Eaa te Tumu Kare te Au Kite o Iehova e Ariu Atu ki te au Akaapaanga Pouroa a te Tangata?
Aru te Au Kite o Iehova i te kaveinga Pipiria, auraka e ariu atu ki te au akaapaanga e te au akakino anga pouroa. Ei akaraanga, karanga tetai maseli Pipiria e: “Ko tei ako atu i te akavaava[a] ra, ka rauka iaia te akama.” (Maseli 9:7, 8; 26:4) Kare matou e māroia ki roto i tetai taumaro anga anoano koreia no te au akaapa anga pikikaa, ka akamou ra matou ki runga i te akamarekaanga i te Atua.—Salamo 119:69.
E tika, “e tuatau to te muteki ua, e e tuatau to te tuatua.” (Koheleta 3:7) Ka ariu matou ki te au tangata tei inangaro i te kite i te tuatua mou, inara kare matou e piri ki roto i te au taumaro anga puapinga kore. Ka aru matou i te au apiianga e te au akaraanga o Iesu e te au Kerititiano mua.
Kare a Iesu i pau ana i tona akaapa pikikaa angaia i mua ia Pilato. (Mataio 27:11-14; 1 Petero 2:21-23) Pera katoa, kare a Iesu i ariu ana ki te au akaapa anga e tangata kona kava aia e te kaikai maata. Mari ra, kua vaoo ua atu aia i tana ka rave ei akakite iaia uaorai, kia rotai ki te kaveinga: “E akatikaia ra te pakari e tana ra au tamariki [angaanga].” (Mataio 11:19) Inara, me ka anoanoia te reira, kua ariu aia ma te ngakau toa ki te aronga tei akakino iaia.—Mataio 15:1-3; Mareko 3:22-30.
Kua apii a Iesu i tana au pipi kia kore e taitaia i te au akaapa anga pikikaa. Karanga aia: “E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei.” (Mataio 5:11, 12) Inara, karanga katoa a Iesu me akatupu te au akaapa anga i te mataara no tana au pipi kia tutu ma te akakite, ka akatupu aia i tana i taputou: “Naku oki e oronga atu i te vaa no kotou e te pakari, kare rava e tika i to kotou au enemi kia akakore mai e kia patoi mai.”—Luka 21:12-15.
Kua ako te apotetoro ko Paulo i te au Kerititiano kia kopae i te au taumaro anga puapinga kore a te aronga patoi, te akatakaanga i taua taumaro anga “e mea puapinga kore ïa e te tumu kore oki.”—Tito 3:9; Roma 16:17, 18.
Kua akamaroiroi te apotetoro ko Petero i te au Kerititiano kia paruru i to ratou akarongo i te ngai ka rauka. (1 Petero 3:15) Inara kua kite aia, i te maata anga o te taime, e meitaki atu i te rave kia kitea mai te tuatua. Tata aia: “Kia mopani kotou i te vaa o te kite kore o te tangata neneva ra i ta kotou tuatua meitaki.”—1 Petero 2:12-15.