Ka Akapaapaa Ainei Koe ia Iehova?

“MEI toou katoa ra ingoa, e te Atua, koia katoa te akameitaki ia koe e tae ua atu ki te openga o te enua ra.” E au tuatua teia mei ko mai i tetai imene anga totou na te au tamariki a Kora. (Salamo 48:10) I teia tuatau, e mirioni ua atu tetai pupu mana o te Au Kite o Iehova te akapaapaa ra i te Atua e te akakite ra i tona ingoa na te tutu aereanga i te tuatua meitaki o tona Patireia. Na te raveanga i teia i roto i te au enua e 232 e te au airani o te moana e i roto i te au reo maata atu i te 300, te itae tika tikai ra ratou i te “openga o te enua.”

Eaa ra te opara ra i te au tangata o te au peu tukeke, tu oraanga, e te au turanga o te reo kia akapaapaa ia Iehova? To ratou tu ariki tikai i te kite tika tikai i te Tuatua a te Atua, ko te Puka Tapu ra, ko te tumu maata ia. Na te tuatua mou pae vaerua ra i akarangatira mai ia ratou no ko mai i te mataku tau kore e no ko mai i te au irinaki anga akonoanga tuikaa mei te tamamae anga mutu kore ra. (Ioane 8:32) Na te tuatua mou katoa oki i tauturu ia ratou kia ariki i te au tu meitaki o te Atua, mei tona aroa ra, te mana, te pakari, e te tu tau, kapitiia mai te tu tangi. Te maramaanga i to te Atua orongaanga i tana Tamaiti anau tai ra, ko Iesu Karaiti, ei atinga oko no te au tangata i akakeu i te au tangata tuatua tika ra kia akapaapaa e te tavini ia Iehova.

E tau ki te puka Puka Tapu o Apokalupo, te kapiki ra te pupu kaka e: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.” (Apokalupo 4:11) Kare taua akapaapaa anga i tupu ua no ko mai i tetai manako anga o te apainga. Mari ra, kua tupu mai te reira no ko mai i te akangateitei anga ia Iehova.

E Akapaapaa i te Atua na te Akakitekiteanga i te Tuatua Meitaki

I te akapaapaaanga ia Iehova, te aru ra te reira tangata i te akaraanga maata o Iesu Karaiti, te tangata akapaapaa maata roa atu o te Atua. Te aruanga i te takainga vaevae o Iesu kua kapitiia mai kia o atu ki roto i te angaanga tutu aereanga o te tuatua meitaki o te Patireia o te Atua. (Mataio 4:17, 23; 24:14) Kua riro teia angaanga tutu aereanga ko te angaanga maroiroi maata roa atu i te ao katoa nei i te akapaapaaanga ia Iehova.

E puapinga maata tikai teia angaanga tutu aereanga no reira rai te Puka Tapu i kapiti taka maramaʼi i te reira ki te ora. Te karanga ra a Roma 10:13-15: “‘Ko te kapiki i te ingoa o te Atu ra, e ora ïa.’ Eaa ua ra te tangata e tikaʼi kia kapiki atu kiaia i tei kore i akarongoia e ratou ra? e eaa oki ratou e tikaʼi kia akarongo iaia i tei kore i kitea e ratou ra? e eaa oki ratou e kite ei i te akakite kore? Eaa oki ratou e tikaʼi kia akakite kia kore ratou e ungaia? koia oki tei tataia ra e, ‘Ko te manea o te vaevae o te aronga i apai mai i te tuatua reka o te au, ko te apai mai i te evangelia o te meitaki ra e!’”

I teia mataiti i topa akenei, te akono ra te Au Kite o Iehova e maata atu e pirioni au ora i te angaanga tutu aereanga. E mei teaa atura te au tupu anga meitaki tei rauka mai mei ko mai i teia akapaapaaanga i te Atua! Kua kapiti mai etai 314,000 ra ki te pupu o te aronga akapaapaa na te akatutu anga i to ratou akatapuanga ki te Atua na te papetito angaia ki te vai.

Inara, eaa ra te ka tuatuaia no te 12,288,917 tei tae mai ki te 1994 Akamaaraanga i te matenga o Karaiti? I rotopu ia ratou e maata atu e 7,000,000 kare i akapaapaa ake ia Iehova ei aronga tutu aere i te tuatua meitaki. Inara to ratou tae anga mai ki teia atianga puapinga maata i akatupu mai i te kapiti anga o te au mirioni ua atu ki te pupu o te aronga akapaapaa ra. Eaa ra te ka rauka kia raveia ei tauturu i teia aronga inangaro kia riro mai ei aronga akapaapaa no Iehova ra?

Te Vaira te Tauturu

Penei e e anoano to te manganui o te aronga inangaro i te akapaapaa ia Iehova inara te manako ra e kare e rauka ia ratou i te rave i te au umuumu anga. E tau ratou kia maara i te au tuatua a te tata taramo: “E akara ainei toku mata ki te au tuaivi? e rauka ainei te tauturu iaku i reira? No ko ia Iehova ra te tauturu iaku, ko tei anga i te au rangi e te enua.” (Salamo 121:1, 2) Ko te tika, te akara ra te tata taramo i tona nga mata ki te maunga o Ierusalema te ngai e vaira te iero o Iehova e te nooanga enua o te kavamani teokaratiki. Mei ko mai i teia ka rauka ia tatou i te taopenga tikai e te anoano anga i te tauturu kia akapaapaa i te Atua e te akakitekite i te tuatua akakite o te Patireia no ko mai ia Iehova anake ua e tana akaaerenga.​—Salamo 3:4; Daniela 6:10.

I teia tuatau, te aronga te anoano ra i te akapaapaa ia Iehova ka rauka te akara atu ki te tauturu anga aroa no ko mai i tana akaaerenga i te enua nei. Ei akaraanga, te oronga ra te Au Kite o Iehova i te tauturu na te raveanga i te au apii Puka Tapu i te kainga ma te au tangata te inangaro maira. E maata atu tei kapiti ia mai ki teia porokarama i to te kite ua anga i te au apiianga Puka Tapu. Te tauturu ra te reira i te tangata apii kia akatupu i tetai arikianga no tana e apii ra e no te akaaerenga ta Iehova e taangaanga ra.

E rotai ki teia, te tauta ra te Kite te rave ra i te apii Puka Tapu kia papu e kare te au tuatua mou ou e itae anake ua i te upoko mari katoa ra te ngakau. E kare e tau i te puapii kia akakore i te akaarianga ki te tangata apii ra e akapeea a Iehova i te taangaanga anga i Tana akaaerenga kia rave i Tona akakoroanga i te enua nei. Te poroutia Au Kite o Iehova​—Rave Taokotai ra i to te Atua Anoano i te Ao Katoa e te vitio Jehovah’s Witnesses​—The Organization Behind the Name te akapapu putuputu maira i te tauturu i te raveanga i teia.

E tuanga maata katoa te au uipaanga Kerititiano i te tauturuanga i te aronga akapaapaa ou o Iehova. I te akamata anga o tetai apii Puka Tapu, penei e ka patiia te tangata apii kia aere mai ki te au uipaanga Kerititiano. Kare e roa, ka kite aia i te puapinga o te aere putuputu anga e te paupau anga i roto i te au uipaanga Kerititiano katoatoa. (Ebera 10:24, 25) Ka rauka i te au akaaere i te oronga mai i te tauturu maata no te au taeake irinaki e te aronga akapaapaa ou o Iehova na te teateamamao anga i te au uipaanga te akamaroiroi ra i te pae vaerua e te tu tau.

E Tauturu i te Au Tamariki kia Akapaapaa ia Iehova

Ko te au tamariki tei rotopu i te manganui te ka rauka kia riro mai ei au papuritia no te tuatua meitaki i te tuatau ki mua ra. E mea tau tikai te au metua tane kia rave i te apainga Puka Tapu kia utuutu i ta ratou tamariki “e apii ra ia ratou kia pakari ma te ako a te Atu ra.” (Ephesia 6:4) Me tereni meitakiia e te au metua tu Atua ra, ka rauka katoa i te tamariki rikiriki i te akatupu i te anoano kia akapaapaa ia Iehova.

Kua aravei putuputu atu tetai tamaine meangiti no Atenetina i te aronga pakari o te putuputuanga no tetai au marama, te patianga i to ratou tauturu kia riro tikai aia ei papuritia Patireia. Kare i roa ana, kua akatika tona nga metua e te aronga pakari iaia kia riro mai ei papuritia kare i papetitoia ake. Kua oronga takere aia ma te meitaki i te tuatua akakitekite anga Patireia ki te au ngutupa. Noatu rai e e rima uaorai te mataiti o teia tamaine meangiti e kare i kite ake e akapeea te tatau, kua tamou manako aia i te ngai o tetai au kopapa tuatua o te Puka Tapu. I muri ake te kiteaanga i te irava tuatua, kua pati aia i te tangata o te ngutuare kia tatau i te reira, e i reira kua oronga aia i tetai akataka anga.

Te taka marama ra e ka rauka i te aronga pakari e te nga metua i te rave kia maata te meitaki na te akamaroiroianga e te tauturuanga i te aronga te tere puapinga meitaki ra ki mua ei aronga akapaapaa no Iehova.​—Maseli 3:27.

Tetai Pirianga Mutu Kore ma Iehova

Inara, akapeea ra me te kapiti ua ra koe ki te Au Kite o Iehova no tetai tuatau inara kare i piri ake kia ratou i roto i ta ratou angaanga tutu aereanga? Penei e e meitaki kia ui uaorai koe i te au ui anga tei aru mai, ‘Te irinaki ra ainei au e kua kiteaia mai te tuatua mou e ko Iehova anake ua te Atua tika? Te papu ra ainei iaku e ko te Patireia o te Atua anake ua te pauanga ki te au manamanata o te au tangata ra? Kua akaruke ainei au i te akonoanga pikikaa katoatoa e te au peu o teianei ao e te au ravenga te akariri ra ia Iehova? E aroa oonu ainei toku no te Atua e no tana au umuumu anga tuatua tika ra?’ (Salamo 97:10) Me ka rauka ia koe i te pau tika tikai ae ki teia au ui anga, eaa ra te arai ra ia koe i te akapaapaaanga ia Iehova?​—Akaaite ia Angaanga 8:36.

E maata atu te akapaapaaanga ia Iehova i te tutu aereanga i te tuatua meitaki. Me kua apii koe i te kite tika tikai, e e akarongo tika tikai, e te akatano ra i toou oraanga ki te au umuumu anga tu-Atua, te anoanoia ra koe kia akaketaketa i toou uaorai pirianga ki te Atua. Akapeea ra? Na te raveanga i tetai akatapu anga kiaia na roto i te pure e i reira te akatutuanga i teia na te papetito angaia ki te vai. Tei roto te oraanga mutu kore i te kino. No reira, e akono i teia taime nei i te ako anga a Iesu: “E tomo kotou na te [n]gutupa o iti; te atea maata nei te ngutupa, e te pararauare nei te ara, e tae atu ei ki te mate; e manganui te na reira i te tomo. Te kokota ua nei te ngutupa, e te piri oki o te ara, e tae atu ei ki te ora, e tokoia ua ake tei kite atu i te reira.”​—Mataio 7:13‚ 14.

Ma te vaitata anga te openga o te tumatetenga o teianei akatereanga o te au mea nei, kare teia i te tuatau tapupu anga. E rave viviki i te au takainga ki tetai pirianga mutu kore ma Iehova. E tika tikai, ko teia te taime tikai e ariu meitaki atu ei ki te ui anga, Ka akapaapaa ainei koe ia Iehova?