Akapeea Toou Mou Anga ki Mua i te Noo Anga Akava Anga?

“E kia tae maira te Tamaiti a te tangata ma tona kakā, e te aronga angela tapu ravarai, ei reira aia e noo ei ki rungao i tona terono kakā.”​—MATAIO 25:31.

1-3. Eaa te tumu no tatou kia manako papu no runga i te tu tuatua tau?

‘E APA ME KARE E APA KORE?’ E manganui te ka tamanako ia ratou e akarongorongo atura i te au ripoti no etai akavaanga. Penei te tauta ra te au akava e te au mema tuku tika kia tiratiratu, inara e mea matauia ainei e kia tupu te tuatua tau? Kare ainei koe i akarongorongo ana i te au tuatua tau kore e te au apa i te raveanga akavaanga? Kare taua tu tuatua tau kore ra i te mea ou, mei ta tatou e kite ana i ta Iesu akatutu anga ia Luka 18:1-8 ra.

² Noatu eaa taau i kite ma te tuatua tau o te tangata nei, e akamanako i ta Iesu i manako ra: “Kare aina oki te Atua e akatika mai i tona uaorai tangata i ikiia ra, ko tei kapiki atu iaia i te po e te ao . . . ? E karanga atu au kia kotou, Kare rava e mamia, e akatika mai aia ia ratou. Kia tae maira te Tamaiti a te tangata nei, e kitea ainei e ia te akarongo i te enua nei?”

³ Ae, ka akono a Iehova kia rauka te tuatua tau i tona au tavini i te openga ra. Te kapiti katoa atura Iesu, e maata oki i teianei no te mea te noo nei tatou i “te tuatau openga” o te akatereanga kino nei. Kare e roa atu ana ka taangaanga a Iehova i tana Tamaiti mana ririnui kia takore takiri atu i te rave kino i te enua nei. (2 Timoteo 3:1; 2 Tesalonia 1:7, 8; Apokalupo 19:11-16) Ka rauka ia tatou te kite oonu i ta Iesu tuanga mei tetai o tana au akatutu anga i oronga openga maira, tei putuputu ra te tapaia e ko te parapore o te au mamoe e te au puakanio.

4. Eaa ta tatou i manako no te tuatau tupu anga o te parapore no te au mamoe e te au puakanio, inara eaa tatou ka tamanako ei i taua parapore ra i teianei? (Maseli 4:18)

⁴ Kua roa tatou i te manako anga e te akakite maira taua parapore ra i to Iesu ra nooanga ei Ariki i te 1914 e mei reira mairai i te rave te au akavaanga​—e ora mutu kore no te au tangata tei akakite i te tu mamoe ra, e mate mutu kore no te au puakanio. Inara na te akamanako akaouanga i taua parapore ra i taki atu ki tetai akatikatika anga i te kiteanga i tona tuatau e tupu ei e eaa oki tana e akatutu ra. Na teia akara matatio anga i akaketaketa mai i te puapinga o ta tatou angaanga tutu aere e te puapinga maata o te akarongo anga te au tangata. Kia kite ei i te tumu anga no teia marama oonu anga i taua parapore ra, e akamanako ana tatou i ta te Puka Tapu e akaari maira no Iehova raua ko Iesu, ei nga Ariki e nga Akava.

Ko Iehova ei Akava Teitei Rava

5, 6. Eaa ra i tau ei kia manako atu ia Iehova ei Ariki e ei Akava?

⁵ Te tutara ra a Iehova i te ao katoa e pini ua ake ma te mana ki rungao i te au mea ravarai. I te mea kare ona akamataanga e kare e openga, ko ia te “Ariki au mutu kore.” (1 Timoteo 1:17; Salamo 90:2, 4; Apokalupo 15:3) Tei iaia te mana no te maani ikuiku anga, me kare au ture, e kia akatupu i te reira. Inara te kapiti ra tona mana ei Akava. Te tuatua ra a Isaia 33:22: “Ko Iehova oki to tatou akava; ko Iehova ta tatou tuku ture; ko Iehova to tatou Ariki; nana tatou e akaora.”

⁶ Kua roa te kite anga o te au tavini o te Atua e ko Iehova te Akava o te au tumu akavaanga e te au maroanga. Ei akatauanga, i muri ake i “ta te akava i to te ao katoa nei” paunu anga i te au tika no te au kino o Sodoma e Gomora, kua tuku aia i te tika e kua tau te au tangata o reira kia akapouia e kua raveia taua akavaanga tuatua tika ra. (Genese 18:20-33; Iobu 34:10-12) Mei teaa ra te akapapu anga tau a te reira ia tatou e ko Iehova te Akava tuatua tika te ka rauka ua iaia i te rave i tana au akavaanga!

7. Akapeea ta Iehova ra rave anga ei Akava i te akono anga ma to Iseraela ra?

⁷ I Iseraela i taito ra, i etai taime kua rave tika tika atura a Iehova i te akavaanga. Kare ainei koe e akapumaanaia i reira kia kite e ko tetai Akava apa kore ua tei tuku ra i te au tika? (Levitiku 24:10-16; Numero 15:32-36; 27:1-11) Kua oronga katoa te Atua ra i te “au tuku anga tika” tei meitaki katoa ra ei au turanga no te akavaanga. (Levitiku 25:18, 19; Nehemia 9:13; Salamo 19:9, 10; 119:7, 75, 164; 147:19, 20) Koia “te akava i to te ao katoa nei,” no reira e akatupu anga ta te reira kia tatou ravarai.​—Ebera 12:23.

8. Eaa te orama aiteite atu ta Daniela i akara ra?

⁸ E akakite anga ta tatou na tetai “tei kite mata” no runga i teia tumu. Kua orongaia tetai orama ki te peroveta ko Daniela no etai puaka taae rerevao tei akatutu maira i te au kavamani me kare au patireia. (Daniela 7:1-8, 17) Kua tuatua katoa mai aia: “E kua akanooia iora te au terono, e kua noo maira To te au rā taito ra, ko tei tau tona kakau ki te kiona i te teatea.” (Daniela 7:9) E tamanako ana e kua kite a Daniela i te au terono “kua noo maira to te au rā taito ra [a Iehova].” E ui kia koe uaorai, ‘E kite ainei a Daniela i ko nei i to te Atua ra riroanga ei Ariki?’

9. Eaa tetai aite anga no te ‘nooanga’ ki runga i tetai terono? E oronga mai i etai akatauanga.

⁹ Inara, me ka tatau tatou e “kua noo” tetai ki runga i te terono, penei ka manako tatou e riroanga nona ei ariki, no te mea te taiku ra te Puka Tapu i taua tuatua ra i etai taime. Ei akatauanga: “E tei te riro anga te au [ia Zimeri], e kua mou aia ki runga i tona terono, kua . . .” (1 Ariki 16:11; 2 Ariki 10:30; 15:12; Ieremia 33:17) Kua tuatua tetai totou no te Mesia e: “Ka noo aia ma te mana ki runga i tona terono.” No reira, ka tau te aite anga o ‘te noo ki runga i te terono’ e kua riro ei ariki. (Zekaria 6:12, 13) Kua akatakaia mai a Iehova ei Ariki tei noo ki rungao i tetai terono. (1 Ariki 22:19; Isaia 6:1; Apokalupo 4:1-3) Koia te “Ariki au mutu kore.” Inara, iaia ka akamataʼi i tetai tu ngateitei ou, ka rauka kia tuatuaia e kua riro ei Ariki, mei te mea rai e te noo akaou atura aia ki runga i tona terono.​—1 Paraleipomeno 16:1, 31; Isaia 52:7; Apokalupo 11:15-17; 15:3; 19:1, 2, 6.

10. Eaa tetai angaanga maata a te au ariki o Iseraela ra? E akatutu mai.

¹⁰ Inara teia tetai tumu ei taviri: Ko tetai angaanga maata a te au ariki taito ra ko te akarongo anga i te au oro anga e te tukuanga i te au tika. (Maseli 29:14) E akamanako ana i ta Solomona akavaanga pakari i te maro anga nga vaine e rua ra no te pepe okotai ra. (1 Ariki 3:16-28; 2 Paraleipomeno 9:8) Ko tetai o tana au are kavamani ko “te tomoanga no te terono ei reira aia akavaʼi i te tangata,” kua tapa katoaia “koia te tomoanga akava anga.” (1 Ariki 7:7) Kua akatakaia a Ierusalema ei te ngai i reira “te au terono akava ra i te akamou angaia.” (Salamo 122:5) Te taka meitaki ra e, ko ‘te noo anga ki runga i tetai terono’ ka tau katoa te aite anga e akono anga i te mana akava anga.​—Exodo 18:13; Maseli 20:8.

11, 12. (a) Eaa te puapinga maata o to Iehova ra noo anga ki raro, tei taikuia ra ia Daniela pene 7? (e) Akapeea ta etai atu irava akapapu anga e te noo ra a Iehova ki raro i te akava?

¹¹ I teianei ka oki akaou tatou ki te ngai i akara ra a Daniela i te ‘noo anga To te au rā taito ra.’ Kua kapiti katoa maira a Daniela 7:10: “Kua noo iora te akava anga, e kua eeuia te au buka.” Ae, kua noo iora to te Au Ra Taito ra i te rave i te akava anga no te tutara anga i te ao nei e kia tuku i te tika no te Tamaiti a te tangata e tau aia kia tutara. (Daniela 7:13, 14) I reira ka tatau tatou e “kia tae maira To te au rā taito ra, e kua tukuia mai te akava anga ki te aronga tapu,” koia te aronga i ikiia ra tei tau kia tutara ma te Tamaiti a te tangata. (Daniela 7:22) I te openga ra kua “nooia ra te akava anga” e kua tuku i te akava anga akaapa ki runga i te mana openga o teianei ao.​—Daniela 7:26.a

¹² No reira, ko te aite anga o to Daniela kiteanga i te Atua ra i te ‘noo anga ki runga i te terono’ ko Tona aerenga mai i te rave i te akava anga. I mua akera kua imene a Davida: “Kua akatika mai oki koe [e Iehova] i te tuatua-tau e te tuatua-tika naku ra; kua noo koe ki runga i te terono ma te akono i te tuatua-tika.” (Salamo 9:4, 7) E kua tata a Ioela: “Kia akaaraia mai te au etene, kia aere mai oki ki runga i te o o Iehosaphata: ei reira au [a Iehova] e noo ei e akava i te au etene katoa e pini ua ake.” (Ioela 3:12; akaaite ia Isaia 16:5.) Kua o atu a Iesu raua ko Paulo ki roto i te au turanga akava anga i noo ei tetai tangata kia akarongo atu i te oro anga e kia rave i te tuku anga tika.b​—Ioane 19:12-16; Angaanga 23:3; 25:6.

To Iesu Turanga

13, 14. (a) Eaa te akapapu anga a te au tangata o te Atua e ka riro mai a Iesu ei Ariki? (e) I naea a Iesu i noo ei ki runga i tona terono, e na roto i teea tu tana tutara anga mei te 33 T.N. e aere mai?

¹³ E Ariki a Iehova e te Akava oki. Akapeea oki a Iesu? Kua karanga te angera tei akakite ra i tona anau anga: “E na te Atu ra, na te Atua e oronga mai i te terono o tona metua o Davida nona, . . . kare rava ïa e kore tona basileia.” (Luka 1:32, 33) Ka riro ko Iesu ei tuanga mutu kore no te arikianga o Davida ra. (2 Samuela 7:12-16) Ka tutara aia mei te rangi mai, no te mea kua tuatua a Davida: “Kua karanga aturā Iehova ki toku Atu [kia Iesu], Ka noo koe ki toku rima katau nei, e kia akariroia e au to au enemi ei pange vaevae noou. E akatae atu a Iehova i te sepeta o toou ririnui mei Ziona atu nei, e ariki oki koe i rotopu i to au enemi ra.”​—Salamo 110:1-4.

¹⁴ A naea te reira e tupu ei? Kare a Iesu i tutara ei Ariki iaia e tangata ra. (Ioane 18:33-37) I te 33 T.N., kua mate aia, e kua akatuakaouia, e kua kake atu ki te rangi. Te karanga ra a Ebera 10:12: “Kareka te Mesia, oti akera tana atinga okotai i te apai ei tarangaara, noo rava atura ïa i te rima katau o te Atua ra.” Eaa to Iesu mana i reira? “E akanoo iora oki [te Atua] iaia i tona uaorai rima katau i te ao ra, Ki runga rava atu i te au ariki ravarai, e te aronga mana, e te marōrō, e te maata . . . e kua akono oki iaia ei upoko i rungao i te au mea katoa i te ekalesia.” (Ephesia 1:20-22) No te mea e mana ariki to Iesu i rungao i te au Kerititiano i reira, kua rauka ia Paulo i te tata e kua “akaora [a Iehova] ia tatou i te mana o te poiri, e kua akaumu ia tatou ei roto i te basileia o tana Tamaiti akaperepere.”​—Kolosa 1:13; 3:1.

15, 16. (a) Eaa tatou i karangaʼi e kare a Iesu i riro ei Ariki no te Patireia o te Atua i te 33 T.N.? (e) I naea a Iesu i akamataʼi i te tutara i te Patireia o te Atua?

¹⁵ Inara, i te reira taime, kare a Iesu i akono ei Ariki e ei Akava i rungao i to te au pa enua katoa. Kua noo aia i te pae atu i te Atua, ma te tatarianga i te taime e akono ei aia ei Ariki no te Patireia o te Atua. Kua tata a Paulo no Iesu: “E koai to taua au angela ra tana i tuatua ua atu, mei taito mairai e, ‘Ka noo ki taku rima katau nei, e kia akariroia e au to au enemi ei pange vaevae noou?’”​—Ebera 1:13.

¹⁶ E maata te akapapu anga tei akakitekiteia e te Au Kite o Iehova e kua ope to Iesu tuatau tatari anga i te 1914, i tona akamata anga i te tutara i te Patireia o te Atua ra i te au rangi akara koreia ra. Te tuatua ra ia Apokalupo 11:15, 18 e: “Ko te au basileia o teianei ao, kua riro ïa ei au basileia no to tatou Atu e no tana Mesia; e e vai rai te au iaia e tuatau e tuatau ua atu.” “I riri anga te pa enua, e kua kitea mai toou riri.” Ae, kua akakite mai te pa enua i to ratou riri tetai ki tetai i te tuatau o te Tamaki I o Teianei Ao. (Luka 21:24) Te au tamaki, te au ngaruerue enua, te maki mate, te onge kai, e te vai atura ta tatou e kite nei mei te 1914 mairai te akapapu ra e te tutara nei a Iesu i teianei i te Patireia o te Atua ra, e kua vaitata mai te openga takiri o teianei ao.​—Mataio 24:3-14.

17. Eaa nga tumu taviri ta tatou kua akapapu i teianei?

¹⁷ Na te tu akamanako poto akaou anga: Ka rauka kia tuatuaia e kua noo te Atua ki runga i tetai terono ei Ariki, inara i tetai atu tu ka rauka iaia i te noo ki runga i tona terono i te akava. I te 33 T.N., kua noo a Iesu i te rima katau o te Atua, e i teianei e Ariki aia no te Patireia. Inara te rave nei ainei a Iesu i teianei i te tutaraanga ei Ariki, e te akono katoa ei Akava? E eaa tatou i tau ei kia akamanako i teia, e kia maata oki i teia tuatau nei?

18. Eaa te akapapu anga e ka riro katoa a Iesu ei Akava?

¹⁸ Ko Iehova, tei iaia ra te tika kia akamana i te au akava, kua iki ia Iesu ei Akava tei tau ra ki Tana au turanga. Kua akaari a Iesu i teia i tana tuatuaanga no te riro mai anga te au tangata kia ora i te pae vaerua: “Kare rava oki a te Metua tangata e akava ra, kua tuku uaia mai te akava i te Tamaiti.” (Ioane 5:22) Inara, e tere atu i te reira tu akavaanga ta Iesu tuanga no te akava anga, no te mea koia te akava o tei ora e o tei mate ra. (Angaanga 10:42; 2 Timoteo 4:1) Kua akakite maira a Paulo i tetai taime: “Kua akonoia e [te Atua] te ra e akava mai ei aia i to te ao katoa nei ma te tuatua-tika, na te tangata [ko Iesu] i akonoia e ia ra; ko tana i akakite ua mai ki te tangata katoatoa nei, koia i akatu akaou mai iaia mei te mate maira.”​—Angaanga 17:31; Salamo 72:2-7.

19. Eaa ra i tikai kia tuatua i to Iesu nooanga ei Akava?

¹⁹ Te tika ra ainei tatou i te manakoanga e te noo ra a Iesu ki runga i tetai terono kaka no te rave i te tuanga no te Akava? Ae. Kua tuatua a Iesu ki te au apotetoro: “Kia tae i te anga akaou anga ra, kia noo te Tamaiti a te tangata ki runga i tona terono kakā, e noo katoa kotou, ko tei aru mai iaku, ki runga i te terono raungauru e rua ara, i te akava anga i te au kopu o Iseraela raungauru e rua ara.” (Mataio 19:28) Noatu rai e ko Iesu te Ariki o te Patireia i teianei, te vaira tetai atu angaanga nana tei taikuia maira ia Mataio 19:28 te ka kapitiia mai koia te noo anga ki runga i tetai terono kia akava i te tuatau o te Tauatini Mataiti ra. A te reira tuatau ka akava aia i te au tangata ravarai, te aronga tuatua tika e te aronga tuatua tika kore. (Angaanga 24:15) E tauturu meitaki ia kia tamou i teia ki te manako ia tatou ka akaariu atu i to tatou manako ki tetai o ta Iesu au parapore te piri maira ki to tatou tuatau e ki to tatou au oraanga oki.

Eaa ta te Parapore i Tuatua?

20, 21. Eaa ta te au apotetoro a Iesu i ui tei piri maira ki to tatou tuatau nei, te taki atura ki teea uianga?

²⁰ I mua poto ake i to Iesu mate anga, kua ui tana au pipi kiaia: “E akakite mai koe ia matou i te tupu anga o taua au mea nei, e te akairo o toou aerenga mai, e te openga o teianei ao?” (Mataio 24:3) Kua totou atura a Iesu i te au tupu anga puapinga maata ki runga i te enua nei i mua ake i ‘te taenga mai te openga.’ I mua poto ake i taua openga ra, ei reira to te au pa enua ra e kite ei “ratou i te Tamaiti a te tangata i te aere anga mai na roto i te tiao rangi, ma te mana, e te kakā maata.”​—Mataio 24:14, 29, 30.

²¹ Inara, ka akapeea te au tangata o taua au pa enua ra i te tae anga mai te Tamaiti a te tangata ma tona kaka? E kimi tatou mei te parapore o te au mamoe e te au puakanio ra, tei akamataia mai ra ma te au tuatua: “E kia tae maira te Tamaiti a te tangata ma tona kakā, e te aronga angela tapu ravarai, ei reira aia e noo ei ki rungao i tona terono kakā; E akaputuputuia to te pa enua ravarai ki mua i tona aroaro.”​—Mataio 25:31, 32.

22, 23. Eaa te au tumu te akakite maira e kare te parapore no te au mamoe e te au puakanio i akamata mai i tona tupu anga i te 1914 ra?

²² Te piri atura ainei teia parapore ki to Iesu ra noo anga i tona mana ariki i te 1914, mei ta tatou i manako roa ana? Inara, te tuatua ra a Mataio 25:34 iaia ei Ariki, no reira te tau ra te akamata anga o taua parapore ra mei to Iesu riro anga ei Ariki i te 1914 mai ra. Inara eaa te akavaanga tana i rave i muri ua maira? Kare ia i te akavaanga i “to te pa enua ravarai.” Mari ra, kua akaariu atu aia i tona manako anga ki te aronga tei karanga ra no “te ngutuare o te Atua” ratou. (1 Petero 4:17) Kia tau ki ta Malaki 3:1-3, kua tutaka akava atura a Iesu ei karere na Iehova i te toenga o te au Kerititiano akatainuia ra i runga i te enua nei. Ko te tuatau katoa oki ia no te tukuanga akava anga ki runga ia Kerititome, tei karanga pikikaa ra e no “te ngutuare o te Atua aia.”c (Apokalupo 17:1, 2; 18:4-8) Inara kare e apinga tei akakite mai e i taua tuatau ra, me kare mei reira mai, kua noo a Iesu e akava openga i te au tangata o to te pa enua ravarai ei au mamoe me kare ei au puakanio.

²³ Me ka akara matatio tatou i ta Iesu angaanga i roto i te parapore ra, ka kite tatou iaia i te akava anga i to te pa enua ravarai i te openga ra. Kare te parapore ra e akaari mai ana e ka raveia taua akava anga ra no tetai tuatau roa e manganui te au mataiti, mei te mea rai e ko te au tangata ravarai e mate i te au raungauru mataiti kua topa kua akavaia e tau no te mate mutu kore me kare no te ora mutu kore. I te akara anga ko te maataanga o tei mate i teia au raungauru mataiti ua akenei kua riro atu ki te au tanumanga matauia o te au tangata. (Apokalupo 6:8; 20:13) Inara, te akataka maira taua parapore ra i te tuatau e akavaʼi a Iesu i te au tangata o “to te pa enua ravarai” te ora ra i reira e te aro atura i te rave anga o tana akava anga.

24. Aea te parapore no te au mamoe e te au puakanio e akatupuiaʼi?

²⁴ I tetai atu tu, te tou maira te parapore ki te tuatau ki mua a te aerenga mai te Tamaiti a te tangata ra ma tona kaka. Ka noo aia i te akava anga i te au tangata te ora ra i reira. Ka akatumuia tana akava anga ki runga i ta ratou i akakite mai i to ratou uaorai tu. A taua tuatau ra e taka meitaki ei “te tu ke anga i te tangata tuatua-tika e te tangata kino.” (Malaki 3:18) Ka raveia te akakite anga e rave anga tikai i te akava anga i roto i tetai tuatau kotingaia ra. Ka rave a Iesu i te au tuku anga tika tau tei akatumuia ki runga i te mea kite puia no te aronga tataki tai.​—Akara katoa ia 2 Korinetia 5:10.

25. Eaa ta Mataio 25:31 e akakite maira i te tuatua anga no te noo anga te Tamaiti a te tangata ki rungao i tetai terono kaka?

²⁵ Te aite anga o teia, i reira, ko to Iesu ra ‘nooanga ki runga i tona terono kakā’ no te akava anga, tei taikuia maira ia Mataio 25:31, te tou maira ki te tuatau ki mua e noo ei teia Ariki mana ririnui i te akakite e te rave oki i te akava anga ki rungao i to te au pa enua ra. Ae, ko te akara anga i te akava anga te o atura a Iesu ia Mataio 25:31-33, 46 te aiteite ra ki te akara anga ia Daniela pene 7, te ngai i noo ra to te Au Ra Taito ra koia te Ariki tutara ra, i te rave anga i tana tuanga ei Akava.

26. Eaa te akataka anga ou no te parapore te riro maira kia maramaia?

²⁶ I te maramaanga i te parapore no te au mamoe e te au puakanio na roto i teia tu te akakite mai ra e ko te raveanga i te akava anga ki rungao i te au mamoe e te au puakanio a te tuatau ki mua ia. Ka tupu te reira i muri ake i te akamata anga “te mate maata” tei taikuia ra ia Mataio 24:29, 30 e ‘te taenga mai i tona kakā’ te Tamaiti a te tangata ra. (Akaaite ia Mareko 13:24-26.) Ei reira, ma te openga o te akatereanga kino katoa ra, ka akanoo e ka rave a Iesu i te akava anga e ka akatupu atu i te akavaanga.​—Ioane 5:30; 2 Tesalonia 1:7-10.

27. Eaa ta tatou ka tau kia manako maata atu i te kiteanga no runga i ta Iesu parapore openga ra?

²⁷ Te akataka maira teia i to tatou maramaanga i te tuatau o ta Iesu parapore, te akaari maira e aea e akavaiaʼi te au mamoe e te au puakanio. Inara akapeea ta te reira akatupu anga kia tatou te maroiroi nei i te tutuanga i te tuatua meitaki o te Patireia? (Mataio 24:14) Ka akariro ainei te reira kia meangiti mai te puapinga o ta tatou angaanga, me kare ka apai mai ainei kia maata atu te teiaa o te apainga? E akara tatou i te atikara ka aru mai e akapeea te tupu anga kia tatou.

[Au Tataanga Rikiriki i Raro]

Te Maara Ainei Koe?

◻ Akapeea ta Iehova rave anga ei Ariki e ei Akava?

◻ Eaa nga aiteanga e rua no te ‘nooanga ki runga i tetai terono ra’?

◻ Eaa ta tatou i tuatua i mua ana no te tuatau e tupu ei ta Mataio 25:31, inara eaa te tumu anga no tetai akatikatika anga manako?

◻ A naea te Tamaiti a te tangata e noo ei ki runga i tona terono, mei tei akakiteia maira ia Mataio 25:31?