E Angaanga Maata no te Ora o Toou Ngutuare

“E rave atu i te utuutu mai ia ratou i te ako anga e te akatikatikaanga-manako a Iehova.”​—EPHESIA 6:4, NW.

1, 2. Eaa te au akaaoanga te aro maira i te au metua i teia tuatau nei?

KUA tapaia te reira e tetai makatini rongonui e orureau anga. I roto teia i tetai atikara i te akataka anga tei tupu ra i roto i te ngutuare tangata i teia au mataiti ua ake nei. Kua tuatuaia teia e ko “te tupu anga maata o tetai maki no te kopae, te akaipoipo akaou, te kopae akaou, te anau anga tamariki puti, e te au pekapeka i roto i te au ngutuare kare ra i tataka ke.” Te tau ra te reira au tu taitaia e te pekapeka kia kore e poitirereia e ka tupu ia, no te mea kua totouia e te Puka Tapu e ka aro atu te au tangata i te “kino maata” i teia “tuatau openga” nei.​—2 Timoteo 3:1-5.

² E no reira te aro atura te au metua i teia tuatau i te au akaaoanga kare i kiteia i te au uki i mua ana. Inara ko tetai papaki o te au metua i roto ia tatou nei kua akono i ta ratou au tamariki na roto i te au tu akono i te Atua ra “mei [to ratou] tamariki anga mairai,” e manganui te au ngutuare tangata koi akamata ua akenei i te “aereanga na te tuatua mou.” (2 Timoteo 3:15; 3 Ioane 4, NW) Penei kua pakarikari mai ta ratou au tamariki i te akamata anga te au metua i te apii ia ratou i ta te Atua au mataara. Pera katoa, te tupu nei te numero o te au ngutuare tangata e okotai ua metua e te au ngutuare e metua ke te kiteia ra i rotopu ia ratou. Noatu rai eaa toou turanga, te tau ra te apiianga a te apotetoro ko Paulo: “E rave atu i te utuutu mai ia ratou i te ako anga e te akatikatikaanga manako a Iehova.”​—Ephesia 6:4, NW.

Au Metua Kerititiano e ta Ratou Au Apainga

3, 4. (a) Eaa te au tumu tei akariro i te tuanga a te au metua tane kia meangiti mai? (e) Eaa ra i tau ei kia maata atu ta te au metua tane Kerititiano apainga i to te rave anga mai i te manga anake ua?

³ E tamanako ana kua taiku atura Paulo i tana au tuatua ia Ephesia 6:4 ki te “au metua tane” te aronga mua. Kua akataka mai tetai tangata tata e i te au uki o mua ra “na te au metua tane te apainga no te akono i ta ratou tamariki i te mea tau ra e te pae vaerua oki; na te au metua tane te apainga no te apiianga i ta ratou tamariki. . . . Inara na te Orureau Kia Maani Apinga kua takoreia atu teia pirianga; kua akaruke te au metua tane i ta ratou au pama e te au toa, kua akaruke i to ratou au kainga kia rave angaanga i te au ngai maani apinga e i muri akera ki roto i te au opati. Kua riro na te au metua vaine e rave i te au angaanga e manganui ta te au metua tane i apai ana i mua ra. Kua tupu kia maata te riro anga te taoonga metua tane ei tuatua ua kare ei rave anga.”

⁴ Te au tane Kerititiano: Auraka e mareka i te rave anga mai i te manga anake ua, e ka akaruke ei i te terenianga e te utuutuanga katoa i ta kotou au tamariki na ta kotou au vaine e akono. Kua raurau mai a Maseli 24:27 i te au metua tane i te tuatau taito ra: “E akateateamamao i taau ra angaanga ki vao, ka akatau marie ei kia tau taau ki te kainga; ka akatu ei i toou [“ngutuare,” NW] i muri ake.” Mei te reira katoa oki i teia tuatau, ei tetai tangata rave angaanga, penei ka tau koe kia angaanga roa e te pakari i te rapu anga i tetai ora anga. (1 Timoteo 5:8) Inara, i muri akera, e akataka i te tuatau kia ‘akatu ei i toou ngutuare’​—i te pae manako ngakau e te pae vaerua oki, ine.

5. Akapeea e raukaʼi i te au vaine Kerititiano i te rave angaanga ei ora no to ratou au ngutuare ra?

⁵ Te au vaine Kerititiano: Ka tau katoa oki kotou kia rave angaanga pakari no te ora o to kotou au ngutuare. Te tuatua ra a Maseli 14:1 e: “Te patu ra te vaine pakari ra i tona ra are.” Ei nga tokorua akaipoipo, ka rave kapiti korua ko taau tane i te apainga no te terenianga i ta korua anau. (Maseli 22:6; Malaki 2:14) Penei ka o atu ki teia te akoanga i ta korua tamariki, te akapapa ia ratou no te au uipaanga Kerititiano e te rave angaanga tutu aere, me kare te raveanga i te apii a te ngutuare me ka kore e rauka i taau tane i te rave. Ka rauka katoa oki ia koe i te rave maata i te apii i ta korua tamariki i te au angaanga karape i te ngutuare, te au tu mako meitaki, te ma i te pae kopapa, e e manganui atu te au apinga ei tauturu anga. (Tito 2:5) Me ka rave kapiti te au tane e te au vaine na roto i teia mataara, ka rauka ia ratou te akamerengo anga i te au mea anoanoia no ta ratou au tamariki. Eaa ra etai o taua au mea anoanoia ra?

Utuutuanga no Tei Anoanoia no to Ratou Manako Ngakau

6. Eaa te tuanga apainga a te au metua vaine e te au metua tane ka akono i te akatupu anga i te manako ngakau o ta ratou au tamariki ra?

⁶ “Mei te metua [“vaine,” NW] i matuapuru i tana tamariki,” ka manako tau ua ratou, e te tinamou, e te aroaia oki. (1 Tesalonia 2:7; Salamo 22:9) E tokoiti ua te au metua vaine te ka akakore i te anoano kia tuku maata i te manako anga ki runga i ta ratou au tamariki rikiriki ra. Kua ui te peroveta ko Isaia e: “E tika ainei i te vaine kia akangaropoina i tana tamaiti kai u, e kare atura e tangi ki te tamaiti a tona uaorai kopu?” (Isaia 49:15) E no reira e maata te tuanga ei apainga na te au metua vaine i te akatupu anga i te manako ngakau o te au tamariki. Inara, e maata katoa oki te tuanga a te au metua tane i roto i teia tu. Te tuatua ra tetai tangata apii ngutuare tangata ko Paul Lewis e: “Kare roa au i akarongo ana i tetai ua atu tangata angaanga akono i te au manamanata ngutuare i te ripoti anga a tetai tamaiti [akono tau kore] e e pirianga meitaki to raua ko tona metua tane. Kare okotai tamaiti i roto i te au anere ua atu.”

7, 8. (a) Eaa te akapapu anga te vaira no tetai tatua pirianga maroiroi i rotopu i te Atua ko Iehova e tana Tamaiti ra? (e) Akapeea te au metua tane i te rave anga kia tupu tetai tatua pirianga aroa ma ta ratou tamariki katoa ra?

⁷ E no reira rai e mea tau no te au metua tane Kerititiano kia tatanu matakite i tetai tatua aroa ma ta ratou au tamariki ra. Ei akaraanga, e akamanako ana i te Atua ia Iehova raua ko Iesu Karaiti. I te papetito angaia a Iesu, kua tuatua maira Iehova: “Ko taku tamaiti akaperepere koe; kua mareka rava au ia koe.” (Luka 3:22) E maata tei akakiteia mai i roto i taua au tuatua tokoiti ua ra! (1) Kua akakite tika maira Iehova i tana Tamaiti, (2) kua akakite atea ua maira i tona inangaro no Iesu, e te (3) kua akakite katoa mai i tona mareka anga no Iesu. Inara, kare ko teia anake ua te tuatau i tuatua akakite ei a Iehova i tona inangaro no tana Tamaiti. Kua tuatua atura Iesu i muri akera ki tona Metua: “Kua akaperepere mai ana oki koe iaku ou teianei ao i angaiaʼi.” (Ioane 17:24) Inara, e mea tika, kare ainei te au tamaroa e te au tamaine akarongo katoatoa e tau no te akatika anga, no te inangaro, e te mareka anga mei ko mai i to ratou au metua tane ra?

⁸ Me ko koe tetai e metua tane, penei ka rauka kia maata taau rave anga kia tupu tetai tatua pirianga aroa ma taau tamariki na te raveanga putuputu i te pae kopapa e te au tuatua akakitekite anga i te aroa. E tika oki e, e mea ngata no etai au tane kia akaari i to ratou inangaro, e maata oki me kare ratou i inangaro ateaia mei ko mai i to ratou uaorai au metua tane ra. Inara noatu ko tetai tamata anga kare i oti tika no te akakite anga aroa ki taau au tamariki ka rauka i te akatupu ririnui i te meitaki. No te mea, “te aroa e tamata ia i te meitaki.” (1 Korinetia 8:1) Me ka kite taau tamariki i te manako ngakau tinamou no toou aroa ei metua tane, ka riro ratou kia maata atu te manako anga e ‘e au tamaroa e te au tamaine tikai’ ratou e ka ngoie ua te tuatua irinaki anga kia koe.​—Maseli 4:3, akaaite ia NW.

Utuutuanga i Tei Anoanoia no Ratou i te Pae Vaerua

9. (a) I akapeea ta te au metua Iseraela mataku i te Atua ra utuutu anga i te au mea anoanoia i te pae vaerua no to ratou au ngutuare? (e) Eaa te au tuatau te vaira no te au Kerititiano kia apii ua i ta ratou tamariki?

⁹ E au apinga anoano katoaia oki etai no te au tamariki i te pae vaerua. (Mataio 5:3) Kua apii katoa a Mose i te au metua Iseraela ra: “E teianei au tuatua taku e akaue atu kia koe i teianei rā, ei roto i toou ngakau vai ei; E ka apii tamou tikai koe i te reira ki taau au tamariki; ko taau ïa e tuatua kia noo ua koe i roto i to are, e kia aere ua koe na te arataa ra, e kia akāvai koe ra, e kia tu koe ki runga ra.” (Deuteronomi 6:6, 7) Me ko koe tetai e metua Kerititiano, e maata taau ka rauka kia rave ua i taau apiianga, me “kia aere ua koe na te arataa ra.” Te tuatau te aere kapiti ra i roto i te motoka o te pamiri, i te oko apinga i te toa, me kare te aaere kapitianga ma taau au tamariki mei tera ngutupa ki tera ngutupa i te angaanga orometua Kerititiano te oronga maira i te au tuatau meitaki no te akono i te apiianga na roto i tetai turanga ngoie ua. Te au taime kaikai e tuatau meitaki tikai ia no te au pamiri kia tuatua kapiti. “Te akono nei matou i te taime kaikai no te tuatua anga i te au apinga i tupu i taua ra ra,” ko ta tetai metua vaine i akataka mai.

10. Eaa ra i riro ei te apii ngutuare i etai tuatau ei akaaoanga, e eaa te manako anga tau no te au metua ra?

¹⁰ Inara, ko te apiianga akapapaia no tetai apii putuputu i te Puka Tapu ma taau tamariki e mea puapinga katoa ia. E tika rai e, “kua mou rava te neneva ki roto i te ngakau” o te tamariki. (Maseli 22:15) Te tuatua ra tetai papaki au metua e ka ngoie ua i ta ratou tamariki i te akakore atu i ta ratou apii ngutuare. Na ea? Na te raveanga oripu ua e te iu anga, na te akatupuanga i te au tu tau kore ei akariro ke i te manako (mei te au maro anga i rotopu ia ratou tamariki ra), me kare na te akameamea ua e e kite kore i te au tuatua mou akatumuia no te Puka Tapu ra. Me ka aere ua atu teia kia riro ei tarere anga kia kiteia e noai te anoano maroiroi atu, ka tau e kia riro ko to te metua ra anoano kia maroiroi atu. Kare e tau kia akamutu ua te au metua Kerititiano e ka tuku atu na te tamariki e tutara i te ngutuare.​—Akaaite ia Galatia 6:9.

11. Akapeea te apii ngutuare e riro ei ei mea rekarekaia?

¹¹ Me kare taau tamariki e rekareka ana i te apii a te ngutuare, penei ka tau kia akonoia etai au taui anga. Ei akaraanga, te raveia ra ainei te apii ei kotoe anga kia akamanakoia te au tu tarevake ou o taau tamariki? Penei e meitaki atu te uriuri manako poiri ua i taua au manamanata ra. Te rave putuputuia ra ainei ta kotou apii? Me ka akakore ua koe i te apii ngutuare no tetai akaari anga rekaia i te tivi me kare e tarekareka anga, penei kare taau tamariki e manako e e puapinga maata to te apii. Te ngakau tae ra ainei e te oraora ra taau tu raveanga i te apii? (Roma 12:8) Ae, e mea tau kia rekareka te apii anga. E tauta i te akao mai i te tamariki katoatoa. Kia papu e kia akamaroiroi, ma te tuatua akapaapaa pumaana i taau tamariki no ta ratou apiianga. Inara, auraka e rapurapu ua kia oti te tumu tuatua, e tauta kia itaeia to ratou ngakau.​—Maseli 23:15.

Akoanga ma te Tuatua Tika

12. Eaa ra te ako anga i kore ei e tau ei papa anga kopapa i te au taime ravarai?

¹² E mea anoano maata katoaia te ako no te tamariki. Ei metua ra, ka tau koe kia akanoo i te au kotinga no ratou. Te tuatua ra Maseli 13:24: “Ko tei vaoo ua i te pāpā ra, kua riri ïa i tana tamaiti: ko tei aroa ra iaia, e ako ïa iaia i reira ra.” Inara, kare te aite anga o ta te Puka Tapu e ko te ako ka tau te reira i te au taime ravarai na tetai papa anga kopapa. Te tuatua ra ia Maseli 8:33 e: “E akarongo mai i te ako,” e te tuatuaia maira kia tatou e “e meitaki to te ako i te tangata pakari ra, i te pāpā i te neneva e kia anere ua atu te tainga.”​—Maseli 17:10.

13. Akapeea te rave i te ako anga tau i te tamaiti ra?

¹³ I etai atianga, penei te tau ra etai ako anga i te pae kopapa. Inara, me ka raveia te reira ma te riri, penei ka maata roa ia e kare e puapinga. Te akamatakite maira te Puka Tapu: “E te au metua ra, auraka e akariri atu i ta kotou tamariki, ko te taitaia aea ratou.” (Kolosa 3:21) E tika oki, “e akanenevaia oki te tangata pakari i te takinga-kino.” (Koheleta 7:7) Ka rauka i tetai mapu tei akaririia ra kia akameameaau atu i te au turanga tuatua tika. E no reira ka tau rai te au metua kia akono i te au Tuatua Tapu ei ako i ta ratou tamariki i te tuatua tika na roto i te tu ngaueue kore inara kia tau ia. (2 Timoteo 3:16) Te akonoia ra te ako no te akono i te Atua ma te aroa e te maru.​—Akaaite ia 2 Timoteo 2:24, 25.a

14. Eaa te mea tau na te au metua kia rave me te tuku ua ra ratou ki te riri anga?

¹⁴ E tikai, “te apa anake nei tatou i te au mea katoa e manganui.” (Iakobo 3:2) Noatu rai ko tetai metua aroa ua ra ka topa rai i te taomi anga no tetai tuatau poto ua e ka tuatua i tetai apinga kare i te takinga meitaki me kare ka akaari i te riri. (Kolosa 3:8) Me ka tupu ake te reira, auraka e tuku kia opu te ra ma taau tamaiti i roto i te tu taitaia maata me kare ko koe uaorai i roto i tetai tu riri. (Ephesia 4:26, 27) E akakore i te reira tu ma taau tamaiti, ma tetai tataraara anga me te akara anga tau ra te reira. (Akaaite ia Mataio 5:23, 24.) Na te akaarianga i te reira tu akaaka penei ka akapiri vaitata ia korua ko taau tamaiti. Me ka manako koe e kare e rauka ia koe i te akatere i toou riri e ka tuku ua ki te riri, e kimi i te tauturu mei ko mai i te aronga pakari o te putuputuanga ra.

Au Ngutuare Okotai-Metua e te Pamiri Akaipoipoia Maira ki Roto

15. Akapeea e raukaʼi i te tauturu i te au tamariki i roto i te au ngutuare okotai ua ra metua?

¹⁵ Inara, kare te au tamariki katoatoa e turuia ana e nga metua e rua ra. I te Unaite Teite, e 1 tamaiti i roto i te 4 kua riro na tetai metua okotai i akono. I te au tuatau Puka Tapu ra e mea matauia te ‘au matiroeroe,’ e ko te manako anga no ratou e putuputu te taikuia i roto i te au Tuatua Tapu. (Exodo 22:22) I teia tuatau, te aiteite ra te au ngutuare Kerititiano okotai-metua te aro atura i te au taomi anga e te au tu ngata oki, inara te pumaana ra ratou i te kiteanga e ko Iehova ko “te Metua o te au matiroeroe, e te Akava o te au vaine takaua.” (Salamo 68:5) Te raurauia maira te au Kerititiano kia “takinga-meitaki i te matiroeroe e te au vaine takaua i to ratou mate anga.” (Iakobo 1:27) E maata te ka rauka i te au oa akarongo ra ei tauturu atu i te au ngutuare okotai-metua ra.b

16. (a) Eaa te mea tau na te au metua okotai ra kia rave no to ratou uaorai au ngutuare? (e) Penei eaa ka tu ngataʼi te ako anga, inara eaa i tau ei kia raveia te reira?

¹⁶ Me ko koe tetai e metua okotai, eaa taau uaorai ka rave kia puapingaia toou ngutuare? Ka tau koe kia maroiroi i te apii Puka Tapu a te ngutuare, te aere ki te au uipaanga, e ki te angaanga tutu aere. Inara, ko te ako anga, penei ka riro ei akaaoanga ngata tikai ia. Penei te vaira toou mamae ngakau no te taka keanga tetai oa akaperepere i te mate. Me kare penei te kukumi ua ra koe ma etai manako ngakau no te apa me kare no te riri i tetai ngaa anga akaipoipo. Me te akono kapiti ra korua ko toou tokorua mua i nga tamariki i raro i ta te ture tika, penei te mataku ua ra koe e ka inangaro to tamaiti kia noo atu ma toou tokorua akataka keia ra na te kopae anga. Penei ka akariro te reira au turanga kia ngata te manakoanga ngakau i te akono i te ako anga tau. Inara, te akakite maira te Puka Tapu kia tatou e “ko te tamaiti ra kia akaruke takiriia ra, e riro te metua vaine i te akama.” (Maseli 29:15) E no reira auraka e tuku ua ki te apa, te mamae ngakau, me kare ki te taomi anga manako ngakau na tetai tokorua akaipoipo mua ra. E akanoo i etai au turanga tau e te tamouia. Auraka e akakore i te au kaveinga Puka Tapu ra.​—Maseli 13:24.

17. Akapeea e kore ei e taka meitaki te tuanga apainga a te au mema o te ngutuare e okotai-metua, e eaa te ka rauka kia raveia ei akakore i te reira tu?

¹⁷ Inara, ka rauka ua kia tupu te au tu ngata, me ka akono tetai vaine koia anake ra te metua, i tana tamaiti ei mono no tona tokorua ra​—koia te tangata no te ngutuare—​me kare ko tana tamaine ei vaine tauturu i te au mea muna ra, ma te akateiaa anga iaia i te au manamanata piri maira no te ngutuare. Kare i te mea tau te raveanga i te reira e ka akaoripu ua i te manako o te tamaiti ra. Me ka kore e taka meitaki te apainga a te metua e te tamaiti ra, ka kore ua e tau te ako anga. E akakite e ko koe te metua. Me ko koe te metua vaine e te anoano ra i te apii akatumuia ki runga i te Puka Tapu, e kimi i te reira mei te aronga pakari mai me kare ra penei mei ko mai i tetai tuaine kua pakari ra.​—Akaaite ia Tito 2:3-5.

18, 19. (a) Eaa etai akaaoanga te aroia atura e te au pamiri akaipoipoia maira ki roto? (e) Akapeea te au metua e te au tamariki i roto i tetai pamiri akaipoipoia maira ki roto i te akaari anga i te pakari e te kite?

¹⁸ Te aro katoa ra oki i te au akaaoanga te au pamiri akaipoipoia mai ra ki roto. E putuputu, te kiteaia ra e te au metua akaipoipoia maira ki roto, e e takitai ua ake te “tupu viviki te inangaro.” Ei akaraanga, penei ka manako riri ua te au tamariki piri mai na te akaipoipo anga, ki tetai ua atu tu akaperepere anga ki te au tamariki tika tikai. (Akaaite ia Genese 37:3, 4.) Ko te tika ra, penei te vaira te mamae ngakau ki te au tamariki tei piri maira na te akaipoipo anga no te metua tei taka ke ra e ka mataku e ko te inangaroanga i tetai metua tei piri maira na te akaipoipo anga ka riro ia ei tiratiratu kore ki to ratou metua tane me kare metua vaine tikai ra. Penei ka riro te tauta anga kia oronga i te ako tei ­anoanoia ra kia pauia ma tetai akamaara anga riri e, ‘Kare ko koe toku metua tikai!’

¹⁹ Te na ko ra Maseli 24:3: “E patuia te are i te pakari; e e akatinamouia i te kite.” Ae, na te pakari e te kite i te tuanga a te katoatoa o te pamiri akaipoipoia maira ki roto e puapingaiaʼi. I muri akera, ka tau rai kia ariki te au tamariki ra i te tika e putuputu ra te mamae anga e kua tauiia te au tu ra. Mei te reira katoa oki, ka anoanoia te au metua na te akaipoipo anga i piri mai ei, kia kite e kia akakoromaki e te aroa, auraka kia viviki ua te riri me ka aro atu ki tetai akara anga kopae ke anga. (Maseli 19:11; Koheleta 7:9) I mua ake i te raveanga i te tuanga ako anga, e rave i te akatupuanga i tetai pirianga oa ma tetai tamaiti na te akaipoipo anga i piri mai ei. I mua ake ka tupu ei tetai tatua pirianga, penei ka akamanako tetai papaki e e meitaki atu kia tupu na te metua tikai e rave te ako anga. Me tupu mai te pekapeka, ka tau kia raveia te au tauta anga kia komunikeiti. “Te aronga i akarongo i te ako ra, te reira te pakari,” ta Maseli 3:10 i tuatua maira.c

E Angaanga Tamou no te Ora o Toou Ngutuare!

20. Eaa ta te au upoko o te au ngutuare Kerititiano te ka tau kia rave tamou marie?

²⁰ Kare te au ngutuare Kerititiano maroiroi i te mea tupu ua mai. Ka tau kotou te au upoko ngutuare ra kia angaanga tamou pakari no te ora o to kotou au ngutuare. Kia matakite, i te akara anga i etai au tu tau kore me kare au ravenga no teianei ao. E akanoo i te akaraanga meitaki i te tuatuaanga, te tu akono, te aroa, te akarongo, e te viivii kore. (1 Timoteo 4:12) E akakite i te au ua o te vaerua o te Atua ra. (Galatia 5:22, 23) Te akakoromaki anga, te akamanako anga, te akakore anga ara, e te maru ka akamaroiroi i taau au tauta anga kia apii atu i taau tamariki i te au mataara a te Atua ra.​—Kolosa 3:12-14.

21. Akapeea e raukaʼi kia tamouia tetai reva pumaana, e te mataora ki roto i te ngutuare o tetai ra?

²¹ Ma te tauturu anga a te Atua ra, e tauta i te tamou marie i tetai vaerua pumaana i roto i toou ngutuare. E akapou i tetai tuatau kapiti anga ei ngutuare tangata, ma te tautaanga kia kaikai kapiti e okotai kaikai anga i te au ra tataki tai. Te au uipaanga Kerititiano, te angaanga tutu aere, e te apii ei ngutuare tangata e mea tau anake kia akonoia. Inara, te vai katoa ra oki “te tuatau no te kata . . . e te tuatau no te rererere aere.” (Koheleta 3:1, 4, NW) Ae, e akapapa i te au tuatau no te tamataora anga akamaroiroi. Te tutaka anga i te au ngai vairanga apinga taito, te au ngai no te manu, e etai atu au ngai rekareka anga no te ngutuare katoa ra. Me kare penei ka tamate koe i te tivi e ka akapou i te tuatau no te imeneanga, te akarongoanga ki te akatangi imene, te kanga tarekareka, e te tuatuaanga. Ka tauturu teia i te ngutuare tangata kia kapiti piri vaitata ua.

22. Eaa ra i tau ei kia rave angaanga pakari no te ora o toou ngutuare?

²² E rave tamou marie kotou ravarai te au metua Kerititiano ra kia akamareka pu ia Iehova ra “e kia tupu te au angaanga meitaki katoa ia kotou, e kia maata oki to kotou kite i te Atua.” (Kolosa 1:10) E patu i toou ngutuare ki runga i tetai tango maroiroi no te akarongo anga i te Tuatua a te Atua ra. (Mataio 7:24-27) E kia papu ia koe e ko taau au tauta anga kia akono i taau tamariki “i te ako anga e te akatikatikaanga manako a Iehova” ka rauka mai tona mareka anga.​—Ephesia 6:4, NW.

[Au Tataanga Rikiriki i Raro]

Akapeea Koe me Pau?

◻ Akapeea e raukaʼi i te tane e te vaine i te taokotai i te patuanga kia tupu to raua ngutuare?

◻ Eaa etai au manako ngakau o te au tamariki, e akapeea te akamerengo anga i te reira?

◻ Akapeea e raukaʼi i te au upoko ngutuare i te apii i ta ratou tamariki na roto i te akapapa anga e pera katoa oki te tu kare i akapapaia?

◻ Akapeea te au metua i te ako anga ma te tuatua tika?

◻ Eaa te ka rauka kia raveia ei puapinga no te au ngutuare okotai ua metua e pera katoa te au pamiri akaipoipoia maira ki roto?

[Tutu i te kapi 16]

E mea puapinga maata to te metua tane aroa e te mareka anga ki te tupu anga te manako ngakau o te tamaiti ra