabrina: “I mua ake ka raukai te tika anga kia tutu aere ma te Au Kite o Iehova, kua ui ia mai kiaku: ‘Te inangaro ra ainei koe kia riro mai e ko tetai o te Au Kite o Iehova?’ ‘Kare!’ i pau atu ei au. Kua kite akaou au i te mataku.” I te openga ra, i muri ake i te aere tamou anga ki te au uipaanga pouroa e te kite anga i te au tangata o te Atua i te taangaanga i te au kaveinga Pipiria, kua taopenga a Sabrina e ko te tuatua mou tikai te reira. Kua papetitoia aia e i teianei e vaine tutu evangeria tamou.

Eaa ra i Tuke Ei?

Penei ka ui tetai, ‘Eaa ra i tuke ei te au apii anga a te Au Kite o Iehova mei tetai atu au akonoanga?’ Na te akara anga poto ua i ta te Au Kite e irinaki ra e tauturu ia koe kia kite e e au Kerititiano ngakau tae tikai ratou, e aronga manako akava ngakau i te Pipiria. Te akamaroiroi nei matou ia koe kia akara ki roto i taau uaorai Pipiria i te au irava i roto i te au tuatua tapoto o to ratou au tumu irinaki anga tei akaariia i runga akera.

Na te akara meitaki anga i ta te Au Kite o Iehova e irinaki ra e ia ratou e aru ra i ta te Pipiria e apii ra, ka akameitakiia koe ma te tu rangatira te oronga maira te tuatua mou. (Ioane 17:17) Kare e tumu no te mataku anga i te tuatua mou. E akamaara i ta Iesu taputou: “Kia kite ïa kotou i te tuatua-mou, e na te tuatua-mou kotou e akarangatira.”​—Ioane 8:32.

[Pia i te kapi 6]

ETAI AU TUMU IRINAKI ANGA O TE AU KITE O IEHOVA

◯ Ko Iehova te Atua mana katoatoa. Te kiteaia ra tona ingoa e maata atu i te 7,000 taime i roto i te au tataanga mua o te Pipiria.​—Salamo 83:18.

◯ Ko Iesu Karaiti e Tamaiti na te Atua, tei aere mai ki te enua kia oronga i tona oraanga no te tangata ravarai. (Ioane 3:16, 17) Te aru ra te Au Kite o Iehova i te au apii anga a Iesu Karaiti tei kiteaia i roto i te au Evangeria.

◯ Kua akatumuia te ingoa Au Kite o Iehova no roto mai ia Isaia 43:10, te na ko ra: ‘Ko kotou toku kite, te tuatua mairā Iehova.’

◯ Ko te Patireia ta te tangata e pure ra i roto i te pure e “To Matou Metua” e kavamani ia i te rangi e kare e roa atu ana ka takore i te mamae i te ao kia akapapa no tetai Parataito ta te Pipiria e taputou maira.​—Isaia 9:5, 6; Daniela 2:44; Mataio 6:9, 10; Apokalupo 21:3, 4.

◯ Ko te aronga te rave ra i to te Atua anoano e tuatau to ratou no te rekareka i te au akameitaki anga mutu kore Patireia.​—Ioane 17:3; 1 Ioane 2:17.

◯ Ka tau te au Kerititiano kia akatano i to ratou tu ki ta te Pipiria e tuatua ra. Ka tau ratou kia tu tika, kia akono i tetai oraanga tau e te ma, e kia akaari i te aroa ki to ratou i te pae mai.​—Mataio 22:39; Ioane 13:35; 1 Korinetia 6:9, 10.

[Tutu i te kapi 5]

Te akakite ra te Au Kite o Iehova i te tuatua mou Pipiria ki te tangata i roto e tere atu i te 200 enua