Akapeea te Au Kerititiano me Autu Atu i te Akakino Anga Papuriki

EAA toou manako me akakino atu tetai tangata ia koe me kare te akatotoa ra i te au pikikaa no runga ia koe? Tei matauia ka mamae oonu koe. Te kite ra te Au Kite o Iehova i etai mea mei te reira rai me riro mai ratou ei takete no te akakite anga akamingi me kore kare i tika i roto i te akakite anga nuti. Inara mei ta Iesu i tuatua ia Mataio 5:11, 12, e tumu ta ratou no te rekareka anga.

Ei akaraanga, kua tuatua tetai puka Katorika i Tiamani e “kua tikaia te Kite tataki tai kia oronga i rotopu i te 17 e te 28 patene o tana moni ki te opati maata o te pupu.” Inara, kare te Au Kite o Iehova i akanooia ei pupu, ta ratou angaanga te tutakiia ra na roto i te moni tauturu oronga ua. E manganui te aronga tatau kua akavareia e teia akakite anga pikikaa, koia oki te kite ra te Au Kite o Iehova e mea mii tikai. Inara akapeea te au Kerititiano mou te ariu anga atu i te akakino anga i roto i te akakite anga nuti?

Tetai Akaraanga no te Au Kerititiano kia Aru

Kua akataka meitaki maira a Mataio pene 23 akapeea a Iesu i te akaapa anga i tona aronga patoi o te au akonoanga no to ratou tu pikikaa e te akavare. Te oronga ra ainei teia i tetai akaraanga no te au Kerititiano o teia tuatau e akapeea me akono atu ma te aronga akaapa? Kare roa te reira. Kua akaapa te Tamaiti a te Atua i tona aronga patoi o te au akonoanga i runga i te tumu o te mana tuke ua ake rai e te kite oonu te rauka ra iaia, te rave anga i te reira ei akapuapinga i te urupu tangata e akarongo ra.

Te akakite maira a Mataio 15:1-11 e kua akaapaia a Iesu no te mea kua karangaia no tana au pipi e kua takatakai atu i te au peu ngati Iuda. Akapeea a Iesu i te ariu anga atu? Kua akamou aia i tona turanga. I tetai atianga, kua tuatua atea a Iesu i tona aronga akaapa, i te patoi anga i to ratou au manako tarevake. I te tuatua tei matauia, kare e te tarevake ra te au Kerititiano o teia tuatau i te tautaanga i te akatika i te au akakite anga tarevake o ta ratou angaanga me kare te au apiianga, te tautaanga i te akataka i te turanga na roto i te tu tika e te tau tikai. Ka rave ratou i teia ei tauturu i te tangata ngakau tae kia kite e ko te akaapaanga i te Au Kite o Iehova kare i tika e pikikaa ua.

Inara akara atu akapeea a Iesu i te pau anga i tetai taime poto i muri mai i te tou anga tana pipi e: “Te kite nei koe e, kua riri te aronga Pharisea i te akarongo anga i taua tuatua nei?” Kua “riri” teia au Pharisea​—kare anake ua e kua riri ratou mari ra kua riro mai ei aronga patoi kino tikai ta Iesu i kopae atu. No reira kua pau aia: “E vaoo ua atu; e matapo arataki matapo ïa.” E mea puapinga kore i te uriuri ua atu ma te aronga patoi makitakita, kare e akapuapinga i etai ke, e ka arataki ua atu ki tetai taumaro anga uua kore. (Mataio 7:6; 15:12-14; akaaite ia 27:11-14.) Te akaari maira ta Iesu au pauanga i oronga e “e tuatau to te muteki ua, e e tuatau to te tuatua.”​—Koheleta 3:7.

Kare te Au Kite o Iehova e manakonako ana e kia tuatua meitaki mai te katoatoa ia ratou. Te akamanako ra ratou i te au tuatua a Iesu: “E ae oki kotou, kia akameitaki mai te tangata ravarai ia kotou! i pera oki to ratou ai tupuna i te au peroveta pikikaa ra.” (Luka 6:26) Kua ui ia atu kia C. T. Russell, te peretiteni mua o te Totaiete Punanga Tiaki, e eaa ra aia i kore ei i paruru iaia uaorai no te au akakino anga. Kua pau atu aia: “E mea puapinga kore ua i te paruru ia koe uaorai mei te au kopekope anga pouroa.”

No reira auraka tatou e tuku i te au tuatua a te aronga patoi rave ua i te tamanata ia tatou mei ta tatou angaanga ki te Atua. (Salamo 119:69) E manako pakari tatou no runga i te angaanga a te au Kerititiano mou, koia oki, te angaaanga tutu evangeria. Ei tupu anga matau, ka rauka ia tatou i te au tuatau i te pau i te au uianga e te akamarama anga i te tu o ta tatou angaanga, ei akamako i te tu akono meitaki o tetai tangata e te akoanga iaia na roto i te au Tuatua a te Atua.​—Mataio 24:14; 28:19, 20.

Ka Ariu Ainei Koe i te Akaapa Anga?

Kua tuatua a Iesu no tana au pipi: “Kare kotou i to teianei ao . . . I riri mai ei teianei ao ia kotou.” (Ioane 15:19) E manganui te au ripoti a te nuti te akakino maata ra i te Au Kite o Iehova e au akakite anga riri teia, e tau kia kopaeia te reira. Inara, penei ka oronga te akakite anga nuti i etai au taime i te akakite anga te akaata ra i te kite kore no runga i te Au Kite me kare te akamingi ra e te manako kore ra i te au tika. Penei ka rave mai etai aronga tata tianara i te akakite anga no roto mai i tetai puka akaapa ua. Me ka kopae atu tatou i te akakite anga pikikaa i roto i te akakite anga nuti me kare ka paruru atu i te tika na tetai rave anga tau ka tapapaia ki runga i te au turanga, te raurau anga o te akaapa anga, e tana akakoroanga.

Tetai au taime ka rauka te tika kia akatikatikaia na te tataanga i tetai reta meitaki ki te tangata etita me ka nenei katoaia te reta. Inara ka rauka katoa i te reira reta i te patoi atu i tei kore i akakoroia. Akapeea? Penei ka rauka i te pikikaa mua i te akakite maata atu, me kare penei ka oronga i tetai tuatau ki te aronga patoi kia rauka te pikikaa me kore te au tuatua akakino kia neneiia. I te maata anga o te taime e mea pakari i te akaruke atu i te uianga reta a te tangata etita tei runga ua i te aronga pakari te ikianga. Me akakeu tetai pepa ripoti i te tu iriiri, ka rauka i te opati manga o te Totaiete Punanga Tiaki i te akakite ki te au putuputuanga i te reira enua no runga i te tika, e raukaʼi i te au papuritia pouroa te oronga i tetai akamarama anga merengo ua ki te aronga uiui.

Ka anoano tataki tai ia ainei koe kia piri atu ma te reira au akavare anga takaviriia? Ta Iesu ako “e vaoo ua atu,” e akaruke atu ia ratou, te taangaanga taka marama ra ki teia au pupu patoi. E au tumu Puka Tapu ta te au Kerititiano tiratiratu no te kopae anga i te aronga akaruke te akarongo e to ratou au manako. (1 Korinetia 5:11-13; Tito 3:10, 11; 1 Ioane 2:19; 2 Ioane 10, 11) Me inangaro ngakau tae tetai i te kite te akaapa anga o te Au Kite me kua akatumuia ki runga i te tika me kare te pikikaa, na toou uaorai kite meitaki e oronga i te pau anga.​—Akara i The Watchtower o Mati 15, 1986, au kapi 13 e 14.

Me aravei atu koe i te au akakite anga akamingiia i roto i te pepa, e tamou marie i to tatou ngakau i te ako a Maseli 14:15: “Te akarongo ra te kite kore i te au tuatua katoa ra; te akara meitaki ra te tangata akono ra i tona kainga.” I Tuiterani e manganui te tangata kua riri i te ripoti anga tetai pepa tei akakeu i te manako ngakau no te tuatua anga e kua mate tetai Kite mapu vaine no te mea kua patoi tona kopu tangata i te akatika i te aronga angaanga are maki i te oronga i te pamu toto. Ko te reira ainei te tika? Kare. Kua patoi te tangata maki i te pamu toto te tumu no te akonoanga, inara kua ariki aia i tetai atu akatereanga vairakau kare e toto o roto. Ka rauka teia i te akamataia ma te kore e taroaroa te ka akaora atu i tona oraanga. Inara, kua taroaroa kore te are maki i te oronga anga i te rapakau e kua tureti. Kare te pepa ripoti i taiku ana i teia au tika.

E no reira, e paunu matakite mei teaa te maata anga o te tika i roto i te reira ripoti. Ka rauka ia tatou i te akamarama ki te aronga uiui e na te aronga pakari o te reira ngai e akono ana i te reira turanga na roto i te tu aroa e kia tau ma te au arataki anga Puka Tapu. Na te pirianga ki te au kaveinga me pau atu ka arai atu ia tatou no te rere atu ki te akaoti anga.​—Maseli 18:13.

E Mea Tau te Akakite Anga Mua

I te anere mataiti mua, kua akatotoa te tangata i te pikikaa no runga ia Iesu Karaiti i te akakino anga i tona ingoa meitaki, etai atu kua oronga iaia e tangata pikikaa. (Luka 7:34; 23:2; akaaite ia Mataio 22:21.) I muri mai, kua aravei te putuputuanga ou Kerititiano i te patoi anga tei totoa mei te au akonoanga e te au mea o teianei ao. I te mea e “kua iki ra te Atua i te au mea neneva o te ao nei,” e manganui kua akara akameangiti ia i tona au tavini. (1 Korinetia 1:22-29) Kua tamanako te au Kerititiano mou o teia tuatau nei i te akakino anga, koia oki te tu takingakino anga.​—Ioane 15:20.

Inara, te ariki ra te Au Kite o Iehova i te tangata ta ratou e pukapuka ra e manako tau tona e te akaari ra i te tu aiteite ki etai o te aronga atoro ia Paulo i Roma, tei tuatua e: “Te inangaro atu nei ra matou kia kite matou ia koe i toou manako; i tenana pupu, kua akakinoia ïa e kare e ngai toe, kua kite matou.”​—Angaanga 28:22.

E oronga ki te aronga tei tarevake i te au manako akamarama anga, te rave anga i te reira ma te maru. (Roma 12:14; akaaite ia 2 Timoteo 2:25.) E pati ia ratou kia tiki i te akakite anga no runga i te Au Kite o Iehova, te ka rauka ia ratou kia kore e akavareia e te au akaapa anga pikikaa. Ka rauka katoa ia koe i te taangaanga i te au akamarama anga tei neneiia e te Totaiete Punanga Tiaki te oronga ra i te au tuatua tataki tai no runga i te akaaerenga, tona tuatua enua, e te au apiianga.a Kua pau atu a Philipa kia Natanaela e: “Ka aere mai ka akara.” (Ioane 1:46) Ka rauka katoa ia tatou kia pera. Ka ariki maana ia tetai ua atu te inangaro ra i te atoro i te Are Uipaanga Patireia o te reira ngai e raukaʼi iaia i te akara nona uaorai e eaa tikai te tu peretana o te Au Kite o Iehova e eaa ta ratou e irinaki ra.

Auraka e Mataku i te Aronga Patoi

Mei teaa te akamaroiroi anga te kite anga kare te akakino e tapu i te tangata kia riro mai ei Au Kite! I tetai akaari anga tuatua i roto i te tivi i Tiamani, kua oronga te aronga akaruke i te akarongo i te au pikikaa no runga i te Au Kite e manganui. Kua kite tetai tangata akarakara i ta te tangata akaruke i te akarongo au tuatua e pikikaa te reira e kua akakeu i te rave akaou i tana apii Puka Tapu ma te Au Kite. Ae, ka arataki te akakino anga i tetai au taime i te tupu anga papu tikai!​—Akaaite ia Philipi 1:12, 13.

Kua kite te apotetoro Paulo e ka oronga atu etai pae i te akarongo maata ki te “tuatua taeke” kare i te tuatua mou. Kua tata aia i reira: “E akamaroiroi ra koe i te au mea katoa ra, e akakoromaki rai i te kino, e rave i te angaanga a te apii evangelia, e rave akaope takiri i to taoonga na.” (2 Timoteo 4:3-5) No reira auraka e akatika ia koe uaorai kia tamanataia, ‘e auraka rava e vi’ i to kotou aronga patoi. (Philipi 1:28) Kia vai maru e te tu katau e tutu aere ma te rekareka i te au tuatua meitaki, e ka rauka ia koe te autu i te akakino anga papuriki. Ae, e akamaara i ta Iesu taputou: “E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei: E rekareka kotou, e kia rere ua i te rekareka; e tutaki maata oki ta kotou i te ao ra: i pera oki ratou i te takinga-kino i te aronga peroveta, ko mua ïa ia kotou.”​—Mataio 5:11, 12.

[Au Tataanga Rikiriki i Raro]

[Tataanga i te kapi 27]

Me aravei ia atu e te aronga patoi, kua akakite a Iesu ki tana au pipi: “E vaoo ua atu.” Eaa te aiteanga o tana tuatua?

[Tataanga i te kapi 29]

“E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei.”​—Mataio 5:11