Te Au Mapu Ou, E Akameitaki ia Iehova!
“E akameitaki ia Iehova i runga i te enua nei: . . . Te au tangata ou, e te au tamaine.”—SALAMO 148:7, 12.
1, 2. (a) E manganui te au mapu ou tei kite i teea au tu arairaianga? (e) No teaa te aronga mapu ou kare ei e tau kia riri i te au arairaianga e tuku ra to ratou au metua ki runga ia ratou?
KUA kite meitaki te au mapu ou e eaa ta ratou kare i akatikaia ake kia rave. E maata to ratou ka akakite tika atu kia koe e eaa to ratou pakari i mua ake ka akatikaia ai ratou kia tikoti i tetai mataara ko ratou anake ua me kore kia ara ua kare e moe vave me kore kia akaoro i tetai motoka. I tetai au taime, penei ka manako tetai mapu e e maata roa tana au patianga akatenga e aiteite ua te pauanga e, “Tiaki kia pakari ake koe.”
2 Kua kite kotou e te au mapu ou e te manako ra to kotou au metua e e meitaki atu te tuku i taua au araianga ra, penei ei paruru rai ia kotou uaorai. Kua kite papu, katoa kotou, e ka rekareka roa a Iehova me akarongo kotou i to kotou au metua. (Kolosa 3:20) Inara, te manako ra ainei kotou e, mei te mea ra e te tiaki nei rai kotou no to kotou oraanga kia akamata? Te araiia ainei te au apinga puapinga pouroa e kia pakari roa ake kotou? Kare tera i te tika! E angaanga tetai e raveia nei i teia tuatau ko tei puapinga roa atu i tetai ua atu angaanga taau e tiaki ra. Ka akatikaia ainei kotou te au mapu ou kia piri ki roto i teia angaanga? Meitaki atu i te reira—te patiia atu nei tikai kotou e te Atua Teitei Rava uaorai!
3. Te pati maira a Iehova i te aronga mapu ou kia rauka teea angaanga takake, e eaa te au uianga ta tatou ka akamanako i teianei?
3 Eaa te angaanga ta tatou e tuatua nei? Akara i te au tuatua a to tatou irava tumu no teia atikara: “E akameitaki ia Iehova i runga i te enua nei: . . . Te au tangata ou, e te au tamaine; te au tangata metua, e te au tamariki ra.” (Salamo 148:7, 12) Tera taau angaanga maata: Ka rauka ia koe i te akameitaki ia Iehova. Ei mapu ou, kare ainei koe e mataora ana i te piri atu ki taua angaanga ra? E manganui te pera ra. Kia kite e no teaa i puapingaia ai te manako anga akapera, ka akamanako ana tatou e toru au uianga. Te mea mua, no teaa koe ka tau ei kia akameitaki ia Iehova? Te rua, akapeea koe i te akameitaki anga iaia ma te puapinga tikai? Te toru, eaa te tuatau meitaki no te akamata i te akameitaki ia Iehova?
No Teaa ka Akameitaki ei ia Iehova?
4, 5. (a) Kia tau kia Salamo 148, tei roto tatou i teea turanga takake roa? (e) Akapeea te au mea i angaia kare e kite i te tuatua me kore i te akamanako i te akameitaki anga ia Iehova?
4 Tetai tumu takake no te akameitaki ia Iehova no te mea koia oki Tei Anga mai. Te tauturu maira te Salamo 148 ia tatou kia akamou ki teia tika. E akamanako ana: Me akavaitata atu koe ki tetai pupu tangata maata e imene taokotai ra i tetai imene mataora, e te reka, mei teaa ra toou manako? Peea me kua kite koe e e tika te au tuatua o te imene, te akakite maira i te au manako kua kite koe e puapinga, e rekareka, e te oraora? Kare ainei koe e inangaro i te tamou i te au tuatua e kia piri atu ki roto? Ka pera rai te maataanga ia tatou. I na, te akaari maira te Salamo 148 e tei roto koe i tetai turanga mei te reira rai tera ra e mea umere roa atu ia. Te akataka maira taua taramo ra i tetai urupu maata roa, te akameitaki taokotai pouroa ra ia Iehova. Inara, ia koe e tatau ra ia taramo, penei ka kite koe i tetai apinga tuke ake rai. Eaa ra te reira?
5 Te manganui o te aronga e akameitaki ra tei akatakaia mai i roto ia Salamo 148 kare e kite i te tuatua me kore i te akamanako. Ei akaraanga, ka tatau tatou no runga i te ra, te marama, te au etu, te kiona, te matangi, te au maunga, e te au puku maunga e akameitaki ra ia Iehova. Akapeea ra teia au apinga ora kore tei angaia i te rave anga i te reira? (Sal 148 Irava 3, 8, 9) E tikai e, te na roto ra i taua tu rai e rave ra te au rakau, te au mea angaia o te moana, e te au manu. (Sal 148 Irava 7, 9, 10) Kua akara ana ainei koe i te opunga ra me kore kua akara ana ainei koe ki runga i te marama e tere ra na te pae i te au etu me kua kata ana ainei ma te rekareka i te au manu e kanga ra me kore kua umere ana i tetai ngai ruperupe? I na kua “akarongo” koe i reira i te imene akameitaki mei te au mea tei angaia. Te au mea katoa ta Iehova i maani te akamaara maira ia tatou e koia te mana katoatoa Tei Anga mai, e kare okotai i te ao katoa e pini ua ake tei ririnui, tei pakari, me kore tei aroa mei te reira.—Roma 1:20; Apokalupo 4:11.
6, 7. (a) Te akataka maira te Salamo 148 i teea au mea kite tei angaia mai e akameitaki ra ia Iehova? (e) No teaa ra tatou penei ka akakeuia ai kia akameitaki ia Iehova? Akatutu mai.
6 Te akataka katoa maira te Salamo 148 i te au mea kite tei angaia mai e akameitaki ra ia Iehova. I roto i te Sal 148 irava 2, ka kite tatou i to Iehova au “nuku,” i te rangi, i te au angera, te akameitaki ra i te Atua. I roto i te Sal 148 irava 11, te patiia ra te au tangata mana e te maroiroi, mei te ui ariki e te au akavanui, kia piri atu ki te akameitakianga. Me te rekareka ra te au angera ririnui i te akameitaki ia Iehova, eaa e tika ai te tangata ua nei kia karanga e e maata roa tona puapinga kia akapera? E oti, i roto i te Sal 148 irava 12 e te 13, te patiia maira kotou e te au mapu ou kia piri atu ki roto e kia akameitaki katoa ia Iehova. Te akakeuia ra ainei koe kia inangaro i te rave i te reira?
7 Akamanako ana i tetai akatutuanga. Me e taeake piri toou e kite umere tikai tona—penei i te au tarekareka, te ati, me kore i te akatangi imene—ka tuatua ainei koe no runga iaia ki toou pamiri me kore ki te au taeake ke atu? Kare e ekoko anga. I na, ka riro te kite no runga i te au mea ravarai ta Iehova i rave i te akakeu ia tatou mei te reira. Ei akaraanga, te karanga ra te Salamo 19:1, 2 e ko te au rangi te “apii nei tetai ao i tetai i te tuatua.” Kareka ra tatou, me akamanako tatou i te au mea vavaria ta Iehova i rave, kare roa e rauka ia tatou kia kore e tuatua ki etai ke no runga i to tatou Atua.
8, 9. No teea au tumu i inangaro ei a Iehova ia tatou kia akameitaki iaia?
8 Tetai tumu takake mai no te akameitaki ia Iehova koia oki te inangaro maira aia ia tatou kia akapera. No teaa ra? No te mea ainei e te anoano ra aia i te akameitakianga mei te tangata? Kare. Penei i tetai au taime ka anoano tatou te tangata nei i te akameitakianga, kareka a Iehova e teitei kino roa atu aia ia tatou. (Isaia 55:8) Kare ona au manako papu kore no runga iaia uaorai me kore i tona au tu. (Isaia 45:5) Inara, te inangaro maira aia ia tatou kia akameitaki iaia e te rekareka ra me akapera tatou. No teaa ra? Akamanako ana e rua nga tumu. Te mea mua, kua kite aia e ka anoano tatou i te akameitaki iaia. Kua maani aia ia tatou ma te anoano pae vaerua, te anoano kia akamori. (Mataio 5:3, NW) Ka rekareka roa a Iehova i te kite ia tatou e akatupu ra i taua anoano ra, mei te tu tikai e rekareka ana toou nga metua i te kite ia koe e kai ra i te kai kua kite raua e e meitaki noou.—Ioane 4:34.
9 Te rua, kua kite a Iehova e ka anoano te au tangata ke atu i te akarongo ia tatou e akameitaki ra iaia. Kua tata te apotetoro ko Paulo i teia au tuatua ki te mapu tane ko Timoteo: “Kia matakite ia koe, e taau e apii ra; e tamou tika rai i te reira: tei te akapera oki e oraʼi koe, e te aronga katoa e akarongo mai ia koe ra.” (1 Timoteo 4:16) Ae, me apii koe i etai ke no runga i te Atua ko Iehova, te akameitaki anga iaia, penei ka kite katoa ratou ia Iehova. Ka arataki atu taua kite ra ki te ora mutu kore no ratou!—Ioane 17:3.
10. No teaa tatou i akakeuia ai kia akameitaki i to tatou Atua?
10 Te vai atura rai tetai tumu ke mai no te akameitaki ia Iehova. Akamaara ana i te akatutuanga no runga i to taeake kite. Me akarongo koe i tetai aronga e tuatua pikikaa ra no runga iaia, te akakino anga i tona ingoa meitaki, kare ainei koe e tauta pakari roa atu i te akameitaki iaia? I na, kua akakino pu uaia a Iehova i roto i teianei ao. (Ioane 8:44; Apokalupo 12:9) Te akakeuia ra i reira te aronga e inangaro ra iaia kia akakite i te tika no runga iaia, te akatano anga kia tika te rekoti. Ka inangaro katoa ainei koe i te akakite i toou inangaro e te rekareka kia Iehova e te akaari e ka inangaro koe iaia ei Tutara noou auraka tona enemi tumu, ko Satani? Ka rauka ia koe i te rave pouroa i te reira na te akameitaki anga ia Iehova. Te uianga e aru mai nei, i reira, koia oki ka akapeea ra.
Akapeea Tetai Aronga Mapu Ou i te Akameitaki Anga ia Iehova
11. Eaa te au akaraanga Pipiria e akaari maira e e puapingaia ana te au mapu ou i te akameitaki ia Iehova?
11 Te akaari maira te Pipiria e e puapinga putuputu tikai te au mapu ou i te akameitaki ia Iehova. Ei akaraanga, kua noo ana tetai tamaine Iseraela tei apaiia e te ngati Arama ei tuikaa. Kua akakitekite aia ki tona pu vaine ma te mataku kore no runga i te peroveta o Iehova ko Elisaia. Kua taki atu tana au tuatua ki tetai temeio, e tetai akakiteanga pakari. (2 Ariki 5:1-17) Kua akakitekite mataku kore katoa ana a Iesu i te tamaiti meangiti anga. I te au tupuanga pouroa i tona mapuanga te ka tau kia rekotiia ki roto i te au Tuatua Tapu, okotai a Iehova i iki, ko te atianga i uiui mataku kore ei a Iesu e 12 ua rai mataiti i te au orometua akonoanga i te iero i Ierusalema e kua umere iora ratou i tona kite i te au arataa o Iehova.—Luka 2:46-49.
12, 13. (a) Eaa ta Iesu i rave i roto i te iero i mua poto ua ake i tona matenga, e eaa tei tupu ki te tangata i reira ra? (e) Eaa to Iesu manako no runga i te akameitakianga a te au tamariki tamaroa?
12 Ei tangata pakari, kua akakeu katoa a Iesu i te tamariki kia akameitaki ia Iehova. Ei akaraanga, i nga ra ua i mua ake i tona matenga, kua akapou a Iesu i tetai taime ki ko i te iero i Ierusalema. E “au ravenga tu ke” tana i rave i reira, i karanga ai te Pipiria. Kua uri aia ki vao i te aronga e akariro ra i taua ngai tapu ra ei ana no te keia. Kua akaora katoa aia i te matapo e te tangata pirikoki. Te aronga ravarai i reira, te au arataki akonoanga tikai, tikaanga kua akakeu keia ana kia akameitaki ia Iehova e tana Tamaiti, i te Mesia. Te mea taitaia, ra, kare taua au akameitakianga i tuatuaia ana e te manganui i taua tuatau ra. Kua kite ratou e na te Atua i tono mai ia Iesu, inara kua mataku ratou i te au arataki akonoanga. Okotai ra, pupu tangata, tei tuatua ma te mataku kore. Kua kite ainei koe e koai ratou? Te karanga ra te Pipiria e: “E kia akara mai te kau taunga nunui e te au tata tuatua i te au ravenga tu ke tana i rave ra, e te tamariki i roto i te iero i te kapiki anga, e te na ko anga e, Hosana i te tamaiti a Davida; makitakita rava akera ratou, E kua tuatua maira kia [Iesu], Te kite na koe i ta ratou e tuatua nei?”—Mataio 21:15, 16; Ioane 12:42.
13 Te inangaro ua ra taua au taunga ra e kia akamuteki a Iesu i te au tamariki tamaroa e akameitaki ra iaia. Kua pera ainei aia? Kare! Kua pau atu a Iesu i te kau taunga: “A: kare kotou i tatau ra, ‘I rauka ia koe te akameitaki no roto i te vaa o te tamariki meangiti e te kai u?’” Taka meitaki e, kua mareka a Iesu e tona Metua i te akameitakianga a te au tamariki tamaroa. Te rave ra taua au tamariki ra i tei tau tikai e kia rave te aronga pakari pouroa i reira. I roto i to ratou manako mapu, i te akara anga te taka meitaki pouroa ua ra. Kua kite ratou i teia tangata e rave ra i te au mea umere, te tuatua ma te mataku kore e te akarongo, e te akaari i te inangaro oonu no te Atua e no tona iti tangata. Koia tika rai aia mei tana i karanga—te “tamaiti a Davida,” te Mesia. Akameitakiia no to ratou akarongo, kua rauka katoa i te au tamariki te tuanga takake o te akatupu anga i te totou.—Salamo 8:2.
14. Akapeea te au tareni i rauka i te aronga mapu ou i te tauturu anga ia ratou uaorai i te akameitaki i te Atua?
14 Eaa ta tatou ka kite mai mei taua au akaraanga ra? E puapinga tikai te aronga mapu ou i te akameitaki ia Iehova. E rauka ua ana ia ratou i te kite taka meitaki e te ngoie ua i te tuatua mou, te akakite anga i to ratou akarongo ma te ngakau tae e te maroiroi. Kua rauka katoa ia ratou te tareni tei taikuia ia Maseli 20:29: “Ko te ririnui te inuinu o te tangata ou ra.” Ae, kua akameitakiia kotou e te aronga mapu ou ki te maroiroi e te ririnui—e au apinga tika tikai no te akameitaki anga ia Iehova. Akapeea, tikai, kotou me taangaanga i taua au tareni ra?
Akapeea Koe me Akameitaki ia Iehova?
15. Kia puapingaia te akameitaki anga ia Iehova, eaa te akakeuanga ka anoanoia?
15 Kia puapingaia ai ka akamata mai te reira ki roto i te ngakau. Kare e rauka ia koe te akameitaki ia Iehova ma te tau me te rave ua ra koe i te reira no te mea te inangaro ra tetai ke ia koe kia pera. Akamaara, ko tei maata roa atu i te au akauenga koia oki teia: “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.” (Mataio 22:37) Kua rauka ainei ia koe te kite ia Iehova uaorai na roto i taau uaorai apiianga i tana Tuatua? Te tupuanga tau no taua apiianga ra koia oki ko te manako ngakau inangaro no Iehova. Te mataara natura no te akakite i taua inangaro ra koia oki na te akameitaki anga iaia. Me taka meitaki toou akakeuanga e te ririnui, kua papa koe no te akameitaki maoraora ua ia Iehova.
16, 17. Eaa ta te tu tuanga angaanga e rave ra i roto i te akameitaki anga ia Iehova? Akatutu mai.
16 I teianei, i mua roa ake ka akamanako ei e eaa taau ka tuatua, e akamanako e akapeea koe me rave. Naringa tera tamaine ngati Iseraela i te tuatau ia Elisaia i te tu tau kore, te akangateitei kore, me kore te pikipikikaa, i toou manako e ka akarongo atu te aronga Arama tei opu iaia ki tana au tuatua no runga i to Iehova peroveta? Kare paa. Mei koia rai, penei ka akarongo mai te tangata ia koe me kite ratou i toou tu akangateitei, te tuatua tika, e te mako. (Roma 2:21) Akamanako ana i tetai akaraanga.
17 Kua aro atu tetai tamaine 11 mataiti i Potukara i te taomianga i te apii kia akamaara i te au ra orote tei patoi i tona akava ngakau tereniia i te Pipiria. Kua akamarama aia ki te puapii ma te akangateitei e no teaa aia i patoi ei, inara kua aviri mai te puapii iaia. I te tuatau i aereia, kua tauta putuputu te puapii i te taakama iaia, te takatakata i tana akonoanga. Inara, kua akangateitei atu rai teia tamaine mapu. Te au mataiti i muri mai, te tavini ra taua tuaine mapu ra ei painia tamou, e orometua tamou. I ko i tetai uruoaanga, kua akarakara atu aia i te au tangata e papetitoia ra e kua kite aia i tetai ia ratou. Ko tona puapii i mua ana! I muri ake i te takave anga ma te aue, kua akakite te vaine pakari ake ki te mapu e kare roa i ngaropoina ana iaia te tu akangateitei o te tamaine i apii ana aia. Kua atoro atu tetai Kite iaia, e kua tuatua atu aia no runga i te tu o te tamaine i apii ana aia. Tei tupu mai, kua akamataia tetai apiianga Pipiria, e kua ariki teia vaine i te tuatua mou o te Pipiria. Ae, ka riro toou tu ei mataara ririnui no te akameitaki ia Iehova!
18. Eaa ta tetai mapu ou ka tau kia rave me te emiemi ra aia i te akamata i tetai au pukapukaanga no runga i te Pipiria e i te Atua ko Iehova?
18 E ngata ana ainei ia koe i tetai taime i te akamata i tetai au pukapukaanga i te apii no runga i toou akarongo? Kare ko koe ua te manako pera ra. Inara, ka rauka ia koe i te akanoo kia riro na etai ke e ui mai kia koe no runga i toou akarongo. Ei akaraanga, me tau i te ture e me ka akatikaia, kore koe e apai mai i tetai au puka no runga i te Pipiria e ka tatau ei i te reira i te taime kaikai me kore i tetai au taime ke atu ka akatikaia? Penei ka ui mai toou au oa apii kia koe no runga i taau e tatau ra. Na te pau anga e te akakite anga kia ratou i taau mea reka no runga i te atikara me kore i te puka i to rima, penei ka kite ake koe kua akamataia tetai pukapukaanga meitaki tikai. Akamaara i te ui i te au uianga, te kimi anga eaa ta toou au oa apii e irinaki ana. E akarongo ma te akangateitei, te akakite anga atu i taau i kite mei te Pipiria. Mei ta te au tupuanga i te kapi 29 e akaari maira, e maata te au mapu ou e akameitaki ra i te Atua i te apii. Te apai maira teia i te rekareka maata kia ratou e te tauturu i te manganui kia kite ia Iehova.
19. Akapeea te au mapu ou i te puapinga maata atu anga i roto i te angaanga orometua mei tera are ki tera are?
19 Te angaanga orometua mei tera are ki tera are tetai mataara puapinga roa atu i te akameitaki ia Iehova. Me kare koe i piri ake, kore ei e akanoo i te reira ei akakoroanga? Me te piri atura koe, e au akakoroanga ainei tetai penei ka inangaro koe i te akanoo noou uaorai? Ei akaraanga, i to te tuatua ua i taua au apinga rai i te au ngutupa tataki tai, e kimi i te au mataara no te akameitaki atu, te pati ki toou nga metua e etai atu aronga karape atu no tetai au manako tauturu. Apii e ka akapeea te taangaanga maata atu i te Pipiria, te rave kia puapingaia te au atoroanga, e te akamata i tetai apiianga Pipiria. (1 Timoteo 4:15) Te maata atu i taau akameitaki ia Iehova na taua au mataara ra, te puapinga maata atu ia koe, e te maata anga atu ia toou rekareka i taau angaanga orometua.
Eaa te Tuatau ka Tau kia Akamata Koe i te Akameitaki ia Iehova?
20. No teaa kare ei te au mapu e anoano kia manako e e tamariki ou roa ratou i te akameitaki ia Iehova?
20 Roto i te au uianga e toru i roto i teia uriurianga, ko te pauanga ki teia mea openga nei te mea ngoie roa atu. Akara ra i te pauanga tika ua a te Pipiria: “E tenana e akamanako i Tei anga ia koe i to ou anga ra.” (Koheleta 12:1) Ae, ko teia oki te taime no te akamata i te akameitaki ia Iehova. E ngoie ua i te karanga e: “E tamariki ou roa au i te akameitaki ia Iehova. E kite kore oki au. Ka tiaki roa au kia pakari ake au.” Kare ko koe a mua i te manako akapera. Ei akaraanga, kua akakite te mapu ko Ieremia kia Iehova e: “Aue! e taku Atu e Iehova e! i na, kare au i kite i te tuatua: e tamaiti ua oki au nei.” Kua akapapu atura a Iehova iaia e kare e tumuanga no te mataku. (Ieremia 1:6, 7) Mei koia katoa, kare a tatou apinga e mataku me akameitaki tatou ia Iehova. Penei kare e kino e rokoia mai ei tatou te kare e rauka ia Iehova i te takore takiri atu.—Salamo 118:6.
21, 22. No teaa te aronga mapu e akameitaki ra ia Iehova i akaaiteia ai ki te au, e no teaa tera akaaiteanga i riro ei ei akamaroiroianga?
21 No reira, te raurau atu nei matou ia kotou e te aronga mapu ou: Auraka e emiemi i te akameitaki ia Iehova! Ko teia te taime meitaki roa atu koi mapu ei kotou i te piri ki roto i te angaanga puapinga roa atu e raveia nei i te enua nei i teia tuatau. Me akapera koe, ka riro mai koe ei tuanga no tetai apinga umere roa—koia oki te pamiri o te ao katoa e pini ua ake no te aronga e akameitaki ra ia Iehova. Te rekareka ra a Iehova e tei roto koe i teia pamiri. Akara ana ra i teia au tuatua ta te tata taramo i tuatua atu kia Iehova: “E puareinga roa to toou ra au tangata, i te rā o toou ra mana, ma te kakā tapu ra; toou ra uanga, mei te au ïa o te kopu o te popongi.”—Salamo 110:3.
22 Te tutu o te au e kanapanapa ua ra i te popongi marama e mea manea tikai, me kare ainei? E oraora, kanapanapa tikai te reira, e kare takiri e rauka kia tareia no te manganui roa. Mei tera rai ta Iehova akara mai anga ia kotou e te aronga mapu ou e akameitaki ra iaia ma te tiratiratu i teia au tuatau kino nei. Taka meitaki e, ko taau ikianga kia akameitaki ia Iehova te akarekareka ra i tona ngakau. (Maseli 27:11) Na te au mataara ravarai, i reira, e kotou e te aronga mapu ou, e akameitaki ia Iehova!
Akapeea Koe me Pau?
• Eaa tetai au tumu puapinga no te akameitaki ia Iehova?
• Eaa te au akaraanga Pipiria e akaari maira e e puapingaia tikai te au mapu ou i te akameitaki ia Iehova?
• Akapeea e rauka ai i te au mapu ou i te akameitaki ia Iehova i teia tuatau?
• Eaa te tuatau ka tau kia akamata te au mapu ou i te akameitaki ia Iehova, e no teaa ra?
[Au Tutu i te kapi 25]
Mei te mea e kite takake roa to toou taeake, kare ainei koe e taiku atu i teia ki etai ke?
[Tutu i te kapi 27]
Penei ka inangaro toou au oa apii kia kite i toou akarongo
[Tutu i te kapi 28]
Me inangaro koe kia meitaki atu i roto i taau angaanga orometua, e pati i tetai Kite karape atu no tetai au manako tauturu