E Tu Tau to Iehova!

“Te pakari no runga mai . . . e tau ia.”​—IAKOBO 3:17, NW.

1. Akapeea etai pae te akatutu anga i te Atua ma te tu tau kore, e eaa toou manako no runga i tetai akara anga i te Atua mei teia?

EAA te tu Atua taau ka akamori? Te irinaki ainei koe iaia ei Atua tu tau kore, rave tika ua, te anu e te maro? Ki te tangata Porotetani taui ra ko John Calvin, te akara anga e mei te reira rai te Atua. Kua karanga a Calvin no te Atua e e “parani mutu kore e te taui kore” tana no runga i te aronga tataki tai, te akataoonga tataki tai anga i mua atu ana e me ka noo mataora aia e tuatau ua atu e me ka tamamae mutu koreia i roto i te ai era. Ka tamanako ana: Naringa teia i tika, kare aau mea ka rave, noatu taau tauta anga, te ka taui i ta te Atua parani roa e te maro noou ra e toou tuatau ki mua. Ka akakeuia ainei koe ki teia tu Atua tau kore?​—Akaaite ia Iakobo 4:8.

2, 3. (a) Akapeea tatou te akatutu anga i te tu tau kore o te au taokotaianga e te au akaaerenga tangata? (e) Akapeea ta Ezekiela orama o te kariota kaka o Iehova i te akaari anga i Tona tu akatano ua?

² Mei teaa atura to tatou mareka i te kite e e tu tau tikai to te Atua o te Puka Tapu! Ko te au tangata te aronga tu tau kore e te maro kare ko te Atua, kua tapekaia e to ratou uaorai tu tiama kore. Ka riro te au akaaerenga tangata akono koreia mei te au rerue tari apinga ra. Me te tere ra tetai rerue maatamaata tari apinga ki tetai arai anga i runga i te ara rerue, kare e rauka i te tapae, e e ngata katoa i te tapu. I etai au rerue no te viviki roa to ratou tere ka anoanoia e okotai kiro mita e tere atu no te tapu i muri ake ka tukuiaʼi te au pereiki! Mei tetai pai maatamaata rai, ka tere ua atu te reira no tetai varu kiro mita i muri ake i te tamate angaia te au enitini. Noatu e me akatereia ki muri, ka tere ua atu rai te reira no tetai toru kiro mita! Inara i teianei, ka tamanako ana i tetai apinga umere rava atu i teia nga mea e rua, e mea tei akatutu ra i te akaaerenga a te Atua.

³ E tere atu i te 2,600 mataiti i topa, kua oronga a Iehova i tetai orama ki te peroveta ko Ezekiela tei akatutu ra i Tana akaaerenga i te rangi o te au mea ora vaerua ra. E kariota umere ma te akauruia i te au tu tikai, ko ta Iehova uaorai “apinga tere” i raro ake i tana akatere anga. Te mea umere rava atu koia ko te tu o tona neke anga. I teia au auira mamaata e a paepae e tei ki i te au mata, e raukaʼi ia ratou i te kite i te au ngai ravarai e e raukaʼi i te taui viviki i te akatere anga, ma te kore e tapupu me kore e tapaepae. E kare teia apinga tere maatamaata e tere teiaa ua mei tetai pai maatamaata me kore tetai rerue tari apinga. Ka rauka te reira i te neke mei te uira rai te viviki, pera katoa te rave i te au tapae anga i te tua katau! (Ezekiela 1:1, 14-28) E tuke tikai a Iehova ki te Atua ta Calvin i tutu ra e mei Tona Kariota tei tuke ra ki ta te tangata nei au matini tei maani marikonga kore uaia. E tu akatanotano tiama tikai tona. Na te arikianga i teia tu o Iehova e tau te reira kia tauturu ia tatou kia vai akatano ua e te kopae i te erere o te tu tau kore.

Iehova​—Te Peretana Akatano Rava Atu i te Ao Katoa e Pini Ua Ake

4. (a) Na teea tu to Iehova ingoa tikai te akaari anga iaia e e Atua akatano ua atu? (e) Eaa etai au taoonga tei orongaia no te Atua ko Iehova, e eaa ra ratou i tau ei?

⁴ Te akakite tikai ra to Iehova ingoa i tona tu akatano ua. Te aite anga tikai o “Iehova” koia oki “Nana e Akariro kia Tupu.” Tera te aite anga te akatupu ra a Iehova iaia uaorai kia riro mai e ko Tei Akatupu i tana au taputou ravarai. I to Mose ui anga ki te Atua no tona ingoa, kua akakite ua a Iehova i te aiteanga na teia tu: “Te vai nei au, ko au rai e vai nei.” (Exodo 3:14) Kua tuatua tikai ta Rotherham urianga e: “Ka Riro Mai Au ei taku uaorai i mareka ra.” Ka vai rai a Iehova, me kore ka iki i te ka riro maira, noatu eaa te ka anoanoia no te akatupu i tana au akakoroanga e te au taputou tika ra. No reira, te akamaneaia ra aia ma te au taoonga umere ra, mei te Tei Anga, Metua, Atu Ngateitei, Tiaki, Iehova sabaota, Akarongo o te pure, Akava, Puapii Maata Rava, Tei Oko Akaou. Kua akatupu aia iaia uaorai kia riro ei teia au mea ravarai e tei maata atu no te rave i tana au akakoroanga aroa ra.​—Isaia 8:13; 30:20; 40:28; 41:14; Salamo 23:1; 65:2; 73:28; 89:26; Akava 11:27; akara katoa i te New World Translation, Appendix 1J.

5. Eaa ra tatou ka kore ei e taopenga e te akaari maira to Iehova tu akatano ua e ka taui tona tu me kore tana au turanga?

⁵ Ko te aite anga ainei i reira, e ka taui to te Atua tu me kore au turanga? Kare; mei ta Iakobo 1:17 e tuatua ra, “kare rava e tu ke ke iaia ra, kare oki e tu ke anga e ngai mea ngiti ua ake.” Te vaira ainei tetai akatarevake anga i konei? Kare. Ei akaraanga, koai ia metua aroa kare e taui ana i te au tuanga angaanga e puapingaʼi te tamariki? I roto i te ra okotai, penei ka riro mai tetai metua ei tangata ako, ei kuki, ei tangata akono are, ei puapii, ei tangata papa, ei oa, ei tangata maani matini, ei neti​—e te vai atura. Kare te metua e taui i tona tu me rave aia i teia au tuanga angaanga; ka akatano ua aia ki te au anoano o te reira taime. E pera katoa a Iehova inara e maata rava atu ia. Kare e kotinga ki tana uaorai ka rauka i te akatupu e puapingaʼi tana au mea ora. Te oonu anga o tona pakari e mea umere maata tikai ia!​—Roma 11:33.

E Akairo te Tu Tau no te Pakari Tu-Atua

6. Eaa te au aiteanga tikai e te au akakite anga o te tuatua Ereni ta Iakobo i taangaanga no te akatutu i te pakari tu-Atua?

⁶ Kua taangaanga te pipi a Iakobo i tetai tuatua reka no te akatutu i te pakari o teia Atua teitei akatano ua ra. Kua tata aia: “Te pakari no runga mai . . . e tau ia.” (Iakobo 3:17, NW) Te tuatua Ereni tana i taangaanga i konei (e·pi·ei·kesʹ) e ngata ia no te uri. Kua taangaanga te aronga uri i te au tuatua mei te “maru,” “paruparu,” “akakoromaki,” e te “manako meitaki.” Te uri ra te New World Translation i te reira e e “tu tau,” ma tetai tataanga i raro ake te akakiteanga e ko te aiteanga tikai ko te “tuku ua atu.”a Te akakite katoa ra te reira tuatua i te tu o te kore anga e aru i te au akakiteanga tikai o te ture, te kore anga e arairai anoano kore ra me kore te maro. Kua akakite te tangata apiipii ko William Barclay i roto i te New Testament Words e: “Te mea tumu e te mea puapinga no runga i te epieikeia [tu tau] koia oki no ko mai ia i te Atua. Naringa te Atua i aruaru mai i tana au tika ra, naringa te Atua i taangaanga mai i te au turanga maro o te ture kia tatou, teiea i reira tatou? Ko te Atua te akaraanga teitei o tetai tei epieikēs e tei akono ra i tetai atu ma te epieikeia.”

7. Akapeea a Iehova i te akaari anga i te tu tau i roto i te aua o Edene?

⁷ Ka tamanako ana i te tuatau te meameaau anga te tangata nei i to Iehova tu ngateitei. Mei teaa atura i te ngoie no te Atua i te tamate i taua aronga meameau akameitaki kore e toru​—ko Adamu, Eva, e Satani! Mei teaa atura te maata o te mamae ngakau tana ka akakore ra mei iaia uaorai! E koai te ka taumaro atu kiaia e kare ona tika anga i te tuku i taua arai anga tika? Inara, kare rava a Iehova e akamou ana i tana akaaerenga kariota kaka ki roto i etai turanga tika ma te maro e te akatano kore ra. No reira kare te reira kariota i rora takauri ana i te pamiri tangata e te au manakonakoanga katoatoa no te tuatau mataora ki mua o te tangata nei. Ma te tuke ra, kua akaanga viviki a Iehova i tona kariota mei te ai uira. I muri viviki ua ake i te meameaau rai, kua akanoo te Atua ko Iehova i tetai akakoroanga roa tei tangi ra e tei oronga i te manakonakoanga ki te au uanga katoatoa a Adamu.​—Genese 3:15.

8. (a) Eaa te tuke i rotopu i ta Kerititome manako tarevake o te tu tau e to Iehova tu tau tikai? (e) Eaa ra tatou ka karangaʼi e kare to Iehova tu tau e akakite ra e penei ka akangaropoina aia i te au kaveinga tu-Atua?

⁸ Inara, kare to Iehova tu tau e akaari ra e penei e e akangaropoina aia i te au kaveinga tu-Atua. Penei te manako ra te au akonoanga a Kerititome e e tu tau to ratou me akangaropoina ratou i te akaturi kia marekaia mai e ta ratou au anana marikonga kore. (Akaaite ia 2 Timoteo 4:3.) Kare rava a Iehova e aati ana i tana uaorai au ture, e kare katoa e akangaropoina ana i tana au kaveinga. Mari ra, te akaari ra aia i tetai tu puareinga no te tuku ua atu, no te akatano ki te au turanga, e raukaʼi taua au kaveinga ra i te taangaangaia ma te tu tika e te tu tangi. E manako ua ana aia i te akatau meitaki i tana taangaanga anga i te tu tika e te ririnui ki tona aroa e te pakari tau. Ka uriuri ana tatou e toru au mataara ta Iehova akaari anga i te tu tau.

‘Papa Ua no te Akakore’

9, 10. (a) Eaa ra te ‘papa ua anga no te akakore’ ka piri atu ei ki te tu tau? (e) Akapeea a Davida i te puapinga anga mei to Iehova tu papa ua no te akakore, e no teaa ra?

⁹ Kua tata a Davida e: ‘Te meitaki ra oki koe, e te Atu, e kua papa ua koe no te akakore mai i te ara nei, e te aroa maata i te aronga katoa e kapiki atu ia koe.’ (Salamo 86:5) I te uri angaia te au Tuatua Tapu Epera ki te reo Ereni, te tuatua no te ‘papa ua no te akakore’ e e·pi·ei·kesʹ, me kore “tu tau.” E tikai, na te papa ua anga i te akakore e te akaari i te tu tangi penei ko te mataara tikai ia no te akaari i te tu tau.

¹⁰ Kua kite tikai a Davida uaorai e mei teaa to Iehova tu tau no teia. I te akaturi anga a Davida raua ko Bate-seba e kua akanoo kia tamateia tana tane, kua tano raua ko Bate-seba kia akautungaia kia mate. (Deuteronomi 22:22; 2 Samuela 11:2-27) Naringa te au akava tangata maro ra i akava i teia akavaanga, kua mate rai raua roaʼi. Inara kua akaari a Iehova i te tu tau (e·pi·ei·kesʹ), koia oki mei ta Vine’s Expository Dictionary of Biblical Words e tuku ra, “tei akaari ra i te tu manako meitaki tei akara ‘tangi ra e te tau ra i te au tika o tetai akavaanga.’” Te au tika tei akakeu ra i ta Iehova pau anga tangi te akara anga kua kapiti mai ia i te tu tataraara ngakau tae o te aronga tarevake e te tu tangi ta Davida uaorai i akaari i mua atu ana no tetai ke atu. (1 Samuela 24:4-6; 25:32-35; 26:7-11; Mataio 5:7; Iakobo 2:13) Inara, i tau ki ta Iehova akatutu anga iaia uaorai ia Exodo 34:4-7, e mea tau i reira kia akatikatika a Iehova ia Davida. Kua tuku aia i te peroveta ia Natana kia Davida ma tetai tuatua pakari, te akakiteanga i te tika kia Davida e kua akavaavaa aia i te tuatua a te Iehova. Kua tataraara a Davida e kare atura i mate no tana ara.​—2 Samuela 12:1-14.

11. Akapeea a Iehova i te akaari anga i tetai tu papa ua no te akakore ia Manase?

¹¹ I teia tu e umere rava atu te akaraanga o Manase, te ariki o Iuda, i te mea e e kino tikai a Manase no tetai tuatau roa, kare aia mei ia Davida rai. Kua akamaata a Manase i te au rave anga akonoanga viivii i roto i te enua, kapiti mai te atinga tangata. Penei e nana katoa i ‘keke rotopu’ i te peroveta akarongo ko Isaia. (Ebera 11:37) Ei akautunga ia Manase, kua tuku a Iehova iaia kia apainaia ei tuikaa ki Babulonia. Inara, kua tataraara a Manase i roto i te are auri e kua pati akatenga ra kia tangiia aia. I te ariu anga atu ki teia tataraara anga ngakau tae, kua ‘papa ua a Iehova i te akakore’​—noatu i roto i teia turanga pakari.​—2 Paraleipomeno 33:9-13.

Tauianga i te Aerenga i te Au Turanga Ou e Tupu Maira

12, 13. (a) I Nineve, eaa te turanga tei taui tei akakeu ra ia Iehova kia taui i tona aerenga? (e) Akapeea to Iona tu tau i meangiti mai ei i to te Atua ko Iehova?

¹² Te akaari katoa maira to Iehova tu tau i roto i tona puareinga ua anga i te taui i tetai aerenga tana i tamanako ra i te au turanga ou e tupu maira. Ei akaraanga, i te mati anga te peroveta ko Iona na runga i te mataara o Nineve taito ra, kua taka ngoie ua tana akakite anga akauruia: Ka takoreia te oire maata i roto i te 40 ra. Inara, kua taui te au turanga​—ma te tuke ra! Kua tataraara te au Nineve.​—Iona, pene 3.

¹³ E mea tau i te apii mei te akara anga i te tuke e akapeea a Iehova raua ko Iona i te ariu anga atu ki teia au taui anga. Mei tera te tu kua taui a Iehova i te aerenga o tona kariota kaka. I teia tu kua akatano aia iaia, te akariro anga iaia uaorai ei akakore ra i te au ara kare ei ‘toā tamaki ra.’ (Exodo 15:3) Ko Iona ra, e meangiti ake tona tu tau. Kare aia i aru tamou ana i te tere anga o to Iehova kariota, kua angaanga aia mei te rerue tari apinga ra me kore te pai maatamaata tei taikuia i mua atu ana. Kua akakite aia i te akavaanga, e tau i reira kia akavaia! Penei kua manako aia e ko tetai ua atu taui anga aerenga ka riro te reira ei taakama iaia i roto i te au mata o te au tangata Nineve. Ma te akakoromaki ra, kua apii a Iehova i tetai apiianga meitaki no te tu tau e te tu tangi ki tana peroveta marokiakia.​—Iona, pene 4.

14. Eaa ra a Iehova i taui ei i tona aerenga no tana peroveta ko Ezekiela?

¹⁴ Kua taui a Iehova i tona aerenga i tetai atu au atianga​—noatu i roto i te au mea rikiriki ra. Ei akaraanga, i tetai taime i tona tono anga i te peroveta ko Ezekiela kia akatutu i tetai nuku totou ra, kua kapiti mai ta Iehova au ikuiku anga i tetai akakite anga e kia tunu a Ezekiela i tana kai ma te tutae tangata te vaie. E maata roa teia na te peroveta, tei kapiki ra, “E te Atu e Iehova!” e kua pati akatenga ra kia kore aia e rave i etai mea tei akaviiviiia e ia ra. Kare a Iehova i akangaropoina ana i te au manako o te peroveta ei mea tau kore; mari ra, kua akatika Aia ia Ezekiela kia taangaanga i te tutae manu, e tumu vaie tei taangaangaia i te au enua e manganui e tae ua mai ki teia tuatau.​—Ezekiela 4:12-15.

15. (a) Eaa te au akaraanga te akaari ra e i puareinga ua ana a Iehova i te akarongo e te ariu atu ki te au tangata? (e) Eaa te apiianga te ka mou mai ia tatou mei teia?

¹⁵ Kare ainei i te akamaana anga ngakau no te akamanako i te tu akaaka o to tatou Atua ko Iehova? (Salamo 18:35) E teitei rava atu aia ia tatou; inara ka akarongo akakoromaki aia ki te au tangata tiama kore e pera katoa te taui i tona aerenga ma te tau ra i tetai au taime. Kua tuku aia ia Aberahama kia pati kiaia i te roa o te akapouanga o Sodoma e Gomora. (Genese 18:23-33) E kua tuku Aia ia Mose kia patoi mai i Tana tamanako anga no te takore i te au Iseraela meameaau ra e kua akariro ra ia Mose ei enua maata. (Exodo 32:7-14; Deuteronomi 9:14, 19; akaaite ia Amosa 7:1-6.) Kua akanoo i reira aia i tetai akaraanga tiama no tona au tavini tangata nei, tei tau ra kia akaari i tetai tu papa ua mei teia no te akarongo ki tetai atu me te tau ra e te rauka ra te reira i te rave.​—Akaaite ia Iakobo 1:19.

Te Tu Tau i te Taangaanga Anga i te Mana Akaaere

16. Akapeea a Iehova i te tuke anga mei te manganui o te au tangata i tana mataara i te taangaanga anga i tona mana akaaere?

¹⁶ Kua kite ainei koe e me rauka mai te mana akaaere i te aronga tatakitai, te akara anga e e manganui te ka meangiti mai to ratou tu tau? Tei tuke ra kia Iehova, nona te taoonga teitei rava atu o te mana akaaere e pini ua ake, inara koia te akaraanga tikai no te tu tau. E taangaanga ana aia i tona mana akaaere na roto i tetai tu tau ma te autu ra. Kare mei te manganui o te au tangata ra, kare a Iehova e tinamou kore ana i tona mana akaaere, no reira kare aia e manako akakeuia ana kia paruru i te reira ma te vareae ra​—mei te mea e na te orongaanga i tetai manga mana akaaere ki tetai atu ko te takinoia mai tona uaorai. Ei tika, i te vai ua anga okotai anake mea ora i te ao katoa e pini ua ake, kua oronga a Iehova i te mana akaaere maata ki te reira. Kua akariro aia i te Logo ei “pu angaanga” nona, e mei te reira taime mai te akariro anga i te au mea ravarai ei mea ora na roto i tana Tamaiti akaperepereia ra. (Maseli 8:22, 29-31; Ioane 1:1-3, 14; Kolosa 1:15-17) I muri mai kua oronga aia i te “mana katoa o to te rangi e te ao katoa nei” kiaia.​—Mataio 28:18; Ioane 5:22.

17, 18. (a) Eaa ra a Iehova i tuku ei i tana au angera ki Sodoma e Gomora? (e) Eaa ra a Iehova i pati ei i te au angera no te au manako e akapeea i te akanauru ia Ahaba?

¹⁷ Ma te aiteite ra, kua oronga a Iehova i te manganui o tana au mea ora ma te au angaanga te ka rauka meitaki atu iaia uaorai i te rave. Ei akaraanga, i tona akakite anga kia Aberahama e, “e aere ana au ki raro [ki Sodoma e Gomora], kia kite i te rave tika anga ratou, mei tei tae roa mai i te reo kiaku nei” kare i tuatua ana e ka aere tikai aia ki reira. Mari ra, kua iki a Iehova i te oronga i te mana akaaere, te akataoonga anga i te au angera kia akaputu mai te reira akakite anga kiaia. Kua oronga aia i te mana akaaere kia ratou no te arataki i teia tere kimi anga tika e te ripoti mai kiaia ra.​—Genese 18:1-3, 20-22.

¹⁸ I tetai ati anga, i te manako anga a Iehova no te akautunga i tetai ariki kino ko Ahaba, kua pati Aia i te au angera ki tetai akaputuputuanga i te rangi no te oronga i te au manako e akapeea i te “akanauru” atu i te ariki akarongo kore kia piri ki roto i tetai tamaki te ka tamate atu iaia. Te papu ra e kare a Iehova, te Tumu o te pakari ravarai, e anoano i te tauturu no te manako i te aerenga meitaki rava atu no te rave! Inara, kua akangateitei aia i te au angera ma te akameitakianga o te manakoanga mai i te au tukuanga manako e te mana akaaere no te rave i tana i iki ra.​—1 Ariki 22:19-22.

19. (a) Eaa ra a Iehova i kotingaʼi i te numero o te au ture tana e maani ra? (e) Akapeea a Iehova i te akaari anga iaia uaorai ei tu tau no runga i tana ka tapapa ra mei ia tatou?

¹⁹ Kare a Iehova e taangaanga ana i tona mana akaaere no te akakeu i te akatere anga anoano koreia ki rungao i tetai atu. Na teia tu ra te akaari ra aia i te tu tau aite koreia. E kotinga meitaki ana aia i te numero o te au ture tana e maani ra e e arai ana i tona au tavini mei te ‘rai anga te au manako i tei tataia ra’ na te kapitianga i te au ture teiaa tei maaniia e ratou uaorai. (1 Korinetia 4:6; Angaanga 15:28; akatuke kia Mataio 23:4.) Kare rava aia e umuumu ana i te akarongo matapo mei tana au mea ora, inara i te maata anga o te taime ka oronga aia i te akakite anga tei rava no te arataki ia ratou e te tuku i te iki anga ki mua ia ratou, te akakiteanga kia ratou te au puapinga o te akarongoanga e te ka tupu mei te akarongo kore anga. (Deuteronomi 30:19, 20) I te mea e ka taumaro i te au tangata na roto i te tu apa, te akama, me kore te mataku, ka kimi aia i te itae i te au ngakau; ka inangaro aia i te au tangata kia tavini iaia no to ratou aroa tikai kare no te tu maro ra. (2 Korinetia 9:7) Ka riro teia tu tavini anga katoatoa ma te ngakau katoa ei akarekareka i te ngakau o te Atua, no reira kare e ‘ngata ana i te akamareka’ iaia ma te tu tau kore ra.​—1 Petero 2:18, NW; Maseli 27:11; akaaite ia Mika 6:8.

20. Akapeea to Iehova tu tau i te pa anga ia koe?

²⁰ Kare ainei i te mea umere i te Atua ko Iehova, i tona ririnui tei maata atu i tetai ua atu peretana tei angaia, kare rava aia e taangaanga i te reira ririnui ma te tu tau kore, e kare rava e taangaanga i te reira no te maro i tetai atu? Inara, me akaaiteia ki te tangata tei meangiti roa ra, e tuatua enua to ratou no te taomianga i tetai e tetai. (Koheleta 8:9) Te taka ua ra, e e tu akaperepereia te tu tau, e tu teia tei akakeu ra ia tatou kia aroa maata atu ia Iehova. E oti ka akakeu atu teia ia tatou uaorai kia tatanu i teia tu. Akapeea tatou te rave anga i teia? Na te atikara te ka aru mai e uriuri i teia.

[Au Tataanga Rikiriki i Raro]

Akapeea Koe me Pau?

◻ Akapeea to Iehova ingoa e te orama o tona kariota kaka i te akaari tikai anga i tona tu akatano ua?

◻ Eaa te tu tau, e eaa ra te reira i riro ei ei akairo no te pakari tu-Atua?

◻ Na teea atu mataara ta Iehova akaari anga e e ‘papa ua aia no te akakore’?

◻ Eaa ra a Iehova i iki ei no te taui i tetai aerenga tei tamanakoia i tetai au ngai?

◻ Akapeea a Iehova i te akaari anga i te tu tau i te tu o tana taangaanga anga i te mana akaaere?

[Tutu i te kapi 10]

Eaa ra a Iehova i akakore ei i te ariki kino ko Manase?